Read Ot Danum MATEUS 27 Bible Online

MATEUS 27 - Ot Danum bible

MATEUS 27

¹Homboh ngohkos samasino, paring imam kopala tutang okon Yahudi duon koputusan ahkan munu Yesus.

²Iro manga Io tutang ngomin Io, turus nyarah-Oh ahkan Pilatus, gubernur pomoretah Ruma.

³ Kotihka Yudas ngorana rih, nohto ijo Yesus buah hukum, io monyasal. Turus Yudas nyarah huli tolun pulu duit perak rih, ahkan imam-imam kopala tutang okon-okon Yahudi.

⁴Io nuhtui, “Ahku ius bodusa ngorana ulun ijo eam bosala, nyiring Io kona hukum mahtoi!” Tahpi iro mutah, “Poduli inon ihkai? Orih urusan'mu!”

⁵Yudas nyakah kambut duit rih nokuh Lohpou Tuhan, turus io tulak tutang ngahtung aropoh.

⁶Imam-imam kopala nipun duit rih tutang nuhtui, “Duit tuh duit daha. Numbun hukum agama, duit rih eam tou posolongoh unuk pononga ang Lohpou Tuhan.”

⁷Turus uli iro bohaum, iro ngomin duit rih unuk moli tana ijo konohawot Tana Tuhkang Kobali. Tana rih gunai unuk ngolowong ulun-ulun bohkonuhtus.

⁸Kotului orih nyiring ondou tuh tana rih konohawot “Tana Daha.”

⁹ Honong kodorih, nyolungrih inon ijo tonuhtui bain Nabi Yeremia, iorih, “Iro norima tolun pulu duit perak, jorih regan ijo nyotuju bain ulun Israel kolou bayaran ahkai-Oh.

¹⁰Tutang duit orih iro hapai unuk moli Tana Tuhkang Kobali, kolou ijo tomoretah Tuhan ahkak-Ku.”

¹¹Kotihka Yesus noharep Pilatus, gubernur daerah orih, Pilatus ngisok, “Inon Ihko Lahcan Ulun Yahudi?” “Kolouorih hion'mu,” hion Yesus.

¹²Tahpi uhun imam-imam kopala tutang okon-okon Yahudi nonga aro dawa toharep Yesus, Io eam mutah samasino.

¹³Tului orih Pilatus nuhtui umba Yesus, “Kuwoh Ihko eam ngonih paring ijo iro ndawa umba Ihko rih?”

¹⁴Tahpi Yesus eam mutah honjiot ka nyiring gubernur rih helan samasino.

¹⁵Ang nyinong pesta Paska gubernur moliwus ihcobehti ulun tonyihpir numbun pitih ulun aro.

¹⁶Ang kotihka orih anai ulun konohukum ijo bosewut. Araioh Yesus Barabas.

¹⁷Jadi uhun ulun aro hopuhpung, Pilatus ngisok umba iro, “Iai ijo ihkam kani ahku moliwusoh ahkan ihkam? Yesus Barabas ata'ai Yesus ijo konohawot Kristus?”

¹⁸Pilatus nuhtui kolou orih tului io kota'an, ijo pongowasa Yahudi monyarah Yesus ahkaioh tului kohiri ahtoi'ndo.

¹⁹Ang kotihka Pilatus rahat tuot ang balai bosara, oruhoh ngirim pohtoh tuh ahkaioh, “Ara ihko umba-umba porokara ulun ijo eam bosala rih, bain tului Io, ahku duon nuhpi ijo ja'at tu'u ondou tuh.”

²⁰Tahpi imam-imam kopala tutang okon-okon Yahudi hototurus ngihit ulun aro rih ahkan nyawot umba Pilatus mangat Barabas ijo tonoliwus tutang Yesus Kristus tonohukum mahtoi.

²¹Turus gubernur rih ngisok umba iro, “Tahkan koduo ulun rih, iai ijo ihkam kani ahku moliwusoh ahkan'kam?” “Barabas,” hion'ndo.

²²“Amat kolouorih, ahku harus nguan inon umba Yesus ijo konohawot Kristus?” Pilatus ngisok umba iro. “Mahpak Io!” hion iro paringoh.

