Read Ot Danum LUKAS 4 Bible Online

LUKAS 4 - Ot Danum bible

LUKAS 4

¹Yesus konowasaoh bain Roh Pohotala ang ohkot Io nohtah Sungoi Yordan. Roh Pohotala niting Io nokuh padang bolambah.

²Ang anan Io tonihkos bain sehtan, ohpat pulu ondou kotahiou. Kotahin ohkot rih, Io eam kuman ino-inon. Jadi ang laiuoh Io komo bolo'u.

³Sehtan nuhtui umba Io, ‘‘Ihko Anak Pohotala, kowa? Olai nyuhurih bahtu tuh monjadi luhte.’’

⁴ Yesus mutah, ‘‘Ang luwang Surat Borasih, tonyurat, ‘Ulun eam dahpot bolom tahkan luhte iou.’ ’’

⁵Turus sehtan ngomin Yesus nokuh unuk ijo isung, tutang aang 'cokopijep mahto sehtan ngorinah ahkai-Oh, paring kolahca'an ang kolunon.

⁶‘‘Paring kowasa tutang ponahtou tuh ahkan ahku nyarahoh ahkan-Mu,’’ hion sehtan umba Yesus, ‘‘tului paringoh jari tononga ahkak'ku, tutang ahku nonga ahkan iai bewe ijo ahku jolik umba io.

⁷Paringoh tuh ahkan monjadi ain-Mu, amat Ihko suhkuntu'ut nyembah ahku.’’

⁸ Yesus mutah, ‘‘A'ang Surat Borasih, anai tonyurat, ‘Nyembahrih Tuhan, Pohotalan'mu tutang mohalu io iou.’ ’’

⁹Turus sehtan ngomin Yesus nokuh Yerusalem tutang ngina Io ang ngosan bohuwung Lohpou Tuhan tutang nuhtui umba Io, ‘‘Ihko Anak Pohotala, kowa? Jadi nokohjuk tahkan ohtoi.

¹⁰ Tului ang luwang Surat Borasih anai tonyurat, ‘Pohotala ahkan nyuhu molehkat-molehkat-Oh mohaga Ihko pio-pios.’

¹¹ Tutang ka'a, ‘Molehkat-molehkat ahkan nyambut Ihko honong longon iro, mangat pa'an-Mu eam totuhking ang bahtu.’ ’’

¹² Yesus mutah, ‘‘Ang luwang Surat Borasih, tonyurat, ‘Ara nikos Tuhan Pohotalan'mu.’ ’’

¹³Uli sehtan tondo nikos Yesus hapan kokaron mahcam cara, io nohtah Yesus tutang ngindoi ohkot ijo pios.

¹⁴Pongohuli Yesus buli nokuh Galilea; tutang Io tongowasa bain Roh Pohotala. Tarung tohou arop-Oh johcok nokuh sohapus tana rih.

¹⁵Io majar ang lohpou sombayang, tutang paring ulun monara Io.

¹⁶Yesus hihkas hino nokuh Nasaret, unuk Io tonohajo. Aang ondou Sabat, numbun kopahtutoh Io tulak nokuh lohpou sombayang. Io tombok ahkan mbasa Surat Borasih,

¹⁷tutang tononga ahkai-Oh surat Nabi Yesaya. Io nguap balun surat rih, turus Io nyombang ayat tuh,

¹⁸ ‘‘Roh Tuhan anai aang Ahku, tului Io jari ngahtang Ahku ahkan mborihtaoh Kabar Hinut ahkan ulun porosbolum. Io nguhtus Ahku ahkan monyiar koliwus bagi ulun tonotawan tutang kopios ahkan ulun ijo bobulen; ahkan momorodehkaoh ulun tohenyek

¹⁹tutang monyiar polombutoh wayah Tuhan monyolamat ukup-Oh.’’

²⁰Yesus mbalun huli buhku rih, tutang ngombulioh ahkan ijo nginaoh, tutang turus tuot. Paring ulun ang lohpou sombayang rih, uras nopahjah Io.

²¹Tutang Yesus nopara bopander umba iro koloutuh, ‘‘Ayat-ayat Surat Borasih tuh, ang ondou tuh nyolung aang rahat ihkam ngonih-Oh.’’

²²Auh-auh ijo konohawot-Oh hinut samasino, nyiring iro helan tutang momihak Io. Iro nuhtui, ‘‘Eamkah Io tuh anak Yusep?’’

