Read Ot Danum MARKUS 10 Bible Online

MARKUS 10 - Ot Danum bible

MARKUS 10

¹Pongohuli Yesus nohtah unuk rih, tutang tulak nokuh tana Yudea, tutang tana ang pohoi Sungoi Yordan. Ulun aro lombut hino ngorumbung hokodiling Yesus. Tutang kolou bahut, Yesus mongajar iro.

²Pira-pira ulun Parisi lombut ka'a ahkan nyokohtung Yesus. Iro ngisokoh, ‘‘Numbun hukum hadat agaman ihto, inonrih tou ulun nulang oruhoh?’’

³Yesus mutah, ‘‘Museh nonga poretah inon ahkan ihkam?’’

⁴ ‘‘Museh nongaijin, ulun tou nulang oruhoh, asar nyurat surat hotulang houn,’’ hion'ndo.

⁵‘‘Museh nyurat poretah orih, tului ihkam paham bohali tonongajar,’’ hion Yesus umba'ndo.

⁶ ‘‘Tahpi aang pahtukoh, aang ohkot Pohotala naoi kolunon, konohawot ijo ‘Pohotala napa iro bahkas tutang bawi.

⁷ Orih kotuluioh ulunbahkas ahkan nohtah inai-amaioh tutang hihco umba oruhoh,

⁸mahka kododuooh monjadi ihco.’ Jadi, iro eam hino duo behti, tahpi ihco.

⁹Orih kotuluioh, inon ijo jari ponohihco bain Pohotala, eam tou tonulangoh bain ulun!’’

¹⁰Uli iro nyolong lohpou, murid-murid-Oh ngisok umba Yesus tohou hal orih.

¹¹ Yesus nuhtui umba iro, ‘‘Iai monulang oruhoh turus kawin umba bawi bohkon, ulun orih hobandung tohimo oruhoh ijo pahtok rih.

¹²Kolourih ka'a ulunbawi ijo monulang bosaioh turus kawin umba ulunbahkas bohkon, io ka'a hobandung.’’

¹³Anai ulun-ulun ngomin anak-inyam nokuh Yesus, mangat Io nambit tutang momborehkat iro. Tahpi murid-murid Yesus baca ulun-ulun rih.

¹⁴Nohto hal orih, Yesus ningak iro turus Io nuhtui umba murid-murid-Oh, ‘‘Nauhoh anak-inyam rih lombut ahkak-Ku! ara baca iro, bain ulun-ulun ijo kolou iro tuh, ijo monjadi anak ukup ain Pohotala.

¹⁵ Ingat tuh! Iai eam nohimo Pohotala kolou ihcobehti anak-inyam, eam ahkan monjadi anak ukup ain Pohotala.’’

¹⁶Uli nuhtui kolouorih Yesus nyokahpu anak-inyam rih, pongohino Io nginaoh longoi-Oh ang ngosan kuhung nyino-nyinong iro tutang mborehkat iro.

¹⁷Ohkot Yesus noturus hino ponyalai-Oh, ihcobehti lombut nokoru nokuh Yesus. Ulun orih suhkuntu'ut ang tohimo Yesus tutang ngisok, ‘‘Guru ijo morong, ahku harus nguan inon, mangat dahpot norima pombolum ijo sojahti tutang kototahiu?’’

¹⁸‘‘Ombai ihko ngohawot Ahku morong?’’ hion Yesus. ‘‘Eam aro ijo morong, bohkonumba Pohotala bongoi.

¹⁹ Ihko jari kota'an poretah-poretah Pohotala, ‘Ara munu, ara hobandung, ara nahkou, ara bosaksi alik, ara mobula, horomat amai tutang inai'kam.’ ’’

²⁰‘‘Amai Guru,’’ hion ulun rih, ‘‘paring poretah orih jadi ahku numbui tahkanuhun kobiou'ku.’’

