Read Ot Danum LUKAS 19 Bible Online

LUKAS 19 - Ot Danum bible

LUKAS 19

¹Kotihka Yesus johcok ang Yerikho, Io nyalan turus nyuru tohun lowu rih.

²Ang lowu rih anai ihcobehti kopala ponagih pajak ijo tahtou. Araioh Zakheus.

³Io jolik nohto iai Yesus rih, tahpi tului ulun paham aro tutang io ulun iwak, mahka io eam duon nohto Yesus.

⁴Jadi, io nokoru nosolu ulun-ulun, turus nuhkat ihco pu'un kahju, mangat duon nopahjah Yesus ijo honjulu hino ahkan nguha ang anan.

⁵Kotihka Yesus johcok ang pinda pu'un kaju rih, Io nokara nokuh diang turus nuhtui, ‘‘Zakheus, mosuluh jeleng! Tului Ahku harus masap nokuh lohpou'mu ondou tuh.’’

⁶Zakheus jio-jion mosuluh tutang nyambut Yesus honong umbot kojorihoh.

⁷Paring ulun ijo nohto hal orih nopara bokuhtuk. Iro nuhtui, ‘‘Ceh! Io tulak masap ang lohpou ulun ijo eam pios!’’

⁸Pongohino rih ang lohpouoh, Zakheus tombok tutang nuhtui umba Yesus, ‘‘Tuhan soparu tahkan ponahtou'ku ahkan ahku nyadahkahoh ahkan ulun porosbolum; tutang iai beweu ijo pu'u ahku nihpuoh, ahkan ahku bayar huli ahkaioh opat kali lihpet!’’

⁹Turus hion Yesus, ‘‘Aang ondou tuh ihko tutang paring jolahan'mu tonyolamat bain Pohotala tutang nonga pombolum ijo bohua, tului ihko ka'a lihit Abraham.

¹⁰ Anak Ulun lombut ahkan ngurah tutang monyolamat ulun ijo lacat.’’

¹¹ Pondehan ulun magun ngonih auh Yesus nuhtui, Io monyorihta ihco porobasa. Tului, ang ohkot orih, Io anai doni Yerusalem, tutang ulun ngohu ijo Pohotala pohos ahkan moretah kolou Lahca ang kolunon.

¹²Yesus nuhtui, ‘‘Anai ihcobehti bongsawan ijo tulak nokuh lowu mahcu ahkan tomotuot monjadi lahca, pongohino buli.

¹³Soun tahkan hihkas, io na'ah sopulu behti pohalu, turus mbagi ahkan iro nyinong behti ihcokobawak duit bulou. ‘Bodagang umba duit tuh, pondehan ahku tulak,’ hioioh umba iro.

¹⁴Tahpi ponduduk lowu orih bohiri umbaoh. Jadi, uli io tulak iro ngirim soruhan ahkan nuhtui, ‘Ihkai eam kani ulun tuh monjadi lahcan ihkai.’

¹⁵Tahpi ulun uhtusbongsawan rih tomotuot monjadi lahca, pongohino io huli nokuh lowuioh. Jeleng io na'ah pohalu-pohaluoh noharep, ahkan ngota'an pira utung ijo jari iro dinui.

¹⁶Pohalu ijo pahtuk lombut tutang nuhtui, ‘Tuan, ihco duit bulou ijo Tuan nonga orih, jari ahku dinui sopulu.’

¹⁷‘Pios,’ hion Tuan rih, ‘ihko pohalu ijo morong! Tului a'ang hal-hal ijo koik ihko duon tomorocaya, ahku ahkan notuot ihko pongowasa sopulu lowu.’

¹⁸Pohalu koduo lombut tutang hioi, ‘Tuan, ihco duit bulou ijo Tuan nongaoh lomoi, jari ahku ngondinuioh limo.’

¹⁹Umba pohalu orih lahca rih nuhtui, ‘Ihko ahkan monjadi pongowasa isung limo lowu.’

²⁰Pohalu ijo bohkon lombut turus nuhtui, ‘Tuan, tuh duit Tuan; ahku ngina luwang saputangan.

²¹Ahku mihkoh umba Tuan, tului Tuan ulun ijo karas. Tuan ngomin inon ijo bohkon ain Tuan nihpun hasir ang unuk ijo eam tonombulan bain Tuan.’

²²Lahca rih nuhtui umba io, ‘Ihko pohalu ijo ja'at! Tohorong umba tuhtui-tuhtui'mu bongom, ahku ahkan mohukum ihko. Ihko kota'an ahku ulun ijo karas: ahku ngomin inon ijo ahku eam tepui tutang nipun hasir ijo eam ahku ngomulanoh.

²³Amat kolourih ombai ihko eam posolong duit orih nokuh bank mangat amatmira ahku buli ahku duon norima duit orih tutang anakoh?’

