Read Ot Danum MARKUS 3 Bible Online

MARKUS 3 - Ot Danum bible

MARKUS 3

¹Yesus huli hino nokuh lohpou sombayang. Ang anan anai ihcobehti ijo longoi mahtoi silai.

²Ang anan aro ulun-ulun ijo kani ngurah kosalan Yesus, mangat'ndo duon ngadu Io. Jadi iro turus ngolinda Io, inonrih Io ahkan ngopios ulun ang ondou Sabat.

³Yesus nuhtui umba ulun ijo longoioh mahtoi silai rih, ‘‘Has tombok ang ohtoi, ang boun.’’

⁴Turus Yesus ngisok umba ulun-ulun ijo tohko ang anan, ‘‘Numbun agama ihto, tou nguan inon ka ang ondou Sabat? Nguan ang pios ata'ai nguan ang ja'at? Monyolamatoh ulun ata'ai munu?’’ Iro tonih iou.

⁵Honong kosangitoh Yesus nohto hoponyila Io, tahpi Io porosahtoi ka'a, tului iro dalou mahang ahtoi'ndo. Turus Io nuhtui umba ulun rih, ‘‘Nuhcu longon'mu.’’ Ulun rih nuhcu longoioh ka tutang longoi pios.

⁶Mahka ulun-ulun Parisi nohtah lohpou sombayang rih, turus jeleng bohaum umba pira-pira ulun barih Horodes, ahkan munu Yesus.

⁷Yesus tutang murid-murid-Oh tulak mundur arop'ndo nokuh Danou Galilea. Mahka aro samasino ulun tahkan Galilea ijo tulak ngahasu Yesus. Aro ka'a ijo lombut tahkan Yudea,

⁸tahkan Yerusalem, tahkan tana Idomea, tutang tahkan tana ang hila timur Yordan tutang tahkan kodiling lowu-lowu, ang Tirus tutang Sidon. Iro paringoh lombut nokuh Yesus, tului iro ngonih tohou hal-hal ijo jari konuai-Oh.

⁹ Ulun-ulun rih, kolourih karoioh, nyiring Yesus nyuhu murid-murid-Oh nyodia alut ahkai-Oh, tului ara-ara Io noin tonyihki bain ulun-ulun rih.

¹⁰Io ngopios kodorih aro ulun, nyiring paring ulun ijo poros hokosihki ngurah jalan ngondoni-Oh mangat duon ngendeh Io.

¹¹Tutang ulun-ulun ijo sonorupang roh ja'at, nyinong tikat nohto Io, turus iou suhkuntu'ut ang boui-Oh tutang ngociak, ‘‘Ihkorih Anak Pohotala!’’

¹²Tahpi Yesus ngohana samasino roh-roh ja'at rih ngohawot iai Io.

¹³Pongohuli Yesus nuhkat nokuh ihco puruk, tutang na'ah ulun-ulun ijo unuk konohuang-Oh. Ulun-ulun rih lombut,

¹⁴turus Io ngopili tahkan louk iro duo balas behti. Hioi-Oh, ‘‘Ahku ngopili ihkam, mangat'kam homboh Ahku, tutang Ahku nyuhu ihkam, ahkan monyiar Kabar Hinut tahkan Pohotala,

¹⁵tutang ihkam ahkan norima kowasa ahkan muhko roh-roh ja'at.’’

¹⁶Tuhrih aran koduo balas murid orih: Simon (ijo konohawot-Oh ka'a Petrus),

¹⁷Yakobus tutang Yohanes konduangoh, iorih anak-anak Sebedeus (iro tuh konohawot-Oh arai Boanerges, rimaioh ‘‘anak duhung’’),

¹⁸Andreas, Pilipus, Bartolomeus, Mateus, Tomas, Yakobus anak Alpeus, Tadeus, Simon Salutes,

¹⁹tutang Yudas Iskariot ijo dorhaka umba Yesus.

²⁰Pongohuli Yesus buli nokuh lohpou. Tahpi ulun aro lombut hino hokorumbung, nyiring Yesus tutang murid-murid-Oh eam sapet kuman.

²¹Ulun-ulun nuhtui, ‘‘Io jadi gila!’’ Tutang kotihka jolahai-Oh ngonih hal orih, iro tulak ahkan ngomin Io.

²² Guru-guru agama ijo lombut tahkan Yerusalem nuhtui, ‘‘Io sonyalung Baalsebul! Kopala roh-roh ja'at, orihrih ijo nonga kowasa ahkai-Oh duon muhko roh ja'at.’’

²³Mahka Yesus na'ah ulun aro rih, tutang monyorihta ahkan'ndo hapan pira-pira porobasa. ‘‘Koloukuwoh tou roh ja'at muhko roh ja'at,’’ hion Yesus.

²⁴‘‘Amat ihco nogara bobolah a'ang hobarih-hobarih, ijo toturus homusuh, nogara orih eam ahkan botahan.

²⁵Tutang amat a'ang ihco jolahan eam anai kohihco tutang ului-uluioh saling hokohiri, jolahan orih ahkan bokahkas.

²⁶Amat ang luwang kolahca'an sehtan nyolung bobolah tutang kojajong, kolahca'an rih eam tehen tahi tutang musti ahkan nihou.

²⁷Eam aro ihcobehti ka nyolong ahkan luwang lohpou ihcobehti ulun ijo ba'as, tutang monyilou ponahtouoh, amat io eam labih houn masung ulun ba'as rih. Uliorih kolowun io duon monyilou ponahtou ulun rih.

²⁸Kota'an'kam! Amatmira ulun nguan dusa tutang ngohawot auh mohina, io duon tongapun.

²⁹ Tahpi amatmira io mohina Roh Pohotala, io eam duon tongapun! Tului pohina rih anai dusa ijo kototahiu.’’ (

³⁰Yesus ngohawot kolourih, tului anai ulun ijo nuhtui, ijo Yesus sonyalung roh ja'at.)

³¹Uliorih inai tutang konduang-konduang Yesus lombut. Iro ngindoi ang konaha tutang nyuhu ulun bohkon na'ah Yesus.

³²Kotihka orih aro ulun rahat tuot ang kodiling Yesus. Iro nuhtui umba-Oh, ‘‘Amai, inai tutang konduang-konduang Amai anai ang konaha. Iro ngurah Amai.’’

³³Yesus mutah, ‘‘Iai inai-Ku? Iai konduang-konduang-Ku?’’

³⁴Pongohuli Io nopahjah nokuh ulun-ulun ijo tuot hokodiling Io, turus nuhtui, ‘‘Tuhrih inai tutang konduang-konduang-Ku!

³⁵Ulun ijo nguanoh konohuang Pohotala, iorih konduang-Ku bahkas konduang-Ku bawi, tutang inai-Ku.’’