Read Ot Danum MARKUS 14 Bible Online

MARKUS 14 - Ot Danum bible

MARKUS 14

¹ Duo ondou hino Ondou Paska tutang Pesta Luhte Eam Boragi. Imam-imam kopala tutang guru-guru agama rahat ngurah jalan ahkan nawan Yesus cara toni-tonih, tutang ahkan munu Io.

²‘‘Tahpi ara ihto nguaioh rih aang ohkot pesta,’’ hion iro, ‘‘bain mopolombut koridu.’’

³ Kotihka Yesus anai ang Betania, ang human Simon ijo lomoi kona ponyahkit bolang ijo ja'at, ihcobehti bawi lombut nokuh-Oh. Io ngomin ihco kasa pualam bosuang minyak buanharum ijo borega, tonapa tahkan uhat buanharum. Ohkot Yesus rahat tuot kuman, ulunbawi rih nguap kasa pualam rih tutang nohta minyak buanharum rih ngosan kuhung Yesus.

⁴Pira-pira ulun ijo anai ang anan monjadi bosingi tutang nuhtui sama arop iro, ‘‘Inon gunaioh minyak buanharum rih tongondian?

⁵Minyak rih duon tonodagang umba regai, molowi tahkan tolu lahtus duit perak, tutang duitoh nonga ahkan ulun porosbolum!’’ Mahka iro bosingi umba ulunbawi rih.

⁶Tahpi Yesus nuhtui, ‘‘Nauhoh io! Ombai ihkam monyusahahtoioh bawi tuh? Io nguanoh aang'co ijo pios tutang tonara ang tohimok-Ku.

⁷ Ulun porosbolum toturus anai ang marak ihkam. Nyinong kotihka amat ihkam kani, ihkam duon dohop iro. Tahpi Ahku eam hototurus hihco umba ihkam.

⁸Ulunbawi tuh jari nguaioh inon ijo dahpot io nguaioh. Io jari monyodia ahkak-Ku umba minyak buanharum ahkan ponanom-Ku sounumba ohkotoh.

⁹Porocayarih! Ang sohopus kolunon, ang umoh iou Kabar Hinut tahkan Pohotala tonokabarih, angkonuan ulunbawi tuh ahkan tonyorihta ka'a kolou pongingat ahkaioh.’’

¹⁰Turus Yudas Iskariot ihcobehti tahkan koduo balas murid Yesus, hihkas nokuh imam-imam kopala, honong nohuang ngarana Yesus ahkan iro.

¹¹Iro sonang samasino ngonih pohaumoh rih, tutang mbowot ahkan nonga duit ahkan Yudas. Mahka Yudas ka nopara ngurah kosapet ahkan monyarah Yesus.

¹²Aang ondou 'jopahtok a'ang Pesta Luhte Eam Boragi — aang ohkot ulun nyombolih tobiri Paska — murid-murid Yesus ngisok umba Io, ‘‘Ang amohrih Amai jolik ihkai nahtap ukun Paska ahkan Amai?’’

¹³Mahka Yesus nyuhu duo behti tahkan iro, ‘‘Tulakrih nokuh lowu, ang anan ihcobehti bahkas ijo rahat ngomin burung bosuang danum, ahkan hosombang umba ihkam. Kohasurih ih io

¹⁴nokuh lohpou ijo io nyolongoh tutang nuhtui iouoh umba tepun lohpou rih, ‘Amai Guru ngisok, ang amoh unuk Io tutang murid-murid-Oh ahkan kuman ukun Paska.’

¹⁵Ulun orih ahkan nunjukoh ahkan'kam ihco ruangan ang diang ijo hajo. Takun orih jari tohoragu, sukup umba puatoh. Nyodiaoh rih paringoh ang anan bagi ihto.’’

¹⁶Turus koduo behti murid Yesus rih hihkas nokuh lowu. Ang anan iro nyombang paringoh kona kolou ijo tonuhtuioh bain Yesus. Turus iro ka nahtap ukun Paska.

¹⁷Ngolomioh Yesus lombut homboh koduo balas murid-Oh.

