Read Ot Danum LUKAS 21 Bible Online

LUKAS 21 - Ot Danum bible

LUKAS 21

¹Aang Lohpou Tuhan, Yesus nopahjah ulun-ulun tahtou ngipos duit'ndo nokuh luwang pohti pononga.

²Io nohto ka'a ihcobehti balu ijo paham porosbolum, ngipos duo bilap duit tombaga.

³Turus Yesus nuhtui, ‘‘Ngonihoh: balu tuh ngipos labih aro tahkan paring ijo bohkon.

⁴Tului iro paring nonga tahkan kolowin ponahtouoh. Tahpi balu tuh, oluka io porosbolum, io nonga paring ijo anai aang io ijo boguna ahkai bongoi bagi pombolum.’’

⁵Anai ulun-ulun ijo nuhtui tohou koloukuwoh kopiosoh Lohpou Tuhan, tonawas umba bahtu ijo pio-pios tutang umba ramu-ramu ijo tononga ahkan Pohotala. Mahka Yesus nuhtui umba iro,

⁶‘‘Noin anai wayahoh, paring ijo ihkam nohto tuh ahkan bokahkas; eam anai ihco bahtu ka ang ohtoi ijo ahkan mohcon hosusun ang unukoh!’’

⁷Iro ngisok umba Yesus, ‘‘Amai Guru, mirarih aang rih ahkan nyolung? Tutang inon tandaoh amat jari johcok ohkotoh hal orih rih ahkan nyolung?’’

⁸Yesus nuhtui, ‘‘Rondo-rondongrih, ara nyiring ihkam tongobula. Aro ulun ahkan lombut tutang mahapa arak-Ku, tutang nuhtui, ‘Ahku tuh Io!’ tutang ‘Johcok ohkotoh.’ Tahpi a'ai ihkam ngohasu iro.

⁹A'ai ka'a mihkoh amat ihkam ngonih kabar tohou hokolahi tutang asang. Paringoh rih harus nyolung soun. Tahpi orih eam rimai ijo johcok ohkotoh kiamat.’’

¹⁰Turus Yesus noturus tuhtui-tuhtui-Oh, hioi-Oh, ‘‘Uhtus ijo ihco ahkan bokolahi ngolawan uhtus ijo bohkon, tutang nogara ijo ihco ahkan mongolahi nogara ijo bohkon.

¹¹Ang umo-umoh ahkan nyolung moruguh tana ijo hebat, bahaya bolo'u, tutang wabah ponyahkit. Ahkan nyolung hal-hal ijo kongori-ngori tutang mopihkoh ang langit.

¹²Tahpi soun paringoh orih nyolung, ihkam ahkan tonawan tutang tonoporos. Ihkam ahkan ponosara ang lohpou-lohpou sombayang tutang ponosolong nokuh luwang sipir. Tutang ihkam ahkan tonyeret nokuh toharep lahca-lahca, tutang pongowasa-pongowasa, kotului ihkam rih murid-Ku.

¹³Orih rih kosapet ahkan'kam, ahkan mborihta Kabar Hinut tahkan Pohotala.

¹⁴ Tehkadlah ijo ihkam eam ahkan bembang tohou inon ijo harus ihkam nuhtui ahkan mombela arop.

¹⁵Ahku bongok ahkan nonga bagi'mu auh-auh tutang kopiosbudi bosara orih, nyiring eam ihcobehti ka tahkan musuh-musuh'kam duon ngolawan ata'ai nulak inon ijo ihkam nuhtuioh.

¹⁶Ihkam ahkan tongorana bain inai-amai'mu, bain konduang-konduang'mu, bain ari bobuhan'mu, tutang bain injah-jolahan'mu. Ihcokobagi tahkan ihkam ahkan ponunu bain iro.

¹⁷Ihkam ahkan tonyingi bain paring ulun, tului ihkam konohawot murid-Ku.

¹⁸Tahpi ihcokolambar balou ka tahkan kuhung'mu eam ahkan tosohpit.

