Read Ot Danum MARKUS 13 Bible Online

MARKUS 13 - Ot Danum bible

MARKUS 13

¹Kotihka Yesus nohtah Lohpou Tuhan, ihcobehti tahkan murid-murid-Oh nuhtui, ‘‘Amai Guru, cuba nohto pangun-pangun rih. Nohtoani bahtu-bahtuoh. Eam inon kopiosoh!’’

²Yesus mutah, ‘‘Ihko nohto pangun-pangun ijo hajo rih, kowa? Earo ihco bahtu ka tahkan pangun-pangun rih ijo ahkan mohcon hotilap ang unukoh. Paring ahkan konahkas.’’

³Pongohuli Yesus hihkas nokuh Puruk Zaitun, tutang tuot ang unuk ijo hotohimo umba Lohpou Tuhan. Turus Petrus, Yakobus, Yohanes tutang Andreas lombut nokuh Io mangat bopander umba Io cara bongon.

⁴‘‘Cuba Amai nyorihta ahkan ihkai,’’ hion iro umba Io, ‘‘mira paringoh rih ahkan nyolung? Tutang kahta-kahta inonrih ijo ngorinah ijo jari ohkotoh?’’

⁵‘‘Borondongrih,’’ hion Yesus, ‘‘ara nyiring ihkam tonoalik.

⁶Aro ulun lombut hawui mohapan arak-Ku tutang nuhtui, ‘Ahku tuh Io!’ turus ngobalik aro ulun.

⁷Amat ihkam ngonih auh-auh kolahi tutang borihta-borihta poporangan ara mihkoh. Hal-hal orih harus nyolung, tahpi orih eam rimai ijo jari ohkotoh kiamat.

⁸Uhtus ijo ihco, ahkan boparang molawan uhtus ijo bohkon. Nogara ijo ihco ahkan nyarang nogara ijo bohkon. Ang umo-umoh ahkan nyolung tana moruguh tutang bohaya kolou. Paring orih punai pahtuk iou, kolou koporos ijo tokinyam ihcobehti ulunbawi botohi, ijo kani nganak.

⁹ Ihkam harus ati-ati, bain ihkam ahkan tonawan tutang konuhut nokuh balai bosara. Ihkam ahkan ponohpah ang lohpou-lohpou sombayang. Ihkam ahkan tongomin noharep pongowasa-pongowasa tutang lahca-lahca tului ihkam murid-Ku. Tutang orihrih kosapet bagi'kam, dahpot nonga saksi tohou Ahku ahkan iro.

¹⁰Kabar Hinut tahkan Pohotala rih, musti ahkan tonosiar soun, ahkan kokaro uhtus ulun.

¹¹Tutang amat ihkam tonawan tutang konomin ahkan ponosara, ara mihkoh tohou inon ijo harus ihkam nuhtuioh. Amat jari johcok ohkotoh ahkan pander, nuhtui iourih inon ijo jari tonyorihtaoh ahkan'kam aang ohkotoh. Tului pander-pander ijo ihkam ngohawotoh rih eam auh tuhtui emu bongom, molekan lombut tahkan Roh Pohotala.

¹²Ulun ahkan mondorhaka konduangoh bongoi mangat tomunu. Orih ka ijo ahkan nyolung holang amai umba anakoh. Anak-anak ahkan molawan inai-amaioh, tutang nyorah iro ahkan tomunu.

¹³ Ihkam ahkan ngohiri bain paring ulun, tului ihkam murid-Ku. Tahpi ulun ijo botahan nyiring ko-opah ahkan tonyolamat.’’

¹⁴ ‘‘Ihkam ahkan nohto ‘Koja'at ijo mopolonyuh’ tombok ang unuk ijo tongobaca ahkaioh. (Catatan ahkan pomasa: Nohto tu'u-tu'u inon rimaioh!) Ang ohkot rih ulun ijo anai ang Yudea pahtut nokoru nokuh karon-puruk.

¹⁵ Ulun ijo anai ang ngosan sahpou lohpou ara mosuluh tutang nyolong koluwang lohpou ahkan ngomin aang'co.

¹⁶Ulun ijo anai ang umo ara buli lowu ahkan ngomin pokajai.

