Read Ot Danum MATEUS 24 Bible Online

MATEUS 24 - Ot Danum bible

MATEUS 24

¹Kotihka Yesus nohtah Lohpou Tuhan, murid-murid-Oh lombut nokuh Io tutang nunjuk nokuh pangun-pangun Lohpou Tuhan rih.

²Yesus nuhtui umba iro, “Inon rih ihkam nohto paringoh rih? Kota'an'kam eam aro ihco bahtu ka tahkan pangun-pangun orih ahkan mohcon hosusun aang unukoh. Paringoh ahkan boduruh.”

³Pongohuli Yesus tulak ko Puruk Zaitun, tutang rahat Io tuot murid-murid-Oh lombut ahkan hopander umba Io tihkas bongon'ndo. “Ngesah ahkan 'kai mira paringoh rih ahkan nyolung,” hion'ndo umba Io. “Tanda-tanda inon ijo ngorinah polombut Amai tutang lain jaman?”

⁴Yesus mutah, “Bua-buah, ara nyiring ihkam buah kobalik.

⁵Bain aro ulun ahkan lombut honong hapan aran aik-Ku tutang nuhtui, ‘Ahku Lahca Ponyolamat!’ Iro ahkan monihpu aro ulun.

⁶Ihkam ahkan ngonih naing-naing hokolahi tutang borihta-borihta parang, tahpi ara mihkoh. Bain hal-hal orih harus nyolung, tahpi orih eam rimai ijo jari ohkotoh kiamat.

⁷Uhtus ijo ihco ahkan parang ngolawan uhtus ijo bohkon, tutang nogara ijo ihco ahkan nyarang nogara ijo bohkon. Ang umo-umoh ahkan monjadi kosusah bolo'u tutang tana moroguh.

⁸Paringoh rih punai pahtukoh ih, kolou koporos ijo tongarot ihcobehti ulunbawi ijo ohkot kani nganak rih.

⁹ Pongohuli ihkam ahkan tonawan, tutang tonyarah ahkan tonyiksa, tutang tomunu. Hopus kolunon ahkan bosingi ihkam, tului ihkam murid-Ku.

¹⁰Aang ohkot orih aro ulun ahkan murtad, tutang ngarana umba injahoh hawui hokosingi jolahan ihco umba ijo bohkon.

¹¹Aro nabi-nabi pobula ahkan lombut, tutang ngobula aro ulun.

¹²Koja'at ahkan nyoli kodorih hebatoh nyiring aro ulun eam duon hino mongasih.

¹³ Tahpi ulun ijo tehen johcok laiuoh, ahkan tonyolamat.

¹⁴Tutang Kabar Hinut, tohou koloukuwoh Pohotala moretah ahkan tonyiar nokuh hopus kolunon, mangat paring ulun ngonihoh. Uliorih rih ndai punai rih lombut ondoukiamat.”

¹⁵ “Ihkam ahkan nohto ‘Koja'at ijo mopolumatoh,’ kolou ijo tonuhtui bain Nabi Daniel, tombok ang unuk ijo borasih. (Catatan ahkan ijo mombasaoh: Niruk inon rih rimaioh!)

¹⁶Aang kotihka orih, ulun ijo anai ang Yudea pahtut buhou nokuh puruk-puruk.

¹⁷ Ulun ijo anai ang diang sahpou lohpou ara nosuluh ahkan ngomin aang'co tahkan luwang lohpou.

¹⁸Ulun ijo anai ang umo ara buli ahkan lowu, ngomin jubahoh.

¹⁹Eaminon ngolioh ondou-ondou orih ahkan ulun-ulun bawi ijo botohi, tutang inai ijo magun ngoposu nguaoh!

²⁰Bodo'a iou, mangat ara nyiring ihkam harus buhou ang musim uhjan ata'ai aang ondou Sabat!

²¹ Aang ondou-ondou ijo kongori-ngori rih, ahkan anai kosusahan hajo, kolou ijo jaha pu'u nyolung tahkan pahtuk kolunon nyiring uhuntuh, tutang eam hino ahkan nyolung huli.

²²Jahkaoh Pohotala eam ngoliwak ohkotoh; mahka eam aro ihcobehti ka ijo solamat. Tahpi tului uhkup aiu-Oh, Pohotala ngoliwak wayah rih.

²³Aang ohkot orih rih amat anai ihcobehti nuhtui umba ihkam, ‘Nohto, Lahca Ponyolamat rih anai ang ohtoi!’ ata'ai ‘Io anai ang anan!’ — ara rih ihkam porocayaoh umba ulun orih.

²⁴Bain ahkan lombut ponyolamat pobula tutang nabi-nabi pobula. Iro ahkan nguan gawi-gawiu ijo luar biasa, tutang tandahelan-tandahelan ahkan mobula, amat touduon, taput uhkup ain Pohotala ka'a.

²⁵Jadi ingat rih! Ahku jari nyiar ahkan'kam labih soun, houn umba ang rih nyolung.

