Read Ot Danum MATEUS 26 Bible Online

MATEUS 26 - Ot Danum bible

MATEUS 26

¹Ohkot Yesus ngopah ajaroh tohou paring hal rih, Io nuhtui umba murid-murid-Oh,

² “Ihkam kota'an duo ondou hino Ondou Hajo Paska, tutang Anak Ulun ahkan tonyarah ahkan tonahpak ang sopolahki!”

³Ang ohkot orih rih imam-imam kopala tutang okon-okon Yahudi mohaum ang istana Imam Hajo, Kayapas.

⁴Iro bohaum ahkan nawan Yesus hapan cara toni-tonih, turus ahkan munu Io.

⁵“Tahpi,” hion'ndo, “ara nguan aang kolorih ang uhun Ondou Hajo Paska, tului noin, napa korusuh ang louk ulunaro.”

⁶Kotihka Yesus anai ang Betania, ang lohpou Simon ijo houn ngarot ponyahkit bobelang ijo mopihkoh,

⁷ ihcobehti ulunbawi lombut nokuh Yesus, io ngomin ihco kasa pualam, bosuang minyak buanhorum ijo borega. Aang kotihka Yesus beteng tuot kuman, ulunbawi rih nusuh minyak buanhorum rih aang kuhung Yesus.

⁸Murid-murid Yesus nohto aangjadinyolung orih tutang turus bosingi, “Inon gunaioh gawi koloutuh ngoraus ih?” hion'ndo.

⁹“Minyak atuh tou tomodagang hapa lega ijo larang, tutang duitoh nonga ahkan ulun porosbolum!”

¹⁰Yesus kota'an tiruk'ndo, turus Io nuhtui, “Ombai ihkam nyala ulunbawi tuh? Io nguan ang'co ijo Hinut tutang horomat ahkak-Ku.

¹¹ Ulun porosbolum toturus anai ang louk ihkam, tahpi Ahku eam hototurus jaham hihco ihkam.

¹²Tului nusuh minyak buanharum rih ang behtik-Ku, io mohalu Ahku nitu kolowong-Ku,

¹³Porocayarih! Ang sohapus kolunon, ang amohrih Kabar Hinut tahkan Pohotala tonyiar, anggawin bawi tuh, ahkan tonyiar ka'a monjadi pongingat ahkaioh.”

¹⁴Turus ihcobehti tahkan murid Yesus, ijo bogare Yudas Iskariot, tulak nokuh imam-imam kopala.

¹⁵ Yudas nuhtui umba iro, “Inon ijo tononga'kam ahkak'ku amat ahku monyorah Yesus ahkan'kam?” Mahka iro morehken tolun pulu koluang duit perak, turus nonga duit orih ahkan Yudas.

¹⁶Nopara tahkan ohkot orih Yudas ngurah kosapet ijo pios ahkan monyarah Yesus.

¹⁷Ang ondou ijo pahtukoh, aang Pesta Luhte Eam Boragi, murid-murid Yesus lombut nokuh Io. Iro ngisok, “Ang umoh Amai jolik, ihkai nyodia ukun Paska ahkan Amai?”

¹⁸Yesus mutah, “Tulak nokuh ihcobehti ang lowu tutang nuhtui umba io, ‘Hion Amai Guru, jari johcok ohkotoh ahkak-Ku: Ahku kani napa pesta Paska ang lohpou'mu homboh umba murid-murid-Ku!’ ”

¹⁹Murid-murid Yesus numbun inon ijo sonuhu Yesus ahkan'ndo. Iro tulak monyodia ukun Paska rih.

²⁰Uli ngolomi, Yesus tutang koduo-balas murid-Oh tuot kuman.

²¹Pondehan iro kuman, Yesus nuhtui, “Ngonih'kam: ihcobehti tahkan louk ihkam ahkan ngarana Ahku.”

