Read Ot Danum MARKUS 12 Bible Online

MARKUS 12 - Ot Danum bible

MARKUS 12

¹ Pongohino Yesus nopara bopander honong porobasa ahkan imam-imam kopala, guru-guru agama tutang okon-okon Yahudi rih. Yesus nuhtui, ‘‘Anairih ihcobehti ulun, ijo ngombulan ihcokolambar kombulan anggur, turus kehpan pahkotoh ang kodilingoh. Ulilimbah rih io ngali lowong unuk pokakas mohahpit anggur rih, turus io nombok ihco lohpou jaga. Ulilimbah rih io posewa pombulan anggur rih, ahkan pira-pira ponggawihasil, turus io tulak nokuh lowu bohkon.

²Kotihka jari ohkotoh musim mutik bua anggur, ulun rih ngirim ihcobehti pohaluoh nokuh ponyewa-ponyewa rih, ahkan norima bagianoh.

³Tahpi ponyewa komulan anggur rih, nawan pohalu rih. Pongohino iro nahup kuhung pohalu rih, turus nyuhu io buli ngomin longo buang.

⁴Turus tepun komulan rih, ngirim hino ihcobehti pohaluoh ijo bohkon. Tahpi ponyewa pombulan anggur rih, mohpah kuhung pohalu rih turus muhkooh hawui hololea io.

⁵Tepun pomulan rih ngirim hino ihcobehti pohalu ijo bohkon. Tahpi iro munu pohalu rih. Tutang kolourih toturusoh iro nguan aro pohalu ijo bohkon hino: anai ijo ponohpah'ndo tutang anai ka'a ijo ponunu'ndo.

⁶Iai rih hino ijo tou tongirim huntuh bain tepun komulan rih? Tihkas mohcon ihcobehti, yorih anak aiu bongoi ijo unuk kosayangoh. Jadi, kojoriaioh io ngirim anakoh orih ahkan ponggawi-ponggawi. ‘Musti anak'ku tuh ahkan tomohoromatoh,’ tiruk tepun pombulan.

⁷Tahpi ponggawi-ponggawi rih hopahkat sama aropoh, ‘Tuh io ahli warisoh. Has ihto munu io, mangat ihto duon warisoh tuh!’

⁸Mahka anak orih tonawan, turus tomunu. Otui iro dian nokuh luar pomulan rih.’’

⁹Turus Yesus ngisok, ‘‘Inon ijo ahkan konuan bain tepun pomulan rih? Musti io ahkan lombut tutang munu ponggawi-ponggawi rih turus monyarahoh kombulan orih ahkan ponggawi-ponggawi ijo bohkon.

¹⁰ Ihkam tatuoh pu'u mbasa ayat tuh a'ang Surat Borasih, ‘Bahtu ijo eam tohapa bain tuhkang-tuhkang pomangun jari monjadi bahtu ijo mombahtang.

¹¹Tuhrih aangkonuan Tuhan; eaminon kopioioh!’ ’’

¹²Mahka dolang bosewut uhtus Yahudi, ijo ngonih porobasa rih, ngurah jalan nawan Yesus, tului iro kota'an porobasa rih, tonituoh Yesus ahkan iro. Tahpi iro mihkoh ulun aro. Jadi, iro tulak nohtah Yesus.

¹³Pira-pira ulun Parisi tutang pira-pira ulun barih Horodes sonuhu nyokohtung Yesus umba kisok-kisokoh.

¹⁴Iro lombut nokuh Yesus tutang nuhtui, ‘‘Amai Guru, ihkai kota'an Amai morong tutang eam norimaoh tiruk ulun bohkon ka. Amai mongajar torus-tarang tohou kohondak Pohotala bagi ulun, kotului Amai eam nopahjah ului. Nah cuba Amai nuhtui ahkan ihkai, ‘Numbun poroturan agaman ihto, toukah bayar pajak ahkan Kaisar ata'ai eam? Harusrih ihto bayar pajak rih, ata'ai eam?’ ’’

¹⁵Yesus ngota'an kopura-puraan'ndo. Io mutah, ‘‘Inon buhkui ihkam kani nyokohtung Ahku? Cuba pokarah ahkak-Ku ihcokobilap duit perak.’’

¹⁶Mahka iro nonga ahkai-Oh ihcokobilap duit perak. Turus Yesus ngisok iro, ‘‘Gambar iai tutang aran iai tuh?’’ ‘‘Kaisar,’’ hion'ndo.

¹⁷‘‘Nah, amat kolourih,’’ hion Yesus, ‘‘bayar ahkan Kaisar inon ijo ain Kaisar, tutang ahkan Pohotala inon ijo ain Pohotala.’’ Iro helan ngonih Io.

¹⁸ Pira-pira ulun tahkan barih Saduki lombut nokuh Yesus. (Iro anairih barih ijo niruk tohou ulun mahtoi eam ahkan bolum hoduli.)

¹⁹ ‘‘Amai Guru,’’ hion iro umba Yesus, ‘‘Museh nyurat hukum tuh ahkan ihto: ‘Amat ihcobehti bahkas mahtoi, tutang io eam anai nohtah anak, mahka konduangarioh kawin umba baluioh mangat nonga lihit ahkan ulun ijo jari mahtoi rih.’

²⁰Pu'u anai pihtu ulun hokonduang, ijo pongoko kawin, turus mahtoi eam aro nohtah anakoh.

²¹Pongohino 'jo koduooh kawin umba baluioh, tahpi io ka mahtoi eam aro nohtah anak. Hal ijo sama nyolung ka'a umba konduang ijo kotolu,

²²tutang toturusoh nyiring hawui ijo kopihtu iro. Kolaiuoh ulunbawi rih bongoi mahtoi ka'a.