²³Mahka Yesus mutah auh'ndo, ‘‘Musti ihkam ahkan hapa tindung tuh tohimo Ahku, ‘Dokter, ngopiosrih arop'mu bongom. Kahtahelan ijo ihkai ngonih Ihko nguai ang Kapernaum, nguai ka'a ang lowuhuman-Mu bongom.’ ’’

²⁴ Yesus mondahang auh hino, ‘‘Ingatrih, eam anai nabi ijo tomohoromat ang lowui humaioh bongoi.

²⁵ Tahpi ngonihrih: Aang jaman Elia, kotihka eam aro nosuluh uhjan tolu sotengah toun kotahiuoh, nyolung lo'u ijo paham ang paring lowu. Aang ohkot orih anai aro balu-balu ang Israel.

²⁶ Oluka kolourih, Pohotala eam nyuhu Elia tulak nokuh ahkan ihco tahkan marak balu-balu rih, molekan tihkas ahkan ihcobehti balu ang Sarfat ang daerah Sidon.

²⁷ Kolourih ka'a, ang jaman Nabi Elisa anai aro ulun ang Israel boponyahkit belang, ijo mopihkoh, tahpi eam ihcobehti ka'a tahkan iro tongopios, kocoali Naaman ulun Siria rih.’’

²⁸Paring ulun ang lohpou sombayang rih bosingi samasino ohkot ngonih hal rih.

²⁹Iro tombok turus muhko Yesus nokuh luar lowu, tutang ngitot-Oh nokuh kowangkorong, ang umoh lowun iro tonombok. Iro nohuang nonjuhung Io nyolong nokuh kowang korong.

³⁰Tahpi Yesus nyolat aropoh holat ulun aro rih turus hihkas.

³¹Pongohuli Yesus hihkas nokuh lowu Kapernaum ang Galilea. Ang anan Io majar ulun-ulun ang ondou Sabat.

³² Iro helan nohto caraoh, Io majar, tului Io bopander hawui pongaroh.

³³Ang anan ang lohpou sombayang rih anai ihcobehti ijo sonorupang roh ja'at ulun rih bokociak-kociak,

³⁴‘‘O Yesus, ulun Nasaret, Ihko kani nguan inon umba ihkai? Ihko lombut ahkan morusak ihkai? Ahku ta'an iai Ihko: Ihko sonuhu ijo borasih tahkan Pohotala!’’

³⁵‘‘Tonih!’’ Karahang Yesus ahkan roh ja'at rih. ‘‘Solukarih ihko tahkan ulun tuh!’’ Turus roh ja'at rih moropihtan ulun rih, ang tohimo ulun aro, pongohino soluka tahkan ulun rih tahpi eam ngoporosoh.

³⁶Paring ulun helan, tutang nuhtui hawoi aropoh, ‘‘Eam inon auh-auh-Oh. Umba bopongaroh tutang kowasa Io moretahoh roh-roh ja'at rih soluka, tutang iro soluka ka'a!’’

³⁷Mahka kabar tohou Yesus johcok ang sohapus tana hokodiling.

³⁸Yesus nohtah lohpou sombayang rih, turus tulak nokuh lohpou Simon. Opu Simon rahat poros mondam, tutang ulun-ulun nyorihtaoh hal rih ahkan Yesus.

³⁹Yesus hihkas nokuh unuk opu Simon kaling, turus muhko darom orih. Darom rih nihou, tutang opu Simon rih turus kuat tutang nohalu iro.

⁴⁰Kotihka mahtanondou rahat bolop, paring ulun ngomin ahkan Yesus, konduang-konduangoh ijo poros mahca-mahcam ponyahkit. Yesus ngina longoi-Oh nokuh ngosan kuhung iro nyino-nyinong tutang ngopios iro paring.

⁴¹Roh-roh ja'at ka soluka tahkan aro ulun, hawoi ngombak-ngoriak, ‘‘Ihko Anak Pohotala!’’ Tahpi Yesus ngorahang iro tutang eam aro nonga ijin iro nuhtui kolourih, tului iro kota'an ijo Io Lahca Ponyolamat.

⁴²Aang ohkot mahtanondou punai lombut Yesus nohtah lowu rih, turus tulak nokuh ihco unuk ijo tonih-benyem. Ulun-ulun nopara ngurah Io, tutang kotihka iro nyombang Io, iro ngurah-jalan, mangat Io ara nohtah iro.

⁴³Tahpi Yesus nuhtui, ‘‘Kabar hinut tohou koloukuwoh Pohotala moretah, harus Ahku mborihta ka'a ang nyinong karon-lowu bohkon, tului ahkan orih rih, Pohotala nyuhu Ahku nokuh kolunon.’’

⁴⁴Tului orih Yesus bokotbah ang luwang lohpou-lohpou sombayang ang sohapus tana Yudea.