Read Ot Danum LUKAS 6 Bible Online

LUKAS 6 - Ot Danum bible

LUKAS 6

¹ Aang sino ondou Sabat, kotihka Yesus nyuru ihco umo gandum, murid-murid-Oh ngohtom gandum rih. Iro ngoluhpotoh gandum rih umba longoi, tutang turus kumaioh.

²Pira-pira ulun Parisi nuhtui, ‘‘Ombai ihkam molanggar hukum-hukum agaman ihto, tului nguan ijo ngohana aang ondou Sabat?’’

³ Yesus mutah, ‘‘Jaha pu'uoh ihkam mbasa tohou ijo konuanoh Lahca Dawid, kotihka io tutang ulun aiu bolo'u?

⁴ Io nyolong ahkan luwang lohpou Tuhan tutang ngomin luhte ijo jari tonyorahoh ahkan Pohotala, turus kumaioh. Pongohuli tonongaoh ka'a ahkan ulun aiuoh luhte rih. Podahal numbun hukum agaman ihto, imam beweu ijo duon kuman luhte rih.’’

⁵Turus Yesus nuhtui, ‘‘Anak Ulun bokowasa isun ondou Sabat!’’

⁶Aang sino ondou Sabat ijo bohkon, Yesus tulak mongajar ang lohpou sombayang. Aang anan, anai ulun ijo longoi silaioh mahtoi.

⁷Pira-pira guru agama tutang ulun Parisi kani ngurah kosalan Yesus, ahkan iro tou ngadu Io. Jadi iro turus nohtoani, inon Io ahkan ngopios ulun ang ondou Sabat.

⁸Tahpi Yesus kota'an tiruk iro. Mahka Io nuhtui umba ulun ijo mahtoi longoi silai orih, ‘‘Olai, tombok ang ohtoi ang boun!’’ Ulun rih kuat, turus tombok ang anan.

⁹Pongohino Yesus ngisok umba ulun-ulun ijo anai ang anan, ‘‘Numbun agaman ihto, tou nguan inon ang ondou Sabat? Nguan ijo hinut ata'ai nguan ijo ja'at? Monyolamat ulun ata'ai moncolahka ulun?’’

¹⁰Yesus nohto hokodiling ahkan iro paring, turus nuhtui umba ulun rih, ‘‘Nyulukohrih longon'mu.’’ Ulun rih nyulukoh longoioh, tutang longoi ka pios.

¹¹Tahpi guru-guru agama tutang ulun-ulun Parisi rih bosingi samasino, tutang nopara bohaum tohou inon ijo tou iro nguai nohimo Yesus.

¹²Aang ohkot rih Yesus nuhkat nokuh pupung puruk kani bodo'a. Aang anan Io bodo'a ahkan Pohotala sokombun ngolomi rih.

¹³Amat ondou jari boloang, Io na'ah murid-murid-Oh, turus ngopili duo balas behti tahkan iro. Io napa aran koduo balas behti rih, karon-rasul. Iro anairih:

¹⁴Simon (ijo konohawot-Oh Petrus), tutang Andreas konduang Simon rih, Yakobus tutang Yohanes, Pilipus tutang Bartolomeus,

¹⁵Mateus tutang Tomas; Yakobus anak Alpeus, tutang Simon (ulun Selot),

¹⁶Yudas anak Yakobus, tutang Yudas Iskariot ijo pongo hino, monjadi pongorana Yesus.

¹⁷Pongohino Yesus mosuluh tahkan puruk rih, homboh umba rasul-rasul rih, turus tondo tutang tombok ang ihco unuk ijo ngondahtah. Aang anan anai ka'a ijo kopulau hajo murid-murid-Oh ijo bohkon, tutang aro ulun ijo lombut tahkan umo-umoh tahkan hapus Yudea, tutang Yerusalem, tutang lowu-lowu Tirus tutang Sidon ijo saran tasik.

¹⁸Iro lombut kani ngonih auh Yesus, tutang ahkan konopios tahkan karon-ponyahkit'ndo. Iro ijo sonorupang roh ja'at lombut ka'a tutang tonopios.

¹⁹Paring ulun ngurah jalan nokaweh Yesus, tului anai kowasa ijo bolua tahkan behtin Yesus, ijo ngopios iro paring.

²⁰Yesus nopahjah murid-murid-Oh, turus nuhtui, ‘‘Kosanangrih ihkam ulun-ulun porosbolum, tului ihkam anairih anak ukup ain Pohotala!

²¹Kosanangrih ihkam ijo bolo'u uhuntuh; ihkam ahkan konombosuhoh! Kosanangrih ihkam ijo nangih uhuntuh; ihkam ahkan ngota'o!

²² Kosanangoh ihkam, amat konohiri ulun, tonulak, tonohina tutang tonopitnah bain tului Anak Ulun!

²³ Nabi-nabi aang jaman houn tononguanoh kolourih ka'a. Amat hal orih nyolung, hondakleh ihkam sanang ahtoi tutang nari honong jorih, tului hajo upah tonahtap ahkan ihkam ang soruga.

²⁴Tahpi colahkarih ihkam ijo tahtou uhuntuh; tului ihkam jari nginyam komomih-kopioioh!

²⁵Colahkarih ihkam ijo bosuh huntuh; tului ihkam ahkan bolo'u! Colahkarih ihkam ijo ngota'o huntuh; tului ihkam ahkan poros ahtoi, tutang nangih!

²⁶Colahkarih ihkam, jahka paring ulun monara ihkam; tului kolouorih ka'a tahtu ajuh iro monara nabi-nabi pobula jaman lomoi.’’

