Read Ot Danum LUKAS 5 Bible Online

LUKAS 5 - Ot Danum bible

LUKAS 5

¹ Aang ihco ohkot, Yesus tombok ang saran Danou Genesaret. Aro ulun hokosihki-kupuroh ahkan ngonih borihta tahkan Pohotala.

²Yesus nohto duo alut ang tohpin rih; ulun-pongohcinoh jari jahkat tahkan alut-alut rih, tutang beteng muhi jala'ndo.

³Yesus jahkat nokuh ihco alut, iorih alut Simon, turus nyuhu Simon nulak alutoh rih, isut mahcu tahkan saro. Yesus tuot ang luwang alut rih tutang majar ulun aro.

⁴Uli tondo mongajar, Io nuhtui umba Simon, ‘‘Meseurih nokuh unuk ijo timbon, tutang nimbai jala'mu ahkan nawan ohcin.’’

⁵ ‘‘Amai Guru,’’ hion Simon, ‘‘'Cokombun ngolomi ihkai bogawi paham, tahpi eam duon ino-inon! Tahpi tului Amai nyuhu, olai, ahku ahkan nimbai jala hino.’’

⁶ Ulimba iro nguanoh rih, iro ngondahpot kolourih karo ohcin nyiring jala'ndo nopara boruhtat.

⁷Tului orih iro nyawot dohop umba injah-jolahan iro ang alut ijo bohkon. Injah-jolahan iro rih lombut, turus iro sama-sama nyuang koduo alut rih tuwi umba ohcin, nyiring alut-alut rih nyiring kahom.

⁸Ohkot Simon nohto rih, io nyembah suhkuntu'ut ang tohimo Yesus, turus nuhtui, ‘‘Nohtah ahku, Tuhan! Tului ahku ulun ijo bodusa!’’

⁹Simon tutang paring ulun ijo homboh io helan nohto arooh ohcin ijo iro nyalaoh.

¹⁰Kolourih ka'a umba injah-jolahan Simon, iorih Yakobus tutang Yohanes, anak-anak Sebedeus. Yesus nuhtui umba Simon, ‘‘Ara mihkoh! Nopara uhuntuh, ihko ahkan monjadi ponjala ulun.’’

¹¹Simon tutang injah-jolahaioh nguhut alut-alut rih ahkan isun kowang, pongohino nohtahoh paringoh turus iro ngohasu Yesus.

¹²Aang sino ondou, Yesus anai ang ihco lowu. Ang anan anai ihcobehti bahkas ijo behtiouoh tuwi umba ponyahkit belang ijo mongolioh. Kotihka io nohto Yesus, io suhkuntu'ut nyembah ang tohimooh hawoi nyawot, ‘‘Amai, amat Amai kani, Amai duon ngopios ahku!’’

¹³Yesus nambit ulun rih hawoi nuhtui, ‘‘Ahku kani, piosrih ihko!’’ Wayah rih ka'a ponyahkit orih nihou.

¹⁴ Turus Yesus baca io nyiar aang orih ahkan ia-iai ka, hion Yesus, ‘‘Tulak nokuh imam, tutang nyawot io ahkan momasti ihko jari pios. Turus tulak nonga pononga kolou ijo ponoretah Museh, kolou kopahtut ahkan ulun-ulun ijo ihko jari tu'u-tu'u pios.’’

¹⁵Tahpi kabar tohou Yesus rih tosiar nokuh umo-umoh, tutang aro ulun lombut ahkan ngonih-Oh, tutang ahkan konopios tahkan ponyahkit iro.

¹⁶Uliorih rih Yesus tulak bodo'a nokuh unuk ijo tonih.

¹⁷Aang sino ondou kotihka Yesus mongajar, anai pira-pira ulun Parisi tutang guru-guru agama tuot ang anan. Iro lombut tahkan Yerusalem tutang tahkan lowu-lowu ang Galilea tutang Yudea. Kuwasa Tuhan anai ang Yesus unuk ngopios ulun-ulun poros.

¹⁸Aang ohkot rih pira-pira ulun lombut ngitot ihcobehti ijo mahtoibehtiu ijo kaling ang ngosan kahcangoh. Iro ngurah jalan ngitot ulun rih, nokuh luwang lohpou, mangat dahpot ngina io ang tohimo Yesus.

¹⁹Tahpi tului ulun rih paham aro ang anan, iro eam duon ngitotoh nyolong. Bain tului orih iro ngohtun io nokuh diang sahpou lohpou. Turus iro ngahkas sahpou, tutang monosuluh io sama-sama umba kahcangoh ang tohimo Yesus, ijo ang tohun ulun aro rih.

