Read Ot Danum MATEUS 22 Bible Online

MATEUS 22 - Ot Danum bible

MATEUS 22

¹Yesus bopander hino umba ulun aro honong hapan porobasa,

²hioi-Oh, “Amat Pohotala moretah, koada'aioh kolou porobasa tuh: Ihcobehti lahca nguan pesta kawin ahkan anakoh.

³Lahca rih nyuhu pohalu-pohalu tulak ngomin ulun aro ijo jari tomorawe nokuh pesta kawin rih. Tahpi dolang tomorawe rih eam kani lombut.

⁴Uli hino lahca rih nyuhu pohalu-pohalu ijo bohkon, hioioh umba iro: ‘Mander ih ahkan tomorawe rih. Ukun-ukun pesta jari sadia. Sahpi tutang anak-anak sahpi'ku ijo bolomak ius tonyombalih. Paringoh uras sodia. Olai, lombut nokuh pesta kawin!’

⁵Tahpi ulun-ulun ijo tomorawe rih eam podulioh. Iro tulak nokuh gawiu nyinong-behti, — tongai iro nokuh umoioh, 'jo bohkon nokuh unuk usahaoh;

⁶tutang ijo bohkonoh hino nawan pohalu lahca rih, turus nahup tutang munu iro.

⁷Kotihka lahca rih ngonih naing orih, io bosingi samasino. Io ngirim sorodaduoh ahkan munu pomunu-pomunu orih, tutang nyaha lowun'ndo.

⁸Uliorih rih io na'ah pohalu-pohaluoh turus nuhtui, ‘Pesta kawin jadi uras sadia, tahpi ulun tomorawe eam pahtut.

⁹Tulak uhuntuh ka'a, nokuh jalan-jalan rami, tutang morawe ngohpah ulun aro rih, nokuh pesta kawin tuh.’

¹⁰Mahka pohalu-pohalu rih ka tulak. Iro tulak nokuh jalan-jalan hajo tutang mohalu paring ulun ijo tobarung umba iro ang anan, ijo pios oluka ijo ja'at. Mahka tuwi lohpou unuk pesta kawin rih, umba ulun-ulun tomorawe.

¹¹Pongohuli lahca rih nyolong nohto-nohto tomorawe. Io nohto ihcobehti ang pesta rih ijo eam hapan pokahjan pesta.

¹²Turus io ngisok umba ulun rih, ‘Sobat koloukuwohrih ihko tou nyolong nokuh ohtoi eam hapan pokahjan pesta?’ Ulun rih eam duon numbah ino-inon.

¹³ Turus lahca rih nuhtui umba pohalu-pohaluoh, ‘Ngahut pa'ai tutang longoi ulun tuh, tutang nyakah io nokuh luar ahi unuk ijo pindong. Ang anan ahkan anai tangih tutang kokarot.’ ”

¹⁴Turus Yesus ngohpah porobasa rih kolihtuh, “Aro ijo tona'ah, tahpi honjiot ih ijo konopili.”

¹⁵Pongohuli ulun-ulun Parisi tulak hopahkat sama-sama hotohou koloukowuh iro tou nyokohtung Yesus umba karo-kisok'ndo.

¹⁶Mahka iro nyuhu murid-murid'ndo nokuh Yesus homboh pira-pira ulun barih Horodes. Ulun-ulun rih nuhtui umba Yesus, “Amai Guru, ihkai ta'an Amai morong. Amai majar ulun hapan auh torus-tarang tohou kohondak Pohotala umba ulun, eam aro poduli tiruk iai beweu. Tului Amai eam nopahjah kolouului.

¹⁷Tului orih cuba Amai nuhtui ahkan 'kai: Numbun poroturan agaman eto, tou mombayar pajak ahkan Kaisar ata'ai eam?”

¹⁸Yesus ngota'an konohuang'ndo ijo ja'at orih, jadi Io nuhtui, “O, ulun pura-pura! Ombai ihkam kani nyokohtung Ahku?

¹⁹Cuba, pokarah ahkak-Ku ihcokobawak duit ijo hapan ahkan mbayar pajak!” Turus iro nonga ahkai-Oh ihcokobawak duit perak.

²⁰Yesus ngisok umba iro, “Gambar tutang aran iairih tuh?”

²¹“Kaisar,” puhtah'ndo. Mahka Yesus nuhtui umba iro, “Amat kolourih, nongarih ahkan Kaisar ijo ain Kaisar, tutang tonga ahkan Pohotala inon ijo ain Pohotala.”

