Read Ot Danum MARKUS 6 Bible Online

MARKUS 6 - Ot Danum bible

MARKUS 6

¹Tahkan unuk rih, Yesus buli hombo-homboh umba murid-murid-Oh nokuh lowu humai-Oh.

²Aang ondou Sabat Io nopara majar ang lohpou sombayang. Anai aro ulun ang anan. Ohkot ulun-ulun rih ngonih pongajaran Yesus, iro helan samasino. Iro nuhtui, ‘‘Tahkan umoh ulun tuh dahpot paringoh rih? Kopihtar mahcam inon tuh ijo tohko ang Io? Koloukuwoh Io nguan kahtahelan?

³Eamrih Io tuh tuhkang kahju anak Maria, tutang konduang tahkan Yakobus, Yoses, Yudas tutang Simon? Iorih konduang-konduang-Oh bawi mahi tohko mohcon ang ohtoi ka'a.’’ Tului rih iro nulak Io.

⁴ Turus Yesus nuhtui umba'ndo, ‘‘Ihcobehti nabi tonohoromat ang umo-umoh, kocoali ang lowu humaioh tutang ang louk ari konduangoh tutang injah jolahaioh.’’

⁵Ang unuk rih Yesus eam kani nguan angihco kahtahelan ka'a, tihkas ngopios pira-pira ulun poros tutang ngina longoi-Oh ang ngosan iro.

⁶Io helan iro eam porocaya. Pongohino Yesus tulak nokuh lowu-lowu ang hokodiling anan, tutang majar.

⁷Io na'ah koduo balas murid-Oh, turus nyuhu iro homboh duo, tutang nonga kowasa ahkan iro duon muhko roh-roh ja'at.

⁸ Io nonga potunjuk tuh ahkan iro, ‘‘Ara ngomin ino-inon ahkan ponomuoi'mu, kocoali sukah. Ara ngomin ukun ata'ai kambut pononga, ata'ai ka duit.

⁹Hapa ka'a sorupah, tahpi ara ngomin duo lambar pokahjan.’’

¹⁰Io hino nuhtui, ‘‘Amat ihkam nyolong nokuh ihco lohpou, mohcon ang anan, nyiring ihkam nohtah lowu rih.

¹¹ Tahpi amat ihkam johcok ang ihco unuk, tutang ulun-ulun ang anan eam kani norima tutang ngonih auh'kam, nohtahrih unuk rih. Tutang nohka awun tana tahkan tapa pa'an'kam kolou pongingat toharep iro!’’

¹²Mahka koduo balas murid Yesus rih hihkas. Iro hihkas monyiar kabar ijo ulun harus hubah tahkan dusa-dusan'ndo.

¹³ Murid-murid Yesus rih muhko aro roh ja'at, ngasak undus ang ulun ijo poros tutang ngopios iro.

¹⁴ Kabar-kabar tohou paring ang ijo nyolung rih, johcok ka'a ang Lahca Horodes, tului aran Yesus jari bosewut ang umo-umoh. Anai ulun ijo nuhtui, ‘‘Yohanes Popondus jari bolum hoduli! Iorih kotuluioh Io anai tepun kowasa nguan kahtahelan rih.’’

¹⁵Tahpi ulun-ulun bokon nuhtui, ‘‘Io Elia.’’ Anai ka'a ijo nuhtui, ‘‘Io nabi, kolou ihcobehti nabi jaman lomoi.’’

¹⁶Kotihka Horodes ngonih orih, io nuhtui, ‘‘Musti jituh Yohanes Popondus ijo soun jari ahku nyuhu nohtok kuhungoh. Huntuh io jari bolum hoduli!’’

¹⁷ Tului soun tahkan orih, Horodes nyuhu ulun nawan Yohanes, tutang posolong io ahkan luwang sipir. Horodes nguan hal kolourih, tului Herodias, oruh konduangoh bongoi, iorih Pilipus. Bain Horodes nukun Herodias,

¹⁸tutang tohou hal rih Yohanes jari dulangduli ningak Horodes koloutuh, ‘‘Eam tou ihko kawin umba oruh konduang'mu rih!’’

