Read Ot Danum MARKUS 1 Bible Online

MARKUS 1 - Ot Danum bible

MARKUS 1

¹Tuhrih Kabar Hinut tohou Yesus Kristus, Anak Pohotala.

² Kabar Hinut rih pahtukoh kolou ijo tonyurat bain Nabi Yesaya, koloutuh, “ ‘Tuhrih ijo sonuhu-Ku,’ hion Pohotala; ‘Ahku nyuhu io, labihhoun tahkanumba-Mu mangat Io nawas jalan ahkan-Mu.’

³ Anai ulun ijo na'ah ang padang balambah, ‘Nahtapohrih jalan ahkan Tuhan; morahta jalan-jalan ijo ahkan tononguha-Oh.’ ’’

⁴Kolou ijo tonyurat orih, kolouorih rih ka'a lombut Yohanes ang padang balambah. Io mopondus ulun tutang momborihta borihta tahkan Pohotala. “Ihkam harus hubah tahkan dusa-dusan'kam tutang harus ponopondus, mangat Pohotala ngapun ihkam,’’ kolourih hion Yohanes.

⁵Paring ulun tahkan tanah Yudea tutang lowu Yerusalem tulak ngonih Yohanes. Iro ngahku dusa-dusan'ndo, tutang Yohanes mopondus iro ang Sungoi Yordan.

⁶ Yohanes nokehpan hatiu tahkan bulun unta. Pohtong kahangoh tahkan uhpak, tutang ukuioh mokalop tutang oling lawung.

⁷Io narung borihta tuh, ‘‘Noin ulimba ahku, ahkan lombut ulun ijo labih hajo tahkanumba ahku. Ahkan nyundop nguwat talin soruhpah-Oh ka, ahku eam anaigunaioh.

⁸Ahku mopondus ihkam umba danum, tahpi Io mopondus ihkam umba Roh Pohotala.’’

⁹Ang ohkot orih Yesus lombut tahkan Nasaret ang tana Galilea, tutang Yohanes mopondus Io ang Sungoi Yordan.

¹⁰Kodorih Yesus kuat tahkan sungoi rih Io nohto langit bokuap tutang Roh Pohotala mosuluh kolou bulung dala nokuh ngosan Yesus.

¹¹ Pongohuli konahan auh Pohotala nuhtui, ‘‘Ihkorih Anak-Ku ijo Ahku ngasih-Oh. Ihko ngojorih ahtoi-Ku.’’

¹²Toturus ulimba rih Roh Pohotala ngomin Yesus tulak nokuh padang balambah.

¹³Ohpat pulu ondou Io anai ang anan, Io tonihkos bain Sehtan. Ohcin-ohcin boliar anai ka'a sama-sama umba Io ang anan, tutang molehkat-molehkat mahalu Io.

¹⁴Uliorih Yohanes ponosolong ang sipir, Yesus tulak nokuh Galilea, tutang nyiar Kabar Hinut tahkan Pohotala ang anan.

¹⁵ Hioi-Oh, ‘‘Pohotala ahkan jeleng moretah. Hubah ihkam tahkan dusa-dusan'kam, tutang porocayarih umba auh Kabar Hinut ijo tahkan Pohotala!’’

¹⁶Kotihka Yesus nyalan ang saran Danou Galilea, Io nohto duo behti pongohcin, iorih Simon tutang arioh Andreas. Iro rahat nawan ohcin ang danou rih umba jala.

¹⁷Yesus nuhtui umba iro, ‘‘Ngahasurih Ahku, Ahku ahkan majar ihkam monjala ulun.’’

¹⁸Hunrih iro nohtah jala'ndo turus ngohasu Yesus.

¹⁹Yesus nyalan turus, turus nohto hino duo behti hokonduang ijo bohkon, yorih Yakobus tutang Yohanes anak-anak Sebedeus. Iro anai ang luwang alut ngorong jala'ndo.

²⁰Yesus turus na'ah iro. Tutang iro nohtah amai'ndo ang luwang alut hihcoumba ulun-ulun upahan'ndo. Turus iro tulak ngahasu Yesus.

²¹Yesus tutang murid-murid-Oh johcok ang lowu Kapernaum. Ang ondou Sabat pongooh, Yesus nyolong nokuh lohpou sombayang tutang nopara majar.

²² Ulun-ulun ijo ngonih-Oh helan umba cara-Oh Io mongajar. Tului, Io mongajar hapan pongaroh eam kolou guru-guru agama.