²¹Yesus nohto ulun rih tutang masi umba io turus nuhtui, ‘‘Bototah ihco hal hino, ijo ihko porulu nguai. Tulak buli, modagang paring ponahtou'mu; nonga orih duitoh ahkan ulun porosbolum, tutang ihko ahkan dahpot ponahtou ang soruga. Uliorih rih lombutrih ngohasu Ahku.’’

²²Ngonih Yesus nuhtui kolourih, ulun rih kocewa, turus nohtah unuk orih, honong poros ahtoi, kotului io tahtou samasino.

²³Mahka Yesus nopahjah murid-murid-Oh, turus nuhtui umba iro, ‘‘Bohali samasino ahkan ulun tahtou monjadi anak ukup ain Pohotala!’’

²⁴Murid-murid-Oh helan ngonih tuhtui Yesus rih. Tahpi Yesus nuhtui hoduli, ‘‘Anak-anak-Ku, puna bohali ahkan monjadi anak ukup ain Pohotala!

²⁵Labih murah 'cokungan unta nyolong luwang doih tahkan ihcobehti uluntahtou nyolong Kolunon Bohua Ain Pohotala.’’

²⁶Auh-auh Yesus rih, nguan murid-murid-Oh helan, nyiring iro hokisok sama arop'ndo, ‘‘Amat kolouorih, iai ijo tou solamat?’’

²⁷Yesus nohto iro tutang mutah, ‘‘Ahkan kolunon rih mostahel, tahpi eam mostahel ahkan Pohotala; paringoh touurasoh bagi Pohotala.’’

²⁸Turus Petrus nuhtui, ‘‘Amai nohtorih ihkai, jari nohtahoh kokaro-karonoh ahkan ngohasu Amai.’’

²⁹Hion Yesus, ‘‘Porocaya iou: ulun ijo jari nohtah lohpou kosalahoh, ata'ai konduangoh ijo bahkas, ata'ai bawi, ata'ai inaioh, ata'ai amaioh, ata'ai anak-anakoh, ata'ai ka'a umo totounoh tului ngohasu Ahku tutang tului Kabar Hinut tahkan Pohotala,

³⁰ulun rih ahkan norima labih aro ang wayah huntuh tuh. Io ahkan duon solahtus lihpet labih aro lohpouoh, konduang bahkas, konduang bawi, inai, karon-anak, umo totoun, — tutang koporos ka'a. Tutang noin ang jaman ijo ahkan lombut, ulun rih ahkan monorima pombolum ijo sojahti tutang kototahiu.

³¹ Tahpi aro ulun ijo uhuntuh tuh, pahtukoh ahkan mojadi ijo laiu, tutang aro ijo uhuntuh tuh laiu, ahkan monjadi ijo pahtukoh.’’

³²Yesus tutang murid-murid-Oh rahat a'ang ponyalan nokuh Yerusalem. Yesus nyalan ang baun, tutang murid-murid-Oh poros ahtoi paringoh. Tutang ulun-ulun ijo ngohasu pongo umba Io ka nanyam mihkoh. Pongohuli rih Yesus na'ah murid-murid-Oh bongon'ndo, tutang nyorihta ahkan iro inon ijo ahkan nyolung noin ngosan arop-Oh.

³³‘‘Ngonihrih,’’ hioi-Oh, ‘‘ihto huntuh rahat nihtu Yerusalem. Ang anan Anak Ulun ahkan tonosorah ahkan imam-imam kopala tutang guru-guru agama. Io ahkan tomohukum munu, pongohuli tonyorah ahkan ulun-ulun, bohkon Yahudi.

³⁴Iro ahkan ngonjea-jea Io, ngoluhca Io, monyiksa Io, tutang nyopolahkioh Io. Tahpi aang ondou tolu Io ahkan bolum hoduli.’’

³⁵Turus Yakobus tutang Yohanes, yorih anak-anak Sebedeus, lombut nokuh Yesus. ‘‘Amai Guru,’’ hion'ndo, ‘‘anai ihco hal, ijo ihkai jolik Amai nguai ahkan'kai.’’