¹⁸ Tutang pondehan iro tuot kuman, Yesus nuhtui, ‘‘Ngonih iou, ihcobehti tahkan marak ihkam, ijo huntuh kuman homboh Ahku ahkan motanah Ahku.’’

¹⁹Ngonih orih, murid-murid Yesus monjadi paham porosahtoi. Turus ihcobehti hawui ihcobehti nopara ngisok umba Yesus, ‘‘Mihkoh bohkon ahku ijo hion Amai hirahoh?’’

²⁰Yesus mutah, ‘‘Io ihcobehti tahkan ihkam 'jo duo balas tuh ijo kuman hihco piring umba Ahku.

²¹Puna Anak Ulun ahkan mahtoi kolou ijo tonyurat ang luwang Surat Borasih. Tahpi eam inon kocolahkaoh ulun ijo motanah Anak Ulun rih! Labih pios ahkan ulun orih amat io eam pu'u konanak samasino!’’

²²Kotihka iro rahat kuman, Yesus ngomin luhte tutang ngohawot do'a torimakasih ahkan Pohotala. Pongohuli Io mbolah luhte orih honong longoi-Oh, turus nongaoh ahkan murid-murid-Oh hawui nuhtui, ‘‘Onin tutang kumairih tuh behtik-Ku.’’

²³Ulimba Io ngomin ihco sakir anggur. Io ngohawot do'a torimakasih ahkan Pohotala, turus nongaoh sakir orih ahkan murid-murid-Oh. Pongohuli iro paringoh ngorih anggur rih.

²⁴ Ulimba Yesus nuhtui, ‘‘Tuhrih dahak-Ku ijo mondehen bowot Pohotala, daha ijo tonusuh'ku ahkan aro ulun.

²⁵Porocayarih: Ahku eam ahkan ngorih anggur tuh hino, johcok aang ohkot Ahku ngorih anggur ijo bohua homboh ihkam ang Kolunon Bohua Ain Amai-Ku.’’

²⁶Pongohuli io monyanyi ihco nyanyi tara. Tutang ulimba rih iro tulak nokuh Puruk Zaitun.

²⁷ Pongohino Yesus nuhtui umba iro, ‘‘Ihkam paring ahkan nokoru nohtah Ahku. Tului luwang Surat Borasih tonyurat, ‘Pohotala ahkan munu sokahtikoh, tutang kawan tobirioh ahkan rawu-riai.’

²⁸ Tahpi uli Ahku bolum hoduli, Ahku ahkan hihkas hounumba ihkam nokuh Galilea.’’

²⁹‘‘Eam,’’ mutah Petrus, ‘‘nauhoh iro paring nohtah Amai, ahku samasino eam.’’

³⁰‘‘Ingat,’’ hion Yesus, ‘‘ngolomi tuh ka'a, hounumba manuk dalung nandu duo tikat, ihko tolu tikat ngulim Ahku.’’

³¹Petrus mutah hawui tegas, ‘‘Nauh ahku harus mahtoi hombo-homboh umba Amai, samasino ahku eam ahkan nuhtui ijo ahku eamkosono Amai!’’ Tutang murid-murid ijo bohkon nuhtui kolouorih ka'a.

³²Iro johcok ang ihco unuk ijo araioh Getsemane, tutang Yesus nuhtui umba murid-murid-Oh, ‘‘Tuotrih ang ohtoi pondehan Ahku hihkas bodo'a.’’

³³Turus Yesus ngomin Petrus, Yakobus tutang Yohanes, hihkas hombo-homboh umba Io. Io nopara nginyam sedih tutang golisah.

³⁴‘‘Ahtoi-Ku sedih samasino,’’ hion Yesus umba iro, ‘‘anyam'ku kolou kani mahtoi iou. Mohcon rih ang ohtoi tutang bojaga-jagarih!’’

³⁵Yesus hihkas labih mahcu honjiat, turus nolehku ang tana tutang bodo'a. A'ang do'a-Oh Io nyawot, amat tou Io eam usah nyuru wayah kokarot rih.

