Read Ot Danum LUKAS 13 Bible Online

LUKAS 13 - Ot Danum bible

LUKAS 13

¹Aang ohkot rih ulun mborihta ahkan Yesus tohou pira-pira ulun Galilea ijo ponunu Pilatus, kotihka iro rahat nonga pononga ahkan Pohotala.

²Norima kabar orih, Yesus nuhtui, ‘‘Tului ulun-ulun Galilea ijo ponunu kolourih, ihkam ngira orih buktioh iro paling bodusa, tahkan paring ulun Galilea ijo bohkon?

³Samasino eam! Tahpi ingatrih: amat ihkam eam hubah tahkan dusa-dusan'kam, ihkam paring ahkan mahtoi ka'a kolou iro.

⁴Koloukuwoh ka'a umba jalu balas ulun ijo palus ang Siloam kotihka candi rih nopahas iro? Ihkam ngohu rih korinah iro paling bodusa tahkan paring ulun-ulun bohkon ijo mohcon ang Yerusalem?

⁵Samasino eam! Sino hino Ahku nuhtui: Amat ihkam eam hubah tahkan dusa-dusan'kam, ihkam paring ahkan mahtoi ka'a kolou iro.’’

⁶Uliorih Yesus nyorihta ka'a porobasa tuh, ‘‘Anai ihcobehti anaingina pu'un sikun ang kobun angguroh. Sino ondou io tulaklah ngurah buaoh ang pu'un rih, tahpi eam nyombangoh ihcoluang buaoh.

⁷Jadi, io nuhtui umba tuhkang kobunoh, ‘Nohto, jari tolu toun ahku lombut ngurah buaoh sikun tuh, tahpi eam mua ihcokoluang ka'a. Towongrih pu'un tuh! Io tihkas ngohpah zat ukun tahkan tana!’

⁸Tahpi tuhkang kobun orih mutah, ‘Nauh ih io bolum ihcotoun tuh hino, tuan. Ahku ahkan nyangkul tana hokodilingoh tutang ngina pupuk.

⁹Mihkoh sino huli io tou mua toun noharep. Tahpi amat eam, tou tuan nyuhu ulun nowongoh.’ ’’

¹⁰Aang sino ondou Sabat, Yesus majar ang ihco lohpou sombayang.

¹¹Ang anan anai ulunbawi ijo jari jalu balas toun poros, tului anai roh ja'at ang luwang behtiuoh. Ulunbawi rih nyohkot, tutang samasino eam duon tombokmorong.

¹²Kotihka Yesus nohtooh, na'ahrih Io umbaoh, ‘‘Ibu, ihko pios tahkan ponyahkit'mu!’’

¹³Turus Yesus ngina longoi-Oh nokuh ngosan bawi rih, tutang aang uhun orih ka'a io tombokmorong, turus monara Pohotala.

¹⁴ Kopala lohpou sombayang rih bosingi, kotului Yesus ijo ngopios ulun ang ondou Sabat, tului orih io nuhtui umba ulun-ulun, ‘‘Anai onom ondou ahkan bogawi; lombutrih ang ondou-ondou rih ahkan ngopios, ararih ang ondou Sabat!’’

¹⁵Tuhan mutah, ‘‘Pura-pura ihkam tuh! Aang ondou Sabat paring ulun molohpas sapi ata'ai keledaioh tahkan pahkotoh tutang ngitot soluka ahkan nunga korih akaioh.

¹⁶Nah, ang ohtoi uhuntuh anai ihcobehti bawi lihit Abraham ijo jari jalu balas toun kotohiuoh konongarut bain Sehtan. Inon io eam tou tonguwat tahkan karutoh rih ang ondou Sabat?’’

¹⁷Putah Yesus rih nguan polawan-polawan Yesus mia samasino; tahpi paring ulun-ulun bohkonoh jolik nohto karonaang ijo helan ijo konuan Yesus.

¹⁸Yesus ngisok, ‘‘Amat Pohotala moretah, koloukuwoh koada'aioh? Umba inon ka'a Ahku nindungoh?

