Read Ot Danum LUKAS 1 Bible Online

LUKAS 1 - Ot Danum bible

LUKAS 1

¹Teofilus ijo randah ahtoi, Aro ulun jari bousaha nyurat tutang monyusun tohou karon-kojodianrih ijo jari nyolung ang tohun ihto.

²Iro nyurat hotohorong umba ijo jari tomorihta ahkan ihto bain ulun-ulun ijo nohto bongoi karonaang nyolung orih tahkan pahtukoh, tutang pongohino mborihtaoh kabar orih.

³Uli ahku honong nolihtioh moriksa paring orih tahkan pahtukoh, ahku ngira pios mangat nyurat ihco laporan ijo tosusun ahkan'kam.

⁴Ahku nguan orih mangat'kam kota'an ijo inon ijo jari tomara ahkan Ihkam puna morong.

⁵ Kotihka Horodes monjadi lahca tana Yudea, anai ihcobehti imam, bogare Sakharia. Io tame barih imam-imam Abia. Oruhoh bogare Elisabet, ka'a lihit imam.

⁶Pombolum lohpouawu orih rih ngojorih ahtoi Pohotala. Koduooh bokehtep umba paring poretah tutang Hukum Tuhan umba ko opah ahtoi'ndo.

⁷Iro eam aro anak tului Elisabet tomanang tutang doro rih jari oko.

⁸Aang sino ondou, ohkot barih Abia duon gilir, Sakharia konopili nguan gawi, kolou imam ang nohimo Pohotala.

⁹Umba tenung ijo kopahtutoh konuan bain imam-imam, Sakharia tonunjuk ahkan nyolong nukuh luwang Lohpou Tuhan tutang mahpong manyan.

¹⁰Pondehan upacara mahpong manyan io nguai, ulun aro bodo'a ang luar.

¹¹Ang ohkot orih, molehkat Tuhan ngorinah aropoh ahkan Sakharia. Molehkat rih tombok ang sila kotou meja unuk mahpong manyan rih.

¹²Ohkot Sakharia nohto molehkat rih, io tokonyat tutang mihkoh.

¹³Tahpi molehkat rih nuhtui, ‘‘Ara mihkoh Sakharia! Pohotala jari ngonih do'a'mu. Oruh'mu Elisabet ahkan nganak ihcobehti anak bahkas. Ihko harus nonga araioh Yohanes ahkaioh.

¹⁴Ihko ahkan paham jorih, tutang aro ulun ahkan jorih jirah amat anak rih konanak noin!

¹⁵ Io ahkan monjadi ulun hajo numbun topahjah Tuhan, tutang io eam ahkan ngorih anggur ata'ai korih ijo mombusou. Tahkan io konanak, io ahkan konowasa bain Roh Pohotala.

¹⁶Aro ulun Israel tonitingoh buli nokuh Pohotala, Tuhan iro.

¹⁷ Io ahkan monjadi soruhan Tuhan ijo ba'as tutang bokowasa kolou Elia. Io ahkan ngobuah amai umba anak, tutang ulun eam te'et tonitingoh buli aang jalan tiruk ijo morong. Honong kolourih io nahtap ihco ukup ijo jari tahtap ahkan Tuhan.’’

¹⁸‘‘Koloukuwoh ahku ta'an ijo kolourih ahkan nyolung?’’ hion Sakharia umba molehkat rih, ‘‘ahku jari oko, tutang oruh'ku ka'a jari oko.’’

¹⁹ Molehkat rih mutah, ‘‘Ahku tuh Gabriel. Ahku pohalu Pohotala tutang Iorih ijo nyuhu ahku nyapaioh kabar hinut tuh ahkan'mu.

²⁰Inon ijo ahku nuhtuioh, ahkan nyolung ang ohkotoh. Tahpi tului ihko eam porocaya, ihko noin eam duon pander ihko ahkan bisu nyiring inon ijo ahku nuhtuioh tuh nyolung.’’

²¹Pondehan rih ulun-ulun ijo toturus ngindoi Sakharia. Iro helan ombai io kolourih kotahiuoh ang luwang Lohpou Tuhan.

²²Tutang ang ohkot io soluka, io eam duon pander umba iro. Io turus ih nonga tanda umba longoioh, tutang tahtap io bisu. Mahka ulun-ulun ka kota'an ijo io jari nohto aangihco ponopahjah ang luwang Lohpou Tuhan.

²³Ulirih opah ohkot gawiouoh ang Human Tuhan, Sakharia buli nokuh lohpouoh.

