Read Ot Danum MARKUS 15 Bible Online

MARKUS 15 - Ot Danum bible

MARKUS 15

¹Homboh-ngohkos samasino, paring Okon Bosara Agama tutang imam-imam kopala, okon-okon Yahudi tutang guru-guru agama hopahkat jele-jeleng. Iro momasung Yesus, pongohuli ngihtot Io tutang monyorah Io ahkan Pilatus.

²Pilatus ngisok umba Yesus, ‘‘Tu'u Ihko Lahcan Ulun Yahudi?’’ ‘‘Kolouorih hion'mu,’’ putah Yesus.

³Imam-imam kopala monyorihta aro dawa tohimo Yesus.

⁴Turus Pilatus ngisok hino umba Yesus, ‘‘Eam kanirih Ihko mutah? Cuba nopahjah, pira-pira dawa-dawa ijo iro nujuoh tohimo Ihko!’’

⁵Tahpi Yesus eam kani samasino mutah hino nyiring Pilatus helan.

⁶Aang nyinong pesta Paska, koharusoh Pilatus moliwus ihcobehti ulun hukuman numbun sawot ulun aro.

⁷Ang luwang sipir, ang louk ponyilou-ponyilou ijo monjadi pomunu ang ohkot korusuh, anai ihcobehti bogare Barabas.

⁸Ulun aro hopuhpung tutang nyawot umba Pilatus ahkaioh moliwus ihcobehti tohukum kolou kopahtutoh.

⁹Pilatus ngisok umba iro, ‘‘Kani ihkam, ahku moliwus lahcan ulun Yahudi rih ahkan'kam?’’

¹⁰Tului Pilatus ngosono ijo imam-imam kopala nyarah Yesus ahkaioh tului hiri ahtoi'ndo.

¹¹Tahpi imam-imam kopala ngihit ulun aro mangat nyawot Pilatus moliwus Barabas ahkan'ndo.

¹²Maka Pilatus nuhtui hino umba ulun aro rih, ‘‘Amat kodorih ahku harus nguan inon umba ulun ijo ihkam ngohawotoh Io lahcan ulun Yahudi rih?’’

¹³Iro paringoh bokociak, ‘‘Mahpakoh Io!’’

¹⁴‘‘Tahpi inon kosalai-Oh?’’ hion Pilatus. Turus iro bokociak labih muhing hino, ‘‘Mahpakoh Io!’’

¹⁵Pilatus jorik monyanang ulun aro rih, io polua Barabas ahkan iro. Pongohino io nyuhu ulun mahcat Yesus, turus nyorah-Oh mangat tonomahpakoh.

¹⁶Yesus omin kobain sorodadu-sorodadu nokuh balai bosara ang istana gubernur. Pongohino paring ponokawan tona'ah hopuhpung.

¹⁷Turus iro mokehpan jubah ungu aang Yesus tutang napa ahkur tahkan akah-akah duhi, pongohino kehpai ang kuhung Yesus.

¹⁸Pongohuli iro nonga tahbe ahkai-Oh, ‘‘Sembah Lahcan Ulun Yahudi!’’ hion iro.

¹⁹Iro mohpah kuhung Yesus umba sukahoh, turus iro ngoluhca-Oh. Iro nyembah nyundop ang tohimo-Oh.

²⁰Uli iro ngonjea Yesus, iro nguhkoi jubah ungu rih turus mokehpan huli pokahjan aiu bongoi. Pongohino rih Io omin'ndo bolua lowu ahkan tomahpak.

²¹ Ang beteng jalan iro hojojuan ihcobehti ngohtun sopolahkin Yesus. Ulun orih toborung punai tahkan dukuh kani nyolong nokuh lowu. (Araioh Simon, — asar tahkan Kirene — amai ain Aleksander tutang Rufus.)

²²Yesus omin nokuh ihco unuk ijo bogare Golgota, rimaioh, ‘‘Unuk bakongkuhung.’’

²³Ang anan iro kani nonga ahkai-Oh anggur ijo capur mur, tahpi Yesus eam kani ngorih anggur rih.

²⁴ Pongohuli iro mahpak Io, tutang hobagi hatiu-Oh tutang batenong mangat ngota'an bagiu nyinong behti.

²⁵Pomahpak Io rih nyolung pukul jalatien ngohkos.

²⁶Ang ngosan sopolahki-Oh tonokehpan surat tohou dawa toharop Io rih, ‘‘Lahcan Ulun Yahudi!’’

