Read Ot Danum LUKAS 7 Bible Online

LUKAS 7 - Ot Danum bible

LUKAS 7

¹Umbot jari nuhtui hal-hal orih ahkan ulun aro, Yesus tulak nokuh Kapernaum.

²Ang anan anai komandan sorodadu Ruma ijo anai tepun jihpon ijo paham ponokasihoh. Jipoi rih mondam karas nyiring kani palus.

³Aang ohkot komandan rih ngonih tohou Yesus, io nyuhu pira-pira okon ulun Yahudi tulak nokuh-Oh ahkan nyawot mangat Io lombut tutang ngopios jihpoi rih.

⁴Kotihka johcok umba Yesus, ulun-ulun rih nyawot honong paham mangat Yesus dohop komandan rih, ‘‘Komandan tuh punatou dahpot pondohop bain Amai,’’ hion'ndo umba Yesus,

⁵‘‘tului io ngasih uhtus ihto, tutang jari mangun lohpou sombayang ahkan ihkai.’’

⁶Mahka Yesus tulak homboh umba iro. Kotihka Yesus kani johcok ang lohpou rih, komandan rih nyuhu injah-injahoh ahkai nuhtui, ‘‘Eam usah Amai uyu-uyuh nokuh lohpou'ku. Ahku eam pahtut norima Amai ang lohpou'ku.

⁷Orih kotuluioh ahku bongok eam bohanyi nyombang Amai. Jadi nonga iou poretah mangat jihpok'ku pios.

⁸Tului ahku ka'a minda umba poretah ijo isung umba ahku, tutang ang pinda ahku anai ka'a karon-sorodadu ijo harus numbun aang poretah'ku. Amat ahku moretah ihcobehti sorodadu, ‘Tulak!’ io ka tulak; tutang amat ahku moretah umba ijo bohkon, ‘Olai kohtoi!’ io ka lombut. Tutang amat ahku moretah jihpok'ku, ‘Nguan tuh!’ io ka nguaioh.’’

⁹Yesus helan ngonih orih. Io ngulos tutang nuhtui umba ulun aro ijo rahat nuhtut Io, ‘‘Eam inon ulun tuh. Ang louk uhtus Israel ka jaha pu'u Ahku nyombang koporocaya kohajon tuh!’’

¹⁰Kotihka ulun-ulun ijo tonyuhu rih buli ahkan lohpou komandan rih, jihpoi orih jari pios.

¹¹Eam tahi pongohuli, Yesus hihkas nokuh lowu Nain. Murid-murid-Oh tutang ulun aro hihkas homboh Io.

¹²Ohkot Yesus johcok ang doni boun bauntukang lowu, ulun-ulun rahat ngihtot otu nokuh luar lowu. Ijo mahtoi orih, yorih anak bahkas, anak tukan ihcobehti bawi balu. Aro ulun lowu homboh inaioh rih.

¹³Kotihka Tuhan Yesus nohto ulunbawi rih, Io ngasianyam umba io turus nuhtui, ‘‘Ara nangih, inai!’’

¹⁴Pongohuli rih Yesus ngondoni tobala otun anak rih, tutang nambit tobalaoh. Mahka ulun ijo ngohtun tobala rih tondo. Yesus nuhtui, ‘‘O anakbiou, Ahku nyuhu ihko monyun!’’

¹⁵Anakbiou ijo jari mahtoi rih monyun, tuot tutang nopara pander. Mahka Yesus nongaoh ahkan inaioh.

¹⁶Paring ulun mihkoh tutang nopara monara Pohotala. Iro nuhtui, ‘‘Ihcobehti nabi hajo jari lombut ang tohun-louk ihto! Pohotala jari lombut ahkan monyolamat ukup-Oh!’’

¹⁷Kabar tohou Yesus rih tosiar ang sohapus Yudea tutang karon-lowu hokodilingoh.