¹⁹Amat ihkam tahan tutang sabar, ihkam ahkan solamat.’’

²⁰‘‘Amatmira ihkam nohto Yerusalem tongodiling sorodadu, ihkam ahkan kota'an lowu orih, eam ahkan tahi hino ahkan tonolingis.

²¹Aang ohkot rih harusrih ulun ijo anai ang Yudea nokoru nokuh puruk-puruk. Iro ijo anai ang luwang lowu ara iro soluka, tutang iro ijo ang luar lowu ara nyolong koluwang lowu.

²² Tului aang ondou-ondou rih anai, ‘Ondou-ondou Hukum Tomuhtus,’ mangat umba kolourih nyolung inon ijo jari tonyurat aang Surat Borasih.

²³Eaminonrih ngorioh aang ondou-ondou rih ahkan ulunbawi ijo botohi tutang inai ijo magun nyusu ngoaoh! Lowu tuh ahkan buah kosusahan ijo hajo, tutang Tuhan ahkan mohukum uhtus tuh.

²⁴Anai ijo tomunu umba padang, anai hino ahkan tungomin kolou tawanan, nokuh lowun-lowun ulun; tutang ulun-ulun ijo eam kosono Pohotala ahkan nihcak-ngihik Yerusalem nyiring opah ohkot ijo jari tonahtap bain Tuhan ahkan iro.’’

²⁵ ‘‘Noin aang mahtanondou, bulan, tutang potion-potion ahkan gihtan tanda-tanda. Ang tana, uhtus-uhtus ahkan mihkoh tutang bingung noharep guruh tutang riak tasik.

²⁶Kolunon ahkan mihkoh sotongah mahtoi noharep inon ijo ahkan nyolung, ang sohapus kolunon tuh tului pongowasa alam raya ahkan monjadi kahcau-balau.

²⁷ Aang ohkot orih Anak Ulun ahkan lombut ang baunondou homboh kowasa tutang kohajoi ijo hajo.

²⁸Amatmira hal-hal orih nopara nyolung, kuat tutang ngahtang kuhung'mu, bain honjulu hino ihkam ahkan tonyolamat.’’

²⁹Turus Yesus mborihta ahkan iro porobasa pongo tuh, hioi-Oh, ‘‘Topahjah pu'un sikun tutang paring pu'un ijo bohkon.

³⁰Amat suluh-suluhoh nopara nyoluhtih, ihkam kota'an ahkan jari doni ohkot ondou tojah.

³¹Kolourih ka'a amat ihkam nohto hal-hal orih nyolung, ihkam ahkan ta'an ijo Pohotala jeleng ahkan moretah kolou Lahca.

³²Kota'anrih! Hal-hal rih ahkan nyolung sountahkan ulun-ulun ijo bolum uhuntuh mahtoi paringoh.

³³Langit tutang tana ahkan lilap, tahpi tuhtui-tuhtui-Ku tahtap kototahiuoh.’’

³⁴‘‘Jagarih arop'kam ara nyiring ihkam dalou kaurderoh umba pesta-pesta tutang minum-ngorih mombusou, ata'ai toturus niruk soal soal pombolum'mu, nyiring ihkam eam botahtap kotihka Ondou orih lombut hawui nyolonga.

³⁵Tului ondou rih ahkan lombut kolou sokohtung ngindoi aang paring ulun ang danum kolunon tuh.

³⁶Bojaga-jagarih, tutang bodo'a toturus ahkan ihkam ba'as noharep paring-hal ijo ahkan nyolung tutang ihkam duon noharep Anak Ulun.’’

³⁷ Yesus majar ang Lohpou Tuhan ang tohun ondou, tutang ngolomi ondouoh, Io hihkas ahkan Puruk Zaitun tutang mohcon ang anan.

³⁸Nyinong ngohkos paring ulun lombut nokuh Lohpou Tuhan ahkan ngonih tuhtui Yesus mongajar.