Read Ot Danum MATEUS 25 Bible Online

MATEUS 25 - Ot Danum bible

MATEUS 25

¹ “Amatmira Anak Ulun lombut kolou Tuhan, koada'ai kolou a'ang porobasa tuh: Sopulu anakdara naharang ponganten nyinong-behti ngomin sumbu, turus tulak naharang ponganten bahkas.

²Limo behti tahkan iro rih uong tutang limo behti ijo bokonoh pihtar.

³Kolimo anakdara ijo uong ngomin sumbuoh, tahpi eam ngomin minyak ahkan bosodia.

⁴Kolimo anakdara ijo pihtar ngomin sumbuoh homboh umba minyak bohahtiu.

⁵Ponganten bahkas rih lombut dandah, jadi karon-anakdara nopara nundu turus tiruh.

⁶Tohun ngolomi, kolawui konahan auh lahap, ‘Ponganten bahkas lombut! Has naharang io!’

⁷Sopulu anakdara rih monyun, tutang nutang sumbu'ndo.

⁸Anakdara-anakdara ijo uong rih nuhtui umba ijo piosbosara, ‘Magirih minyak'kam honjiot ahkan ihkai, tului sumbu ain ihkai jari kani bolop.’

⁹‘Eam tou!’ hion anakdara-anakdara ijo piosbosara rih, ‘bain noin ihto paringoh eam aro cukup minyak. Tulak molioh ang toko.’

¹⁰Mahka anakdara-anakdara ijo baleh rih tulak moli minyak. Pondehan iro tulak, ponganten bahkas lombut. Kolimo anakdara ijo jari bohahtiu rih nyolong hombo-homboh umba pongaten bahkas nokuh unuk pesta, tutang bauntukang konohuit!

¹¹ Pongohuli anakdara-anakdara ijo baleh orih johcok. Iro na'ah, ‘Tuan, Tuan, nguap bauntukang ahkan ihkai.’

¹²Tahpi ponganten bahkas mutah, ‘Ahku eam kosono ihkam!’ ”

¹³Turus Yesus ngo'opah porobasa-Oh rih koloutuh, “Bain tului orih jaga-jagarih, bain ihkam eam kota'an ondouoh ata'aika jamoh.”

¹⁴ “Amatnoin Anak Ulun lombut kolou Tuhan koada'aioh ka'a kolou a'ang porobasa tuh: Ihcobehti ulunbahkas kani tulak nokuh unuk ijo mahcu. Io na'ah pohalu-pohaluoh, turus nonga kowasa modagang ponahtouoh ahkan'ndo.

¹⁵Ahkan nyinong pohalu rih io nonga numbun kosanggupoh nyinong-behti. Ahkan ihcobehti io nonga limo kuhjan duit bulou. Ahkan ijo bokonoh io nonga duo kuhjan duit bulou. Tutang ahkan ihcobehti hino io nonga sokuhjan duit bulou. Turus io tulak.

¹⁶Pohalu ijo norima limo kuhjan duit bulou rih jeleng tulak bodagang, turus norima utung limo kuhjan duit bulou hino.

¹⁷Kolourih ka'a pohalu ijo norima duo kuhjan duit bulou rih norima utung duo kuhjan duit bulou hino.

¹⁸Tahpi pohalu ijo norima sokuhjan duit bulou rih tulak molowong ang tana, turus nyuhuk duit tuanoh ang anan.

¹⁹Tahi tu'u uliorih rih, tuan tahkan pohalu-pohalu rih buli, tutang nopara holehken umba iro.

²⁰Pohalu ijo norima limo kuhjan duit bulou orih lombut, tutang nyarah sopulu kuhjan duit bulou. ‘Tuan,’ hioioh, ‘Tuan nyarah limo kuhjan duit bulou ijo ahkak'ku. Nohtooh, ahku duon utung limo kuhjan hino.’

²¹‘Hinut,’ hion tuan rih, ‘ihko tuh pohalu ijo pios tutang sotia tului ihko duon konoharap umba ijo isut, ahku ahkan morocaya ihko ijo aro ahkan'mu. Nyolongrih tutang umbarih jorih-jorih homboh ahku!’

²²Turus pohalu ijo norima duo kuhjan duit bulou orih lombut, tutang nuhtui, ‘Tuan, Tuan jari nyarah duo kuhjan duit bulou ahkak'ku. Nohtooh, ahku bohasir duon utung duo kuhjan duit bulou hino.’

²³‘Hinut,’ hion tuan rih, ‘ihko jihpon ijo morong tutang sotia. Tului ihko duon konoharap umba ang isut, ahku morocaya ijo aro ahkan'mu. Nyolongrih tutang umbarih jorih-jorih homboh ahku!’

²⁴Pongohuli pohalu ijo norima sokuhjan duit bulou orih lombut tutang nuhtui, ‘Tuan, ahku kota'an tuan ulun ijo karas. Tuan nguhtoi bua ang unuk tuan eam ngombulanoh, tutang ngomin hasil ang unuk ijo eam tuan nuhkan bonyioh.