²²Ngonih orih, murid-murid Yesus monjadi porosahtoi'ndo. Turus iro ihcobehti honong ihcobehti nopara ngisok Yesus, “Tontu bohkon Ahku ijo Amai nituoh?”

²³ Yesus mutah, “Ulun ijo ninjok luhte kohuang pihkan homboh Ahku, iorih ahkan ngarana Ahku.

²⁴Punaoh Anak Ulun ahkan mahtoi kolou ijo tonyurat ang luwang Surat Borasih. Tahpi colahkalah ulun ijo ngarana Anak Ulun! Labih pios ahkan ulun rih, amat io eam pu'u konanak samasino!”

²⁵Turus Yudas pongorana rih nuhtui, “Tontu bohkon ahku ijo hion Amai Guru nituoh?” Yesus mutah, “Kolourih hion'mu!”

²⁶Kotihka iro ulikuman, Yesus ngomin luhte, turus ngohawot do'a torimakasih. Pongohuli Io molah-molah luhte rih umba longoi-Oh, turus nongaoh ahkan murid-murid-Oh hawoi hioi, “Ngomin tutang kumai; jituh behtik-Ku.”

²⁷Uliorih rih Io ngomin ihco sahkir anggur, turus ngohawot do'a torimakasih ahkan Pohotala. Uliorih Io nonga sahkir orih ahkan murid-murid-Oh, hawui nuhtui, “Ngorih rih ihkam paring.

²⁸ Tului tuhrih daha-Ku ijo monsah bowot Pohotala — daha ijo tonusuh ahkan aro ulun ahkan pongapun dusan'ndo.

²⁹Porocayarih: Ahku eam ahkan ngorih anggur tuh hino nyiring ang ohkot Ahku ngorih anggur ijo bohua homboh umba ihkam ang Kolunon Bohua Ain Amai-Ku.”

³⁰Pongohuli rih iro monyanyi ihco nyanyi tara. Tutang uliorih rih iro tulak nokuh Puruk Zaitun.

³¹ Turus Yesus nuhtui ahkan murid-murid-Oh, “Aang ngolomi tuh ihkam paring ahkan nokoru nohtah Ahku; tului aang Surat Borasih tonyurat: Pohotala nuhtui, ‘Ahku ahkan munu sokahtik orih, tutang kawan tobirioh ahkan bororawuh.’

³² Tahpi uli Ahku tongombolum huli, Ahku ahkan tulak hounumba ihkam nokuh Galilea.”

³³Petrus nuhtui umba Yesus, “Nauhoh paring ijo bohkonoh nohtah Amai, ahku samasino eam!”

³⁴“Ingat,” hion Yesus umba io, “ngolomi tuh ka'a, hounumba dalung manuk nandu, tolu tikat ihko eam ngahku Ahku.”

³⁵Petrus mutah, “Sinoka jaka ahku harus mahtoi homboh Amai, ahku eam ahkan nuhtui ijo ahku eam kosono Amai!” Tutang paring murid ijo bohkon, nuhtui kolourih ka'a.

³⁶Uliorih rih Yesus tulak homboh murid-murid-Oh nokuh ihco unuk ijo bogare Getsemane. Ang anan Io nuhtui umba iro, “Tuotrih ang ohtoi, pondehan Ahku tulak bodo'a.”

³⁷Turus Yesus ngomin Petrus tutang koduo anak Sebedeus tulak homboh umba Io. Io nopara nanyam ngoli tutang bolisah.

³⁸Io nuhtui umba murid-murid-Oh, “Ahtoi-Ku ngoli samasino, anyamoh kolou ahkan mahtoi ih. Mohcon ihkam ang ohtoi tutang hawui bojaga-jaga umba Ahku.”

³⁹Pongohuli Yesus tulak ngomahcu aropoh honjiot, turus Io nyundop ahkan tana tutang bodo'a. “Amai,” hioi-Oh, “amat tou, dian tahkan Ahku kokarot ijo Ahku harus nyuruoh tuh. Tahpi a'ai numbun konohuang-Ku, molekan numbun konohuang Amai iou.”