²⁶ Amat ulun nuhtui umba'kam, ‘Nohto, Io anai ang ahi ang padang tonih!’ — ara ihkam nokuh anan. Ata'ai amat iro nuhtui, ‘Nohto, Io nyuhuk luwang tahkun ang ohtoi!’ — ara ihkam porocaya.

²⁷Bain polombut Anak Ulun kolou koboloang kilat ngorolondang tahkan timur, tutang koboloangoh nyiring nokuh barat.

²⁸ Ang umoh anai otunaang, ang anan anai bulung-bulung, ijo kuman otunaang.”

²⁹ “Eam tahi ulimba kosusahan-kosusahan wayah orih, mahtan ondou ahkan nyolung pindong, tutang bulan eam hino boloang. Potion-potion ahkan botahak tahkan langit, tutang pongowasa-pongowasa alamraya ahkan nyolung howui-hobureh.

³⁰ Ulimba rih tanda Anak Ulun ahkan gihtan ang langit. Aang ohkot rih paring uhtus ang tana ahkan nangih. Iro ahkan nohto Anak Ulun lombut ang ngosan baunondou hapan kowasa tutang kohajoi ijo hajo.

³¹Sorunai hajo ahkan tomohpos muhing tutang Anak Ulun ahkan nyuhu molehkat-molehkat-Oh nipun uhkup-Oh, tahkan ko ohpat puhting kolunon, tahkan topahkan langit 'jo ihco, johcok topahkan langit ijo bohkon.”

³²“Ngomin rih sutu ajaran tahkan pu'un sikun. Amat pahting-pahtingoh nyuluh tutang bolomu, tutang nopara nyohondik, ihkam kota'an ijo musim notang jari doni.

³³Kolouorih ka'a amat ihkam nohto hal-hal rih nyolung, ihkam kota'an ijo ohkotoh jari doni samasino.

³⁴Kota'anrih iou! Hal-hal orih ahkan nyolung, hounumba ulun-ulun ijo bolum huntuh, mahtoi paringoh.

³⁵Langit tutang tana ahkan dilap, tahpi karoauh-Ku mohcon turus-jaham.”

³⁶“Eam aro ijo kota'an mira ondouoh tutang jamoh, molehkat-molehkat ang soruga ka'a eam, Anak Pohotala ka eam, tihkas Amai iou ijo kota'an.

³⁷ Amatmira Anak Ulun lombut noin, koada'anoh kolou aang jaman Noah lomoi.

³⁸Aang ondou-ondou sounumba danum sopurak hajo rih, ulun-ulun kuman ngorih, tutang kawin. Kolou orih toturus nyiring ang ondou Noah nyolong koluwang bonamaoh.

³⁹ Ang ohkot danumsopurak orih polonyot iro paring, punan rih iro borondong, umba inon ijo rahat nyolung. Kodorihrih ka'a koada'aioh noin amat Anak Ulun lombut.

⁴⁰Aang ohkot rih, duo behti rahat bogawi ang umo: Ihcobehti ahkan omin tutang ihcobehti ahkan tonohtahoh.

⁴¹Duo behti bawi rahat muhca gandum: Ihcobehti ahkan tongomin tutang ihcobehti hino tonohtahoh.

⁴²Jadi borondongrih, tului ihkam eam kota'an mira Tuhan'kam ahkan lombut.

⁴³ Ingat rih tuh! Jahkaoh tuan lohpou kota'an jam pira ang ngolomi ondou ponahkou ahkan lombut, io eam ahkan tiruh mangat ponahkou eam nyolong nokuh lohpouoh.

⁴⁴Bain orih, ihkam ka'a harus bosodia-sodia. Tului Anak Ulun ahkan lombut aang wayah ijo eam ihkam kota'aioh.”

⁴⁵Hion Yesus hino, “Amat kolourih pohalu ijo umoh rih ijo bokehtep tutang piosbosaraoh? Io rih ijo tongopili bain tuanoh monjadi okon pohalu-pohalu bohkon, mangatoh nonga iro ukun ang ohkotoh.

⁴⁶Eam inon kosanangoh pohalu orih amat tuanoh buli tutang sombang io rahat nguan gawiuoh.

⁴⁷Porocayarih, tuan orih ahkan moharap io ngina ponahtou-ponahtouoh aang pohalu rih.

⁴⁸Tahpi amat pohalu rih ja'at, ijo io ahkan nuhtui ang ahtoioh,

⁴⁹‘Tuan'ku magun tahi kolawui buli,’ turus io nopara nahup karon-pohalu ijo bohkon, tutang kuman ngorih umba ulun-ulun pombusou.

⁵⁰Pongohino tepuioh ahkan lombut ang ondou tutang jam ijo eam io ngohuoh.

⁵¹Mahka pohalu ijo kolourih ahkan tonahup soko'opah, bain tepuioh, tutang ndian io nokuh unuk ulun-ulun pura-pura. Iro ahkan nangih tutang ngarot ang anan.”