Read Ot Danum LUKAS 23 Bible Online

LUKAS 23 - Ot Danum bible

LUKAS 23

¹Paring ijo hopuhpung rih tombok, turus ngitot Yesus noharep Pilatus.

²Ang anan iro nopara mondawa Io. Iro nuhtui, ‘‘Ihkai nyombang ulun tuh molahcat rayat. Io ngihit ulun mangat ara mbayar pajak ahkan Kaisar, tului Io nuhtui Io Kristus ihcobehti Lahca.’’

³Turus Pilatus ngisok umba Yesus, ‘‘Tu'u Ihko Lahca ulun Yahudi?’’ Yesus mutah, ‘‘Kodorih hion'mu.’’

⁴Mahka hion Pilatus umba imam-imam kopala tutang ulun aro rih, ‘‘Ahku eam nyombang ihco kosalai ka aang ulun tuh mangat mohukum Io.’’

⁵Tahpi iro labih hojojuan hino, ‘‘Umba ajar-Oh, Io ngihit ulun ang hapus Yudea; pahtukoh ang Galilea, tutang huntuh jari johcok hino nokuh ohtoi.’’

⁶Kotihka Pilatus ngonih orih rih, io ngisok, ‘‘Inonrih ulun tuh ulun Galilea?’’

⁷Uli tonyorihta Yesus asaroh tahkan tanah ijo anai ang pinda kowasan Horodes, Pilatus ngirim Yesus ahkan Horodes ijo kotihka orih anai ka'a ang Yerusalem.

⁸Horodes jorih samasino kotihka nohto Yesus, tului jari tahi io ngonih tohou Yesus tutang jorih nohto Io. Io moharap dahpot nyaksi Yesus nguan kahtahelan.

⁹Tului orih Horodes aro nonga kisok umba Yesus, tahpi Yesus eam mutah samasino.

¹⁰Imam-imam kopala tutang guru-guru agama noharep ka'a ang anan tutang ndawa Yesus karas tu'u.

¹¹Horodes tutang kawan-kawan sorodaduoh ngonjea tutang mohina Yesus, turus mokahjan Io hapa pokahjan hajo, uliorih rih ngirim Io buli nokuh Pilatus.

¹²Aang ondou orih ka'a Horodes tutang Pilatus, ijo sounoh homusuh, nopara hokobuah hino.

¹³Pilatus muhpungoh imam-imam kopala, dolang okon Yahudi, tutang ulun aro,

¹⁴turus nuhtui umba iro, ‘‘Ihkam ngomin ulun tuh ahkak'ku tutang nuhtui ijo Io monyosatoh ulun-ulun. Huntuh ang toharep ihkam ahku jari moriksa Io, tahpi ahku samasino eam nyombang ihco kosalai ka ijo ihkam ndawa nitu Io.

¹⁵Kolourih ka'a ponyombang Horodes, tului io ka'a jari mongirim Yesus tuh buli nokuh ihkai. Uluntuh eam nguanoh aangihco ka'a ijo harus tonohukum umba hukum mahtoi.

¹⁶Tului orih ahku mahcat Io uliorih moliwus Io.’’ [

¹⁷Aang nyinong pesta Paska, Pilatus harus moliwus ihcobehti ulun hukuman bagi rayat.]

¹⁸Paring ulun ijo hopuhpung ang anan ngoriak, ‘‘Munu Io! Lohpas Barabas ahkan ihkai!’’ (

¹⁹Barabas tonosolong ahkan sipir tului monjadi asang ijo nyolung ang lowu tutang tului munu.)

²⁰Pilatus kani moliwus Yesus, bain rih io nuhtui sino hino umba ulun aro rih.

²¹Tahpi iro ngoriak muhing, ‘‘Mahpakrih Io! Mahpakrih Io!’’

²²Turus ahkan kotolu tikatoh Pilatus na'ah umba iro, ‘‘Tahpi inon kosalai-Oh? Ahku eam nyombang ihco kosalai ka'a ang Io ijo pahtut tomohukum hapa hukum mahtoi! Ahku ahkan mahcat Io, turus moliwus-Oh.’’

²³Tahpi iro turus ngoriak tambah muhing ijo Yesus harus tomahpak. Kojoriai koriak iro bohasir.

²⁴Mahka Pilatus muhtus hukuman mahtoi ngosan Yesus tohorong umba konohuang ulun-ulun rih,

²⁵tutang moliwus ulun ijo iro nyawotoh, iorih ulun ijo tomohukum tului mborontak tutang munu. Pongohino Yesus tomosarahohrih mangat molalusoh konohuang iro.

²⁶Mahka Yesus ka tonomin bain'ndo. Ang beteng jalan, iro hosombang umba ihcobehti ijo bogare Simon, ijo asaroh tahkan Kirene, ijo rahat nyolong nokuh lowu. Iro nambit io, turus hojojuan io ngohtun kahju sopolahki rih, nutut ang lihkut Yesus.

²⁷Aro ulun nutut nyalan ang lihkut Yesus — ang loukoh anai ka'a pira-pira ulunbawi. Bawi-bawi rih nangih tutang nahtum Yesus.

²⁸Tahpi Yesus ngulos nitu iro tutang nuhtui, ‘‘Dolang bawin Yerusalem! Ara nangih Ahku. Tangihrih arop'mu bongom tutang anak-anak'mu.

²⁹Bain ahkan lombut ohkot ulun ahkan nuhtui, ‘Koutungoh ulun-ulun bawi ijo eam pu'u botohi, ijo eam pu'u nganak tutang eam pu'u ngoposu anakoh!’

