Read Ot Danum MATEUS 7 Bible Online

MATEUS 7 - Ot Danum bible

MATEUS 7

¹“A'ai mosara ulun bohkon, mangat ihkam bongom ka'a, ara tomosara bain Pohotala.

² Kotului koloukuwoh ihkam mosara ulun bohkon, kodorih ka'a Pohotala ahkan mosara ihkam. Tutang tihpong ijo ihkam hapa bagi ulun bohkon, ahkan tonohapan ka'a bain Pohotala bagi ihkam.

³Ombai ihkam nohto poruhukkahju ang mahtan konduang'kam, hunanai tohtokkahju luwang mahtan'kam bongom, eam ihkam nohtoanioh?

⁴Koloukuwoh ihkam dahpot nuhtui umba konduang'kam, ‘'Kan'toi ahku polua poruhukkahju rih tahkan mahtan'mu,’ hunanai ang mahtan'kam bongom anai tohtokkahju?

⁵Oi ulun pura-pura! Dian houn tohtokkahju tahkan mahtan'kam bongon, punan ihko nohto honong botarang, tutang dahpot dian poruhukkahju tahkan mahtan konduang'kam.

⁶Ara nonga ramu ijo borasih ahkan asu, mangat asu rih ara ngulos turus nosahap ihkam. Tutang ara nonga hitan ahkan urak, mangat urak rih ngihcak-ngihik hitan orih.”

⁷“Nyawot, mahka ihkam ahkan norima. Ngurah, mahka ihkam ahkan nyombang. Negah bauntukang, mahka bauntukang konuap bagi ihkam.

⁸Tului ulun ijo nyawot ahkan norima; ulun ijo ngurah ahkan nyombang; tutang ulun ijo negah, ahkan konuap bauntukang.

⁹Ang louk ihkam, kuwoh anai amai ijo nonga bahtu ahkan anakoh amat io nyawot luhte?

¹⁰Ata'ai nonga lohi amat io nyawot ohcin?

¹¹Oluka ihkam ja'at, ihkam tou ka'a nonga ijo hinut ahkan anak-anak'kam. Mahi hino Amai'kam ang soruga! Io molowi hino ahkan nonga ijo hinut ahkan ulun ijo nyawot umba Io.

¹² Nguan ulun bohkon, kolou ihkam jolik tononguan bain iro. Orihrih usin hukum Museh tutang ajar nabi-nabi.”

¹³“Nyolong nguha bauntukang ijo sihki, tului bauntukang tutang jalan ijo nitu nokuh norahka hajo tutang lumbah, tutang aro ulun ijo nitoioh.

¹⁴Tahpi sihki tutang bohali bauntukang tutang jalan ijo ngomin ulun nitu pombolum. Tutang baya honjiot rih ulun ijo nyombang orih.”

¹⁵“Rondo-rondong toharep nabi-nabi polasu. Iro lombut nokuh ihkam hobukus bulu tobiri, tahpi iro kotu'ui kolou horomaung ijo bosiak.

¹⁶Ihkam ahkan ngosono iro tahkan bua gawinoh. Ruwut duhi eam ahkan polua bua anggur tutang bahtang duhi eam momua bua sikun.

¹⁷Tahkan bahtang ijo subur anaimua bua ijo pios, tutang tahkan bahtang ijo eam pios anaimua bua ijo ja'at.

¹⁸Bahtang ijo subur eam dahpot mua bua ijo maram, tutang bahtang ijo ja'at eam duon mua bua ijo pios.

¹⁹ Nyinong bahtang ijo eam mua bua ijo pios, tonowong tutang tonyaha.

²⁰ Kodorih hino umba nabi-nabi pobula. Ihkam ahkan ngosono iro tahkan bua gawiuoh.”

²¹“Eam paring ulun ijo na'ah Ahku, ‘Tuhan, Tuhan’, ahkan nyolung anak uhkup Pohotala, tahpi baya ulun-ulun ijo numbun kohondak Amai-Ku ijo ang soruga.

²²Ang Ondou Kiamat aro ulun ahkan nuhtui umba Ahku, ‘Tuhan, Tuhan, eam umba aran-Mu ihkai jari mborihta pohtoh Pohotala? Tutang eamrih umba aran Tuhan ka'a ihkai jari muhko roh-roh ja'at hawui nguan aro tandahelan?’

²³ Tahpi Ahku ahkan muhtah, ‘Ahku eam pu'u ngosono ihkam! Hahtun tahkan ohtoi, ihkam ijo nguan koja'at!’ ”

²⁴“Nah, ulun ijo ngonih auh-Ku tuh, tutang numbun orih, sama kolou ulun horati ijo nombok lohpouoh ang ngosan bahtu.

²⁵Ang ohkot uhjan borohos, tutang danum suhu lombut, hawui bahiu karas nihtu lohpou rih, lohpou rih eam bolukang tului jari tonombok ang ngosan bahtu.

²⁶Tutang ulun ijo ngonih auh-Ku tuh, tahpi eam numbunoh io sama kolou ulun baleh ijo nombok lohpouoh ang ngosan baras.

²⁷Ang ohkot uhjan borohos tutang danum suhu lombut hawui bohiu hajo nihtu lohpou rih, lohpou rih bolukang. Tutang korusakoh karas samasino!”

²⁸ Kolaiuoh Yesus tondo majar, tutang ulun-ulun ijo anai ang anan, helan samasino ngonih ajar-Oh.

²⁹Tului Io majar umba pongaroh eam kolou guru-guru agama ain iro.