Read Ot Danum LUKAS 14 Bible Online

LUKAS 14 - Ot Danum bible

LUKAS 14

¹Aang sino ondou Sabat Yesus tulak kuman ang lohpou ihcobehti tokoh Parisi. Aang anan ulun-ulun nohtoani Yesus honong tolihti.

²Mahka lombut nokuh Yesus ihcobehti ulun ijo bolatung ijo pa'ai longoioh, loting-loting.

³Turus Yesus ngisok umba guru-guru agama tutang ulun-ulun Parisi ijo anai ang anan, ‘‘Numbun hukum agaman ihto, tou ihto ngopios ulun poros ang ondou Sabat ata'ai eam?’’

⁴Guru-guru agama tutang ulun-ulun Parisi rih tonih ih. Turus Yesus na'ah ulun rih, tutang ngopios io, pongohino rih nyuhu io tulak.

⁵ Uliorih rih Yesus nuhtui umba ulun-ulun, ‘‘Jahkaoh ihcobehti tahkan ihkam, anaingina ihcobehti anak, ata'ai ihcokungan sahpi, ijo botahak nokuh aang luwang sumur ang ondou Sabat, inon io eam ahkan bojoin nguhutoh bolua anak orih ata'ai sahpi orih, ondou orih ka'a?’’

⁶Tahpi eam ihcobehti ka duon mutah auh Yesus tohou hal orih.

⁷Yesus nohto aro ulun tipen ijo mitih unuk-unuk ijo paling pios. Tului orih Io nonga ajar tuh ahkan iro paring.

⁸ ‘‘Amatmira ihkam torawe tipen nokuh pesta kawin, ara tuot ang korusi ijo horomat. Tului ara-ara lombut ihcobehti bohkon ijo labih tohoromat tahkan'kam jari torawe ka'a,

⁹nyiring tuan lohpou ijo jari morawe boro rih, toropaksa lombut nokuh'kam tutang nuhtui, ‘Apun konduang, unuk tuh jari tonahtap ahkan amai atuh.’ Mahka honong paham komia ihko topaksa tuot ang unuk ijo paling lihkut.

¹⁰Tului orih, amatmira ihkam tonorawe, mitihrih unuk ijo paling lihkut, mangat tuan lohpou ahkan lombut tutang nuhtui umba'kam, ‘Aring, has tuot ang unuk ijo labih pios.’ Umba kolourih ihkam tohoromat, ang tohimo ulun aro tipen ijo bohkon.

¹¹ Tului nyinong ulun ijo ngondiang aropoh ahkan tongopinda, tahpi ijo ngopinda aropoh ahkan tongondiang.’’

¹²Turus hion Yesus umba tuan lohpou rih, ‘‘Amat ihko morawe ulun ahkan pesta kuman hondou ata'ai kuman ngolomi, ara morawe injah-jolahan'kam, ata'ai aring-konduang'kam, ata'ai ka'a jolahan'kam ijo tahtou. Tului noin iro ahkan morawe ihko hino, tutang hapan kolouorih ihko norima balos ngosan anggawin'kam.

¹³Jadi, amat ihko nguan pesta, morawerih ulun porosbolum, ulun cahcat, ulun kaet-kehcang tutang ulun bobulen.

¹⁴Ihko ahkan tomorehkat, tului ulun-ulun rih tutang eam ahkan duon mbalasoh kopios'kam rih. Kopios'kam orih ahkan tomalos bain Pohotala aang ohkot ulun-ulun ijo morong monyun huli tahkan popahtoi.’’

¹⁵Aang ohkot anai ihcobehti ijo kuman homboh ang anan ngonih auh Yesus, io nuhtui, ‘‘Utung samasino ulun ijo ahkan kuman homboh umba Pohotala, amat Io lombut kolou Lahca!’’

¹⁶Tahpi Yesus nuhtui umba ulun orih rih, ‘‘Aang ihco ohkot anai ihcobehti nguan pesta ijo hajo tutang morawe aro ulun.

