Read Ot Danum LUKAS 12 Bible Online

LUKAS 12 - Ot Danum bible

LUKAS 12

¹ Bokuhjan-kuhjan ulun-ulun ngorumbung Yesus nyiring anai ijo nihcak-ngihik pa'an injahoh. Pondehan ulun-ulun rih hokorumbung, Yesus nuhtui umba murid-murid-Oh, ‘‘Bua-buah toharep ragin ulun Parisi, maksud-Ku kopura-pura'ndo.

² Eam anai ijo bosuhuk ijo eam ahkan gihtan, tutang eam anai ijo tongulim ijo eam ahkan ponokarah.

³Ijo ihkam nuhtuioh ang ohkot ngolomi ahkan konahan ang ohkot koboloang; tutang ijo ihkam mongosinok ang tolingan ulun ang luwang tahkun bokatop, ahkan tonosiar ulun nokuh umo-umohoh.’’

⁴‘‘Ingatrih, karon-jolahak-Ku! Ara mihkoh umba iro ijo munu behti, tahpi eam duon nguan labih tahkanumba orih.

⁵Piosrih Ahku ngorinah ahkan'kam, iai ijo harus ihkam mihkohoh. Mihkohrih umba Pohotala! Tului amat uli munu, Io bokowasa ka'a ngondian nokuh norahka! Porocayarih, Io ijo harus ihkam mihkohoh.

⁶Limo kungan bulung opit tomorahkang legai duo duit ijo pokokoikoh. Oluka kolourih eam ihcokungan ka tonolingou Pohotala.

⁷Balou ang kuhung'mu jari tongihtung paringoh, tului orih ara mihkoh; ihkam labih borega tahkan bulung-bulung opit rih!’’

⁸‘‘Ingat tu'u-tu'u: Ulun ijo ngahkuoh ang tohimo ulun aro tului io murid-Ku, io ahkan tomongahku ka'a bain Anak Ulun ang tohimo molehkat-molehkat Pohotala.

⁹Tahpi ulun ijo ngulim ang tohimo ulunaro ijo io murid-Ku, io ahkan tongulim ka'a bain Anak Ulun ang tohimo karon-molehkat Pohotala.

¹⁰ Amatmira ulun ijo nuhtui aang'co ngolawan Anak Ulun, io duon tongapun; tahpi amatmira io mohina Roh Pohotala, io eam duon tongapunoh.

¹¹ Amat ihkam konomin nokuh karon-lohpou sombayang ahkan tomosara ang tohimo pomoretah ata'ai pongowasa, ararih mihkoh tohou koloukuwohoh ihkam harus mombela arop, ata'ai tohou inon ijo harus ihkam nuhtuioh.

¹²Tului inon ijo harus ihkam nuhtuioh rih ahkan tomara bain Roh Pohotala ahkan'kam ang ohkotoh.’’

¹³Ihcobehti tahkan louk ulun aro nuhtui umba Yesus, ‘‘Amai Guru, cuba Amai nyuhu konduang'ku nonga ahkak'ku ihcobagian tahkan ponahtou ijo tonohtah amai ihkai.’’

¹⁴Yesus mutah, ‘‘Konduang, iairih potuot Ahku monjadi hakim ata'ai tuhkang magi waris ahkan ihkam duo?’’

¹⁵Pongohuli, ahkan paring ulun ijo anai ang anan Yesus nuhtui, ‘‘Bua-buahrih, tutang borondong, ara nyiring ihkam bokuhu. Tului pombolum ulun eam bogatung umba ponahtouoh, oluka ponahtouoh holowi-holea.’’

¹⁶Turus Yesus nyorihta porobasa tuh, ‘‘Anairih ihcobehti ulun tahtou, io tepun tana ijo nonga aro hasir.

¹⁷Ulun tahtou rih nopara moniruk hino a'ang ahtoi, ‘Jadi eam arondai unukoh ngina hasir tana'ku. Inon ahkar'ku huntuh?’

¹⁸Pongohuli io moniruk hino tutang nuhtui umba aropoh bongoi, ‘Olai, ahku anai ahkar; koraking-koraking'ku ahkan ahku nyuhu ngahkasoh, turus ahku mangun ijo paling hajo. Ang anan ahku ngina paring gandum'ku tutang ponahtou-ponahtou'ku ijo bohkon.