⁴⁰Uliorih rih Yesus huli nokuh tolu murid-Oh tutang sombang iro rahat tiruh. Io nuhtui umba Petrus, “Tihkas ihco jam iou ihkam tolu eam duon bojaga umba Ahku?

⁴¹Bojaga-jagarih, tutang bodo'a mangat ihkam ara buah tihkos. Puna Roh'kam kani nguan ijo morong, tahpi ihkam eam sanggup, tului dasar ulun tuh bolomu.”

⁴²Sino huli Yesus tulak bodo'a, hioi-Oh, “Amai, amat koporos tuh harus Ahku nyuruoh, tutang eam duon dian tahkan Ahku, nauhoh konohuang Amai ijo nyolung.”

⁴³Uliorih Yesus huli hino tutang sombang murid-murid-Oh magun ka'a tiruh, tului iro karas nundu.

⁴⁴Sino hino Yesus nohtah iro tutang bagi kotolu tikatoh bodo'a hawui ngohawot auh-auh ijo sama.

⁴⁵Uliorih rih Io huli hino nokuh murid-murid-Oh tutang nuhtui, “Magunrih ihkam tiruh tutang ngorong hasong? Nohto, jari johcok ohkotoh Anak Ulun tonyarah ahkan kowasa ulun-ulun bodusa.

⁴⁶Kuat ndai, has ihto tulak. Topahjah ulun ijo modagang Ahku jari lombut!”

⁴⁷Pondehan Yesus magun bopander, Yudas, ihcobehti tahkan duo balas murid-Oh rih lombut. Hombo-homboh umba io, lombut ka'a aro ulun ijo ngomin padang tutang tohtok kahju. Iro sonuhu bain imam-imam kopala tutang okon-okon Yahudi.

⁴⁸Pongorana rih jari tonyorihta ahkan'ndo tanda tuh, “Ulun ijo ahku ngohcomoh, orih uluioh. Nawan Io!”

⁴⁹Kodorih johcok ang unuk orih Yudas turus tulak nokuh Yesus, tutang nuhtui, “Tabe, Amai Guru!” turus io mongohcom Yesus.

⁵⁰Yesus ngisok, “Konduang, ahkan inon konduang lombut ahkan ohtoi?” Pongohuli ulun aro rih miar, tutang nawan Yesus.

⁵¹Anai ihcobehti murid Yesus, ijo anai ang anan, umba Yesus, nyohpit podangoh tutang moriwih jihpon imam hajo nyiring bosaping tolingaioh.

⁵²Yesus nuhtui umba murid-Oh orih, “Ngupang huli podang'mu nokuh luwang salungoh, tului paring ulun ijo mongguna podangoh ahkan mahtoi bain podang ka'a.

⁵³Ihko ngira Ahku eam tou nyawot dohop umba Amai-Ku, tutang Io jeleng ahkan ngirim molobien umba duo balas ponokawan sorodadu molehkat?

⁵⁴Tahpi amat kodorih, eam tou nyolung kolou ijo jari tonujum ang Surat Borasih ijo puna harus nyolung kolou ijo ang huntuh tuh?”

⁵⁵ Turus Yesus nuhtui umba ulun aro rih, “Kuwoh Ahku tuh ponyilou, nyiring ihkam lombut hawui ngomin podang tutang tohtokkahju ahkan nawan Ahku? Nyinong ondou Ahku mongajar ang Lohpou Pohotala, tutang ihkam eam nawan Ahku!

⁵⁶Tahpi puna jari koharusoh kodorih ahkan nyolung inon ijo tonyurat bain nabi-nabi ang luwang Surat Borasih.” Uliorih rih, paring murid-murid Yesus bororawuh nohtah Yesus.

