Read Ot Danum LUKAS 2 Bible Online

LUKAS 2 - Ot Danum bible

LUKAS 2

¹Ang ohkot rih Kaisar Agustus momoretahoh, mangat paring warga nogara Kolahca'an Ruma molihting aropoh ahkan tongiso.

²Tongiso ijo pahtukoh tuh tolalusoh ohkot Kirenius monjadi gubernur tana Siria.

³Paring ulun aang ohkot rih, tulak mangat tomolihting ang lowuioh nyinong behti.

⁴Yusep ka tulak tahkan Nasaret ang Galilea, nokuh Betlehem ang Yudea, unuk Lahca Dawid konanak; tului Yusep lihit Dawid.

⁵Yusep molihting aropoh homboh Maria kisokoh ijo rahat botohi.

⁶Kotihka iro ang Betlehem, johcok ohkotoh bagi Maria ahkan nganak.

⁷Io nganak ihcobehti anak bahkas, anakoh ijo pongoko. Anak rih konohuwutoh umba benang laping, turus ponokaling ang luwang julang tongolahpikoh umba kojugu; tului iro earo nyumbang lohpou ijo unuk iro nginap.

⁸Aang ngolomi orih anai sokahtik-sokahtik ijo rahat ngindoi karon-tobirioh ang padang uru ang tana rih.

⁹Songela molehkat Tuhan ngorinahoh arop akan iro, tutang kolondang koloang tahkan Tuhan monyingah ngoloang iro, tutang iro paham mihkoh.

¹⁰Tahpi molehkat rih nuhtui, ‘‘Ara mihkoh! Tului ahku lombut ngitot kabar hinut ahkan'kam — kabar ijo paham moposanang paring ulun.

¹¹Ondou tuh ang lowun Dawid jari konanak Lahca Ponyolamat'mu iorih Kristus, Tuhan.

¹²Tuhrih tandaoh ahkan ihkam: ihkam ahkan nyombang ihcobehti Anak longa konohuwut umba benang lapin, tutang ponokaling ang luwang julang.’’

¹³Songola molehkat rih homboh umba karon-molehkat bohkon ijo monara Pohotala. Hion'ndo,

¹⁴‘‘Tara ahkan Pohotala ang langit ijo palingdiang! Tutang ang isung tana kosanangsolamat rih ahkan ulun ijo ngojorih ahtoi Tuhan!’’

¹⁵Uli karon-molehkat nohtah iro tutang buli nokuh soruga, sokahtik-sokahtik rih pander sama aropoh, ‘‘Olai ihto nokuh Betlehem tutang nohto dolangang ijo nyolung rih, ijo tonuhtuioh Tuhan ahkan ihto.’’

¹⁶Iro jeleng tulak, turus nyombang Maria tutang Yusep honong anak longa rih, ijo rahat kaling ang luwang julang.

¹⁷Kotihka dolang sokahtik nohto anak longa rih, iro nyorihta inon ijo tonuhtui karon-molehkat tohou anak longa rih.

¹⁸Tutang paring ulun helan ngonih borihta tahkan sokahtik orih.

¹⁹Tahpi Maria ngina paring auh rih ang luwang ahtoioh tutang ngumangoh.

²⁰Sokahtik-sokahtik rih buli nokuh padang uru sambir monara tutang pohajo Pohotala, tului paring ijo jari iro ngonih tutang nohto, horong kolou ijo tonuhtui bain molehkat.

²¹ Uli umur jalu ondou, Anak rih tonyunat. Tutang iro ngohawot arai-Oh Yesus, aran ijo tononga molehkat ahkai-Oh hounumba Io tonohi inai-Oh.

²² Johcok wayahoh Yusep tutang Maria molalus hadat mporasih numbun Hukum Museh. Jadi iro ngitot Anak rih nokuh Yerusalem ahkan tonyorah ahkan Tuhan.

²³ Tului ang luwang hukum Tuhan, tonyurat koloutuh, ‘‘Nyinong anak bahkas ijo pokookoioh, harus tonosorah ahkan Tuhan.’’

²⁴Iro ka'a nohuang monyorah pononga, iorih ihco pasang bulung tokukur ata'ai duo kungan bulung dala ijo biou, kolou ijo tonahtap a'ang hukum Tuhan.

²⁵Aang ohkot rih ang Yerusalem anai ihcobehti bogare Simeon io ulun hinut ijo mihkoh umba Pohotala tutang rahat ngindoi wayahoh Pohotala nyolamat Israel. Roh Pohotala hihco io,

²⁶tutang Roh Pohotala jari monyorihta ahkaioh ijo io eam ahkan mahtoi, amat jaha nohto Lahca Ponyolamat ijo nobowot Tuhan.