¹⁹Pongohino ahkan ahku bopander honong arop'ku bongok: Ihko boutung! Kokaron ijo pios jari ahku tepuioh, tutang eam ahkan opah pira-pira toun. Nondo-bo'o iou uhuntuh! Kuman ngorih iou tutang nginyamohrih komomih pombolum'mu!’

²⁰Tahpi Pohotala nuhtui umba io, ‘Oi uong! Ngolomi tuh ka'a ihko ahkan mahtoi, turus iairih ijo ahkan tepun paring ponahtou'kam ijo jari tonipun'kam ahkan arop rih?’

²¹Kolourih kojoriai umba nyinong ulun ijo bousaha monjadi tahtou ahkan arop, tahpi eam bousaha monjadi tahtou ang mahtan Pohotala.’’

²²Turus Yesus nuhtui umba murid-murid-Oh, ‘‘Orih kotuluioh Ahku nuhtui, ‘Ara mihkoh tohou pombolum'kam, iorih inon ijo ahkan ihkam kumai, ata'ai inon ijo ahkan ihkam hapaoh.’

²³Pombolum anairih labih boguna tahkan ukun, tutang behti labih boguna tahkan pokahjan.

²⁴Nohtoanirih bulung-bulung okak! Iro eam ngombulan, tutang ngohtom, eam ka'a tepun gudang ata'ai koraking. Tahpi Pohotala mohaga iro! Ihkam labih borega umba bulung-bulung!

²⁵Iai tahkan louk ihkam ijo tului kihkohoh duon ngombu umuroh oluka honjiot?

²⁶Amat hal 'cokokoik orih mahi eam duon ihkam nguaioh, ombai mihkoh tohouumba hal-hal bohkon?

²⁷ Nohtoanirih koloukuwoh dolak-dolak bahkung bolum; dolak-dolak rih eam bogawi, eam ka'a monatangbenang. Tahpi Lahca Salomo ijo kolourih kotahtouoh ka eam hapa pokahjan ijo kolou kopion dolak bahkung rih!

²⁸Uru ang padang bolum ondou tuh, tutang ondou hawon tononyoha lingis. Tahpi Pohotala ngopion uru rih kolouorih kopioioh. Mahihino ihkam! Tahpi ihkam kurang porocaya!

²⁹Jadi, ararih mihkoh tutang bimbang tohou inon ijo ahkan ukun'kam tutang korih'kam.

³⁰Hal-hal kolourih ngodulu bain ulun ijo eam kosono Pohotala. Padahal Amai'mu ta'an ijo ihkam porlu paring orih.

³¹Tahpi ihkam pahtut bousaha mangat Pohotala moretah ngosan pombolum'kam, mahka ijo bohkon orih ahkan tononga Pohotala ka'a ahkan'kam.’’

³²‘‘Ihkam ijo tihkas koik jamalahoh ara mihkoh! Tului Amai'kam sanang nonga ahkan'kam borehkat tahkan Pomoretah-Oh.

³³Modagangoh ponahtou'mu, tutang nongarih duitoh ahkan ulun porosbolum. Naparih ahkan'kam kambut ijo eam dahpot kupit, iorih ponahtou ijo tongina ang soruga. Ponahtou rih eam tou nihou bain ponahkou eam duon ngomiuoh, tutang somahtoi eam duon morusakoh.

³⁴Tului ang amoh ponahtou'kam, ang anan ka'a ahtoi'kam!’’

³⁵ ‘‘Bojaga-jaga nohimo nyinong hal. Ihkam harus hototurus botahtap hopokajan tutang sumbu'kam hototurus bolum,

³⁶ sama kolou pohalu-pohalu ijo rahat botahtap ngindoi tuanoh buli tahkan pesta kawin. Amat tuan rih buli tutang ngahtok bauntukang, iro ahkan jeleng nguap bauntukang.

³⁷Eaminonrih koutungoh pohalu orih ijo sombang rahat ngindoi ang ohkot tuanoh lombut. Porocayarih: tuan orih ahkan botahta-tahtap tutang nyuhu pohalu-pohaluoh rih tuot, turus io nahalu iro.

³⁸Eaminonrih koutungoh pohalu-pohalu orih, amat tuanoh rih nyombang iro rahat tahtap ngindoi, oluka tuan rih lombut ang tohun ngolomi ata'ai labih dandah umba orih!