¹⁹Orih bainoh Herodias mondandam umba Yohanes rih tutang jolik munu Yohanes, tahpi io eam duon nguai hal rih tului baca bain Horodes.

²⁰Tului Horodes nyuhu ulun monjaga Yohanes bua-buah ahkan kosolamatan Yohanes ang sipir, tului io mihkoh umba Yohanes. Io kota'an Yohanes ihcobehti ulun morong ijo sonuhu bain Pohotala. Tutang puna, amat Yohanes nuhtui, Horodes jorih ka'a ngonihoh, oluka io toturus golisah samasino kotuluioh.

²¹Kojoriaioh Herodias duon kosapet aang ondou pongingat ondou-konanak Horodes. Kotihka orih Horodes nguan pesta tutang mara paring pojabat isung ang kolahca'an aiu, porowira-porowira tutang tokoh-tokoh masyarakat Galilea.

²²Ang pesta rih anak bawi Herodias monari, tutang tari orih rih karas ngonjorih ahtoi Horodes tutang ulun-ulun ponara. Mahka Horodes nuhtui umba anakdara rih, ‘‘Ihko jolik inon, nyawotrih. Ahku ahkan nongaoh ahkan'mu!’’

²³Turus Horodes hobowot umba anakdara rih umba tulut. Horodes nuhtui, ‘‘Inon ka'a ijo ihko nyawot, ahkan ahku nongaoh, oluka nyiring soparu tahkan kolahcak'ku tuh ka'a!’’

²⁴Mahka dara orih nyolong tutang ngisok inaioh, ‘‘Inai, inon sopahtutoh ijo ahku nyawot?’’ Inaioh mutah, ‘‘Nyawot iou kuhung Yohanes Popondus.’’

²⁵Dara orih jeleng soluka nokuh Horodes tutang nuhtui, ‘‘Ahku nyawot kuhung Yohanes Popondus tononga uhun ituh ka'a ang ngosan ihco talam!’’

²⁶Ngonih sawot kodorih Horodes poros ahtoioh. Tahpi io eam duon nulak sawot orih tului io jari nulut aropoh ang toharep ulun-ulun aro ijo ponaraoh.

²⁷Jadi, io turus moretah ihcobehti pongawaloh ngomin kuhung Yohanes Popondus. Mahka sorodadu rih tulak nokuh sipir, turus nohtok kuhung Yohanes.

²⁸Pongohuli sorodadu ngomin kuhung orih ang ngosan talam tutang monyarahoh ahkan dara orih. Tutang dara orih nongaoh hino ahkan inaioh.

²⁹Kotihka murid-murid Yohanes ngonih hal orih, iro tulak ngomin buhkang Yohanes, turus ngolowongoh.

³⁰Rasul-rasul ijo sonuhu bain Yesus rih, pongohuli buli hino, tutang hihco umba Yesus. Iro nyorihta ahkan Yesus paring ijo jari iro nguai tutang majaroh.

³¹Aro samasino ulun ijo lombut tutang tulak, nyiring uhun ahkan kuman ka, Yesus tutang murid-murid-Oh eam sapet. Tului orih Yesus nuhtui umba murid-murid-Oh, ‘‘Olai ih, ihto tulak nokuh unuk ijo tonih, tutang ang anan ihto tou bongon 'to tutang ihkam tou ngorong-hasong pondehan.’’

³²Mahka iro ka tulak hapan alut, nokuh ko-unuk ijo tonih.

³³Tahpi aro ulun jari nohto iro nohtah unuk orih, tutang kota'an nokuh umoh iro. Jadi, tahkan paring lowu ang wilayah orih, ulun-ulun nokoru nyuru jalan isuntana nosolu Yesus tutang murid-murid-Oh.

³⁴ Kotihka Yesus jahkat tahkan alut, Io nohto ulun aro. Io masi umba iro, tului iro kolou tobiri ijo eam aro ulun nyokahtikoh. Mahka Io ka'a nopara majar aro hal ahkan iro.

³⁵Kotihka jari sohit, murid-murid Yesus nuhtui umba Yesus, ‘‘Tuh jari doni pindong tutang unuk tuh tonih benyem.

³⁶Labih pios Amai nyuhu ulun-ulun tuh tulak, mangat iro duon moli ukun ang dukuh-dukuh dangou tutang lowu-lowu ang kodiling tuh.’’

