Read Ot Danum LUKAS 10 Bible Online

LUKAS 10 - Ot Danum bible

LUKAS 10

¹Uliorih Tuhan mitih pihtu pulu murid hino, turus nyuhu iro duobehti-duobehti nosolu Io nokuh nyinong lowu tutang unuk ijo kani tomasap-Oh.

² ‘‘Bua ijo tongohtom aro,’’ hioi-Oh umba iro, ‘‘tahpi ponggawi ahkan ngohtomoh baya honjiot. Tului rih nyawot umba Tepui umo rih, mangat Io ngirimoh ponggawi mangat ngohtom bua umoi-Oh.

³ Olai, tulak ih! Ahku nyuhu ihkam kolou tobiri nokuh marak horomaung.

⁴ Ara ngomin ehpok ata'ai kambut pononga, ata'ai ka sorupah. Ara tondo ang beteng jalan ahkan nunga tabe ahkan ihcobehti ka ka'a.

⁵Amat ihkam nyolong ihco lohpou, ngohawot ohrih labih holu, ‘Keleh kosanangrih luwang lohpou tuh.’

⁶Amat ang anan anai ulun ijo rajin hokobuah, tabe hokobuah'mu rih ahkan tehen aang oh; amat eam, nguhutrih huli tabe kobuah'mu rih.

⁷ Mohcon ang ihco lohpou iou. Norima inon ijo nyorunganoh ang anan ahkan'mu, tului ulun ijo bogawi bohak norima upahoh. Ara kindah-kondaha tahkan ihco lohpou nokuh ihco lohpou bohkon.

⁸Amatmira ihkam lombut ang ihco lowu, tutang ang anan ihkam tonoharang hapan kopios, kumanrih inon ijo nyorunganoh ang anan ahkan'mu.

⁹Nawas ulun-ulun ijo mondam ang lowu rih, tutang nyorihta ahkan ulun-ulun ang anan, ‘Pohotala pohos ahkan nopara moretah kolou Lahca ang tohun ihkam.’

¹⁰ Tahpi amat ihkam lombut ahkan ihco lowu, tutang ang anan ihkam eam tonorima, bolua nokuh jalan tutang nuhtuiohrih,

¹¹‘Molekan korawun tana lowun'mu ijo lehket ang tapapa'an 'kai, ihkai ngopohitoh monjadi pongingat ahkan'mu. Tahpi kota'anrih ijo jari doni wayahoh Pohotala nopara moretah kolou Lahca ang marak tohun ihkam!’

¹² Ingatrih, aang ondou kiamat, ulun Sodom ahkan labih murah tongapun Pohotala tahkan iro ulun lowu orih!’’

¹³ ‘‘Colahkarih ihko, Korazim! Tutang colahkarih ihko, Betsaida! Jahkaoh kahtahelan-kahtahelan ijo tonapa ang tohun-louk'kam rih jari tonapa ang lowu Tirus tutang Sidon, musti ulun-ulun ang anan jari tahi hubah tahkan dusa-dusan iro, tutang hapa pokahjan tandaporosahtoi hawui ngina awu ang ngosan kuhung'ndo.

¹⁴Aang ondou kiamat, ulun-ulun Tirus tutang Sidon ahkan labih murah duon konapun Pohotala tahkan ihkam.

¹⁵ Tutang ihkam, Kapernaum! Ihko niruk, ihko ahkan konahtang johcok nokuh soruga? Eam! Malah ihko ahkan tondian nokuh norahka!’’

¹⁶ Turus Yesus nuhtui umba murid-murid-Oh, ‘‘Ulun ijo ngonih ihkam, io ngonih Ahku ka. Ulun ijo nulak ihkam, io nulak Ahku, ka'a nulak Io ijo jari nyuhu Ahku.’’

¹⁷Kopihtu pulu murid rih buli tutang jorih samasino. ‘‘Tuhan,’’ hion iro, ‘‘roh-roh ja'at ka te'et umba ihkai inonmira ihkai moretahoh iro ngosan aran Tuhan!’’

¹⁸Yesus mutah, ‘‘Ahku nohto sehtan nosuluh tahkan langit kolou kilap.

¹⁹ Ngota'anrih! Ihkam jari Ahkunonga kowasa ahkan ihkam duon nihjak lohi tutang kahtipkala tutang molot kokaro koba'as musuh, earo anai angihco ka ijo duon mocolahka ihkam.

²⁰Oluka kolourih, ararih jorih tului roh-roh ja'at te'et umba ihkam. Labih hinut ihkam jorih tului aran'kam tonyurat ang soruga.’’

²¹Aang ohkot rih ka'a, Yesus jorih tului konowasa bain Roh Pohotala. Yesus nuhtui, ‘‘Amai, Tuhan ijo mongowasa langit tutang tana! Ahku norimakasih ahkan-Mu, tului paring orih Ihko ngulimoh tahkan ulun-ulun ijo pitar tutang boilmu, tahpi Ihko ngorinah ahkan ulun-ulun ijo eam pitarhorahti. Orih ijo ngojorih ahtoi Amai.