¹⁹Koada'aioh kolou porobasa ulituh. Ihco luang sawi omin bain ihcobehtiulun, turus ngomulanoh ang komulan. Luang rih bolum turus monjadi pu'un, tutang bulung-bulung nguan kosalahoh, ang da'an-da'an pu'un rih.’’

²⁰Sino hino Yesus ngisok, ‘‘Amat Pohotala moretah, umba inon Ahku nindung koada'aioh?

²¹Koada'aioh kolou ragi ijo konomin bain ihcobehti bawi turus ngoluhtotoh umba opat pulu lihter galapung, nyiring kamir paringoh.’’

²²Aang ponyalaioh nokuh Yerusalem Yesus nyuru lowu-lowu tutang desa-desa sambir majar.

²³Turus anai ulun ngisok umba Io, ‘‘Amai, inon baya isut ih ulun ijo ahkan tonyolamat?’’ Yesus mutah,

²⁴‘‘Bousaharih ahkan nyolong nyuru bauntukang ijo sihki. Tului, ingat! Aro ulun ngurah jalan nyolong, tahpi eam tou.

²⁵Aang ohkot tuan lohpou monyun tutang ngatop bauntukangoh, ihkam magun tombok ang luar tutang nopara ngahtok-ngahtok sambir nuhtui, ‘Tuan nguap bauntukang ahkan ihkai!’ Tuan rih ahkan mutah, ‘Ahku eam ngota'an ihkam lombut tahkan umoh!’

²⁶Ihkam ahkan mutah, ‘Ihkai jari kuman ngorih homboh Tuan tutang Tuan jari majar ahkan ihkai ka'a ang jalan-jalan lowun ihkai!’

²⁷ Tahpi Tuan rih ahkan nuhtui hino, ‘Ahku eam ngota'an ihkam lombut tahkan umoh. Hihkas tahkan ohtoi, ihkam ijo nguan koja'at!’

²⁸ Aang ohkot ihkam nohto Abraham, Isaak, tutang Yakub homboh paring nabi hokojorih mohcon ang Tana Bohua Ain Pohotala, ihkam ahkan nangihnongok tutang ngarot, tului ihkam bongom tomuhko nokuh luar!

²⁹Ulun-ulun ahkan lombut tahkan timur tutang barat, tahkan utara tutang solahtan, tutang ahkan hokojorih mohcon ang Tana Bohua Ain Pohotala.

³⁰ Punakotu'uioh, anai ulun ijo pongo ahkan monjadi ulun ijo pahtuk, tutang anai ulun ijo pahtuk ahkan monjadi ulun ijo pongo.’’

³¹Aang ohkot rih ka'a, anai pira-pira ulun Parisi lombut nokuh Yesus tutang nuhtui, ‘‘A'ai mohcon ang ohtoi! Tulakrih nokuh unuk bohkon, tului Horodes kani munu Ihko.’’

³²Yesus mutah, ‘‘Hihkas nuhtui ahkan ulun ijo eam anai gunaioh rih, ‘Ondou tuh tutang hawun Ahku muhko roh ja'at tutang ngopios ulun poros, tahpi ang ondou kotolu, Ahku ahkan ngohpahoh gawik-Ku.’

³³Oluka kolourih Ahku harus noturusoh ka'a ponyalak-Ku ondou tuh, hawun tutang uli hawun, tului eam pios ihcobehti nabi tonomunu ang luar Yerusalem.

³⁴Yerusalem, Yerusalem! Nabi-nabi ihko munuoh! Ulun-ulun soruhan Pohotala ihko muhkahoh umba bahtu nyiring mahtoi! Jari pira tikat Ahku jolik ngoraup paring ulun'mu kolou pohuk ngolindung karon-anakoh ang pinda ilatoh, tahpi ihko eam kani!

³⁵ Tului orih Pohotala eam kani ngohomboh ihko. Ngota'anrih, nopara tahkan huntuh ihko eam nohto Ahku hino, nyiring ihko nuhtui, ‘Tomorekat Io ijo lombut a'ang aran Tuhan.’ ’’