²⁷‘‘Tahpi ahkan ihkam ijo ngonih Ahku huntuh, Ahku nonga pohtoh tuh: Ngasi musuh-musuh'kam, tutang nguan kopios umba ulun ijo bosingi ihkam.

²⁸Mborehkat ulun ijo tatai nulat'kam, tutang bodo'a ahkan ulun ijo ja'at tohimo'kam.

²⁹Amat ulun ngahpek kohcom'kam ijo sila koto'u, nyuhu io ngahpek kohcom'kam sila komuloi hino. Amat jubah'kam tononyilou, nonga ka'a kolambi'kam.

³⁰Amat ulun nyawot aangihco tahkan ihko, nonga rih ahkaioh; tutang amat ramun'kam tononyilou, ara ihko nyawotoh huli.

³¹ Nguan umba ulun bohkon, kolou ijo ihkam jolik ulun bohkon nguai umba ihkam.

³²Amat ihkam ngasih ulun-ulun ijo ngasih ihkam beweu, inon gunaioh? Ulun bodusa ka'a ngasih ulun ijo ngasih iro!

³³Tutang amat ihkam nguan kopios umba ulun-ulun, ijo nguan kopios ahkan'kam beweu, inon balos'kam? Ulun bodusa mahi nguan kolourih!

³⁴Tutang amat ihkam nyahaman duit baya ahkan ulun-ulun ijo tou nahuroh, inon balos'kam? Ulun bodusa ka'a nyahaman duit ahkan ulun bodusa, turus nyawotoh nahuroh!

³⁵Koharusoh eam kolourih! Ihkam sobalikoh harus ngasih musuh'kam, tutang nguan aang hinut ahkan iro. Ihkam harus nonga pohonjaman, tutang ara harapoh tou buli. Amat kolourih uhpah'kam ahkan hajo, tutang ihkam ahkan monjadi anak-anak Pohotala Ijo Maha Isung. Tului Pohotala hinut ahtoi nohimo ulun ijo eam ta'an torimakasih, tutang tohimo ulun ijo ja'at ka'a.

³⁶Hondakoh ihkam monjadi pongasih kolou Amai'kam ijo tuwi umba pongasih!’’

³⁷‘‘Ararih mosara ulun bohkon, mangat ihkam bongom ka'a eam tomosara bain Pohotala. Ararih mohukum ulun bohkon mangat ihkam bongon ka'a ara tomohukum Pohotala. Ngapunrih ulun bohkon, mangat Pohotala ka'a ngapun ihkam.

³⁸Tongarih ahkan ulun bohkon, mangat Pohotala ka'a nonga ahkan'kam; ihkam ahkan norima pononga ijo labih molowi, ijo jari tonakar sito-siton ahkan'kam. Tului tahkar ijo ihkam hapaoh ahkan ulun bohkon, ahkan tohapa Pohotala ahkan'kam.’’

³⁹ Pongohuli Yesus monyorihta ahkan iro porobasa pongo tuh, ‘‘Amat ulun bobulen niting ulun bobulen ijo bohkon, musti koduo-duooh rih ahkan botahak nokuh luwang lowong.

⁴⁰ Eam anai murid ijo labih hajo tahkanumba guruoh. Tahpi murid ijo jari opah ajaroh, ahkan monjadi sama kolou guruoh.

⁴¹Ombai ihkam nohto poruhuk luwang mahtan konduang'kam, rahatanaioh tohtokkahju ijo ang mahta'kam bongom eam ihkam nontoanioh?

⁴²Koloukuwoh ihkam duon ngohawot ahkan konduang'kam, ‘Olai, konduang, ahku polua poruhukkahju atuh rih tahkan mahtan'kam,’ Rahatanaioh ang luwang mahtan'kam bongom, tohtokkahju ijo eam ihko nohto? O ulun pura-pura! Poluarih soun tohtokkahju ijo anai ang mahtan'kam bongom. Punan rih ihkam duon nohto honong tarang tutang dahpot mopolua poruhukkahju tahkan mahtan konduang'kam.’’

⁴³‘‘Pu'un ijo bosiwuh eam mua bua ijo ja'at. Kolourih ka'a pu'un ijo eam bosiwuh eam mua bua ijo pios.

⁴⁴ Nyinong pu'un, ulun ngosonooh tahkan buaoh. Ruwut duhi eam tou mua bua sikun, tutang ruwut duhi eam mua bua anggur.

⁴⁵ Ulun ijo pios poluaoh hal-hal ijo hinut, tului ahtoioh tuwi umba kohinut. Ulun ijo ja'at nguan hal-hal ijo ja'at tului ahtoioh tuwi umba koja'at. Tului inon ijo konohawot bain nyama jorih ijo momujar tahkan ahtoi.’’

⁴⁶‘‘Ombai ihkam na'ah Ahku, ‘Tuhan, Tuhan,’ tahpi eam molalus inon ijo Ahku nuhtui ahkan'kam?

⁴⁷Umba iaikah dahpot ihto nyamaoh ulun ijo lombut ahkak-Ku, tutang ngonih auh-auh-Ku, honong molalusoh? — Piosrih Ahku, pokarahoh ahkan'kam — .

⁴⁸Io kolou ulun ijo kotihka nombok lohpou, ngali timbo-timbon, turus napa galangoh umba bahtu. Aang ohkot anai danum ba'ah noturung lohpou rih, lohpou orih eam duon hogunde tului jari tonombok ang ngosan galang ijo pios.

⁴⁹Tahpi ulun ijo ngonih auh-auh-Ku tutang eam molalusoh, jorih kolou ihcobehti ulun ijo nombok lohpouoh eam anai galangoh. Amat danum ba'ah noturung lohpou rih, lohpou rih jeleng bolihang; tutang rusakoh hajo samasino!’’