²⁰Kotihka Yesus nohto eam inon kohahjoioh porocaya iro, Io nuhtui umba ulun rih, ‘‘Konduang, dusa'mu jari tonapun.’’

²¹Guru-guru agama tutang ulun-ulun Parisi nopara hopander sama arop iro, ‘‘Iai ulun tuh ijo bohanyi ngonja'at Pohotala? Iai ijo duon ngapun dusa-dusa, bohkon umba Pohotala bongoi?’’

²²Yesus ta'an pongisok iro. Jadi Io nuhtui, ‘‘Ombai ihkam hokisok kolourih ang luwang ahtoi ihkam?

²³Umoh ijo labih jeleng, nuhtui, ‘Dusa'mu jari tonapun,’ ata'ai nuhtui, ‘Kuatlah tutang nyalanrih!’?

²⁴Tahpi huntuh Ahku ahkan ngorinah ahkan'kam ijo ang ngosan tana tuh Anak Ulun bokowasa ahkan ngapun karon-dusa.’’ Turus Yesus nuhtui umba olun mahtoibehtiu rih, ‘‘Kuatlah, ngohtun kahcangkaruk'mu tutang buli iou!’’

²⁵Bojeleng ulun rih kuat ang tohimo iro paring, turus ngahtang kahcangkarukoh, tutang buli honong monara Pohotala.

²⁶Iro paringoh helan samasino, turus monara Pohotala. Tutang hawui nanyam ijo mihkoh, iro nuhtui, ‘‘Helan samasino aang jari, ijo ihto nyaksioh ondou tuh!’’

²⁷Ulirih Yesus soluka tutang nohto ihcobehti ponagih pajak, bogare Lewi, rahat tuot ang kantoroh. Yesus nuhtui umba io, ‘‘Ngohasu Ahku.’’

²⁸Lewi tombok tutang nohtah paringoh, turus ngohasu Yesus.

²⁹Uliorih rih Lewi nguan pesta ang lohpouoh ahkan Yesus. Aro ponagih pajak tutang ulun-ulun bohkon umba kuman homboh umba iro.

³⁰ Papira ulun Parisi tutang guru-guru agama, nanyam eam sanang turus nuhtui umba murid-murid Yesus, ‘‘Ombai ihkam paringoh kuman ngorih umba ponagih pajak tutang ulun-ulun ijo eam pios?’’

³¹Yesus mutah, ‘‘Ulun ijo borigas eam porulu dokter, tihkas ulun ijo poros iou.

³²Ahku lombut eam ahkan na'ah ulun-ulun ijo nanyam aropoh jari hinut, molekan ulun-ulun ijo bodusa, mangat'ndo hubah tahkan dusa-dusan'ndo.’’

³³Ulun-ulun nuhtui umba Yesus, ‘‘Murid Yohanes tutang murid ulun-ulun Parisi bojoin puasa tutang bodo'a. Tahpi murid-murid'mu kuman tutang ngorih.’’

³⁴Yesus mutah, ‘‘Inonrih ihkam duon nyuhu ulun pomasap, puasa ang pesta kawin, kotahin pongaten bahkas masih sama-sama iro? Puna eam!

³⁵Tahpi ahkan johcok ohkotoh, pongaten bahkas rih ahkan konomin tahkan iro. Aang ohkot orih rih iro ahkan puasa.’’

³⁶Turus Yesus monyorihta ahkan iro porobasa tuh, ‘‘Eam aro ulun ijo nupang kolambi ijo oko umba 'cokarabit benang tahkan kolambi bohua rih. Tului kolambi ijo oko borutat bain benang ijo bohua rih. Mahihino benang tupangoh ihco bohua rih eam cuhcuk umba kolambi ijo soun rih.

³⁷Kolourih ka'a eam aro ulun ijo nyuang anggur bohua nokuh luwang tolehkung uhpak ijo oko, tului anggur bohua orih ahkan kotuluioh tolehkung usang rih pusit. Mahka anggur orih botusuh, tutang tolehkungoh rusak.

³⁸Anggur ijo bohua harus nyuang ang tolehkung ijo bohua.

³⁹Kolourih ka'a eam aro ulun, ijo kani ngorih anggur ijo bohua, uli ngorih anggur ijo usang. ‘Anggur ijo usang rih labih nyoling,’ hioioh.’’