²³“Tahpi inon koja'at-Oh?” Pilatus ngisok. Turus iro ngoriak muhi-muhing hino, “Mahpak Io!”

²⁴ Kojoriaioh Pilatus borondong ijo io eam tou nguan ino-inon hino tutang ijo ulun-ulun rih puna tou ahkan borontak. Jadi Pilatus ngomin danum, turus ang toharep ulun aro rih io muhi longoioh hawui nuhtui, “Ahku eam nanggung-jawab ngosan popahtoi ulun tuh! Orih urusan'kam!”

²⁵Paring ulun aro rih mutah, “Yo, nauhoh ihkai tutang anak-anak 'kai nanggung hukuman ngosan popahtoi-Oh!”

²⁶Turus Pilatus molopas Barabas ahkan iro, tutang nyuhu ulun mahcat Yesus; tutang nyarah Yesus ahkan tomahpak.

²⁷Pongohino sorodadu-sorodadu Pilatus ngomin Yesus nyolong nokuh istana gubernur, tutang paring kawansorodadu kupur aang kodiling Yesus.

²⁸Iro nguap hahtin Yesus, tutang makehpan ahkai jubah ungu.

²⁹Iro nguan ahkur ijo tahkan bojahkah boduhi, turus nokehpaioh aang kuhung Yesus. Pongohuli iro ngina ihco doroh kahju ahkan sukahoh ang longoi koto'ui-Oh, turus sutup ang toharep-Oh hawui'ndo ngojea Io. “Daulat Lahcan Ulun Yahudi!” hion'ndo.

³⁰Iro ngoluhca baui-Oh, tutang ngomin sukah rih, turus nahup Io ang kuhung-Oh.

³¹Uli iro ngonjea Io, iro nguhkoi jubah-Oh ungu rih turus kehpan hahtin Aiu bongoi. Pongohuli Io konomin bolua ahkan tomahpak.

³²Aang beteng jalan iro hosombang umba ihcobehti tahkan Kirene bogare Simon. Iro nyuhu Simon rih ngohtun sopolahkin Yesus.

³³Pongohuli iro johcok ang ihco unuk ijo konohawot Golgota, ijo rimaioh “Unuk Bangon Kuhung.”

³⁴ Ang anan iro nonga ahkan Yesus korih anggur ijo capur poru. Tahpi uli Yesus nyurup anggur rih, Io eam norimaoh.

³⁵ Pongohino iro nyopolahki Io, tutang hobagi-bilah hahtiu-Oh hapan tenung.

³⁶Ulimba iro tuot monjaga Io ang anan.

³⁷Ang diang kuhung-Oh iro nokehpan surat tohou dawa toharep Io, yorih: “Jituh Yesus Lahcan Ulun Yahudi.”

³⁸Hombo-homboh umba Io, iro mahpak ka'a duo behti ponyilou; ihcobehti ang sila koto'ui, ihcobehti hino ang sila komuloi-Oh.

³⁹ Ulun-ulun ijo nyihing ang anai ngiling-ngiling kuhung, tutang ngoluhca nohanya Yesus.

⁴⁰ Iro nuhtui, “Ihko ijo kani ngahkas Lohpou Pohotala, tutang mangunoh hino ang tolu ondou! Amat Ihko Anak Pohotala, mosuluh rih tahkan sopolahki rih, tutang nyolamat arop'mu!”

⁴¹Kolouorih ka'a imam-imam kopala tutang guru-guru agama tutang okon-okon Yahudi ngonjea Yesus. Iro nuhtui,

⁴²“Io monyolamat ulun bohkon, podahar arop-Oh bongoi Io eam duon nyolamatoh! Amat Io Lahcan Israel, piosrih Io uhuntuh mosuluh tahkan sopolahki orih, punan ihkai porocaya umba-Oh.

⁴³ Io porocaya umba Pohotala tutang nuhtui ijo Io Anak Pohotala. Orih, olai ihto nohto-Oh inon rih Pohotala kani monyolamat Io uhuntuh.”

⁴⁴Ponyilou-ponyilou ijo tonyalib homboh Io rih ka malah umba ngonjea Io ka'a kolourih.

⁴⁵Ang tohun ondou, kotahin tolu jam sohopus tana rih monjadi pindong.