²⁴Eam pira kotahiu ulirih rih, Elisabet oruhoh botohi turus ngurung aropoh ang lohpou limo potion kotahiuoh.

²⁵Io nuhtui, ‘‘Kojoriaioh Tuhan dohop ahku tutang ndianoh kohina'ku.’’

²⁶Kotihka Elisabet jari botohi onom potion, Pohotala nyuhu molehkat Gabriel hihkas nokuh Nasaret ihcokobawak lowu ang tana Galilea.

²⁷ Gabriel soruhan nokuh ihcobehti anakdara, bogare Maria. Bujangteme orih jari konisok bain ihcobehti bogare Yusep lihit Lahca Dawid.

²⁸Molehkat rih lombut ahkan Maria hawoi nuhtui, ‘‘Kosanangsolamat ahkan'mu ijo tomborehkat Tuhan paham kopioi! Tuhan hihco ihko!’’

²⁹Ngonih tuhtui molehkat rih Maria tokohcit, nyiring hokisok umba a'ang ahtoi, inon rimai tabe rih.

³⁰Mahka molehkat rih nuhtui umba io, ‘‘Ara mihkoh Maria, tului ihko unuk kojorih ahtoi Pohotala.

³¹ Ihko ahkan botohi, tutang nganak ihcobehti anak, ijo harus ihko nonga araioh Yesus.

³² Io ahkan monjadi ulunhajo tutang ahkan konohawot Anak Pohotala Ijo Mahaisung. Tuhan Pohotala ahkan ngonjorian Io Lahca kolou Lahca Dawid, tahtu ajuh-Oh.

³³Tutang Io ahkan morehtah kolou Lahca ang ngosan uhtus Yakub turus-jahamoh. Kolahcai-Oh eam ahkan opah.’’

³⁴‘‘Tahpi ahku magun bujangteme,’’ hion Maria umba molehkat rih, ‘‘koloukuwoh hal orih duon nyolung?’’

³⁵Molehkat rih mutah auh, ‘‘Roh Pohotala ahkan lombut ahkan'mu, tutang kowasan Pohotala ahkan monyokuwung ihko. Orihrih kotuluioh anak ijo ahkan konanak'mu rih, ahkan konohawot Borasih, Anak Pohotala.

³⁶Ingat, Elisabet konduang'mu 'cotahtu rih, jari botohi onom bulan, oluka io jari oko, tutang ulun jari ngohawot io tomanang.

³⁷ Tului bagi Pohotala eam aro ijo mustahel.’’

³⁸Turus Maria nuhtui, ‘‘Ahku tuh jihpon Tuhan, nauhoh ijo nyolung ahkak'ku, kolou ijo ihko nuhtui.’’ Turus molehkat orih tulak nohtah Maria.

³⁹Jeleng uliorih rih, Maria tulak nokuh ihco lowu ang Yudea ang tana hopuruk-puruk.

⁴⁰Io tulak nokuh lohpou Sakharia, tutang kotihka io nyolong, io ngohawot tabe ahkan Elisabet.

⁴¹Tutang kolourih Elisabet ngonih tabe Maria, anak ijo ang luwang butui Elisabet rih jorih. Mahka Elisabet konowasa bain Roh Pohotala,

⁴²turus nuhtui, ‘‘Ihko ijo paling tomorehkat ang louk paring ulunbawi! Ponorehkat anak ijo ahkan ihko nganakoh rih!

⁴³Iai ahku nyiring inai Tuhan lombut masap ahku?

⁴⁴Kolourih ahku ngonih tahbe'mu, anak ijo luwang butui'ku jorih.

⁴⁵Sanangsolamat ihko, tului porocaya ijo inon tonuhtui Tuhan ahkan'mu rih ahkan nyolung!’’

⁴⁶ Maria nuhtui, ‘‘Ahtoi'ku monara Tuhan,

⁴⁷tutang moruak'ku paham kojorihoh, tului Pohotala Ponyolamat'ku.

⁴⁸ Io ingat ahku jihpoi-Oh ijo hina! Nopara huntuh paring uhtus nuhtui ijo ahku ulun sanangsolamat.

⁴⁹Tului Pohotala Ijo Palingkowasa nguan hal-hal hajo ahkak'ku. Borasih tu'u arai-Oh.

⁵⁰Lihit honong lihit Tuhan ngina porokasih ahkan ulun ijo mihkoh umba Io.

⁵¹Umba longoi-Oh ijo ba'as Io morawu-riaioh ulun bojuhu, tutang nderoh rancana iro.