²⁷Hombohumba Yesus iro mahpak duo behti ponyilou; ihcobehti ang sila koto'u tutang ihcobehti hino ang sila komuloi-Oh. [

²⁸ Kotului kolourih nyolung auh surat ang Surat Borasih iorih: ‘‘Io tongohu iro monjadi barih ulun ja'at.’’]

²⁹ Ulun-ulun ijo nguha ang anan ngeleng-ngiling kuhungoh, tutang mohina Yesus. Iro nuhtui, ‘‘Uh, Ihko ijo kani ngahkas Lohpou Pohotala, tutang nombokoh ang tolu ondou.

³⁰Cuba nosuluh tahkan sopolahki rih tutang nyolamat arop-Mu!’’

³¹Kodorih ka'a imam-imam kopala tutang guru-guru agama hololea Yesus. Iro bopander sama aropoh, ‘‘Io monyolamat ulun bohkon, tahpi arop-Oh bongoi Io eam duon monyolamatoh!

³²Amat Io lahcan Israel, Lahca Ponyolamat, pios ih Io uhuntuh nosuluh tahkan sopolahki orih, mangat ihkai nohtooh tutang porocaya umba Io!’’ Ulun-ulun ijo nyopolahki homboh Yesus rih ka'a hololea Yesus.

³³Aang tohun ondou, kotahin tolu jam sohopus lowu rih monjadi pindong.

³⁴ Tutang ang pukul tolu cohit, Yesus ngombak umba auh ijo muhing, ‘‘Eloi, Eloi, lama sabakhtani?’’ ijo rimai, ‘‘Yoh, Pohotalak-Ku, yoh, Pohotalak-Ku, ombai Ihko nohtah Ahku?’’

³⁵Pira-pira ulun ang anan ngonih kombak orih, tutang nuhtui, ‘‘Ngonih'kam Io na'ah Elia!’’

³⁶ Ihcobehti tahkan iro jele-jeleng hihkas ngomin dolak karang turus ngucomoh aang anggur mosom. Pongohino dolak karang iro ngowuhoh hapan owuh poring, turus tonuhcuoh nokuh biwih Yesus, sambir nuhtui, ‘‘Ngindoi, has ihto nohto, inon Elia lombut moposuluh Io tahkan sopolahki atuh.’’

³⁷Turus Yesus ngombak hino tutang palus.

³⁸ Dindingbenang ijo toniring ang luwang Lohpou Tuhan bolah monjadi duo tahkan diang nyiring pinda.

³⁹Komandan ijo tombok ang doni sopolahki rih nohto koloukuwoh Yesus palus. Komandan rih nuhtui, ‘‘Puna tu'u ulun tuh Anak Pohotala!’’

⁴⁰ Ang anan anai ka'a pira-pira ulunbawi ijo rahat nohto paringoh rih tahkan mahcu. Ang marak iro rih anai Salome, Maria Magdalena, tutang Maria inai Yakobus ijo biou tutang Yoses.

⁴¹Iro rih ulun-ulun bawi ijo ngohasu tutang ndohop Yesus kotihka Io anai ang Galilea. Tutang anai aro hino ulunbawi bohkon ang anan ijo ius lombut nokuh Yerusalem hombo-homboh umba Yesus.

⁴²Ondou jari nopara pindong kotihka Yusep tahkan Arimatea lombut. Io barih ulun Basara Agama ijo tonohoromat. Io ka'a rahat ngindoi wayahoh Pohotala nopara moretah kolou Lahca. Ondou rih ondou Bosodia, (yorih ondou hounumba ondou Sabat). Tului rih hawui kohanyi Yusep, nohimo Pilatus tutang nyawot otun Yesus.

⁴³

⁴⁴Pilatus helan ijo ngonih Yesus rih jari mahtoi. Nyolung io nyuhu ulun na'ah komandan pasukan, tutang ngisok umba io inon Yesus jari tahi mahtoi.

⁴⁵Uli ngonih laporan komandan rih, Pilatus mangijin Yusep tou posuluh tutang ngomin otun Yesus.

⁴⁶Turus Yusep moli benang pomukusotu tahkan benang lena pongopiosoh, tutang uli rih posuluh otun Yesus, io mukusoh umba benang lena rih. Pongohino rih io pokalingoh otui rih ang luwang ihco tanom ijo tonguai ang luwang puruk bahtu. Uliorih rih io molinang ihco bahtu hajo ponuhtup bauntukang tanom rih.

⁴⁷Pondehan rih Maria Magdalena tutang Maria inai Yesus nohtoani ang umoh Yesus ponokaling.