¹⁸Murid-murid Yohanes monyorihta ahkan Yohanes paring angjadinyolung orih. Mahka Yohanes na'ah duo behti muridoh

¹⁹turus nyuhu iro hihkas nokuh Tuhan Yesus tutang ngisok Io, ‘‘Amairih ulun rih ijo ahkan lombut numbun bowot Pohotala, ata'ai harus ihkai ngindoi 'cobehti bohkon?’’

²⁰Koduo murid Yohanes rih tulak nokuh Yesus tutang nuhtui, ‘‘Yohanes Popondus nyuhu ihkai ngisok umba Amai, inonrih Amai ulun ijo lombut numbun bowot Pohotala, ata'ai harus ihkai ngindoi ulun bohkon?’’

²¹Ohkot rih, Yesus ngopios aro ulun, tutang muhko aro roh ja'at tutang nguan aro ulun bobulen tou nohto.

²² Jadi Yesus mutah, ‘‘Bulirih nokuh Yohanes tutang mander ahkaioh, inon ijo ihkam ngonih, tutang nohto: ulun bobulen tou nopahjah, ulun mahtoipa'ai tou nyalan, ulun ijo boponyahkit belang ijo mokorieng pios, ulun borengen ngonih, ulun mahtoi bolum huli, tutang Kabar Hinut tahkan Pohotala, jari tonyiar ahkan ulun-ulun porosbolum.

²³Kosanang rih ahkan ulun ijo eam anai porokehtoi ahkan nulak Ahku.’’

²⁴Uli ulun-ulun sonuhu Yohanes rih buli, Yesus nopara bopander umba ulun aro tohou Yohanes, hioi-Oh, ‘‘Ihkam tulak nokuh padang bolambah, ahkan nohto inon? Ijo kopu'un poring ijo tonahpi bahiu?

²⁵Ihkam tulak ahkan nohto inon? Ihcobehti ijo hopokajan bohinoi? Ulun-ulun ijo hopokajan kolourih tutang ijo bolum molobien mohcon aang istana lahca!

²⁶Jadi ihkam bolua ahkan nohto iai? Ahkan nohto ihcobehti nabikah? Tu'u, malah anai labih tahkanumba ihcobehti nabi.

²⁷ Tului Yohanes orihrih ijo konohuang luwang ayat Surat Borasih tuh, ‘Tuhrih ulun sonuhu-Ku,’ hion Pohotala, ‘Ahku ahkan nyuhu io labih houn tahkanumba-Mu, ahkai io nawas jalan ahkan-Mu!’ ’’

²⁸‘‘Ingatrih!’’ hion Yesus hino, ‘‘ang kolunon tuh eam pu'u anai ulun ijo labih hajo tahkan Yohanes Popondus. Tahpi ulun ijo paling koik ang louk ukup Pohotala, labih hajo tahkan Yohanes Popondus.’’

²⁹ Paring ulun — Tahput ponagih-ponagih pajak — ngonih Yesus nuhtui hal rih; iro ulun-ulun ijo jari mone'et sawot kohondak-kohondak Pohotala, tutang kani tonopondus bain Yohanes.

³⁰Tahpi ulun-ulun Parisi tutang guru-guru agama eam kani norima rancana Pohotala ahkan arop'ndo. Iro eam kani tonopondus bain Yohanes.

³¹Turus Yesus bopander hino, hioi-Oh, ‘‘Umba inon harus Ahku nindung ulun-ulun jaman tuh? Kolou inonkah iro?

³²Iro kolou anak-anak ijo tuot ang pasar; ihcokopulou na'ah umba ijo bohkon, ‘Ihkai ngonyahpi lagu jorih ahkan ihkam, tahpi ihkam eam kani narinasai! Ihkai nyanyi ihco lagu koporosahtoi tutang ihkam eam nangih!’

³³Yohanes Popondus lombut — io bopuasa tutang eam ngorih anggur — tutang ihkam nuhtui, ‘Io nyalung sehtan!’