²⁵Ahku mihkoh, jadi ahku tulak nyuhukoh duit tuan rih ang luwang tana. Tuh io duit tuan!’

²⁶‘Ihko pohalu ijo ja'at tutang bokolas!’ hion tuan rih. ‘Eamkah ihko ta'an ijo ahku nguhtoi bua ang unuk ahku eam ngombulan, tutang ngomin hasil ang unuk ahku eam noburan bonyi?

²⁷Amat kolourih koharusoh ihko ngina duit rih ang bank, mangat ang kotihka ahku buli, ahku duon norima huli duit aik'ku rih tutang anakoh.

²⁸Tului orih omin duit rih tahkan io, tutang nonga ahkan ulun ijo tepun sopulu kujan duit bulou orih.

²⁹ Tului ulun ijo jari anaingina, ahkai tononga labih aro hino tutang io ahkan molobien tu'u. Tahpi ulun ijo eam anaingina, isut ijo magun anai aang io ahkan tongomin ka'a.

³⁰ Tutang pohalu ijo eam boguna rih, dian ahkan luwang unuk pindong ang konaha. Ang anai io ahkan nangih tutang mongarot!’ ”

³¹ “Amatnoin Anak Ulun lombut kolou Lahca tongitot molehkat-molehkat-Oh. Io ahkan tuot ang ngosan pododusan aiou ijo hajo.

³²Uhtus-uhtus ahkan tonipun ang toharop-Oh. Turus Io ahkan ngobohkon iro monjadi duo kobarih kolou sokahtik mombarih tobiri tahkan kombing.

³³Ulun-ulun ijo molalus konohuang Pohotala ahkan konina ang sila koto'ui-Oh tutang ijo bohkon ang sila komuloi-Oh.

³⁴Pongohuli Lahca rih nuhtui umba ulun-ulun ang hila koto'ui-Oh, ‘Nokuhohtoi ihkam ijo tomorehkat bain Amai-Ku. Nyolong nokuh Kolahca'an ijo tonyodia ahkan'kam tahkan pahtuk kolunon.

³⁵Tului ang kotihka Ahku bolo'u, ihkam nonga Ahku ukun, tutang ang uhun Ahku tojahbolai, ihkam nonga Ahku korih. Ahku ihcobehti bohkonuhtus, ihkam norima Ahku ang lohpou'kam.

³⁶Ahku eam hopokajan, ihkam nonga Ahku hahtin'kam, Ahku poros ihkam mohaga Ahku, Ahku ang sipir, ihkam nyonguk Ahku.’

³⁷Turus ulun-ulun orih ahkan nuhtui, ‘Tuhan, mira ihkai pu'u nohto Tuhan bolo'u turus ihkai nonga Tuhan ukun, ata'ai tojahbolai, turus ihkai nonga Tuhan korih?

³⁸Mira ihkai pu'u nohto Tuhan kolou ulun bohkonuhtus, turus ihkai nyambut Tuhan nokuh luwang lohpou 'kai? Mira Tuhan pu'u eam hopokajan, turus ihkai nonga Tuhan hahtin?

³⁹Mira ihkai pu'u nohto Tuhan poros ata'ai tonyipir, turus ihkai dohop Tuhan?’

⁴⁰Lahca rih ahkan mutah, ‘Kota'an ih; ohkot ihkam nguan hal orih sinoka umba anai ihcobehti, tahkan konduang-konduang-Ku ijo paling hina, rimai ihkam jari nguaioh umba Ahku!’

⁴¹Turus Lahca rih ahkan nuhtui umba ulun-ulun ang hila komuloi-Oh, ‘Hahtun tahkan ohtoi, jahanam! Nyolong nokuh luwang baho ijo eam tou bolop, ijo jari nyodia ahkan sehtan tutang molehkat-molehkatoh!

⁴²Tului ang ohkot Ahku bulou, ihkam eam nonga Ahku ukun, ang uhun Ahku tojahbolai, ihkam eam nonga Ahku korih.

⁴³Ahku ihcobehti bohkonuhtus, ihkam eam norima Ahku nokuh luwang lohpou'mu. Ahku eam aro hatik, ihkam eam nonga Ahku hahtin. Ahku poros tutang tonyipir, ihkam eam masap dohop Ahku.’

⁴⁴Turus iro ahkan nuhtui umba-Oh, ‘Tuhan, mira ihkai nohto Tuhan bulo'u, ata'ai tojahbolai, ata'ai kolou ihcobehti bohkonuhtus, ata'ai eam hopokajan, ata'ai poros, ata'ai tonyipir, tutang ihkai eam dohop Tuhan?’

⁴⁵Lahca rih ahkan mutah, ‘Kota'an'kam: ang ohkot ihkam eam kani dohop, anai ihcobehti ijo hina tuh, rimai ihkam eam aro kani dohop Ahku.’

⁴⁶ Mahka ulun-ulun rih ahkan tomohukum umba hukuman ijo kototahiuoh, rahatoh ulun-ulun ijo numbun kohondak Pohotala ahkan ngomo pombolum ijo morong tu'u tutang kototahiu.”