¹⁷Kotihka jari ohkotoh ahkan nopara pesta, ulun rih nyuhu pohalu tulak nokuh ulun-ulun torawe tutang nuhtui, ‘Has lombut, paringoh jari botahtap!’

¹⁸Tahpi iro paringoh, mihco honong mihco nopara nyawot apun. Ijo pahtuk nuhtui umba pohalu orih rih, ‘Ahku punai ih moli ihco kolambar tana, tutang perulu ahku tulak njongukoh. Apunrih ahku.’

¹⁹Ijo bohkon nuhtui, ‘Ahku punak'ku moli limo pasang sahpi tutang kani mocubaoh sahpi-sahpi rih, apunrih ahku.’

²⁰Ijo bohkon hino nuhtui, ‘Ahku punak kawin, tului orih ahku eam duon lombut.’

²¹Pohalu orih buli tutang monyorihta hal rih ahkan tuanoh. Tuan rih bosingi samasino, tutang nuhtui umba pohaluoh, ‘Jeleng, hihkas nokuh jalan-jalan tutang hontas-hontas ang kohta. Ngomin nokuh ohtoi ulun porosbolum, ulun cahcat, ulun bobulen tutang ulun mahtoi behtiu.’

²²Pongohino jihpon rih nuhtui, ‘Tuan, poretah tuan jari ihkainguai, tahpi unuk magun aro.’

²³Turus tuan rih nuhtui, ‘Tulak nokuh jalan-jalan hajo tutang jalan koik ang luar kohta tutang hojojuan ulun-ulun lombut nyiring lohpou'ku tuwi.

²⁴Ingatrih! Eam ihcobehti ka tahkan louk ulun-ulun torawe ijo jari tomorawe rih, ahkan komokomomih ukun'ku ang pesta tuh!’ ’’

²⁵Aro ulun homboh nyalan homboh Yesus. Yesus ngulos nohto kolihkut tutang nuhtui umba iro,

²⁶ ‘‘Amat ulun lombut nokuh Ahku, tahpi io labih masi inaioh ata'ai amaioh, oruhoh, anakoh, konduang-konduangoh, malah aropoh bongoi, io eam dahpot monjadi murid-Ku.

²⁷ Ulun ijo eam kani ngohtun sopolahkioh tutang ngohasurih Ahku, eam tou monjadi murid-Ku.

²⁸Amat ihcobehti tahkan ihkam kani nombok ihcokobawak candi, botantu io ahkan tuot ngihtung houn, bolanjaoh mangat io ngota'an, inon duitoh suhkup ahkan pojadioh candi rih ata'ai eam.

²⁹Tului amat nyahta eam duon pojadioh, podahar kahlangoh jari tonapa, mahka paring ulun ijo nohto ang konuai rih ahkan ngonjea io.

³⁰Iro ahkan nuhtui, ‘Iih, ulun tuh mangun, tahpi eam duon mopojadi!’

³¹Amat ihcobehti lahca, ijo anai anaingina sopulu kujan sorodadu, kani parang umba lahca bohkon ijo anai duo pulu kujan sorodadu, botantu lahca rih tuot ngitung holu, inon io cukup ba'as ahkan molawan musuhoh rih.

³²Amat io kota'an ijo io eam ba'as, tontu ang ohkot musuh mahcu, io ahkan ngirim soruhan aiuoh ahkan nyawot hokobuah.’’

³³Kolaiouoh hino Yesus nuhtui, ‘‘Kolourih ka'a umba ihkam, eam kani ihcobehti ka tahkan ihkam duon monjadi murid-Ku, amat io eam monongaoh kokaro-karooh.’’

³⁴‘‘Tonyu rih pios, tahpi amat tonyu rih monjadi tawah duon kah ulun ngomohitoh huli?

³⁵Eam anai gunai hino, pios ahkan umo oluka ahkan pupuk. Jadi tondian ih. Amat anai tolinga pios ngonihoh!’’