Read Ot Danum LUKAS 11 Bible Online

LUKAS 11 - Ot Danum bible

LUKAS 11

¹Ang sino ondou Yesus bodo'a ang ihco unuk. Opah bodo'a, anai ihcobehti tahkan murid-murid-Oh nuhtui, ‘‘Tuhan, cuba majar ihkai bodo'a, kolou Yohanes majar murid-muridoh bodo'a.’’

²Mahka Yesus nuhtui umba iro, ‘‘Amat ihkam bodo'a, nuhtuiohrih kolouituh, ‘Amai, Ihko ih Pohotala tihkas Ihco. Pios Ihko tonyembah tutang tomohoromat.

³Nonga nyinong ondou ukun ijo ihkai poruluoh.

⁴Apun karon-dusan ihkai, tului ihkai ka'a ngapun nyinong ulun ijo bosala umba ihkai. Tutang ararih mohonouoh ihkai nihou koporocaya aang ohkot ihkai tonihkos.’ ’’

⁵Yesus nuhtui umba murid-murid-Oh, ‘‘Jahkaoh ihcobehti tahkan louk ihkam tulak nokuh lohpou injahoh ang tohun ngolomi tutang nuhtui, ‘Konduang, pokuhtang ahku luhte tolu kobawak,

⁶tului injah'ku ijo rahat a'ang ponyalaioh, punai ih tondo ang lohpou'ku tutang ahku eam aro ukun ijo tononga'ku ahkaioh!’

⁷Jahkaoh injah'kam ijo ihko nokuh orih mutah koloutuh, tahkan luwang lohpouoh, ‘Ara nderoh ahku! Bauntukang jari tongulin tutang ahku hawui karon-anak'ku jari tiruh. Ahku eam duon kuat tutang nonga ino-inon ahkan'kam.’ ’’

⁸‘‘Turus koloukuwoh?’’ hion Yesus huli, ‘‘Ahku nuhtui, yo! Oluka ihko anairih injahoh, io eam ahkan monyun tutang nonga aangihco ahkan'kam. Tahpi tului ihko eam nanyam mia ahkan nyawot umba io hototurus, mahka io ahkan kuat ka'a tutang nonga ahkan'kam, inon ijo ihko poruluoh.

⁹Jadi, Ahku nuhtui umba ihkam: Nyawotrih, mahka tononga ahkan ihkam; ngurahrih, mahka ihkam ahkan duon; ngahtokrih, mahka bauntukang ahkan tonguap ahkan'kam.

¹⁰Tului ulun ijo nyawot ahkan norima; ulun ijo ngurah ahkan sombang, tutang ulun ijo ngahtok, ahkan konuap bauntukang.

¹¹Ang louk ihkam inon anai amai ijo nonga lohi ahkan anakoh amat io nyawot ohcin?

¹²Ata'ai nonga kahtipkala amat io nyawot kotoluh?

¹³Oluka ihkam ja'at, ihkam ta'an ka'a nonga ijo pios ahkan anak'kam. Mahihino Amai'kam ijo ang soruga! Io ahkan nonga Roh-Oh ahkan iro ijo nyawot umba Io!’’

¹⁴Ang sino ondou Yesus muhko roh ja'at soluka tahkan ihcobehti bisu. Uli roh ja'at rih soluka tahkan ulun rih nopara dahpot nuhtui. Aro ulun helan,

¹⁵ tahpi anai ijo nuhtui, ‘‘Io duon muhko roh ja'at orih, tului kowasa Baalsebul, kopala roh ja'at rih.’’

¹⁶ Anai ka'a ulun-ulun bohkon ijo kani nyokohtung Yesus, jadi iro nyawot Io nguan kahtahelan ahkan tanda ijo Io lombut tahkan Pohotala.

¹⁷Tahpi Yesus ngota'an konohuang iro. Mahka Io nuhtui umba iro, ‘‘Amat ihco nogara bobolah a'ang habarih-habarih ijo saling homusuh, nogara rih eam ahkan tahan. Tutang ihco bobuhan ijo bobolah-bolah tutang homusuh ihco sama bohkon, ahkan lonyuh.

¹⁸Kolourih ka'a aang kolahca'an Sehtan; amat ihco barih hokolahi umba barih ijo bohkon, kolahca'an rih ahkan bokahkas. Ihkam nohou ijo Ahku muhko roh ja'at rih bain kowasa Baalsebul.