³⁹ Ingatrih tuh! Jahkaoh, tuan lohpou rih ta'an jam pira ponahkou lombut, io ahkan monjaga mangat ponahkou eam duon nyolong nokuh luwang lohpouoh.

⁴⁰Tului orih ihkam ka'a harus bojaga-jaga, tului Anak Ulun ahkan lombut aang ohkot ijo eam ihkam mongira-ngiraoh.’’

⁴¹‘‘Tuhan, inon polajaran rih Tuhan nituoh ahkan ihkai ata'ai umba paring ulun?’’ hion Petrus.

⁴²Tuhan mutah, ‘‘Iai pohalu ijo te'et tutang pihtar, nyiring potuot bain tuanoh monjadi kopala, ngosan karon-pohalu bohkon ahkan io nonga iro ukun ang ohkotoh?

⁴³Eaminonrih kosanangoh pohalu orih amat tuanoh buli tutang sombang io rahat nguan aang-konuai!

⁴⁴Porocayarih: tuan rih ahkan morocaya ngina karon-ponahtouoh ahkan pohalu orih.

⁴⁵Tahpi amat pohalu orih ngira aang ahtoioh, ‘Tuan'ku magun tahi kolawui buli,’ turus io nopara nahup paring pohalu bohkon tutang kuman ngorih nyiring bobusou,

⁴⁶mahka tuanoh ahkan buli aang ondou tutang jam ijo eam tongohu-ngohu. Tutang pohalu rih ahkan duon hukuman ijo bahat bain tuanoh, tutang ngindiu hihco umba ulun-ulun ijo eam te'et ahkan Pohotala.

⁴⁷Pohalu orih ijo kota'an konohuang tuanoh, tahpi eam botahtap tutang eam nguan konohuang tuanoh rih ahkan tonomahcat ijo karas.

⁴⁸Tahpi pohalu ijo eam ngota'an konohuang tuanoh, pongohino nguan angihco ijo sala nyiring harus tonopahcat, honong mohian ih. Tului ulun ijo tononga aro ahkan tonyawot aro ka'a. Tutang ulun ijo jari morocaya aro, tahkan io tonyawot aro hino.’’

⁴⁹‘‘Ahku lombut ahkan polombut ponyaha ang kolunon tuh. Eaminon kopiosoh amat bahooh jari ngonyelak!

⁵⁰ Magun anai koporos paling bahat ijo harus Ahku nyuruoh. Tutang ahtoi-Ku bolisah samasino sounumba orih nyolung.

⁵¹Kuwohrih ihkam ngohu Ahku lombut ahkan ngomin kobuah, nokuh kolunon? Eam, bohkon kobuah, molekan hokolawan.

⁵²Nopara tahkan uhunituh, jolahan anairih tahkan limo behti ahkan hokolawan, tolu molawan duo, ata'ai duo molawan tolu.

⁵³ Amai ahkan ngolawan anakoh bahkas, tutang anak bahkas molawan amaioh. Inaioh ngolawan anakoh ijo bawi, tutang anak bawi ahkan ngolawan inaioh. Upuoh ahkan ngolawan monatuioh ijo bawi, tutang monatui ijo bawi ahkan ngolawan upuoh.’’

⁵⁴Yesus nuhtui ka'a ahkan ulun aro, ‘‘Amat ihkam nohto bounondou nuhkat ang hila barat, turus ihkam ngohawot, ‘Ahkan uhjan.’ Tutang morong tu'u uhjan.

⁵⁵Amat ihkam komo bohiu lombut tahkan hila solahtan, ihkam ngohawot, ‘Ahkan notang.’ Tutang morong tu'u notang.

⁵⁶Ihkam ijo jolik pura-pura! Ihkam duon nujum totang ondou tutang nohto kolou langit tutang tana. Ombai tanda-tanda jaman tuh eam tou ihkam nujumoh?’’

⁵⁷‘‘Ombai ihkam eam mutusoh bongom inon ijo morong?

⁵⁸Amat anai ulun ngadu ihkam nokuh bosara, bousaha soduo-duonoh ahkan ngombuah porokara orih umba io houn, pondehan ihkam magun ang beteng jalan. Amat eam, noin io nunda ihkam nokuh nohimo hakim, tutang hakim rih ahkan nyarah ihkam nokuh polisi, tutang polisi posolong ihkam ahkan luwang sipir.

⁵⁹Porocayarih! Ihkam eam ahkan soluka tahkan sipir, hounumba danda'kam lunas.’’