²⁷Bain toniting Roh Pohotala, Simeon nyolong ang Lohpou Tuhan. Aang ohkot rih, Yusep tutang Maria ngitot nyolong Yesus, ijo magun koik rih, ahkan nguan upacara ijo tomoretah hukum agama.

²⁸Mahka Simeon ngomin Anak rih tutang nyokahpu Io, turus monara Pohotala,

²⁹‘‘Uhuntuh, Tuhan, Ihko jari ponyolung bowot-Mu. Nauhoh jihpon-Mu tuh palus honong komangat.

³⁰Tului umba mahta'ku bongok, ahku jari nohto Ponyolamat ijo lombut tahkanumba Ihko.

³¹Ponyolamat rih Ihko jari nahtapoh ahkan kokaro uhtus:

³² kolouoh koloang, ijo mopoloang jalan, bagi uhtus-uhtus ijo bokon, ahkan lombut nokuh-Mu; iorih koloang ijo polombut horomat ahkan ukup-Mu Israel.’’

³³Amai tutang inai Anak orih helan ngonih inon ijo tonuhtui Simeon tohou Anak'ndo.

³⁴Simeon mborehkat iro tutang nuhtui ahkan Maria, inai Anak rih, ‘‘Anak tuh jari tomitih bain Pohotala, ahkan morusak tutang ahkan monyolamat aro ulun Israel. Io ahkan monjadi tanda ahkan Pohotala, ijo ahkan tonolawan bain aro ulun,

³⁵tutang honong kolourih bokahkas atoi bua iro. Koporos ahtoi ahkan newek ahtoi'mu kolou padang ijo monyo'ot.’’

³⁶Anai hino ihcobehti nabi bawi ijo jari oko samasino. Araioh Hana, anak Panuel, tahkan lihit Asyer. Uliumba pihtu toun kawin,

³⁷Hana monjadi balu, tutang uhuntuh umuroh jalu pulu ohpat toun. Eam pu'u io nohtahoh Lohpou Tuhan. Handou homalom io te'et ang anan umba Pohotala homboh bodo'a tutang puasa.

³⁸Horong aang ohkot rih ka'a io lombut, turus monara Pohotala tutang nuhtui tohou Anak rih ahkan paring ulun ijo ngindoi wayahoh Pohotala momorodehkaoh Yerusalem.

³⁹ Ulimba Yusep tutang Maria nguan paring ijo harus numbun Hukum Tuhan, iro buli nokuh Nasaret ang Galilea.

⁴⁰Anak rih sasar hajo tutang ba'as. Io horahti samasino tutang paham tonokasih Pohotala.

⁴¹ Nyino-nyinong toun ulun oko Yesus tulak nokuh Yerusalem mangat umba pesta Paska.

⁴²Tutang kotihka Yesus johcok umur duo balas toun, iro hihkas nokuh pesta rih tohorong kopahtuh.

⁴³Umbot pesta orih rih iro buli, tahpi Yesus, Anak rih magun mohcon ang Yerusalem, tutang amai inai-Oh eam kota'an.

⁴⁴Iro ngohu Io umba homboh kawaninjah-Oh. Ulimba iro nyalan ihcoondou punaioh iro ngurah Io, ang louk ari-konduang tutang injah-jolahan'ndo.

⁴⁵Tahpi iro eam nyombang-Oh, jadi iro ngulos nokuh Yerusalem ngurah Io.

⁴⁶Ulirih tolu ondou, iro nyombang Io ang Lohpou Tuhan. Io rahat tuot ngonih guru-guru agama tutang monyapai aro kisok.

⁴⁷Paring ulun ijo ngonih Io helan tului karon-putah-Oh ijo tohorong.

⁴⁸Ulun oko-Oh helan nohto Io. Inai-Oh nuhtui umba Io, ‘‘Anak, ombai Ihko nguan koloutuh ahkan ihkai? Amai-Mu tutang Inai-Mu porosahtoi ngurah Ihko!’’

⁴⁹Yesus mutah, ‘‘Ombai amai tutang inai ngurah Ahku? Inon amai tutang inai eam kota'an ijo Ahku harus anai ang luwang lohpou Amai-Ku?’’

⁵⁰Tahpi iro eam horahti umba putah Yesus rih.

⁵¹Pongohuli Yesus buli homboh iro nokuh Nasaret, tutang te'et umba iro. Paring hal orih ngina bain inai-Oh ang luwang ahtoioh.

⁵² Yesus mahi ndahang hajo tutang tambah horahti, tutang unuk kojorih bain Pohotala tutang unuk konojolik bain kolunon.