¹⁷Eaminon kongorioh aang ondou-ondou rih bagi bawi ijo botohi tutang inai ijo magun nyusu anakoh!

¹⁸Bodo'arih, mangat hal-hal orih ara nyolung ang uhun uhjan.

¹⁹ Ang ondou-ondou ijo ngoli rih, ahkan anai ihco kosusah ijo jaha pu'u nyolung, tahkan umba Pohotala naoi tana nyiring uhuntuh, tutang eam hino ahkan nyolung huli.

²⁰Jaka eam Pohotala mopoiwak wayah orih, mahka eam anai ihcobehti ka'a ijo tonyolamat. Tahpi kotului ukup-Oh, Pohotala mopoiwak wayah orih rih.

²¹Ang ohkot orih rih, amat ihcobehti nuhtui umba ihkam, ‘Nohto Lahca Ponyolamat rih anai ang ohtoi!’ ata'ai ‘Nohto, Io anai ang anan!’ — ara ihko porocaya umba auh ulun rih.

²²Tului ponyolamat-ponyolamat bobalik, tutang nabi-nabi bobalik ahkan lombut. Iro ahkan nguan gawi-gawi ijo luar biasa, tutang kahtahelan-kahtahelan, ahkan ngobalik amat duon, ukup Pohotala ka'a.

²³Jadi, bojaga-jagarih! Paring orih jari Ahku nyorihtaoh ahkan'kam, hounumba hal orih nyolung.’’

²⁴ ‘‘Uli wayah kosusah rih, mahtan-ondou ahkan monjadi pindong, tutang bulan eam hino koloang.

²⁵ Potion-potion ahkan botahak tahkan langit tutang pongowasa-pongowasa pinda langit ahkan nyolung sampur-baur.

²⁶ Aang ohkot orih Anak Ulun ahkan gihtan lombut ang ngosan baunondou hapan kowasa hajo tutang kohajoi-Oh.

²⁷Io ahkan nyuhu molehkat-molehkatoh ahkan nipun ukup konopili Pohotala, tahkan ko-ohpat puhting tana tahkan topahkai nokuh topahkan langit.’’

²⁸‘‘Omin polajaran tahkan pu'un sikun. Amat pahting-pahtingoh bohijou tutang nyolundik, tutang nopara bodoun biou, ihkam kota'an ijo uhun tojah jari doni.

²⁹Kolourih ka'a amat ihkam nohto hal-hal orih nyolung, ihkam kota'an ijo ohkotoh jari doni samasino.

³⁰Kota'anrih! Paring ang-nyolung rih, ahkan nyolung eam hounumba ulun-ulun ijo bolum uhuntuh, mahtoi paringoh.

³¹Langit tutang tana ahkan dilap, tahpi auh-Ku tehen kototahiuoh.’’

³² ‘‘Oluka kolourih, eam ihcobehti ka kota'an, mira ondouoh ata'ai jamoh. Karon-molehkat ang soruga eam, tutang Anak ka eam, tihkas Amai iou ijo kota'an.

³³Jadi ihkam harus bojaga-jaga tutang botahtap tului ihkam eam kota'an mira ohkotoh.

³⁴ Koada'aioh, nindung ihcobehti ulun, ijo nohtah lohpouoh turus tulak nokuh unuk ijo mahcu. Io nyarah ahkan pohalu-pohalu mohaga lohpouoh, tutang nonga karon-gawi ahkan iro nyino-nyinong behti. Ahkan pongindoi bauntukang, io mohtoh ahkan ngindoi moro-morong.

³⁵Tului orih ihkam harus bojaga-jaga, bain ihkam eam kota'an mira tepun lohpou orih ahkan buli — mihkohtou aang sohit ondou, mihkohtou aang tohun ngolomi, mihkohtou aang ohkot topolaoi, ata'ai mihkohtou aang ohkot mahtanondou lombut.

³⁶Amat io lombut songola, ara nyiring io nyombang ihkam rahat tiruh.

³⁷Inon ijo Ahku nuhtuioh tuh ahkan'kam, Ahku ka'a nuhtui ahkan paring ulun: Bojaga-jagarih hototurus!’’