Read Ot Danum MARKUS 11 Bible Online

MARKUS 11 - Ot Danum bible

MARKUS 11

¹Ohkot doni Yerusalem iro johcok ang lowu Betpage tutang Betania, ang kowang Puruk Zaitun. Ang anan duo behti murid-Oh tonyuhu labihsoun bain Yesus.

²‘‘Tulakrih, nokuh lowu ijo anai ang tohimorih,’’ hion Yesus umba iro. ‘‘Kolourih ihkam nyolong lowu rih, ihkam ahkan nohto ihcokungan anak keledai rahat tonyuhkui, ijo jaha pu'u tonunggang ulun. Nguwatohrih keledai rih tutang omin 'kanohtoi.

³Tutang amat anai ulun ngisok umba'kam, ahkan inon'kam nguwat suhkui keledai rih, mutah'kam, ‘Tuhan kani hapaoh, tutang Io jeleng ngitotoh hino.’ ’’

⁴Koduo murid Yesus rih ka tulak, tutang nyombang 'cokungan anak keledai ijo rahat nyuhkui aang bauntukang lohpou ang saran jalan. Mahka iro nguwatoh suhkui keledai rih.

⁵Ulun-ulun ijo tombok ang anan ngisok umba iro, ‘‘Oi, rahat inon ihkam? Ombai nguwatoh suhkui anak keledai rih?’’

⁶Iro mutah kolou inon ijo jari tonyuhu bain Yesus umba iro. Mahka ulun-ulun rih mohonou iro ngomin keledai rih.

⁷Ohkot iro johcok unuk Yesus, ngosan lihkut keledai rih iro molahpikoh umba jubah iro, turus Yesus nunggang ang ngosanoh.

⁸Aro ulun mombirang jubah'ndo ang jalan, anai hino ijo nahtai ang tohun jalan pahting-pahting pu'un ijo iro ngomiou tahkan umo.

⁹ Ulun-ulun ijo nyalan ang tohimo tutang ulun-ulun ijo ngahasu tahkan lihkut, paringoh molahap, ‘‘Tararih Pohotala! Tomorehkatrih io ijo lombut ngosan aran Tuhan!

¹⁰Bolumrih pomoretah-Oh ijo ahkan lombut — pomoretah Dawid tahtu ajuh ihto! Tara ahkan Pohotala Ijo Mahaisung!’’

¹¹Kolaiuoh Yesus johcok Yerusalem, turus nyolong nokuh Lohpou Tuhan. Ang anan Io monopahjah hokodiling-Oh. Tahpi tului jari doni sohit, Io pongohuli tulak nokuh Betania hombo-homboh umba koduo balas murid-Oh.

¹²Anghawun ondouoh, kotihka iro rahat nyalan soluka tahkan Betania, Yesus bulo'u.

¹³Tahkan mahcu Io nohto 'cokobahtang pu'un sikun ijo daui labat. Jadi, Io tulak nokuh pu'un sikun rih ahkan nohto bua-Oh. Tahpi kotihka Io johcok ang pu'ui rih, Io eam nyombang ino-inon, tihkas daui-daui iou, tului aang ohkot rih jaha musim bua sikun.

¹⁴Turus Yesus nuhtui ahkan pu'un sikun rih, ‘‘Nopara tahkan uhuntuh, eam anai ihcobehti ka ijo ahkan kuman bua, tahkanumba ihko hino!’’ Murid-murid Yesus ngonih auhtuhtui orih.

¹⁵Pongohuli iro johcok ang Yerusalem, tutang Yesus tulak hino nokuh Lohpou Tuhan. Ang anan Io nopara muhko paring ulun ijo bodagang bopoli, ang unuk rih. Io mbalik-nokila meja-mejan ulun pohurup duit, tutang baku-baku podagang bulung dala.

¹⁶Tutang eam ihcobehti ka ijo tou tonong ijin baiu-Oh ngomin inon iou nyuru boun Lohpou Tuhan rih.