³⁶‘‘Amai, yo Amai,’’ hioi-Oh, ‘‘eam anai angihco ka ijo mustahel bagi Amai. Ngahtang kokarot tuh tahkan Ahku. Baya ararih numbun konohuang-Ku, molekan konohuang Amai.’’

³⁷Ulimba rih Yesus hoduli tutang nyombang murid-murid-Oh rahat tiruh. Io nuhtui umba Petrus, ‘‘Simon tiruhrih ihko? Baya ihco jam iou ihko eam duon bojaga-jaga?’’

³⁸Turus Yesus nuhtui umba iro, ‘‘Bojaga-jaga iou, tutang bodo'a ahkan ihkam eam kona tihkos. Puna roh'kam kani nguan ijo morong, tahpi behtin'kam eam sanggup, tului dasar ulun rih bolomu.’’

³⁹Sino hino Yesus hihkas bodo'a tutang ngohawot auh-auh ijo sama ka'a.

⁴⁰Ulimba Io hoduli hino nokuh murid-murid-Oh, tutang nyombang iro magun ka'a tiruh, tului iro karas nundu. Mahka iro eam ta'an inon ijo harus iro nuhtuioh ahkan Yesus.

⁴¹Kotihka Yesus hoduli nokuh iro ang 'jo kotolu tikatoh, Io nuhtui, ‘‘Magunrih ihkam tiruh tutang ngorong-hasong? Sukuprih! jari johcok ohkotoh Anak Ulun tonosarah nokuh longon ulun-ulun bodusa.

⁴²Kuatrih, olai ihto hihkas. Nohto! Ulun ijo motanah Ahku jari lombut!’’

⁴³Pondehan Yesus magun pander, lombut Yudas, ihcobehti tahkan koduo balas murid orih. Hombo-homboh umba io, lombut ka'a aro ulun ijo ngomin padang tutang gagada. Iro sonuhu bain imam-imam kopala, guru-guru agama tutang okon-okon Yahudi.

⁴⁴Ulun potanah rih nonga ihco tanda ahkan iro, ‘‘Ulun ijo ahku ngohcomoh,’’ hioi umba iro, ‘‘iorih ului-Oh. Nawan Io, tutang omin Io, umba ponjagaan ijo bua-buah.’’

⁴⁵Aang ohkot rih Yudas lombut, io turus hihkas nokuh Yesus tutang nuhtui, ‘‘Amai Guru!’’ pongohino io ngohcom Yesus.

⁴⁶Turus ulun-ulun ijo lombut hombo-homboh umba Yudas rih nawan Yesus tutang masung Io.

⁴⁷Tahpi anai ihcobehti ijo anai ang anan nyilak padangoh tutang molong jihpon imam hajo nyiring bosaping tolingaioh.

⁴⁸Turus Yesus nuhtui umba iro, ‘‘Inonkah Ahku tuh ulun ja'at, nyiring ihkam lombut ngomin padang tutang gagada ahkan nawan Ahku?

⁴⁹ Nyinong ondou Ahku mongajar ang Lohpou Tuhan ang tohimo ihkam, tutang ihkam eam nawan Ahku. Tahpi puna jari koharusoh kodorih, mangat nyolung inon ijo tonyurat ang Surat Borasih.’’

⁵⁰Paring murid-Oh nokoru rawu-riai nohtah Yesus.

⁵¹Ihcobehti ulunbiou, ijo baya hapan ihcokolambar benang ahkan ponuhtup behtiu, ngahasu Yesus. Ulun-ulun rih kani nawan io,

⁵²tahpi io nguhkoi benang orih, turus nokoru sambir hoborang.

⁵³Yesus konomin nokuh lohpou imam hajo. Ang anan paring imam kopala, okon Yahudi, tutang guru agama rahat hopuhpung.

⁵⁴Petrus ngohasu Yesus tahkan mahcu nyiring nyolong luwang kanaha lohpou imam hajo. Tutang ang anan io tuot ngindu aropoh, doni baho homboh umba pongawal-pongawal.