³⁴Anak Ulun lombut — Io kuman tutang ngorih — turus ihkam nuhtui, ‘Topahjah ulun rih! Bokora, pombusou, hojolahan umba ponagih pajak, tutang hojolahan umba ulun bodusa.’

³⁵Oluka kolourih, kolomunahtoi Pohotala gihtan tahkan paring ulun ijo norima Oh.’’

³⁶Ihcobehti ulun Parisi, bogare Simon, na'ah Yesus kuman. Yesus tulak nokuh lohpouoh tutang tuot kuman.

³⁷ Ang lowu rih anai ihcobehti bawi ijo bolum ang dusa. Ohkot io ngonih ijo Yesus beteng kuman ang lohpou ulun Parisi rih, io lombut hawoi ngomin ihco kasa pualam bosuang minyak buanharum.

³⁸Io tombok ang sila likut Yesus doni pa'ai-Oh tutang nangih homboh misa pa'an Yesus hapa danum mahtaioh. Uli hino pa'an Yesus tongapitoh umba balouoh turus ngarokoh tutang nahtaoh umba minyak buanharum.

³⁹Kotihka ulun Parisi ijo morawe Yesus nohto ang rih, io nuhtui ang ahtoioh, ‘‘Jahka Io tuh Nabi, puna Io ta'an iai ulunbawi tuh ijo ngendeh Io, tutang ijo ulunbawi rih bolum a'ang dusa!’’

⁴⁰Turus Yesus nuhtui umba Simon, ‘‘Simon, anai aangihco ijo kani Ahku mander ahkan ihko.’’ ‘‘Yo, Amai Guru,’’ hion Simon, ‘‘nuhtuirih.’’

⁴¹Yesus nuhtui, ‘‘Anai duo behti ijo nguhtang umba ulun ijo nyohaman duit. Ijo'cobehti nguhtang limo lahtus duit perak, tutang ijo'cobehti hino limo pulu duit perak.

⁴²Koduo-duooh eam duon mbayar uhtangoh rih, mahka uhtang iro tomotihouoh. Orih, iai tahkan iro duo behti rih ahkan labih mongasih umba ulun ijo monjohamanoh duit rih?’’

⁴³‘‘Ahku niruk ulun ijo paling aro tomotihou hutangoh!’’ hion Simon. ‘‘Tiruk'mu tu'u,’’ hion Yesus.

⁴⁴Turus Yesus nopahjah umba ulunbawi rih, tutang nuhtui umba Simon, ‘‘Ihko nohto ulunbawi tuh? Ahku lombut nokuh lohpou'mu, tutang ihko eam nyodia danum hapa muhi pa'ak-Ku; tahpi ulunbawi tuh jari muhi pa'ak-Ku umba danum mahtaioh, tutang ngahpitoh umba balouoh.

⁴⁵Ihko eam nyambut Ahku hawui ngarok, tahpi ulunbawi tuh eam tondo ngarok pa'ak-Ku, tahkan Ahku lombut ang ohtoi.

⁴⁶Ihko eam nusuh minyak ang kuhung-Ku, tahpi ulunbawi tuh jari nusuh minyak buanharum ang pa'ak-Ku.

⁴⁷Tu'u-tu'u: pongasihoh ijo hajo rih bokorinah ijo dusaioh ijo aro jari dahpot apun! Amat ulun tonapun honjiot, io ahkan pongasioh honjiot ka'a.’’

⁴⁸Turus Yesus nuhtui umba ulunbawi rih, ‘‘Dusa-dusan'mu jari tonapun.’’

⁴⁹Ulun-ulun bohkon ijo tuot kuman homboh umba Yesus nopara nuhtui sama arop'ndo, ‘‘Iai Ulun tuh nyiring duon ngapun karon-dusa?’’

⁵⁰Tahpi Yesus nuhtui umba ulunbawi rih, ‘‘Tului ihko porocaya umba Ahku, ihko tonyolamat. Tulak rih honong kosanang!’’