³⁰ Aang ohkot orih ulun ahkan nuhtui umba puruk-puruk, ‘Nopahasrih ihkai!’ Tutang umba puruk-puruk, ‘Ngawukrih ihkai!’

³¹Bain amat nohimo kaju ijo magun bolum, ulun jari nguan koloutuh, inon hino ijo ahkan konuan iro nohimo kaju ijo jari koring!’’

³²Anai hino duo behti ulun bohkon — koduo-duooh ponyilou — ijo tonomin'ndo ahkan tomohukum mahtoi hombo-homboh umba Yesus.

³³Kotihka johcok unuk ijo konohawot ‘‘Bangonkuhung,’’ iro mahpak Yesus tutang koduo ponyilou rih — ihcobehti ang hila koto'ui tutang ihcobehti hino ang hila komuloi Yesus.

³⁴ Turus Yesus bodo'a, ‘‘Amai, ngahpunrih kosalan iro! Iro eam kota'an inon ijo konuan'ndo.’’ Pokahjan Yesus iro magi-mbilahoh ang anan, ang louk iro hapan tenung.

³⁵ Ulun-ulun tombok ang anan hawui nopahjah, pondehan okon-okon ulun Yahudi ngonjea Yesus tutang nuhtui, ‘‘Io jari nyolamat ulun bohkon; cubarih huntuh Io nyolamatoh arop-Oh bongoi, amat Io tu'u-tu'u Lahca Ponyolamat ijo tomitih bain Pohotala!’’

³⁶ Dolang sorodadu ka ngonjea Io. Iro lombut tutang nonga anggur mosom ahkai-Oh

³⁷hawui nuhtui, ‘‘Amat Ihko Lahca ulun Yahudi, nyolamat ih arop-Mu!’’

³⁸Ang hila diang kuhungoh ang kaju sopolahkin Yesus, tonyurat auh-auh tuh, ‘‘Io tuh Lahca Ulun Yahudi.’’

³⁹Anai ihcobehti ponyilou ijo tomahpak ang anan mohina Yesus. Io nuhtui, ‘‘Ihko Lahca Ponyolamat, kowa? Nah, nyolamatoh rih arop-Mu tutang ihkai!’’

⁴⁰Tahpi ponyilou ihco hino ningak injahoh rih, hioioh, ‘‘Inon ihko eam mihkoh umba Pohotala? Ihko sama-sama tomohukum mahtoi kolou Io.

⁴¹Tihkas hukum ihto duo puna sotimpal umba gawiu ihto. Tahpi Io samasino eam aro kosalai!’’

⁴²Turus io nuhtui umba Yesus, ‘‘Yesus, ingatrih ahku, amat Ihko lombut huli kolou Lahca!’’

⁴³‘‘Porocayarih,’’ hion Yesus umba io, ‘‘ondou tuh ihko ahkan hihco Ahku ang Pirdaus.’’

⁴⁴Kurang-labih pukul duo balas tohun ondou, mahtanondou eam boloang, tutang sohapus lowu rih kahputpijem samasino nyiring pukul tolu sohit.

⁴⁵ Dindingbenang ijo ahkan poholat Lohpou Tuhan borutat monjadi bolah duo.

⁴⁶ Turus Yesus ngombak umba auh muhing, ‘‘Amai! Nokuh a'ang longon-Mu Ahku monyarah arop-Ku!’’ Uli nuhtui kolourih, Io ka palus.

⁴⁷Kotihka komandan sorodadu nohto, inon ijo jari nyolung, io monara Pohotala. Turus io nuhtui, ‘‘Tu'u-tu'u, Io tuh eam aro bosala!’’

⁴⁸Ulun aro ijo lombut ang anan ahkan nonton, nohto inon ijo nyolung. Iro paring buli honong ahtoi ijo paham monyasal.

⁴⁹ Tutang paring injah-jolahan Yesus, hawui ulunbawi-ulunbawi ijo homboh Io tahkan Galilea, tombok tahkan mahcu tutang nohto paringoh rih.

⁵⁰Anai ihcobehti bogare Yusep ijo boasar tahkan lowu Arimatea ang tana Yudea. Io ihcobehti pios ijo tohoromat ulun, tutang ijo rahat ngindoi ohkotoh Pohotala nopara moretah kolou Lahca. Oluka io anggota Majelis Agama, io eam sotuju umba koputusan tutang tindakan anggota majelis rih.

⁵¹

⁵²Yusep rih tulak nohimo Pilatus tutang nyawot mangat otun Yesus sonarah ahkaioh.

⁵³Pongohino io monosuluh otun Yesus tahkan kaju sopolahki, turus mukus-Oh umba benang pomukusotu tahkan lena. Uliorih rih io pokaling-Oh ang luwang kolowong ijo napaoh ang luwang puruk bahtu — kolowong rih jaha pu'u hapan.

⁵⁴Ondou rih ondou Jomahat; tutang ondou Sabat doni nopara.

⁵⁵Ulunbawi-ulunbawi ijo lombut homboh Yesus tahkan Galilea nutut Yusep tutang nopahjah kolowong rih. Iro nohto ka'a koloukuwoh otun Yesus ponokaling ang luwang tanom.

⁵⁶ Pongohino rih iro buli turus nahtap kasairorapah tutang minyak buanharum ahkan ngasai otun Yesus. Aang ondou Sabat, iro tondo bogawi ahkan mone'et hukum agama Yahudi.