Read Ot Danum MARKUS 7 Bible Online

MARKUS 7 - Ot Danum bible

MARKUS 7

¹Ihcokobarih ulun Parisi tutang pira-pira guru agama tahkan Yerusalem, lombut nokuh Yesus.

²Iro nohto pira-pira murid Yesus kuman hapan longoi eam tomuhi borasih socara agama, iorih eam labih houn muhi longoi numbun poroturan agama Yahudi.

³Ulun-ulun Parisi, kolourih ka'a paring ulun Yahudi, te'et samasino numbun hadat istiadat tahtu ajuh'ndo. Iro eam ahkan kuman hounumba muhi longoi numbun cara-cara botantu.

⁴Inon ijo tomoli ang pasar eam ahkan'ndo kumai, amat jaha tomuhi labih soun. Tutang aro poroturan bohkon tahkan tahtu ajuh iro, ijo iro nambit tehen; kolou, jahkaoh hadat muhi sakir, pikan tutang pokakas-pokakas tahkan tombaga.

⁵Tului orih ulun-ulun Parisi tutang guru-guru agama rih ngisok umba Yesus, ‘‘Ombai murid-murid-Mu rih kuman, padahar longon iro ijo eam tomuhi? Inon buhkui iro eam numbun hadat istiadat tahtu ajuh ihto?’’

⁶ Yesus mutah, ‘‘Ihkam ulun-ulun pura-pura! Tahorong samasino inon ijo tonujum Yesaya tohou ihkam, iorih, ‘Koloutuh hion Pohotala, Ulun-ulun rih tihkas nyembah Ahku umba auhtuhtui, tahpi ahtoi iro mahcu tahkan Ahku.

⁷Porocuma iro nyembah Ahku, tului hadat ulun, iro ngajaroh kolo-kolou orih poroturan-Ku!’

⁸Poretah-poretah Pohotala ihkam mohonauoh, tutang poroturan-poroturan ulun, ihkam nambit ba'a-ba'as.’’

⁹Turus Yesus nuhtui hino, ‘‘Ihkam ahpik samasino nulak poretah Pohotala, mangat tehen umba ajaran'mu bongom.

¹⁰ Museh jari nonga poretah tuh, ‘Hormatrih amai tutang inai'mu,’ tutang ‘Ia-iai ngombihtak umba inai-amaioh, harus hukum mahtoi.’

¹¹Tahpi ihkam mongajaroh: Amat ulun nuhtui umba ulun okooh, ‘Inon ijo soharusoh ahku nongaoh ahkan amai tutang inai, jari ahku nongaoh ahkan Pohotala,’

¹²mahka ihkam moliwusoh ulun rih tahkan kopahtutoh ijo dohop amai-inaioh.

¹³Jadi umba ajaran ihkam bongom, ijo ihkam nonga ahkan ulun-ulun, ihkam ngondian auh Pohotala. Magun aro hal koloutuh ijo ihkam nguaioh.’’

¹⁴Turus Yesus na'ah ulun aro rih sino hino tutang nuhtui ahkan'ndo, ‘‘Ngonihrih mangat solembang!

¹⁵Eam anai angihco tahkan luar, ijo nyolong ahkan nokuh luwang ulun, ijo nguan ulun orih pali. Tobalikoh, ijo soluka tahkan ichobehti, orihrih ijo nguan io pali. [

¹⁶Jadi, amat anaingina tolinga, pios io ngonihoh.]’’

¹⁷Kotihka Yesus nohtahoh ulun aro rih tutang nyolong lohpou, murid-murid-Oh ngisok umba Io tohou porobasa rih.

¹⁸Mahka Yesus pander umba'ndo, ‘‘Inonrih ihkam jaha ka'a solembang? Inonrih ihkam eam tou solembang ijo, ijo nyolong nokuh luwang ihcobehti eam tou kotuluioh ulun rih monjadi pali?

¹⁹Tului ijo nyolong rih eam nyuru ahtoi, tahpi nyuru butui, tutang pongohuli soluka hino.’’ Umba auh-auh rih Yesus ngorinah ijo paring uhkun rih borasih.

²⁰Turus Yesus nuhtui hino, ‘‘Ijo soluka tahkan ulun, orihrih ijo ngonja'at io.

²¹Tului tahkan luwang, yorih tahkan luwang ahtoi, lombut tiruk ja'at, ijo kotuluioh ulun nguan kosundal, nahkou, munu,

²²hobandung, ngobalik, ngarana, hawoi nguan kokaro ang'co ijo ja'at hawoi sorahkah, eam mia, bohiri, bojuhu tutang bohali majaroh.

²³Paring ijo ja'at rih lombut tahkan luwang, tutang orihrih ijo kotuluioh monjadioh ulun pali.’’

²⁴Pongohino Yesus nohtah unuk rih, tutang tulak nokuh daerah doni lowu Tirus. Io nyolong nokuh luwang ihco lohpou, tutang eam kani ijo ulun kota'an Io anai ang anan. Tahpi Io eam duon mosuhukoh arop.

²⁵Ihcobehti inai, ijo anak bawioh sonyalung roh ja'at, ngonih tohou Yesus, io lombut nokuh Yesus tutang suhkuntu'ut ang tohimo-Oh,

²⁶sambil nyawot mangat Yesus muhko roh ja'at tahkan anakoh rih. Ulunbawi rih bohkon ulun Yahudi, konanak ang tana Penisia ang Siria.

²⁷Yesus nuhtui umba io, ‘‘Anak-anak harus tononga ukun labih soun. Eam pios ngomin ukun anak-anak turus nyahkahoh ahkan asu.’’

²⁸‘‘Tuan,’’ hion ulunbawi orih, ‘‘asu-asu ang pinda meja ka kuman pahpat-pahpat ijo ngonyahtu konuan anak-anak rih!’’

²⁹Turus Yesus nuhtui umba io, ‘‘Tului ihko mutah kodorih, buli iou; roh ja'at rih jari nyoluka tahkan anak'mu!’’

³⁰Inai orih buli. Ang lohpou io nyombang anakoh rahat kaling ang unuk ngaruk, tutang roh ja'at moro-morong jari soluka tahkan anakoh rih.

³¹Pongohino Yesus nohtah daerah Tirus, tutang noturus ponyalai-Oh nyuru Sidon nokuh Danou Galilea. Io ngomin jalan nyuru daerah Sopulu Lowu.

³²Ang anan ulun ngomin ahkai-Oh 'cobehti ijo bisu borengen. Iro nyawot Yesus ngina longoi-Oh aang ngosan ulun rih.

³³Yesus ngomin ulun rih, bongon doro tahkan ulun aro. Turus nginaoh iking nokuh luwang tolingan ulun orih. Turus Yesus ngoluhca, tutang ngoruit jola ulun rih.

³⁴Uliorih rih Yesus nokara nokuh langit, nguhut hasongoh ba'a-ba'as tutang nuhtui umba ulun rih, ‘‘Epata,’’ ijo rimai-Oh ‘‘Bokuap!’’

³⁵Tolingan ulun rih tokuap tutang jolaioh monjadi bolomu huli, tutang io nopara pander honong murah.

³⁶Turus Yesus baca iro paring ahkan monyiar hal orih ahkan ia-iai beweu. Tahpi mahimahi Io baca, mahi-mahi hino iro monyiaroh.

³⁷Tutang paring ulun ijo ngonih rih helan samasino. Iro nuhtui, ‘‘Paringoh konuai-Oh honong pios! Mahihino Io nguan ulun borengen duon ngonih, tutang ulun bisu duon pander!’’