⁵⁵Imam-imam kopala tutang paring Okon Bosara Agama ngurah jalan ngondahpotoh bukti-bukti ijo nosalan Yesus, mangat duon momuhtusoh hukuman mahtoi ahkan Yesus. Tahpi iro eam ngondahpot ihco bukti ka.

⁵⁶Aro saksi ijo tona'ah ahkan nonga kosaksian alik toharep Yesus, tahpi kosaksian iro rih hokolawan ihco umba ijo bohkon.

⁵⁷Turus pira-pira saksi tombok, tutang nonga kosaksian alik tuh tohou Yesus,

⁵⁸ ‘‘Ihkai pu'ungonih ulun tuh nuhtui, ‘Ahku ahkan ngahkas Lohpou Pohotala tuh ijo konuan bain ulun, tutang uli tolu ondou, Ahku ahkan nombok ijo bohkon ijo eam tonapa ulun.’ ’’

⁵⁹Tahpi kotorangan ulun-ulun rih ka hokolawan ihco umba ijobohkon.

⁶⁰Mahka imam hajo tombok ang boun iro paring tutang ngisok umba Yesus, ‘‘Inonrih Ihko eam mutah dawa-dawa ijo tonitu ahkan-Mu?’’

⁶¹Tahpi Yesus tonih ih. Io eam mutah samasino. Turus Imam Hajo rih ngisok sino hino umba Yesus, ‘‘Inon Ihko Lahca Ponyolamat, Anak Pohotala Ijo Borasih?’’

⁶² ‘‘Ahku rih Io,’’ mutah Yesus, ‘‘tutang ihkam paring ahkan nopahjah Anak Ulun tuot ang sila kotoun Pohotala Ijo Pahamkowasa tutang lombut ang baunondou ang langit!’’

⁶³Mahka imam hajo morutat-rutat kolambiuoh tutang nuhtui, ‘‘Eam usah hino saksi!

⁶⁴ Ihkam jari ngonih bongon auh-auh-Oh ijo monulat Pohotala. Uhuntuh inon koputusan'kam?’’ Iro paringoh mutusoh ijo Yesus sala, tutang harus tomohukum mahtoi.

⁶⁵Turus pira-pira ulun nopara ngoluhca Yesus tutang iro nuhtup mahtai-Oh tutang nahup Io, turus nuhtui, ‘‘Cuba ngohawot iai ijo nahup Ihko?’’ Pongawal-pongawal ka'a umba napar Yesus.

⁶⁶Pondehan Petrus magun anai ang kanaha, anai ihcobehti pohalu bawi tahkan imam hajo lombut koanan.

⁶⁷Kotihka nohto Petrus ngindu behtiuoh ang doni baho, io nohtoani tu'u-tu'u boun Petrus tutang nuhtui, ‘‘Eamrih ihko ka'a hombo-homboh Yesus ulun Nasaret rih?’’

⁶⁸Tahpi Petrus ngalawan, ‘‘Ahku eam ta'an tutang eam horahti inon ijo konohuang'mu,’’ hioioh umba pohalu rih. Turus Petrus nokuh bauntukang lohpou imam hajo rih. [Ang wayah rih, manuk dalung nandu.]

⁶⁹Pohalu bawi rih nohto Petrus hino, tutang nuhtui huli umba ulun ang anan, ‘‘Io puna anai ihcobehti tahkan iro!’’

⁷⁰Tahpi Petrus ngolawan hino. Eam tahi uli hino, ulun-ulun ang anan nuhtui hino umba Petrus, ‘‘Eam duon ngolawan hino ihko, puna anai ihcobehti tahkan marak iro, tului ihko tahkan Galilea!’’

⁷¹Turus Petrus nopara nulut aropoh tutang nuhtui, ‘‘Ahku eam kosono umba ulun ijo hion ihkam rih!’’

⁷²Ang ohkot rih ka'a manuk dalung nandu ahkan koduo tihkatoh. Tutang Petrus topoingat, ijo Yesus nuhtui ahkaioh, ‘‘Hounumba manuk dalung nandu duo tikat, ihko tolu tikat eamngahku Ahku.’’ Mahka Petrus ka'a nangih sira-sirak.