²³Aang ondou ulun mahtoi bolum hoduli, ahkan oruh iai ulunbawi rih? Bain kopihtu-pihtuoh jari kawin umba io!’’

²⁴Yesus mutah, ‘‘Ihkam koliru samasino. Kotului ihkam eam solembang auh Surat Borasih, oluka kowasan Pohotala.

²⁵Tului amatmira ulun-ulun mahtoi bolum hoduli, iro eam ahkan kawin hino, molekan iro ahkan bolum kolou molehkat ang soruga.

²⁶ Tutang tohou ulun mahtoi tongombolum hoduli, jaha pu'ukah ihkam mambasa ang luwang Surat Borasih Museh, tohou ruwut ijo ngonjelak rih? Ang luwang ayat-ayat rih, tonyurat ijo Pohotala nuhtui ahkan Museh, ‘Ahku tuh Pohotalan Abraham, Pohotalan Isaak, Pohotalan Yakub.’

²⁷Pohotala rih, eam Pohotalan ulun mahtoi. Io Pohotalan ulun bolum. Ihkam koliru samasino!’’

²⁸ Turus lombut iou ihcobehti guru agama ngonih tuhtui holat Yesus umba ulun-ulun tahkan barih Saduki rih. Guru agama rih nohto ijo Yesus jari mutah auh ulun-ulun rih hawui pios. Mahka io ngisok umba Yesus, ‘‘Poretah umohrih, ijo paling boguna tahkan paring poretah?’’

²⁹ Yesus mutah, ‘‘Poretah ijo pahtukoh iorih: ‘Ngonihrih, oi uhtus Israel! Tuhan Pohotalan ihto, Tuhan rih Tukan.

³⁰Sita Tuhan Pohotalan'kam hapan kotuwi ahtoi'kam, tutang hapan koparing homboruan'kam, hapan sohopus ahkar'kam, tutang honong kokaro koba'as'mu.’

³¹ Poretah koduo, iorih: ‘Sitarih sosama'kam, kolou ihko monyita arop'mu bongom.’ Eam aro hino poretah bohkon ijo labih boguna tahkan koduo poretah rih.’’

³² Turus guru agama rih nuhtui umba Yesus, ‘‘Kona samasino Amai Guru! Puna morong inon ijo Amai nuhtuioh: Tuhanrih Pohotala ijo Tukan, tutang eam anai hino Pohotala ijo bohkon.

³³ Tutang ulun harus sita Pohotala hapan kotuwi ahtoioh, tutang hapan sohopus ahkaroh, honong umba kokaro koba'asoh. Tutang io ka'a harus hokasih sosamaoh kolou nyita aropoh bongoi. Orih labih pios tahkan umba ponyorahan pononga tomahpong tutang pononga-pononga bohkonoh ahkan Pohotala.’’

³⁴Yesus nohto ijo guru agama rih jari mutah hapan pios samasino. Tutang Yesus nuhtui umba io, ‘‘Ihko ius doni monjadi anak ukup ain Pohotala.’’ Uliumba rih eam ihcobehti ka ijo bohanyi hino nyurung kisokoh umba Yesus.

³⁵Pondehan majar ang Lohpou Tuhan, Yesus ngisok, ‘‘Koloukuwohrih guru-guru agama duon nuhtui ijo Lahca Ponyolamat rih lihit Dawid?

³⁶ Podahar Dawid bongoi — kotului tongorinah bain Roh Pohotala — nuhtui, ‘Tuhan homauh umba Tuhan'ku: tuot ihko ang silan kotouk-Ku nyiring Ahku nguan musuh-musuh-Mu ngominda umba Ihko.’

³⁷Jadi, amat Dawid bongoi ngohawot io Lahca Ponyolamat rih, ‘Tuhan,’ koloukuwoh tou Io tahkan lihit Dawid?’’ Ulun aro ijo anai ang Lohpou Tuhan rih sanang ngonih Yesus majar.

³⁸Io nuhtui umba iro, ‘‘Ati-atirih tohimo guru-guru agama. Iro jolik nyala-nyalan umba jubah ijo ombu tutang jolik tomohoromat ang pasar-pasar.

³⁹Iro jolik unuk-unuk ijo tomohoromat ang luwang lohpou sombayang tutang ang pesta-pesta.

⁴⁰Iro monihpu baluranda tutang mosuwit lohpouoh. Tutang ahkan ngolindung koja'at iro rih, iro bodo'a ombu-ombu. Hukuman iro noin bahat!’’

⁴¹Ohkot tuot hotopohoi umba pahti porahpah ang Lohpou Tuhan, Yesus nohtoani ulun-ulun posolong duit iro ahkan luwang pahti rih. Aro ulun tahtou posolongoh aro duit;

⁴²turus ihcobehti balu ijo porosbolum lombut ka'a. Io posolong duo bilap duit tombaga, iorih duit pokokoik regaioh.

⁴³Mahka Yesus na'ah murid-murid-Oh turus nuhtui umba iro, ‘‘Nohtoani tuh: balu ijo porosbolum rih posolong ahkan luwang pahti orih, labih aro tahkanumba ijo tomosolong bain paring ulun-ulun bohkonoh.

⁴⁴Bain iro paring nonga tahkan kolowin ponahtouoh. Tahpi balu rih nonga, sinoka, paham porosbolum, io nonga paring ijo anai aang io — oluka ijo io poruluoh bagi pombolum.’’