Read Ot Danum MATEUS 28 Bible Online

MATEUS 28 - Ot Danum bible

MATEUS 28

¹Kotihka ondou Sabat jari nyihing ang ondou Minggu ngohkosjowujowuk samasino, Maria Magdalena tutang Maria ijo bohkon rih ka'a tulak nohto lowong rih.

²Songela nyolung tana moruguh ijo monyangit. Ihcobehti molehkat Tuhan nosuluh tahkan soruga turus molinang bahtu atop lowong tanom orih hawoi tuot ang ngosanoh.

³Kolou molehkat rih sama kolou kilat tutang hahtiuoh puhti samasino.

⁴Sorodadu ponjaga ijo ngindoi ang anan korinah kihkoh'ndo nyiring iro nohcot, tutang ngola kolou ulun mahtoi.

⁵Molehkat rih nuhtui umba ulun-ulun bawi orih, “Ara mihkoh! Ahku ta'an ihkam ngurah Yesus ijo jari tomahpakoh rih.

⁶Io eam aro ang ohtoi. Io jari bolum, kolou ijo jari tonuhtui-Oh soun. Nokuh ohtoi nohto unukoh Io tomokaling.

⁷Uhuntuh tulak jele-jeleng, monyiaroh ahkan murid-murid-Oh, ‘Io jari bolum tutang huntuh Io tulak labih soun umba ihkam, nokuh Galilea. Ang anan ihkam ahkan nohto Io!’ Ngingat iou, inon ijo jari tonuhtui-Oh ahkan'kam.”

⁸Jele-jeleng ulun-ulun bawi rih nohtah kolowong rih. Honong nanyam mihkoh sapur jorih, iro nokoru ahkan monyiaroh hal orih ahkan murid-murid Yesus.

⁹Songela Yesus lombut hosombang umba ulun-ulun bawi orih tutang nuhtui, “Tabe!” Turus iro nokuh ngondoni Io, uli rih ngohawon pa'ai-Oh tutang nyembah Io.

¹⁰“Ara mihkoh,” hion Yesus umba iro, “tulak nuhtui ahkan konduang-konduang-Ku, mangat'ndo tulak nokuh Galilea; ang anan iro ahkan nohto Ahku.”

¹¹Pondehan ulun-ulun bawi rih tulak, pira-pira tahkan sorodadu pongawal ijo ngindoi tanom rih buli nokuh lowu, tutang ngonorangan ahkan imam-imam kopala, paring ijo jari nyolung.

¹²Imam-imam kopala rih bohaum umba okon-okon Yahudi, turus nonga jombalah hajo duit ahkan sorodadu ponjaga rih,

¹³tutang nuhtui, “Ihkam harus nuhtui ijo murid-murid Yesus lombut ang ngolomi ondou, tutang nahkou otui-Oh ohkot ihkai rahat tiruh.

¹⁴Tutang amat gubernur ngonih hal orih, ihkai ahkan ngata'u io mangat ihkam eam buah hukum konuaioh.”

¹⁵Mahka sorodadu ponjaga rih, ngomin duit rih, tutang nguan kolou ijo tomohtoh ahkan iro. Bain tului rih kesah rih magun tosiar ang louk ulun Yahudi nyiring aang ondou tuh.

¹⁶ Kosobalas murid Yesus rih tulak nokuh Galilea sorurui umba ijo ponoretah Yesus ahkan iro.

¹⁷Ang ohkot iro nohto Yesus ang anan, iro suhkuntu'ut nyembah Io. Tahpi anai ang louk iro ijo bembang.

¹⁸Yesus ngondoni iro tutang nuhtui, “Paring kowasa ang soruga tutang ang ngosan tana jari tonyorah ahkak-Ku.

¹⁹ Tului orih, tulakrih ahkan kokaron uhtusulun ang sohapus kolunon, ngonjodian iro monjadi murid-murid-Ku. Mopondus iro honong ngohawot aran Amai, tutang Anak, tutang Roh borasih Pohotala.

²⁰Mongajaroh iou iro mone'et paring ijo jari Ahku moretah umba'kam. Tutang ingat rih Ahku ahkan hototurus homboh ihkam nyiring lain jaman.”