¹⁷ Pongohuli Yesus majar ulun-ulun ang anan. Io nuhtui, ‘‘Ang luwang Surat Borasih tonyurat koloutuh: Pohotala nuhtui, ‘Lohpou-Ku ahkan konohawot lohpou unuk bodo'a ahkan paring uhtus ulun.’ Tahpi ihkam ngonjoriaioh kosalah ponyilou!’’

¹⁸Imam-imam kopala tutang guru-guru agama ngonih auh pander rih. Mahka iro nopara ngurah jalan ahkan munu Yesus. Iro mihkoh umba-Oh, kotului paring ulun kagum ngonih ajaran-Oh.

¹⁹Amat jari ngolomi, Yesus tutang murid-murid-Oh nohtahoh lowu rih.

²⁰Homboh-ngohkos anghawun ondouoh, ohkot iro nyihing pu'un sikun rih, iro nohto pu'un orih jari mahtoi nyiring kouhat-uhatoh.

²¹Turus Petrus toroingat ahkan aangnyolung ihcoondou hounoh. Mahka Petrus nuhtui umba Yesus, ‘‘Amai Guru, cuba nohto! Pu'un sikun ijo Amai nulutoh rih, jari mahtoi!’’

²²Yesus mutah, ‘‘Porocayaiou ahkan Pohotala.

²³ Tu'u-tu'u ihkam dahpot nuhtui umba puruk tuh, ‘Hogahtangrih, tutang tongodian rih, nokuh tohun tasik!’ mahka hal rih ahkan nyolung ahkan ihkam; asar ihkam eam bembang, tutang ihkam porocaya ijo, ijo ihkam ngohawotoh orih moro-morong nyolung.

²⁴Bain orih, ingatrih tuh: Amatmira ihkam bodo'a tutang nyawot angihco, porocayarih ijo Pohotala jari nonga ahkan'mu, inon ijo ihkam nyawot, mahka ihkam ahkan monorimaoh.

²⁵ Tutang amat ihkam bodo'a, tahpi ahtoi'mu eam sanang nohimo ihcobehti, ngapunrih ulun rih houn, mangat Amai'mu ang soruga ka'a ngapun dusa-dusan'kam. [

²⁶Amat ihkam eam ngapun ulun bohkon, Amai'kam ijo ang soruga ka'a eam ngapun dusa-dusan'kam.]’’

²⁷Iro hoduli hino nokuh Yerusalem, tutang aang ohkot Yesus nyalan bokodiling ang luwang Lohpou Tuhan, imam-imam kopala, guru-guru agama tutang okon-okon Yahudi lombut nokuh Io.

²⁸Iro ngisok Io, ‘‘Ngosan galang inon Ihko nguanoh hal-hal tuh? Iai ijo nonga hak rih ahkan-Mu?’’

²⁹Yesus mutah, ‘‘Ahku ka'a kani ngisok umba ihkam. Mutahrih, tutang Ahku ahkan nuhtuioh ahkan'kam, umba hak iai Ahku nguan hal-hal tuh.

³⁰Yohanes mopondus umba hak iai, Pohotala ata'ai kolunon?’’

³¹Turus imam-imam kopala tutang okon-okon Yahudi nopara bahaum hawui arop'ndo. Iro nuhtui, ‘‘Amat ihto nuhtuioh, ‘Umba hak Pohotala,’ Io ahkan nuhtui, ‘Ombai eam porocaya umba Yohanes?’

³²Tahpi bohali ka'a ahkan ngohawot, ‘Umba hak kolunon,’ ’’ Tului iro mihkoh ahkan ulun aro, tului paring ulun ngohu Yohanes rih nabi.

³³Jadi iro mutah, ‘‘Ihkai eam kota'an.’’ Turus Yesus nuhtui umba iro, ‘‘Amat kolourih, Ahku ka eam kani nuhtui ahkan'kam umba hak iai Ahku nguan paringoh tuh.’’