Read Ot Danum MARKUS 2 Bible Online

MARKUS 2 - Ot Danum bible

MARKUS 2

¹Pira-pira ondou pongohuli Yesus tulak buli nokuh Kapernaum. Mahka tosiar borihta ijo Io rahat ang lohpou.

²Turus aro ulun lombut. Iro hokorumbung ang anan nyiring eam anai hino unuk. Ang bauntukang ka tuwi umba ulun. Turus Yesus nyiar borihta tahkan Pohotala ahkan iro.

³Pondehan Io bopander, ohpat behti ngohusung ihcobehti ulun mahtoibehtiu, ngomin io nokuh Yesus.

⁴Tahpi tului ulun dalou karoi, iro eam duon ngonohkin Yesus. Jadi, iro nguap sahpou tohorong ang isun unuk Yesus tuot. Uliorih iro nguluh ulun mahtoibehtiu rih tutang kahcangkarukoh.

⁵Kotihka Yesus nohto kolourih kohajon koharap'ndo, Io nuhtui umba ulun ijo mahtoibehtiu rih, ‘‘O, anak-Ku, dusa-dusan'mu jari tongapun.’’

⁶Pira-pira guru agama ijo anai tuot ang anan nopara anai ngiso-ngisok a'ang ahtoi'ndo,

⁷‘‘Bahanyi morong ulun tuh nuhtui kolourih! Io mohina Pohotala. Iai ijo tou ngapun dusa-dusa, amat eam Pohotala bongoi?’’

⁸Aang ohkot rih ka'a Yesus ngota'an tiruk'ndo. Turus Io nuhtui, ‘‘Ombai ihkam anai niruk kolourih ijo ang luwang ahtoi'kam?

⁹Umoh ijo paling jeleng: nuhtui, ‘Dusa'mu jari tonapun,’ ata'ai nuhtui, ‘Hihkat ih, ngohtun kahcangkaruk'mu tutang nyalan’?

¹⁰Tahpi huntuh Ahku ahkan ngorinah ahkan'kam ijo ang ngosan tana tuh Anak Ulun bokowasa ngapun dusa.’’ Turus Yesus nuhtui umba ulun ijo mahtoibehtiu rih,

¹¹‘‘Hihkat, ngohtun kahcangkaruk'mu tutang buli!’’

¹²Io kuat tutang jeleng ngonin kahcangkarukoh turus bolua tonyaksi bain iro paring. Ulun-ulun rih helan turus nara Pohotala. Hion'ndo, ‘‘Jaha pu'u ihto nohto angjari koloutuh!’’

¹³Yesus buli hino nokuh saran Danou Galilea. Aro ulun lombut nokuh Io, tutang Io majar'ndo.

¹⁴Pondehan Yesus nyalan ang anan, Io nohto ihcobehti ponagih pajak bogare Lewi anak Alpeus, rahat tuot ang kantor pajak, ‘‘Ngahasu rih Ahku,’’ hion Yesus umba io. Mahka Lewi kuat tutang ngahasu Yesus.

¹⁵Ohkot Yesus beteng kuman ang lohpou Lewi, lombut aro ponagih pajak tutang ulun aro ijo tongohu eam pios bain ulun aro, umba kuman homboh Yesus tutang murid-murid-Oh. Tului aro ang louk iro ngohasu Yesus.

¹⁶Pira-pira guru agama tahkan barih Parisi, nohto Yesus kuman homboh umba ponagih-ponagih pajak tutang ulun-ulun ijo tongohu eam pios rih. Jadi iro ngisok umba dolang murid Yesus, ‘‘Ombai Guru'kam kuman hihco umba ponagih-ponagih pajak tutang ulun-ulun ijo eam pios rih?’’

¹⁷Yesus ngonih kisok'ndo rih, turus mutah, ‘‘Ulun ijo borigas eam boguna nokuh dokter; tihkas ulun ijo poros iou. Ahku lombut eam ahkan na'ah ulun ijo ngohu aropoh jari pios, molekan ulun ijo ngohu aropoh hina.’’

¹⁸Ang ihco ohkot, murid-murid Yohanes Popondus tutang ulun-ulun Parisi beteng puasa. Turus anai ulun lombut nokuh Yesus tutang ngisok, ‘‘Ombai murid Yohanes Popondus tutang murid ulun-ulun Parisi puasa, tahpi murid Amai eam?’’

¹⁹Yesus mutah, ‘‘Aang pesta kawin, inonrih ulun tipen eam kuman? Amat pongaten ijo bahkas magun hihco'ndo, puna iro kuman.

²⁰Tahpi ahkan lombut ohkotoh pongaten bahkas rih kononin tahkan louk'ndo. Ang ohkot rih kolawun'ndo eam kuman.

²¹Eam aro ulun ijo nupang kolambi usang umba ihcokolambar benang bohua. Tului benang tupang orih ahkan ngolonyut, tutang morutat kolambi rih nyiring napa rutatoh ijo labih hajo.

²²Kolourih ka'a eam aro ulun ijo nyuang anggur bohua nokuh luwang tolehkung uhpak ijo usang. Tului anggur bohua rih, ahkan monyabab tolehkung uhpak rih pusit. Kotului orih kododuooh rusak nihou. Anggur ijo bohua pahtut nyuang nokuh luwang tolehkung uhpak ijo bohua ka'a!’’

²³ Aang ihco ondou Sabat, kotihka Yesus nyuru ihco umo gandum, murid-murid-Oh nopara ngohtom gandum.

²⁴Turus ulun-ulun Parisi nuhtui umba Yesus, ‘‘Ombai murid-murid-Mu molanggar hukum agaman ihto, songola nguan ijo pali aang ondou Sabat?’’

²⁵ Yesus mutah, ‘‘Jaha pu'urih ihkam mombasa inon ijo konuan Dawid, ohkot Abyatar rahat nguan gawiu monjadi imam agung. Ohkot rih Dawid tutang ulun-ulun aiu ijo bolo'u, tutang eam aro ukun, io nyolong nokuh Lohpou Tuhan, tutang kuman luhte ijo ius sonyorah ahkan Pohotala. Tutang luhte rih tonongaoh ka'a ahkan ulun-ulun aiuoh. Padahar numbun hukum agaman ihto, tihkas imam-imam iou ijo tou kuman luhte rih.’’

²⁷Turus Yesus nuhtui hino, ‘‘Ondou Sabat anai napa ahkan ulun; eam ijo ulun ahkan ondou Sabat.

²⁸Jadi, Anak Ulun bokowasa, mahi ka ngosan ondou Sabat.’’