Read Ot Danum MATEUS 8 Bible Online

MATEUS 8 - Ot Danum bible

MATEUS 8

¹Yesus mosuluh tahkan pupung puruk tutang aro ulun ngohasu Io.

²Ang ohkot orih lombut ihcobehti ijo hoponyahkit belang ijo ngoli. Io suhkuntu'ut ang toharep Yesus hawui nuhtui, “Amai, amat Amai kani, Amai dahpot ngopios ahku.”

³Yesus nambit ulun rih hawui nuhtui, “Ahku kani. Pios ihko!” Uhun orih ka'a ponyahkitoh nihou.

⁴ Turus hion Yesus umba io, “Ingat! A'ai nyorihta ahkan ia-iai ka'a. Tahpi tulak nokuh imam, tutang nyawot ang io ahkan kopastianoh ihko jari pios. Uliorih nonga pononga ijo tomoretah Museh, kolou bukti ahkan ulun-ulun ijo ihko tu'u-tu'u jari pios!”

⁵Ohkot Yesus nyolong nokuh Kapernaum, ihcobehti porowira Ruma lombut nyombang Io, tutang nyawot dohop umba Io.

⁶“Amai” hion porowira rih, “Pohalu'ku mondam ang lohpou. Io kaling pale-palek ang unukoh tiruh tutang ngarot samasino.”

⁷Hion Yesus, “Ahku ahkan tulak ngopios io.”

⁸“Eam usah Amai,” hion porowira rih, “ahku eam pahtut norima Amai ang lohpou'ku. Amai moretah ih. Noin pohalu'ku rih pios.

⁹Tului ahku ka'a harus minda poretah ijo diang. Tutang ang pinda ahku anai karon-sorodadu ijo harus minda poretah'ku. Amat ahku nyuhu ihcobehti sorodadu, ‘Tulak!’ io ka tulak. Ahku nuhtui ahkan ijo bohkon, ‘Nokuh ohtoi!’ io ka nokuh; tutang amat ahku moretah pohalu'ku, ‘Nguan tuh!’ io ka nguaioh.”

¹⁰Ohkot Yesus ngonih inon ijo tonuhtui bain porowira rih, Io helan samasino. Turus Io nuhtui ahkan ulun-ulun ijo anai homboh Io, “Eam inon ulun tuh. Ang louk ulun Israel ka jaha pu'u Ahku nyombang kaporocaya kohajon tuh!

¹¹ Tu'u-tu'u! Aro ulun ahkan lombut tahkan timur tutang barat ahkan jorih-jirah homboh Abraham, Isaak, tutang Yakub aang Kolunon Bohua Ain Pohotala.

¹² Padahal ulun-ulun ijo soharusoh monjadi uhkup ain Pohotala ahkan tongindiu nokuh kopindong ang konaha. Ang anan iro ahkan nangih tutang ngarot.”

¹³Turus Yesus nuhtui umba porowira rih, “Buli ih, inon ijo ihko porocayaoh rih ahkan nyolung.” Tutang uhun orih ka'a pohaluoh rih pios.

¹⁴Yesus tulak nokuh lohpou Petrus. Ang anan Io nohto opu Petrus beteng ngarot pondamoh ang unukoh tiruh.

¹⁵Yesus nambit longoi, turus pondamoh nihou, io borigas tutang nopara mohalu Yesus.

¹⁶Ang ohkot kani sohit, ulun ngomin ahkan Yesus aro ulun ijo sonyalung roh ja'at. Tutang umba ihco kotihkap auh, Yesus duon muhko roh-roh ja'at rih, tutang ngopios ka'a paring ulun ijo poros.

¹⁷ Yesus nguan paringoh rih, tutang umba rih nyolung inon ijo tonuhtui bain Nabi Yesaya, io-rih, “Io ngohtun karot ihto tutang ngopios ponyahkit ihto.”

¹⁸Tohko aro samasino ulun ang kodiling Yesus. Ohkot Yesus nohto iro paringoh. Io nyuhu murid-muridoh mitah danou.

¹⁹Turus ihcobehti guru-agama lombut nokuh Io tutang nuhtui, “Amai Guru, ahku kani umba Amai nokuhamoh ka'a!”

²⁰Yesus mutah, “Tohotung anai lowangoh, tutang bulung anai kosalahoh, tahpi Anak Ulun eam aro unukoh kaling.”

²¹Turus ihcobehti murid-Oh ijo bohkon nuhtui, “Amai, nonga poromusi ahku buli holu ahkan nanom amai'ku.”

²²Tahpi Yesus mutah, “Umba Ahku, tutang nauhoh ulun mahtoi, ngolowong ulun mahtoioh bongoi.”

²³Yesus jahkat nokuh alut tutang murid-murid-Oh homboh Io.

²⁴Songela lombut sawung-bahiou ijo bokorinah, ngamuk danou rih, nyiring alut tonahpi luhcak. Aang ohkot orih Yesus rahat tiruh.

²⁵Mahka murid-murid-Oh tulak nokuh Io, tutang ngoponyun Io. “Amai! Dohop! Ihto colahka!” hion'ndo.

²⁶“Ombai ihkam mihkoh?” hion Yesus, “Ihkam kurang porocaya umba Ahku!” Uliorih Yesus kuat, tutang ningak sawung-bahiou tutang danou rih. Turus danou orih rih monjadi teneng tu'u.

²⁷Murid-murid Yesus helan. Iro nuhtui, “Ulun inon Io tuh, nyiring sawung-bahiou tutang lucak danou ka'a numbun auh-Oh!”

²⁸Yesus johcok ang pohoi danou ang tana Gadara. Ang anan duo behti ijo sonalung roh ja'at lombut nokuh Io. Koduo behti rih basiak samasino, nyiring eam ihcobehti ka bohanyi nguha ang anan.

²⁹Iro soluka tahkan luwang kolowong tanom tutang ngoriak, “Anak Pohotala, ahkan Ihko nguan inon umba ihkai? Inonkah Ihko nohuang ngoporos ihkai olu ka jaham johcok ohkotoh?”

³⁰Eam mahcu tahkan anan, anai aro kawan urak rahat ngurah ukun'ndo.

³¹Roh-roh ja'at rih nyawot umba Yesus, “Amat Ihko ahkan nyuhu ihkai soluka, nyuhu ihkai nyolong luwang urak-urak atuh.”

³²“Tulak!” hion Yesus. Roh-roh ja'at rih tulak tahkan koduo ulun rih, turus nyolong luwang urak-urak. Tutang urak-urak rih ka nokoru tutang nokehcuk tahkan kuhung kowang nokuh danou, turus korobonyop.

³³Pongindoi-pongindoi urak rih nokoru nokuh lowu, tutang ngesah paring ang kojadian rih, ka'a tohou inon ijo jari nyolung umba koduo ulun ijo sonorupang roh ja'at rih.

³⁴Mahka paring ulun ang lowu rih ka'a tulak nyopohpak Yesus. Ohkot iro nohto Yesus, iro nyawot hawui paham, mangat Io hahtun nohtah daerah'ndo.