⁴⁶ Pukul tolu cohit, Yesus ngombak honong auh muhing, “Eli, Eli, lama sabakhtani?” ijo rimai, “O Pohotala-Ku, Pohotala-Ku, ombai Ihko nohtah Ahku?”

⁴⁷Pira-pira ulun ang anan ngonih kombak-Oh, tutang nuhtui, “Io na'ah Elia!”

⁴⁸ Ihcobehti tahkan iro jonyo-jonyo tulak ngomin dolak karang tutang nuhcomoh aang anggur mosom. Pongohuli io nusukoh ang topahkan owuh kahju turus nohtahcukoh nokuh biwih Yesus.

⁴⁹Tahpi ulun-ulun ijo bohkon nuhtui, “Ngindoi, olai ihto nohto inonrih Elia lombut nyolamat Io!”

⁵⁰Pongohuli Yesus ngombak hino honong auh muhing, turus mahtot hasong-Oh ijo pongopahoh.

⁵¹ Dindingbenang ijo moholat, ang luwang Lohpou Tuhan borutat sila duo tahkan diang johcok pinda. Tana moruguh tutang puruk-puruk bahtu bosila.

⁵²Luwang kolowong bokuap, tutang aro ukup Pohotala ijo jari mahtoi tongombolum huli.

⁵³Iro soluka tahkan tanom-tanom uli Yesus bolum tahkan louk ulun mahtoi, tutang iro nyolung nokuh Yerusalem bohua. Tutang ang anan aro ulun nohto iro.

⁵⁴Kopala pasukan hombo-homboh umba karon-sorodadu ijo rahat monjaga Yesus uras mihkoh samasino ohkot nohto tana moruguh tutang paring ang nyolung rih. Iro nuhtui, “Tu'u-tu'u Io tuh Anak Pohotala!”

⁵⁵ Ang anan aro ka'a ulunbawi ijo rahat nohto tahkan mahcu. Iro rih ijo jari ngohasu Yesus mangat dohop Io, nopara tahkan Galilea.

⁵⁶Ang loukoh, iorih Maria Magdalena, Maria inai Yakobus tutang Yusep, tutang inai anak-anak Sebedeus.

⁵⁷Ang ngolomi orih lombut rih ihcobehti ulun tahtou tahkan Arimatea, ijo araioh Yusep. Io ka'a murid Yesus.

⁵⁸Io tulak nokuh Pilatus, tutang nyawot otun Yesus. Turus Pilatus moretahoh mangat otun Yesus tonongaoh ahkaioh.

⁵⁹Mahka Yusep ngomin otun Yesus rih, tutang muhkusoh umba benang pomukusotu tahkan benang lena ijo bohua.

⁶⁰Turus io pokaling otun Yesus ang luwang tanom aiuoh bongoi, ijo tonapaoh ang luwang ihco puruk bahtu. Uliorih io molinang ihcokobawak bahtu hajo nuhtup boun luwang tanom rih, turus tulak.

⁶¹Maria Magdalena tutang Maria ijo bohkon mohcon tuot ang anan noharep tanom rih.

⁶²Ngokos ondou hounumba ondou Sabat, imam-imam kopala tutang ulun-ulun Parisi tulak hombo-homboh nokuh Pilatus

⁶³ tutang nuhtui, “Tuan, ihkai ingat ohkot pomunga orih magun bolum, Io pu'u nuhtui, ‘Ulimba tolu ondou, Ahku ahkan bolum.’

⁶⁴Tului orih, nyuhu ulun monjaga tanom rih pio-pios nyiring ondou ijo kotolu, ahkan murid-murid-Oh eam duon nahkou otui-Oh, turus nuhtui umba ulun-ulun ijo Io jari bolum hoduli tahkan popahtoi. Tutang punga ijo laiu tuh ahkan paling ja'at umba ijo pahtukoh.”

⁶⁵“Ihkam anai sorodadu pongawal,” hion Pilatus umba iro, “tulak monjaga tanom rih sorapat touduon.”

⁶⁶Turus iro tulak nokuh tanom, nyegel bahtu ponuhtupoh, tutang ngina ponjaga ang bauioh, mangat eam anai ijo nganggu kolowong rih.