Read Ot Danum LUKAS 22 Bible Online

LUKAS 22 - Ot Danum bible

LUKAS 22

¹ Pesta Luhte Eam Boragi ijo konohawot Paska jari dohkin.

²Imam-imam kopala tutang guru-guru agama uhun ngurahjalan ahkan munu Yesus cara toni-tonih, tului iro mihkoh umba ulun aro.

³Pongohino sehtan nyolong Yudas ijo konohawot Iskariot, iorih 'cobehti tahkan koduo balas murid Yesus.

⁴Tului orih Yudas tulak tutang bohaum umba imam-imam kopala tutang dolang kopala pongawal Lohpou Tuhan tohou koloukuwoh io duon nyarahoh Yesus ahkan iro.

⁵Iro jorih samasino tutang hobowot ahkan nongaoh duit ahkaioh.

⁶Yudas ka sotuju tutang nopara ngurah kosapet ahkan monyarah Yesus ahkan iro tahpi ara kota'an ulun.

⁷Johcok ondouoh ang Pesta Luhte Ijo Eam Boragi Io tobiri ahkan ukun Paska tonyombalih.

⁸Mahka Yesus nyuhu Petrus tutang Yohanes, ‘‘Tulak'kam nyodia ukun Paska ahkan ihto.’’

⁹‘‘Ang amoh Amai nyuhu ihkai monyodiaoh?’’ kisok iro.

¹⁰Yesus mutah, ‘‘Aang ohkot ihkam nyolong nokuh lowu, ihcobehti ulunbahkas ijo beteng ngomin ihcokobawak kandi, bosuang danum, ahkan hosombang umba ihkam. Ngahasu io nokuh lohpou ijo tonyolongoh,

¹¹tutang nuhtuirih ahkan tepun lohpou rih: Guru nuhtui, ‘Ang umoh unukoh mangat murid-murid-Ku tutang Ahku kuman ukun Paska?’

¹²Tepun lohpou rih ahkan pokarah ahkan'kam ihcotahkun aang luteng ijo hajo, sodia honong puatoh. Nyodia paringoh ang anan.’’

¹³Mahka tulak Petrus tutang Yohanes, turus nyombang paringoh sorurui kolou ijo jari tonuhtui bain Yesus. Iro ka nyodia ukun Paska rih.

¹⁴Kotihka jari ohkotoh ahkan kuman ukun Paska rih, Yesus tuot homboh murid-murid-Oh ang unuk ukunpesta rih.

¹⁵Turus Yesus nuhtui umba iro, ‘‘Ahku jorik samasino kuman ukun Paska tuh homboh ihkam sounumba Ahku ngarotporos!

¹⁶Tului, porocayarih: Ahku eam ahkan kuman tuh hino, nyiring riman tahkan ukun tuh bakorinah ang Kolunon Bohua Ain Pohotala.’’

¹⁷Uliorih Yesus ngahtang sakir anggur, turus ngohawot do'a torimakasih ahkan Pohotala, pongohuli nuhtui, ‘‘Ngomin tuh, tutang magi-magiohrih;

¹⁸tului kota'anrih: nopara uhuntuh Ahku eam ahkan ngorih anggur tuh hino, nyiring Pohotala jari bokowasa honong kotuwi-Oh.’’

¹⁹Umbotrih rih Yesus ngomin luhte. Tutang uli ngohawot do'a torimakasih, Io mbagi-mbagi luhte rih umba longoi-Oh, turus nongaoh ahkan iro, tutang nuhtui, ‘‘Jihtuh behtik-Ku [ijo tonyarah ahkan ihkam. Nguanohrih koloutuh ahkan mingat Ahku.’’

²⁰ Kolourih ka'a uli kuman, Io nonga sakir anggur rih ahkan iro tutang nuhtui, ‘‘Sakir tuh anairih bowot Pohotala ijo bohua, ijo tonosah umba dahak-Ku — daha ijo tonusuh ahkan ihkam.’’]

²¹ ‘‘Tahpi nohto! Ulun ijo ngorana umba Ahku anai ang ohtoi hihco Ahku!

²²Anak Ulun puna ahkan mahtoi kolouumoh jari tongatuh bain Pohotala; tahpi colahka ulun ijo ngorana Ahku!’’

²³Mahka iro nopara hokisok ihco umba ijo bohkon, iai tahkan louk iro ijo ahkan ngorana rih.

²⁴ Aang louk murid-murid Yesus lombut tokian tohou iai tahkan iro ijo harus tongohu paling hajo.

²⁵ Yesus nuhtui umba iro, ‘‘Lahca-lahcan uhtus ijo eam kosono Pohotala mohenyek rayatoh, tutang pongowasa-pongowasaoh konohawot ‘Polindung rayat’.