²²Ohkot iro ngonih kotorangan orih, iro monjadi helan. Mahka iro tulak nohtah Yesus.

²³ Ang ondou orih ka'a, pira-pira ulun Saduki lombut nokuh Yesus. Iro anairih barih ijo moniruk, ijo ulun mahtoi eam ahkan monyun hoduli.

²⁴ “Amai Guru,” hion'ndo, “Museh majar koloutuh: Amat ihcobehti bahkas mahtoi, tutang io eam nohtah anak, konduangarioh harus kawin umba baluoh mangat nonga koturunan ahkan ulun ijo jari mahtoi rih.

²⁵Pu'u anai pihtu behti hokonduang ijo mohcon ang ohtoi. Ijo ohko kawin turus mahtoi eam anai nohtah anak. Mahka baluoh tonohtah ahkan konduangariohrih.

²⁶Konduangarioh rih pongohino mahi mahtoi ka'a eam anai nohtah anakoh. Hal ijo sama nyolung ka'a umba konduangarioh ijo kotolu tutang turu-turusoh nyiring kopihtuoh.

²⁷Laiouoh bawi rih mahi mahtoi ka'a.

²⁸Nah, ang ohkot ulun mahtoi tonombolum huli, oruh iai bawi orih? Tului kopihtu-pihtuoh uras kawin umba io.”

²⁹Yesus mutah, “Ihkam koliru samasino, bain ihkam eam solembang umba Surat Borasih, oluka kowasan Pohotala.

³⁰Tului 'matmira ulun mahtoi noin monyun huli, iro eam ahkan kawin hino, molekan iro ahkan bolum kolou molehkat ang soruga.

³¹Jaha pu'u rih ihkam mbasa inon ijo tongohawot Pohotala tohou ulun mahtoi tonombolum huli? Pohotala nuhtui,

³² ‘Ahku rih Pohotalan Abraham, Pohotalan Isaak, tutang Pohotalan Yakub.’ Pohotala rih, eam Pohotalan ulun mahtoi. Io Pohotalan ulun bolum!”

³³Ohkot ulun aro rih ngonih kotorangan Yesus, iro kagum samasino umba ajaran-Oh rih.

³⁴Ang ohkot ulun-ulun Parisi ngonih ijo Yesus jari ngagum ulun-ulun Saduki eam duon nuhtui ino-inon hino, iro bohaum.

³⁵ Ihcobehti tahkan iro, yorih ihcobehti guru agama, mocuba nyokohtung Yesus umba ihco kisok.

³⁶“Amai Guru,” hioioh, “poretah umoh ijo paling mombahtang ang luwang hukum agama?”

³⁷ Yesus mutah, “Ngasih Tuhan Pohotalan'kam hapan kotuwi ahtoi'kam, hapan sohopus homboruan'kam, tutang hapan paring ahkal'kam.

³⁸'Jorih poretah ijo ngomahtang tutang boguna!

³⁹ Poretah ijo duo sama umba ijo pahtuk orih: Ngasih sama arop'kam kolou ihko ngasih arop'mu bongom.

⁴⁰Koparing hukum agama ijo nonga Museh tutang ajaran nabi-nabi uras hogalang ang koduo poretah rih.”

⁴¹Pondehan ulun-ulun Parisi magun bohaum ang anan, Yesus ngisok umba iro,

⁴²“Koloukuwoh tiruk'kam tohou Lahca Ponyolamat? Uhtus iai Io?” “Uhtus Dawid,” hion'ndo.

⁴³“Amat kolourih,” hion Yesus, “bain inon Roh Pohotala mongowasa Dawid unuk ngohawot Lahca Ponyolamat, ‘Tuhan’? Tului Dawid nuhtui,

⁴⁴ ‘Tuhan nuhtui umba Tuhan'ku: tuot ihko ang silan kotouk-Ku, nyiring Ahku nguan musuh-musuh-Mu monyorah umba Ihko.’

⁴⁵Jadi amat Dawid ngohawot Lahca Ponyolamat rih, ‘Tuhan’, koloukuwoh Io konohawot uhtus Dawid?”

⁴⁶Eam ihcobehti ka duon muhtah auh Yesus. Tutang nopara ondou orih, eam aro ihcobehti bohanyi ngisok ino-inon hino umba Yesus.