¹⁹Amat kolourih, hapan kowasa iai murid-murid'kam muhko roh-roh ja'at rih? Murid-murid-Mu rih bongoi ijo ngorinah ihkam ijo sala!

²⁰Tahpi Ahku muhko roh ja'at rih umba kowasan Pohotala, tutang orih rimai ijo Pohotala jari nopara moretah ang marak ihkam.

²¹Amat ihcobehti ijo ba'as, tutang bosonjata cukup, ngindoi lohpouoh bongoi, paring ramuioh ahkan solamat.

²²Tahpi amat ihcobehti, ijo molowi ba'as monyarang tutang mopokalah io, mahka ulun ijo molowi ba'as rih ahkan ngomin paring sonjata ijo konina bain tehpun lohpou rih, turus hobagi-bagi paring ramui-ramuioh.

²³ Ulun ijo eam barih Ahku, kotu'uioh molawan Ahku tutang ulun ijo eam dohop Ahku, kotu'ui io ngakas gawik-Ku!’’

²⁴‘‘Amat jari roh ja'at nohtah ihcobehti, roh ja'at rih kodiling ngurah unuk-unuk ijo tojah ngurah unuk ngoronghasongoh, tahpi io eam nyombangoh. Tului orih io nuhtui, ‘Ahku ahkan buli nokuh lohpou ijo jari ahku nohtahoh!’

²⁵Ohkot io johcok ang anan, io nyombang lohpou rih borasih tutang tosusun pios.

²⁶Turus io tulak tutang ngomin pihtu roh bohkon, ijo paham koja'atoh tahkan io. Pongohino rih iro nyolong nokuh luwang ulun rih turus mohcon ang anan. Tutang kojoriaioh ulun rih monjadi paling ja'at tahkan pahtukoh.’’

²⁷Uli Yesus nuhtui kolourih, ihcobehti bawi tahkan louk ulun aro rih nuhtui umba Yesus, ‘‘Tu'u-tu'u kosanang ulunbawi ijo nganak tutang potusu Ihko!’’

²⁸Tahpi Yesus mutah, ‘‘Labih sanang hino ulun ijo ngonih auh Pohotala tutang norimaoh!’’

²⁹ Pondehan ulun-ulun ngorumbung Yesus, Yesus turus ka'a nuhtui, ‘‘Eam inon koja'at ulun-ulun zaman tuh. Iro nyawot ihco kahtahelan mangat iro dahpot porocaya umba Ahku, tahpi iro eam ahkan tononga ihco kahtahelan ka'a, kocoali kahtahelan Nabi Yona.

³⁰ Samakolou Nabi Yona ijo mopohelan bagi ulun-ulun kohta Niniwe, kolourih ka'a Anak Ulun ahkan monjadi ihco kohelanan bagi ulun-ulun jaman tuh.

³¹ Aang ondou kiamat, Ratu lowu Solahtan ahkan tombok homboh ulun-ulun jaman tuh, tutang ndawa iro. Tului ahkan ngonih ajaran Salomo ijo pihtar, Ratu rih nguan ponomuoioh ijo mahcu samasino tahkan saran tana. Tahpi ang ohtoi uhuntuh anai ijo labih hajo tahkan Salomo!

³² Aang ondou kiamat ulun lowu Niniwe ahkan tombok homboh ulun-ulun jaman tuh, tutang ndawa iro, tului ulun Niniwe rih hubah tahkan dusa-dusan'ndo, kotihka Yona kotbah ahkan'ndo. Tahpi ang ohtoi uhuntuh anai ijo molowi hajo tahkan Yona!’’

³³ ‘‘Eam anai ulun ijo nutang sumbu turus monyuhukoh ata'ai nuhtupoh umba potoran. Io ahkan ngina sumbu rih ang pa'an sumbu, mangat ulun ijo nyolong duon nohto koloangoh.

³⁴Mahta anairih sumbu ahkan behti. Amat mahta'kam tokining hapus behtin'kam boloang-ngorolondang. Tahpi amat mahtan'kam kabus, behtin'kam nyolung pindong-kihtop.

³⁵Tului orih, bua-buah, ara nyiring koloang ijo anai ang ihkam rih monjadi pindong.