⁵² Lahca-lahca posuluhoh tahkan ponuot tutang ulun hina tonongahtang-Oh.

⁵³Ulun bolo'u konombosuh-Oh umba kokaron kopios, ijo tohtou tomuko honong mapih.

⁵⁴Io ngawat Israel jihpoi-Oh, numbun bowot ijo konuai-Oh umba tahtu ajuh ihto.

⁵⁵ Tuhan eam nolingou bowot-Oh, Io randah ahtoi ahkan Abraham tutang lihitoh nyiring turus-jahamoh.’’

⁵⁶Kurang labih tolu potion kotahiuoh Maria mohcon umba Elisabet, punai io buli nokuh lohpouoh.

⁵⁷Johcok ohkotoh bagi Elisabet ahkan nganak. Io nganak ihcobehti anak bahkas.

⁵⁸Injah bobuhai hokodiling tutang ari konduangoh ngonih eam inon kopiosoh Tuhan toharep Elisabet, tutang iro ka umba jorih homboh io.

⁵⁹ Ohkot longa orih boumur jalu ondou, iro lombut ahkan monyunat io. Iro kani napaoh aran longa rih Sakharia, numbun aran amaioh,

⁶⁰tahpi inaioh homauh, ‘‘Eam! Io harus tonapa araioh Yohanes.’’

⁶¹‘‘Eam ihcobehti ka tahkan ari konduang'mu arai kolourih,’’ hion iro umba Elisabet.

⁶²Turus umba tanda iro ngisok umba Sakharia, aran inon ijo kani tonongarihoh ahkan anakoh.

⁶³Sakharia nyawot ihcokobilap bahtu surat turus nyurat, ‘‘Araioh Yohanes.’’ Iro paringoh helan.

⁶⁴Aang ohkot rih ka'a Sakharia dahpot pander hino tutang monara Pohotala.

⁶⁵Dolang injahjolahai paringoh mihkoh, tutang kabar rih tosiar nokuh hapus purukhotinggang ang Yudea.

⁶⁶Paring ulun ijo ngonih hal orih ngisok a'ang ahtoi'ndo, ‘‘Jarian inonrih anak rih noin?’’ Tului Tuhan homboh io.

⁶⁷Sakharia, amai anak orih, duon tokowasa bain Roh Pohotala, nyiring io nyiaroh pohtoh tahkan Tuhan. Io nuhtui,

⁶⁸‘‘Has ihto monara Tuhan, Pohotalan uhtus Israel! Io jari lombut ndohop ukup-Oh tutang moliwusoh iro.

⁶⁹Io nonga ihto ponyolamat, ijo meteng-mamut lihit Dawid, jihpoi-Oh.

⁷⁰Jaman lomoi nguha nabi-nabi ijo konopili-Oh, Tuhan jari nonga bowot-Oh

⁷¹mangat monyolamat ihto tahkan musuh'to tutang tahkan kowasa ulun-ulun ijo mohiri ihto.

⁷²Ahkan ngorinahoh kotoun ahtoi-Oh ahkan uhtuslihit ihto, bowot-Oh ijo borasih orih ahkan tongonyolung-Oh.

⁷³Io nulut umba Abraham amai ihto, tutang hobowot, ahkan nyolamatoh ihto tahkan musuh ihto, mangat ihto earo mihkoh mohalu Io

⁷⁴

⁷⁵turus nehpu umbaoh tutang nyanang ahtoi-Oh kotahin ihto bolum.

⁷⁶ Ihko, o anak'ku ahkan konohawot nabi Pohotala Ijo Mahaisung. Ihko tonyuhu nosolu baun Tuhan ahkan nandang jalan ahkai-Oh,

⁷⁷mangat momborihta ahkan ukup-Oh ijo iro ahkan tonyolamatoh, amat Pohotala jari mongapun dusa-dusan iro.

⁷⁸Tuhan ihto bolomu ahtoi hawui ponyayang; gunan monyolamat ihto Io lombut. Kolou mahtanondou lombut ang ngohkos ondou,

⁷⁹ kolourihrih Io nongaoh koloang-Oh ahkan paring ulun ijo bolum ang luwang kopindong tutang kihkoh. Io niting ihto aang jalan ijo nitu kobuah.’’

⁸⁰Anak Sakharia rih sasar hajo tutang sasar ba'as rohoh. Io mohcon ang padang balambah, nyiring johcok ohkotoh io ngorinahoh aropoh ahkan uhtus Israel.