⁵⁷Ulun-ulun ijo nawan Yesus ngonin Io nokuh Lohpou Imam Hajo Kayapas. Ang anan guru-guru agama tutang okon-okon Yahudi jari hopuhpung.

⁵⁸Petrus ngahasu Yesus tahkan mahcu nyiring konaha Lohpou Imam Hajo. Turus Petrus nyolong nokuh dohopan rih, tutang tuot hihco pongawal-pongawal. Io jolik kota'an koloukuwoh paring orih johcok laiu noin.

⁵⁹Imam-imam kopala tutang paring Majelis Agama ngurah jalan ngonduon kosaksian alik ahkan duon muhtus hukum mahtoi buah Yesus.

⁶⁰Tahpi iro eam duon ihcobukti ka, oluka aro ijo maju kolou saksi alik. Laiuoh anai duobehti maju nokuh boun.

⁶¹ Iro nuhtui, “Ulun tuh nuhtui, ‘Ahku duon ngahkas Lohpou Pohotala, tutang aang tolu ondou duon mangunoh hoduli.’ ”

⁶²Turus imam hajo tombok tutang ngisok umba Yesus, “Inon Ihko eam mutah dawa ijo nitu arop-Mu rih?”

⁶³Tahpi Yesus tonih ih. Sino hino imam hajo ngisok umba Io, “Honong Pohotala ijo bolum, nuhtuirih ahkan 'kai. Inon Ihko Lahca Ponyolamat Anak Pohotala?”

⁶⁴ Yesus mutah, “Kolouorih hion'mu. Tahpi porocaya iou: nopara uhuntuh ihkam ahkan nohto Anak Ulun tuot ang sila koto'un Pohotala Ijo Mahakowasa, tutang lombut ang ngosan baunondou ang langit!”

⁶⁵ Mahka imam hajo rih morutat hahtiu, tutang nuhtui, “Io nohonya Pohotala! Eam usah hino saksi. Ihkam paringoh uras ngonihoh bongon'kam auh-auhoh ijo nohonya Pohotala.

⁶⁶Huntuh koloukuwoh tiruk ihkam?” Iro mutah, “Io sala tutang pahtut mahtoi.”

⁶⁷ Turus iro ngoluhca boun Yesus, tutang nahup Io. Anai hino ijo napar Io

⁶⁸tutang nuhtui, “Cuba ngurah tutang nuhtui ahkan 'kai, o Lahca Ponyolamat! Iai ijo napar Ihko?”

⁶⁹Petrus rahat tuot ang konaha, ang dohopan. Anai ihcobehti pohalu bawi lombut, tutang ngisok umba Petrus, “Eamkah ihko ka'a hihco umba Yesus ulun Galilea rih?”

⁷⁰Tahpi Petrus eam ngahku ang toharep iro paringoh. “Ahku eam ngosono inon ijo hion'mu,” hion Petrus,

⁷¹turus io tulak nokuh bauntukang dohopan. Ihcobehti pohalu bawi ijo bohkon hino nohto Petrus, tutang nuhtui umba ulun-ulun ang anan, “Ulun tuh nanai ka'a homboh umba Yesus tahkan Nasaret rih.”

⁷²Turus Petrus eam ngahku hino, tutang nulut aropoh. “Ahku tu'u-tu'u eam kosono ulun orih!” hion Petrus.

⁷³Eam tahi uliorih, ulun-ulun ijo tombok ang anan lombut nokuh Petrus, tutang nuhtui, “Musti ihko anai ihcobehti tahkan iro. Orih kontara samasino tahkan auh'mu nuhtui.”

⁷⁴Turus Petrus nulungocahu aropoh, tutang nuhtui, “Ahku eam ngosono ulun orih!” Uhun orih ka'a dalung manuk nandu.

⁷⁵Tutang Petrus toingat ijo Yesus jari nuhtui umba io, “Hounumba dalungmanuk nandu, ihko tolu tikat eam ngahku Ahku.” Turus Petrus bolua, tutang nangih honong porosahtoioh.