³⁶Amat sohopus behtin'mu, boloang, tutang eam aro 'cobagian ka ijo pindong, mahka sohapus behtin'kam rih boloang ngorolondang kolou ngorolondang koloang sumbu.’’

³⁷Uli Yesus tondo hopander, ihcobehti ulun Parisi morawe Io kuman ang lohpouoh. Mahka Yesus tulak kuman ang anan.

³⁸Ulun Parisi rih helan nohto Yesus kuman tutang eam aro muhi longoi-Oh soun, numbun aturan agama.

³⁹Tului rih Tuhan nuhtui umbaoh, ‘‘Punaioh ihkam ulun-ulun Parisi kopahtuhoh muhi pihkan tutang piring hila luar iou, tahpi ang luwang aropoh bongoi tuwi umba kokaras tutang koja'at.

⁴⁰Ihkam bobaleh! Eamrih jari Pohotala ijo nguan hila luar orih, nguan hila luwangoh ka'a?

⁴¹Ijo anai luwang pihkan tutang piring'kam rih, iorih ihco harus ihkam nongaoh ahkan ulun-ulun porosbolum. Umba cara kolourih, paringoh ahkan monjadi borasih ahkan'kam.

⁴² Colahka ihkam, ulun-ulun Parisi! Bua komulan'kam kolou tindungoh selasih tutang enggu tutang rorampah-rorampah bohkonoh, ihkam nonga sepersopuluoh ahkan Pohotala, tahpi koadilan tutang ngasih umba Pohotala eam ihkam nohtoani. Podahal orih ijo koharusoh ihkam nguai, tutang eam mohonou ijo bohkon-bohkonoh ka'a.

⁴³Colahka ihkam, ulun-ulun Parisi! Ihkam jolik unuk-unuk ijo horomat ang luwang lohpou sombayang, tutang jolik duon horomat ang pasar-pasar.

⁴⁴Colahka ihkam! Ihkam sama umba kolowong ijo eam aro nisan, ijo tongihik-ngihik ulun hawoi earo ngota'an.’’

⁴⁵Ihcobehti guru agama nuhtui umba Yesus, ‘‘Amai Guru, umba auh-auh orih, Amai mohina ihkai ka'a!’’

⁴⁶Yesus mutah, ‘‘Colahka ihkam ka'a, guru-guru agama! Ihkam nyuhu nguan hal-hal ijo bohali, tutang nonga aturan-aturan ijo bahat, tahpi ihkam bongom, isut ka eam kani dohop ulun bohkon nguaioh.

⁴⁷Colahka ihkam! Ihkam mangun tanom ahkan karon-nabi, ijo orih tomunu bain tahtu ajuh'kam bongom.

⁴⁸Jadi ihkam bongom ngahku ijo ihkam sotuju inon ijo jari tonguan bain tahtu ajuh'kam; tului puna iro ijo munu karon-nabi rih, tutang ihkam ijo mangun tanom'ndo.

⁴⁹Orih tuluioh, Kopihtar Pohotala nuhtui, ‘Ahku ahkan ngirim ahkan iro nabi-nabi tutang suruhan-suruhan-Ku; tongai tomunu tutang tongai tonoporos!’

⁵⁰Pohotala nguan kolourih, mangat ulun-ulun jaman tuh tomohukum tului munu ijo konuai tohimo paring nabi tahkan kolunon tona'oi,

⁵¹ pahtukoh tahkan munu umba Abel johcok aang tomunuoh Sakharia, ijo nyolung ang holat mesbeh tutang Lohpou Tuhan. Porocaya ih: Ulun-ulun jaman tuh, musti ahkan tomohukum tului paring orih.

⁵²Colahka ihkam, guru-guru agama! Kuhci hapa nguap bauntukang pongotaan sonuhuk bain ihkam, tahpi ihkam bongom eam kani nyolong nokuh luwang mangat ngurah pongosono rih. Tobalikoh ihkam ngolapong lapong jalan ulun-ulun ijo kani nyolong ahkan luwangoh!’’

⁵³Kotihka Yesus nohtah unuk rih, guru-guru agama tutang ulun-ulun Parisi bosingi mongecam Yesus honong paham. Iro nopara mosi-mosi Io, mangat Io kani nuhtui nohou aro hal.

⁵⁴Tutang pondehan orih iro, nohtoani Io moro-morong, mangat nawan aangihco ijo sala konohawot-Oh.