²⁶ Tahpi ihkam eam tou kolourih. Sobalikoh, ulun ijo hajo ang louk'kam harus kolou ijo pokokoikoh, tutang okon harus monjadi kolou pohalu.

²⁷ Iai ijo labih hajo: Ulun ijo tuot kuman ang meja, ata'ai ulun ijo nahalu io? Puna ulun ijo tuot rih. Tahpi Ahku tohko ang louk ihkam kolou pohalu.

²⁸A'ang kokaro kosusah-Ku ihkam toturus sama-sama umba Ahku.

²⁹Kolou ka'a Amai jari nonga ahkak-Ku hak ahkan moretah, kodorih ka'a Ahku ahkan nonga ahkan'kam hak rih.

³⁰ Umba kolouorih ihkam duon umba jorih-jirah hihco Ahku ang ohkot Ahku monjadi Lahca. Tutang ihkam ahkan tuot ang ngosan duo balas pododusan ahkan moretah koduo balas lihit uhtus Israel.’’

³¹‘‘Simon, Simon, ngonih! Sehtan duon ijin ahkan nikos ihko; kolou gandum ngobohkon umba apihoh, nyiring ijo pios ngobohkon umba ijo ja'at.

³²Tapi Ahku jari bodo'a ahkan'mu, Simon, ahkan koporocaya'mu ara luntur. Tutang amat ihkam jari huli ahkak-Ku ihko harus ngoba'as konduang-konduang'mu.’’

³³Petrus mutah, ‘‘Tuhan, ahku bosodia nyolong sipir tutang mahtoi homboh Tuhan!’’

³⁴‘‘Porocayarih, Petrus,’’ hion Yesus, ‘‘Sounumba dalung manuk nandu ondou tuh, ihko tolu tikat eam ngahku Ahku.’’

³⁵ Uliorih rih Yesus nuhtui umba iro, ‘‘Soun kotihka Ahku moretah ihkam hawui eam nyuhu ihkam ngomin ehpok, kambut ata'ai sopahtu, inonrih ihkam kurang ino-inon?’’ ‘‘Eam!’’ hion'ndo.

³⁶‘‘Tahpi huntuh,’’ hion Yesus, ‘‘iai ijo anaingina ehpok ata'ai kambut, pahtut ngomiuoh; tutang iai eam anaingina padang, harus monjual jubahoh mangat moli padang.

³⁷ Tului porocayarih, ayat Surat Borasih ijo auh koloutuh, ‘Io mongohu kolou 'cobehti ponyirou,’ harus nyolung ngosan arop-Ku. Tului inon ijo tonyurat a'ang Surat Borasih tohou Ahku uhun nyolung huntuh tuh.’’

³⁸‘‘Tuhan,’’ hion murid-murid Yesus, ‘‘topahjah ang ohtoi anai duo padang.’’ ‘‘Jadirih!’’ hion Yesus.

³⁹Yesus nohtah lowu tutang hihkas kolou bahutoh nokuh Puruk Zaitun, tutang murid-murid-Oh tulak ka'a homboh Io.

⁴⁰Kotihka johcok ang anan, Io nuhtui umba iro, ‘‘Bodo'arih mangat ihkam ara bodusa, amat ihkam tonihkos.’’

⁴¹Pongohuli rih Io tulak labih mahcu isut tahkan iro, kira-kira komahcu pukah bahtu, turus nolehku-kalopoh tutang bodo'a.

⁴²‘‘Amai,’’ hioi-Oh, ‘‘amat tou ngomahcuohrih tahkan Ahku karotporos ijo harus Ahku nyuruoh tuh. Tahpi ara numbun konohuang-Ku, molekan numbun konohuang Amai ih.’’ [

⁴³Ihcobehti molehkat lombut nokuh Io tutang ngoba'as-Oh.

⁴⁴Yesus karas ngarot cara mboruai, nyiring Io mahi tu'u-tu'u bodo'a. Horas-Oh kolou daha mohceu nokuh tana.]

⁴⁵Tondo bodo'a, Yesus hoduli hino nokuh murid-murid-Oh. Io nyombang iro rahat tiruh, tului paham poros ahtoi.

⁴⁶Turus Io nuhtui umba iro, ‘‘Ombai ihkam tiruh? Monyun tutang bodo'a mangat ihkam eam kona tihkos.’’

⁴⁷Pondehan Yesus magun pander, lombut ihcokokawan ulun. Iro konokon bain Yudas, tahkan ihcobehti murid Yesus. Ulihino Yudas tulak nokuh Yesus turus ngarok Io.