²² Karon aang'co jari tonosorah Amai ahkak-Ku. Eam ihcobehti ka ngosono Anak, bohkonumba Amai. Eam anai ka'a ijo ngosono Amai bohkonumba Anak; tutang ulun-ulun ahkan iai Anak rih ka'a nokosono Amai.’’

²³Turus Yesus ngulos nopahjah murid-murid-Oh, pongohuli nuhtui umba iro bongoi, ‘‘Boutungrih ihkam tului jari nohto ijo ihkam nohto uhunituh tuh.

²⁴Tului ingat: Aro nabi tutang lahca jolik nohto ijo ihkam nohto hunituh tuh, tahpi iro eam nohtooh. Iro jolik ngonih, ijo ihkam ngonih hunituh tuh, tahpi iro eam duon ngonihoh.’’

²⁵ Pongohino ihcobehti guru agama lombut kani nyokohtung Yesus. Io ngisok, ‘‘Amai Guru, ahku pahtut nguan inon mangat duon norima pombolum ijo sojahti tutang kototahiu?’’

²⁶Yesus mutah, ‘‘Inon ijo tonyurat ang Surat Borasih? Koloukuwoh tiruk'mu tohou hal rih?’’

²⁷ Ulun rih mutah, “ ‘Ngasihrih Tuhan Pohotala'mu honong koohpah ahtoi'mu tutang koparing mboruan'mu, tutang umba kokaro koba'as'mu, tutang umba koparing akar'mu,’ tutang, ‘Ngasih umba sosama'mu kolou ihko ngasih umba arop'mu bongom.’ ’’

²⁸ “Putah'kam rih morong,’’ hion Yesus, ‘‘nguan orih mahka ihko ahkan bolum.’’

²⁹Tahpi guru agama rih kani ngomorong aropoh. Io ngisok, “Iai hawui jolahak'ku rih?’’

³⁰Yesus mutah, ‘‘Anai ihcobehti bahkas mosuluh tahkan Yerusalem nokuh Yerikho. Ang beteng jalan io tonyarang ponyilou, tonorapas kokaro ijo io tepuioh, io tonahup sotengah mahtoi, turus io tonohtah, pale-palek ang tohun jalan honong, ngarot ringan paham.

³¹Tobarung ihcobehti imam nyalan ka'a nyuru jalan orih. Kotihka tonohtooh ulun rih io ngoliut tahkan silan jalan, noturus ponyalaioh.

³²Kolourih ka'a umba ihcobehti ulun Lewi ijo nyalan ang anan; kotihka tonohtooh ulun rih io ngondoni tutang nokilikoh. Tahpi io ka ngoliut nokuh pohoi jalan turus nyalan turus.

³³ Tahpi pongohuli ihcobehti Samaria ijo rahat nomuoi, nyuru ka'a ang anan. Kotihka tonopahjahoh ulun rih, paham ngasi ahtoioh tului kosihan.

³⁴Mahka tongondonioh ulun rih, turus muhi ringan-ringanoh umba anggur tutang nawasoh umba minyak, pongohuli mohtong ringan-ringanoh rih. Uliorih io ngahtang ulun rih nokuh lihkut keledaioh bongoi, turus ngomiuoh nokuh ihco lohpou ponginapan tutang mohaluoh.

³⁵Anghawun ondouoh hino io ngomin duo kobilop duit perak tutang nongaoh ahkan tepun lohpou ponginapan rih tutang nuhtui, ‘Ihkam mohalu io, tutang amat anai karon-kotahpas ukus bohkon, ahkan ahku bayar noin amat ahku huli nokuh ohtoi.’ ’’

³⁶Pongohuli Yesus nondo karon-panderoh rih tutang ngisok numbun tuh, ‘‘Tahkan kotolu-tolu behti rih, ijo umoh numbun tiruk'kam, ijo nguai kolou hawuiarop umba ulun ijo tonyilou rih?’’

³⁷Guru agama ijo tongisok orih mutah, “Ulun ijo jari mondohop ulun rih.’’ “Olai, tulak tutang nguan kolouorih ka'a!’’ hion Yesus.

³⁸ Pongohino Yesus tutang murid-muridoh noturus ponyalan'ndo, tutang johcok ang ihco lowu. Ang anan ihcobehti bawi bogare Marta, marawe Yesus masap nokuh lohpouoh.

³⁹Marta anai ngina konduang bawi bogare Maria. Maria rih tuot doni Tuhan Yesus ngonih ajaran-ajaran-Oh.

⁴⁰Tahpi Marta deroh samasino umba gawiu ang lohpou rih, io tulak nokuh Yesus tutang nuhtui, ‘‘Tuhan, inonrih Tuhan eam poduli Maria mohonou ahku nguan ang bongok'ku iou? Nyuhu io dohop ahku!’’

⁴¹‘‘Marta, Marta!’’ hion Tuhan. ‘‘Ihko mihkoh tutang deroh niruk ijotuh tutang ijoorih;

⁴²padahal ijo hajo gunai tihkas ihco. Tutang Maria jari mitih ijo hinut, ijo eam ahkan tongomin tahkan io.’’