Read Ot Danum LUKAS 3 Bible Online

LUKAS 3 - Ot Danum bible

LUKAS 3

¹Aang toun kolimo balas tahkan pomoretah Kaisar Tiberius, Pontius Pilatus monjadi gubernur ang Yudea, tutang Horodes moretah ang Galilea. Pilipus, konduang Horodes moretah ang daerah Iturea tutang Trakhonitis, kolourih ka'a Lisanias moretah ang Abilene.

²Ijo tuot nambit imam-imam hajo iorih Hanas tutang Kayapas. Aang toun orihrih Pohotala nuhtui umba Yohanes, anak Sakharia, ang padang bolambah.

³Mahka Yohanes tulak nokuh umo-umoh ang hopus daerah Sungoi Yordan, tutang monyiar Kabar Hinut tahkan Pohotala, Yohanes na'ah, ‘‘Hubah ihkam tahkan dusa-dusan'kam, tutang ihkam harus tonopondus, mangat Pohotala ngapun ihkam.’’

⁴ Orih horong umba ijo tonyurat ang luwang buhku Nabi Yesaya: ‘‘Anai ulun ijo na'ah ang padang bolambah, ‘Nahtap jalan ahkan Tuhan, morahta jalan ahkai-Oh.

⁵Nyinong tanaluou ahkan tonimbun, nyinong puruk tutang lukuh, tonusut. Jalan ijo kulak-keluk harus pobujuroh, tutang jalan ijo ruakrahken tonimbuk.

⁶Ulun-ulun ang hopus kolunon, ahkan nohto Pohotala nyolamatoh kolunon!’ ’’

⁷ Aro ulun lombut nokuh Yohanes ahkan tonopondus. Yohanes nuhtui umba iro, ‘‘Ihkam ulun ja'at! Iai ijo nuhtuioh, ijo ihkam tou ngolindas tahkan hukum Pohotala ijo ahkan lombut?

⁸ Ngorinahrih umba ang konuan'mu, ijo ihkam jari hubah tahkan dusa-dusan'kam! Ara hino nuhtui ijo Abraham orih tahtu ajuh 'kai. Pios ngingat: Tahkan bahtu-bahtu tuh ka Pohotala sanggup napa lihit ahkan Abraham!

⁹ Kahpak jari ngindoi ahkan nowong pu'un nyiring johcok uhat-uhatoh. Nyino-nyinong pu'un ijo eam polua bua ijo hinut, ahkan tonowong tutang dian ahkan luwang baho.’’

¹⁰‘‘Jadi, inon ijo harus ihkai nguai?’’ kisok ulun-ulun rih, umba Yohanes.

¹¹Yohanes mutah, ‘‘Ulun ijo anaingina duo kolambar kolambi, harus nonga ihcokolombar ahkan injah ijo eam ngina, tutang ulun ijo anai ukui harus io magioh.’’

¹² Ponagih-ponagih pajak ka'a lombut nokuh Yohanes ahkan tonopondus. Iro ngisokoh, ‘‘Amai guru, inon ijo harus ihkai nguai?’’

¹³Yohanes mutah, ‘‘Ara nagih molowi umba inon ijo jari tonahtap.’’

¹⁴Anai ka'a sorodadu ijo ngisok, ‘‘Koloukuwoh umba ihkai? Inon ijo harus ihkai nguai?’’ Yohanes mutah, ‘‘Ara mohenyek iai ka, tutang ara morapas duit tutang dawa-dawa alik. Cukup umba gajih'kam!’’

¹⁵Aang ohkot rih ulun-ulun nopara hokisok hawoi aropoh, inon Yohanes Lahca Ponyolamat ijo iro ngindoioh.

¹⁶Orih kotuluioh Yohanes pander ahkan iro paring, ‘‘Ahku mopondus ihkam umba danum, tahpi noin ahkan lombut Ulun ijo labih hajo tahkanumba ahku. Nguhkoi talin soruhpah-Oh ka ahku eam gunai, Io ahkan mopondus ihkam umba Roh Pohotala tutang baho.

¹⁷Ang longoi-Oh anai tahap ahkan ngiap paring gandum-Oh nyiring borasih. Gandum ahkan nipun-Oh ang luwang kolakingoh, tahpi paring apih ahkan tomahpong-Oh ang luwang baho ijo eam tou bolop!’’

¹⁸Kolourihrih Yohanes ningak ulun-ulun, umba mahca-mahcam cara aang ohkot io monyiar Kabar Hinut.

¹⁹ Tahpi Horodes pongowasa Galilea, toningak bain Yohanes tohou pongawinoh umba Herodias, oruh konduangoh, tutang paring koja'at ijo bohkon ijo jari tonapaoh.

²⁰Tahpi Horodes malah ndahang dolang koja'atoh honong posolong Yohanes ahkan luwang sipir.

²¹Uli paring ulun rih tonopondus, Yesus ka'a tonopondus. Tutang kotihka Io rahat bodo'a langit bokuap,

²² tutang Roh Pohotala mosuluh nokuh ngosan-Oh kolou bulung dala. Turus konahan auh Pohotala nuhtui, ‘‘Ihkorih Anak-Ku ijo Ahku ngasihoh. Ihko ijo ngojorih ahtoi-Ku.’’

²³Aang ohkot Yesus nopara nguangawiu-Oh, Io boumur kurang labih tolu pulu toun. Numbun hion-ulun, Io anak Yusep, anak Eli,

²⁴anak Matat, anak Lewi, anak Malkhi, anak Yanai, anak Yusep,

²⁵anak Matica, anak Amos, anak Nahum, anak Hesli, anak Nagai,

²⁶anak Maat, anak Matica, anak Simei, anak Yosekh, anak Yoda,

²⁷anak Yohanan, anak Resa, anak Serubabel, anak Sealtiel, anak Neri,

²⁸anak Malkhi, anak Adi, anak Kosam, anak Elmadam, anak Er,

²⁹anak Yesua, anak Elieser, anak Yorim, anak Matat, anak Lewi,

³⁰anak Simeon, anak Yahuda, anak Yusep, anak Yonam, anak Elyakim,

³¹anak Melea, anak Mina, anak Matata, anak Natan, anak Dawid,

³²anak Isai, anak Obed, anak Boas, anak Salmon, anak Nahason,

³³anak Aminadab, anak Admin, anak Arni, anak Hesron, anak Peres, anak Yahuda,

³⁴anak Yakub, anak Isaak, anak Abraham, anak Terah, anak Nahor,

³⁵anak Serug, anak Rehu, anak Peleg, anak Eber, anak Salmon,

³⁶anak Kenan, anak Arpakhsad, anak Sem, anak Noah, anak Lamekh,

³⁷anak Metusalah, anak Henoh, anak Yared, anak Mahalaleel, anak Kenan,

³⁸anak Enos, anak Set, anak Adam, anak Pohotala.