Read Ot Danum MATEUS 3 Bible Online

MATEUS 3 - Ot Danum bible

MATEUS 3

¹Ang ohkot orih lombut Yohanes Popondus ang padang balambah ang Yudea tutang nopara bokotbah.

² “Hubah tahkan dusa-dusan'kam” hioioh, “tului Pohotala ahkan jion moretah kolou Lahca!”

³ Yohanes tuhrih ulun ijo kohondak bain Nabi Yesaya aang auh-auhoh tuh, “Anai ulun ijo na'ah-na'ah ang padang balambah, ‘Nyodiaohrih jalan ahkan Tuhan; morahta jalan ahkai-Oh.’ ”

⁴ Yohanes hapapokahjan bulun unta. Pohtong kahangoh tahkan uhpak, tutang ukuioh mokalap tutang oling-lawung.

⁵Aro ulun tahkan Yerusalem, tahkan kodiling tana Yudea tutang tahkan tana-tana ang kodiling Sungoi Yordan, lombut nokuh Yohanes.

⁶Iro mongahku karon-dusan'ndo, tutang Yohanes mopondus iro ang Sungoi Yordan.

⁷ Aro ka'a ulun Parisi tutang Saduki lombut nokuh Yohanes ahkan tonopondus. Tahpi ohkot io nohto iro lombut, io nuhtui umba iro, “Ihkam ulun ja'at! Iai ijo nuhtui, ijo ihkam duon boliwus tahkan hukum Pohotala ijo ahkan lombut?

⁸Ngorinah hapan ang gawin'kam ijo ihkam ius hubah tahkan dusa-dusan'kam.

⁹ A'ai ngohu ihkam dahpot liwus tahkan hukuman tului homauh ijo Abraham anairih tahtu ajuh'kam. Ingat, tahkan bahtu-bahtu tuh ka Pohotala sanggup napa lihit ahkan Abraham!

¹⁰ Otak jari sodia ahkan nowong bahtang kahju nyiring uhat-uhatoh. Nyinong bahtang ijo eam mua ijo pios, ahkan tonowong tutang tonyahkah nokuh luwang baho.

¹¹Ahku mopondus ihkam umba danum, ahkan ngorinah ijo ihkam jari hubah, tahkan dusa-dusan'kam; tahpi ijo ahkan lombut uli ahku, ahkan mopondus ihkam umba Roh Pohotala, tutang baho. Io ijo hajo umba ahku. Ahkan nguwat talin sopahtu-Oh ka ahku eam gunai.

¹²Ang longoi-Oh anai tahap hapai ngiap paring paroi-Oh nyiring borasih. Usin paroi ahkan tonipun baiu-Oh nokuh koraking, tahpi paring ahpihoh ahkan sonaha-Oh, aang baho ijo eam tou bolop.”

¹³Ang ohkot orih Yesus tulak tahkan Galilea nokuh Sungoi Yordan. Ang anan Io lombut nokuh Yohanes tutang nyawot tonopondus.

¹⁴Tahpi Yohanes mocuba nulak sawot Yesus rih. Yohanes nuhtui, “Ahku ijo kopahtutoh tongopondus bain Amai. Huntuh malah Amai ijo lombut nokuh ahku.”

¹⁵Tahpi Yesus muhtah, “Nauhoh ih ahkan uhuntuh tului umba kolouorih ihto jari nguan paring ijo tongohondak Pohotala.” Jadi Yohanes mopondus Yesus.

¹⁶Uli tonopondus, Yesus jeleng soluka tahkan danum ang Sungoi rih. Songela langit bokuap tutang Yesus nohto Roh Pohotala nosuluh kolou bulung dala nokuh ngosan kuhung-Oh.

¹⁷ Uliorih konahan auh Pohotala nuhtui, “Jituh Anak-Ku ijo Ahku ngasih-Oh. Io ngojorih ahtoi-Ku.”