⁴⁸Tahpi Yesus nuhtui umba io, ‘‘Yudas, inon umba karok orih ihko kani ngorana Anak Ulun?’’

⁴⁹Kotihka murid Yesus ijo anai ang anan, nohto inon ijo ahkan nyolung, iro nuhtui, ‘‘Tuhan, keleh ihkai nyarang iro hapan padang!’’

⁵⁰Turus ihcobehti tahkan iro molong jihpon imam hajo hapan padang nyiring bosaping tolingai koto'uioh.

⁵¹Tapi Yesus nuhtui, ‘‘Umbotrih!’’ Turus Io ngomin tolingan ulun rih tutang ngopiosoh.

⁵²Pongohuli rih Yesus nuhtui umba imam-imam kopala tutang komandan-komandan pongawal Lohpou Tuhan tutang okon-okon Yahudi ijo lombut nokuh anan mangat nawan Yesus, ‘‘Inon Ahku tuh ponyilou, nyiring ihkam lombut hapan padang tutang tohtok kaju ahkan nawan Ahku?

⁵³ Nyinong ondou Ahku anai ang louk ihkam ang Lohpou Tuhan, ihkam eam nawan Ahku. Tapi huntuh johcok ohkotoh ihkam nguaioh, kotihka kowasa kopindong nguan gawiu.’’

⁵⁴Iro nawan Yesus tutang ngomin Io nokuh lohpou imam hajo, Petrus ngohasu tahkan mahcu.

⁵⁵Ang tohun kanaha rih anai pohunbaho jari tomohun tutang Petrus ngondoni tuot umba ulun-ulun ijo tuot ang kodilingoh pohun baho rih.

⁵⁶Anai ihco pohalu bawi nohto Petrus tuot ang kodilingoh pohunbaho rih; turus pohalu bawi rih nolihti Petrus, pongohuli nuhtui, ‘‘Ulun tuh ka'a nanai, anai hihco umba Yesus!’’

⁵⁷Tahpi Petrus eam ngahku. Io nuhtui, ‘‘Ahku eam kosono ulun tuh!’’

⁵⁸Eampira pongohuli ihcobehti bohkon nohto Petrus tutang nuhtui, ‘‘Ihko ka'a anai ihcobehti tahkan iro!’’ Tahpi Petrus nuhtui, ‘‘Eam, bohkon ahku!’’

⁵⁹Kira-kira ihco jam pongohuli, ihcobehti bohkon hino nuhtui tutang hajo auh, ‘‘Puna ulun tuh murid Yesus, tului io ka'a ulun Galilea!’’

⁶⁰Tahpi Petrus mutah, ‘‘Inon hion'mu, ahku eam ta'an!’’ Uhun rih ka'a, rahat Petrus magun hopander, dalung manuk nandu.

⁶¹Yesus ka'a nopoliou tutang nopahjah Petrus. Turus Petrus ingat Tuhan jari nuhtui umba io, ‘‘Hounumba dalung nandu ondou tuh, ihko tolu tikat eam ngahku Ahku.’’

⁶²Mahka Petrus soluka tahkan anan tutang nangih sungu-sungut.

⁶³Ulun-ulun ijo rahat monjaga Yesus, ngonjea tutang nahup Io.

⁶⁴Iro nuhtup mahtai-Oh tutang ngisok umba Io, ‘‘Cuba ngohu iai ijo nahup Ihko?’’

⁶⁵Aro hino auh-auh mohina ijo iro muatoh ahkai-Oh.

⁶⁶Ang ngohkos ondouoh, okon-okon Yahudi, imam-imam kopala, tutang guru-guru agama bohaum, turus Yesus omin'ndo nokuh tohun Balai Bosara Agama iro.

⁶⁷‘‘Nyorihtaoh ahkan ihkai,’’ hion iro umba Yesus, ‘‘inonrih Ihko tuh Lahca Ponyolamat?’’ Yesus mutah, ‘‘Amat Ahku nyorihta ahkan'kam, ihkam tuh eam ahkan porocaya.

⁶⁸Tutang amat Ahku ngisok umba'kam, ihkam ka eam ahkan mutah.

⁶⁹Tahpi nopara tahkan huntuh, Anak Ulun ahkan tuot ang hila kotoun Pohotala Ijo Mahakowasa.’’

⁷⁰Iro paringoh nuhtui, ‘‘Amat kolourih, Ihko tuh Anak Pohotala?’’ Yesus mutah, ‘‘Kolourih hion ihkam.’’

⁷¹Mahka iro nuhtui, ‘‘Eam usah hino saksi! Ihto jari ngonih tahkan auh-Oh bongoi!’’