³⁶‘‘Inon ijo ihkam jolik Ahku nguai ahkan'kam?’’ hion Yesus.

³⁷Iro mutah, ‘‘Ihkai jolik tuot ang kotou komuloi Amai, amatmira Amai tuot moretah ang kolahca'an tutang tonohoromat.’’

³⁸ ‘‘Ihkam eam ta'an inon ijo ihkam nyawot,’’ hion Yesus umba iro, ‘‘Sangguprih ihkam ngorih tahkan sakir kokarot ijo ahkan Ahku ngorih tutang nyolong nokuh ang luwang kancah kokarot ijo ahkan Ahku nyolongoh?’’

³⁹‘‘Sanggup,’’ hion'ndo. Mahka Yesus nuhtui ahkan iro hino, ‘‘Puna ihkam ahkan ngorih tahkan sakir kokarot ijo ahkan Ahku ngorih, tutang nyolong ahkan ang luwang kancah ijo Ahku ahkan nyolongoh.

⁴⁰Tahpi tohou iai ijo ahkan tuot ang koto'u ata'ai komuloi-Ku, orih eam Ahku ijo bohak ngahtuh. Pohotala ijo ngahtuhoh ia-iai ijo ahkan tuot ang unuk-unuk orih.’’

⁴¹Kotihka sopulu murid Yesus ijo bohkon ngonih hal orih, iro sangit umba Yakobus tutang Yohanes.

⁴² Jadi, Yesus na'ah iro paringoh, turus nuhtui, ‘‘Ihkam kota'an ijo okon-okon uhtus ijo eam kosono Pohotala mohonyok rayatoh. Tutang ulunhajo-ulunhajo iro nihkin'ndo.

⁴³ Tahpi ihkam eam tou kolourih! Tobalikoh, ulun ijo kani monjadi hajo ang louk'kam, io harus monjadi pohalu'kam.

⁴⁴Tutang ulun ijo kani monjadi pahtukoh ang louk'kam, harus monjadi jihpon bagi paring.

⁴⁵Tului Anak Ulun ka eam lombut ahkan tonohalu, Io lombut ahkan mohalu tutang ahkan nyorah hasong-Oh ahkan momorodehka aro ulun.’’

⁴⁶Iro johcok ang Yerikho. Tutang ohkot Yesus honong murid-murid-Oh hawui ulun aro nohtah lowu rih, ihcobehti ulun bobulen, rahat tuot nyodahkah ang saran jalan. Araioh Bartimeus, anak tahkan Timeus.

⁴⁷Kotihka io ngonih ijo, ijo rahat nyihing orih anairih Yesus ulun Nasaret, io ngociak, ‘‘Yesus, Anak Dawid! Masi ahku!’’

⁴⁸Io tonyangit bain aro ulun tutang tonyuhu tonih. Tahpi io labih muhing hino ngociak, ‘‘Anak Dawid, masi rih ahku!’’

⁴⁹Mahka Yesus tondo, turus nuhtui, ‘‘Na'ahrih io.’’ Jadi iro na'ah ulun bobulen rih. Iro nuhtui umba io, ‘‘Teneng rih! Ihko tona'ah Yesus, kuat!’’

⁵⁰Ulun bobulen rih ka nyahkah jubahoh, turus jele-jeleng kuat, tutang tulak ahkan Yesus.

⁵¹‘‘Inon ijo ihko jolik Ahku nguan ahkan'mu?’’ hion Yesus umba io. Ulun bobulen rih mutah, ‘‘Amai Guru, ahku jolik nohto.’’

⁵²‘‘Tulakrih,’’ hion Yesus, ‘‘tului ihko porocaya umba Ahku, ihko pios.’’ Aang wayah orih ka'a ulun rih tou nohto. Turus io ngahasu Yesus ang jalan.