³⁷Tahpi Yesus mutah, ‘‘Ihkam iou nonga iro ukun.’’ ‘‘Bah, inonrih ihkai harus tulak moli luhte ihco legai duo lahtus duit perak ahkan nonga ukun ulun-ulun tuh?’’ kolou orih hion murid-murid Yesus rih.

³⁸Turus Yesus ngisok, ‘‘Anai pira luhte ang ihkam? Suba tulak nohtooh.’’ Uli iro tulak nohtooh, iro nuhtui, ‘‘Anai limo luhte, tutang anai duo ohcin ka'a.’’

³⁹Turus Yesus nyuhu paring ulun rih tuot hopulou-hopulou ang uru ijo bohijou.

⁴⁰Ulun-ulun rih ka tuot hawui morong, hopulou-hopulou. Anai ijo sorahtus behti 'cokopulou, tutang anai ka'a ijo limo pulu behti ang ihcokopulou.

⁴¹Pongohuli Yesus ngomin limo luhte tutang duo ohcin rih, turus nokara nokuh langit, tutang ngohawot torimakasih ahkan Pohotala. Uli rih Io milat-milat luhte rih umba longoi-Oh, tutang mbilah orih ahkan murid-murid-Oh, nyuhu magioh ahkan ulun aro rih. Tutang duo ohcin rih tonomagi ka'a, ahkan ulun aro paring.

⁴²Iro kuman nyiring bosuh.

⁴³Pongohuli kolowin uhkun ulun aro rih tonipun bain murid-murid Yesus — paringoh anai duo balas tahkin tuwi.

⁴⁴Ulunbahkas ijo kuman luhte rih anai kira-kira limo kuhjan.

⁴⁵Uliorih Yesus jeleng nyuhu murid-murid-Oh tulak hapan alut nosolu Io nokuh Betsaida ang pohoi danou, pondehan orih Io nyuhu ulun-ulun buli nokuh unukoh.

⁴⁶Uli nulak ulun-ulun aro rih, Yesus tulak nokuh pupung puruk ahkan bodo'a.

⁴⁷Kotihka jari ngalomi, alut murid-murid Yesus jari anai ang tohun danou, uhun rih Yesus magun anai ang isun tana.

⁴⁸Yesus nohto iro ujuh tu'u meseu alut rih tului bahiu hokolawan umba ulung alut. Tului rih kira-kira holang jam tolu tutang jam onom topolaoi, Yesus lombut nokuh iro nyalan ang isun danum. Tutang Io nyalan turus kolo-kolou nokalou iro.

⁴⁹Kotihka iro nohto ijo Io nyalan ang isun danum, iro ngira Io otu,

⁵⁰nyiring iro ngoriak mihkoh. Bain iro paringoh nohto Io tutang iro tokohcit. Tahpi turus Yesus nuhtui umba iro, ‘‘Tonih ihkam! Ahku Yesus. Ara mihkoh!’’

⁵¹Turus Io jahkat ahkan alut iro, tutang bahiu tondo. Murid-murid Yesus helan samasino.

⁵²Kahtahelan hapan limo buhtup luhte rih, jaha hino kosonan iro. Bohali bagi iro ahkan nyolembangoh.

⁵³Ohkot johcok ang pohoi danou iro tondo ang saran-kowang Genesaret.

⁵⁴Kotihka iro jahkat tahkan alut, ulun-ulun nohto ijo lombut orih Yesus.

⁵⁵Turus iro nokoru nokuh umo-umoh ang hopus tana rih, tutang ngomin ulun-ulun poros ang ngosan kahcangoh nokuh Yesus. Amat iro ngonih ijo Yesus anai ang ihco unuk, iro ngomin ulun-ulun poros rih nokuh anan.

⁵⁶Ang umoh ka'a Yesus lombut — pios ang desa, ang lowu, ang dukuh — ang anan ulun toturus lombut tutang ngina ulun-ulun mondam ang alun-alun. Turus iro nyawot honong paham, mangat ulun-ulun mondam-poros rih nyawot poromisi ngendeh jubah Yesus, olu baya puhtingoh. Paring ijo ngendehoh nyolung pios.