²³Ang ohkot orih ihcobehti ijo tonyalung roh ja'at nyolong luwang lohpou sombayang, tutang ngoriak,

²⁴‘‘O, Yesus ulun Nasaret, Ihko nguan inon umba ihkai? Ihko lombut ahkan morusak ihkai? Ahku kota'an iai Ihko: Ihko suruhan ijo borasih tahkan Pohotala!’’

²⁵‘‘Tonih!’’ korahang Yesus umba roh ja'at orih, ‘‘soluka ihko tahkan ulun tuh!’’

²⁶Mahka roh ja'at orih ngunde-nguhap ulun orih paham-tu'u, pongohuli bolua tahkan ulun rih sambir ngociak.

²⁷Paring ulun helan samasino, nyiring iro hoponuhtui sama aropoh, ‘‘Bah, inon tuh? Ihco ajaran ijo bohua! Umba pongaroh tutang kowasa, Io moretah roh-roh ja'at soluka, tutang iro te'et umba-Oh!’’

²⁸Mahka kabar tohou Yesus turus tosiar honong jeleng johcok hokodiling tana Galilea.

²⁹Yesus tutang murid-murid-Oh nohtah lohpou sombayang rih, tutang tulak nokuh lohpou Simon tutang Andreas. Yakobus tutang Yohanes tulak ka'a homboh iro.

³⁰Ohpu Simon rahat ngarot poros darom ang unukoh tiruh. Jadi uhun Yesus tutang murid-murid-Oh nyolong nokuh lohpou rih, Yesus tonarung tohou hal rih.

³¹Mahka Yesus tulak nokuh ohpu Simon, tutang nambit longoioh turus dohop io kuat. Pondam orih nihou, tutang io ka nopara nyorungan'ndo.

³²Sohit ondouoh, ulimba mahtanondou bolop, ulun-ulun ngomin ahkan Yesus paring ulun ijo poros tutang ijo tonyalung roh ja'at.

³³Paring ulun-ulun lowu rih, ngorumbung ang boun lohpou rih.

³⁴Turus Yesus ngopios aro ulun ijo ngarot aro mahcam koporos rih tutang muhko ka'a aro roh ja'at. Io eam nyuhu roh-roh ja'at rih nuhtui, tului iro rih ta'ai, iai Io.

³⁵Ngohkosoh hondouoh, ohkot magun bota-botat, Yesus monyun turus nohtah lohpou rih. Io tulak nokuh unuk ijo tonih ang lihkut lowu, tutang bodo'a ang anan.

³⁶Tahpi Simon tutang injah-injahoh tulak ngurah Io.

³⁷Tutang ulimba iro nyombang Io, iro nuhtui, ‘‘Paring ulun rahat tuh ngurah Amai.’’

³⁸Tahpi Yesus mutah, ‘‘Ayu ihto noturus ponyalan ihto nokuh lowu-lowu bohkon ang kodiling ohtoi. Ahku harus bokotbah ang anan ka'a, kotului orih konohuangoh Ahku kanohtoi.’’

³⁹ Tului orih Yesus tulak koumo-umoh ang hopus Galilea, tutang bokotbah ang lohpou-lohpou sombayang hawui muhko roh-roh ja'at.

⁴⁰Ihcobehti ijo boponyahkit belang ijo mopihkoh lombut nokuh Yesus. Ulun orih suhkuntu'ut, tutang nuhtui, ‘‘Amat Amai kani, Amai duon ngopios ahku.’’

⁴¹Yesus ngasi umba ulun orih. Jadi, Io ninjok ulun rih hawui nuhtui, ‘‘Ahku kani, pios iou!’’

⁴²Wayah orih ka'a ponyahkitoh nihou tutang io pios.

⁴³Turus Yesus nyuhu io tulak tutang pohtoh tuh,

⁴⁴ ‘‘Bua-buah, ara ihko mander umba iai beweu, tahpi tulak nokuh imam, tutang nyawot io ahkan momasti, ijo ihko jari pios. Turus ahkan kopios'kam rih, nyarah porahpah numbun ijo ponohto Museh, monjadi kahta ahkan ulun-ulun ijo ihko tu'u-tu'u ius pios.’’

⁴⁵Tahpi ulun rih tulak, tutang hototurus monyiar ijo monjadi orih, koumo-umoh nyiring Yesus eam duon nyolong lowu honong tarang-tarangan. Io tihkas mohcon ang ruar lowu ang unuk-unuk benyem. Olukakolourih ulun hototurus iou lombut nokuh Io tahkan umo-umoh ka'a.