²⁴Pongohino lahca rih nuhtui umba ulun-ulun ijo tombok ang anan, ‘Ngomin duit orih tahkan io, tutang nonga ahkan pohalu ijo tepun sopulu duit bulou rih.’

²⁵Tahpi ulun-ulun rih nuhtui, ‘Tuan, io jari tepun sopulu.’

²⁶ Lahca rih mutah, ‘Ingat, ulun ijo jari tepun ahkaioh tononga labih aro hino. Tahpi ulun ijo eam anaitepun aangihco, inon ijo anai aang io ahkan konomin hino tahkan io.

²⁷Tutang huntuh ngomin ahkan ohtoi karon-musuh'ku rih ijo eam kani ahku monjadi lahcaoh. Munu iro paring ang toharep'ku!’ ’’

²⁸Uli Yesus nuhtui paring orih Io nyalan nosolu boun iro nitu Yerusalem.

²⁹Kotihka johcok tahkin Betpage tutang Betania ang Puruk Zaitun, Io nyuhu duo behti murid-Oh tulak labih soun.

³⁰‘‘Tulakrih nokuh kampung ijo ang boun rih,’’ hion Yesus umba iro, ‘‘amat ihkam nyolong ang anan, ihkam ahkan nohto ihcokungan anak keledai tonyuhkui. Keledai rih jaha pu'u tonunggang ulun. Nguwatrih keledai rih, tutang ngomin nokuh ohtoi.

³¹Amat ulun ngisok umba ihkam, ‘Ombai ihkam nguwat suhkui keledai rih?’ Hion'kam, ‘Tuhan kani hapaoh.’ ’’

³²Koduo murid Yesus rih hihkas tutang sombang paringoh tohorong umba ijo tonuhtui-Oh.

³³Pondehan iro nguwat suhkui anak keledai rih, tepuioh nuhtui umba iro, ‘‘Ahkan inon ihkam nguwat keledai rih?’’

³⁴Iro mutah, ‘‘Tuhan kani hapaoh.’’

³⁵Turus iro ngomin anak keledai rih ahkan Yesus. Pongohino iro mirang jubah'ndo ang lihkut keledai rih turus dohop Yesus jahkat kongosanoh.

³⁶Pondehan Io nguha jalan hawui nunggang keledai rih, ulun-ulun mirang jubah iro ang jalan.

³⁷Kotihka Yesus doni johcok ang Yerusalem, ang jalan ijo mosuluh tahkan Puruk Zaitun, paring murid-murid-Oh ijo aro rih bosurak-surak monara Pohotala tutang ngohawot torimakasih ahkai-Oh tului paring kahtahelan ijo jari iro nyaksioh.

³⁸ Iro bosurak, ‘‘Mborehkatrih Lahca ijo lombut a'ang aran Tuhan! Kojorih ang soruga tutang horomat ahkan Pohotala!’’

³⁹Pira-pira ulun Parisi tahkan louk ulun aro rih nuhtui umba Yesus, ‘‘Amai Guru, nyuhu murid-murid Amai tonih.’’

⁴⁰Yesus mutah, ‘‘Porocayarih! Amat iro tonih, bahtu-bahtu tuh noin ahkan ngoriak.’’

⁴¹Kotihka Yesus mahi nahpi lowu Yerusalem, tutang nohto lowu orih, Io nangihoh.

⁴²Hion Yesus, ‘‘Ngasi-ngasi, paham kopiosoh amat ondou tuh ihkam kota'an, inon ijo duon mopolombut kobuah! Tahpi huntuh ihko eam duon nohtooh.

⁴³Ihko ahkan nginyam ihco wayah, ang amoh musuh'mu nguan pohalang-pohalang ang kodiling'kam; iro ahkan ngahpung ihko, tutang ngohapit'kam tahkan kokaro puting.

⁴⁴Iro ahkan molutek ihko hawui ulun-ulun punduduk'mu; tutang eam ihco bahtu ka ahkan iro mohonouoh mohcon hosusun ang unukoh, tului ihko eam nohtoani wayah kotihka Pohotala lombut ahkan nyolamat ihko!’’

⁴⁵Yesus nyolong nokuh Lohpou Tuhan tutang nopara muko podagang ang anan.

⁴⁶ ‘‘Ang luwang Surat Borasih,’’ hion Yesus umba iro, ‘‘tonyurat koloutuh: Pohotala nuhtui, ‘Lohpou-Ku ahkan monjadi unuk bodo'a.’ Tahpi ihkam napaoh monjadi kosalah ponyilou!’’

⁴⁷ Nyinong ondou Yesus majar ang luwang Lohpou Tuhan. Imam-imam kopala, guru-guru agama, honong okon-okon Yahudi jolik munu Io,

⁴⁸tahpi eam nyombang jalan ahkan nguan hal orih, tului paring ulun toturus beweu ngonih Io, tutang totarik umba dolang auh-Oh.