Read Ot Danum YOHANES 10 Bible Online

YOHANES 10 - Ot Danum bible

YOHANES 10

¹‘‘Tu'u-tu'u morong tuhtui-Ku tuh: Ulun ijo kani nyolong nokuh luwang korambang tobiri nuhkat nguha pahkot, tutang eam nguha bauntukang, tahpi nuhkat nyuru jalan bohkon, io rih ponahkou tutang ponyilou.

²Tahpi ulun ijo nyolong nguha bauntukang, iorih sokahtik tobiri.

³Ponjaga korambang, nguap bauntukang bagi io tutang tobiri-tobiri ngohasu auhoh, aang ohkot io na'ah iro, umba arai nyinong-behti tutang nihting iro soluka.

⁴Ulimba tobiri-tobiri rih ngitot nokuh luar, sokahtik rih nyalan ang boun tutang tobiri-tobiri rih ngohasu io, kobain iro ngosono auhoh.

⁵Iro eam ahkan kani ngohasu ulun bohkon, malah ahkan buhou tahkan ulun rih, tului eam ngosono auhoh.’’

⁶Yesus nyorihta porobasa rih, tahpi iro eam solembang inon ijo konohuang-Oh.

⁷Mahka Yesus nuhtui sino hino, ‘‘Tu'u-tu'u morong auh-Ku tuh: AHKU TUH BAUNTUKANG BAGI TOBIRI.

⁸Paring ijo lombut sounumba Ahku, anairih ponahkou tutang ponyilou, tahpi tobiri-tobiri eam ngonihoh auh'ndo.

⁹AHKU TUH BAUNTUKANG. Iai ijo nyolong nguha Ahku ahkan solamat; io soluka, nyolong tutang ngondahpot ukuioh.

¹⁰Ponahkou lombut tihkas ahkan nahkou, ahkan munu tutang ahkan morusak. Tahpi Ahku lombut mangat ulun dahpot pombolum — ijo molowi-lowi.

¹¹AHKU TUH SOKAHTIK IJO HINUT. Sokahtik ijo hinut nonga hasongoh bagi tobiri-tobirioh.

¹²Ulun konuhpah ijo eam sokahtik, tutang eam ka'a tepun tobiri-tobiri orih, ahkan buhou nohtah tobiri-tobiri orih, amat io nohto horomaung lombut. Mahka tobiri-tobiri orih ahkan tonosahap tutang ngorawu riai horomaung.

¹³Ulun konuhpah rih buhou, tului io bogawi ahkan uhpah, eam mopoduli tobiri-tobiri orih.

¹⁴ AHKU TUH SOKAHTIK IJO HINUT. Sama kolou Amai ngosono Ahku tutang Ahku kosono Amai, kolourih ka'a Ahku ngosono tobiri-tobiri-Ku tutang tobiri-tobiri-Ku ngosono Ahku. Ahku nyarah hasong-Ku ahkan'ndo.

¹⁶Magun anai tobiri-tobiri bohkon ijo ka'a aik-Ku tahpi eam barih aang kawan tobiri tuh. Iro ka'a pahtut Ahku ngihtotoh, tutang iro ahkan ngonih auh-Ku. Iro paringoh ahkan nyolung ihco kokawan umba ihco sokahtik.

¹⁷Amai mongasih Ahku, kotului Ahku nyarah hasong-Ku, mangat norimaoh hoduli.

¹⁸Eam aro ihcobehti ka duon ngomiuoh tahkan Ahku. Ahku nyarahoh ngosan konohuang-Ku bongok. Ahku bokowasa ahkan nyarahoh, tutang bokowasa ngomiuoh huli. Orihrih gawik'ku ijo Ahku torima tahkan Amai-Ku.’’

¹⁹Kotului Yesus nuhtui kolourih, ulun-ulun Yahudi nopara hosuat.

²⁰Aro ijo nuhtui, ‘‘Io sonorupang sehtan! Io bobucon! Ahkan inon ihkam ngonih Io?’’

²¹Tahpi anai ka'a ijo nuhtui, ‘‘Ulun ijo sonorupang sehtan, eam Io nuhtui kolorih! Duon kowa sehtan mopolenang mahtan ulun bobulen mangat tou nohto?’’

²²Ang Yerusalem ulun-ulun rahat pesta peresmian Lohpou Tuhan. Ang ohkot rih wayah sorongin.

²³Yesus rahat nyalan ang Sa'oh Salomo ang luwang Lohpou Tuhan,

²⁴kotihka ulun-ulun Yahudi lombut ngorumbung ang hokodiling Yesus. Iro nuhtui, ‘‘Johcok miraoh Ihko kani mohonouoh ihkai bimbang? Nuhtuiohrih turus tarang, amat Ihko puna tu'u Lahca Ponyolamat.’’

²⁵Yesus mutah, ‘‘Ius Ahku nuhtui ahkan ihkam, tahpi ihkam eam porocaya. Gawi-gawi ijo Ahku nguai ngosan aran Amai-Ku, nonga bukti tohou Ahku.

²⁶Ihkam eam porocaya tului ihkam eam barih tobiri-tobiri-Ku rih.

²⁷Tobiri-tobiri-Ku ngonih auh-Ku. Ahku ngosono iro, tutang iro ngohasu Ahku.

²⁸Ahku nonga iro pombolum ijo sojahti tutang kototahiu, tutang turus-jahamoh iro eam ahkan rusak. Eamanai ihcobehti ka dahpot ngorabut iro tahkan longok-Ku.

²⁹Amai-Ku, ijo ius nongaoh iro ahkak-Ku, molowiumba koparingoh. Tutang eam ihcobehti ka dahpot ngorabut iro tahkan longon Amai.

³⁰Ahku tutang Amai anairih ihco.’’

³¹Turus ulun-ulun Yahudi ngomin hino bahtu nohuang medak Yesus.

³²Tahpi Yesus nuhtui umba iro, ‘‘Ihkam ius nohto Ahku nguan aro gawi hinut, ijo sonyuhu Amai ahkak-Ku. Tahkan paring gawi orih, umoh ijo kobainoh ihkam kani medak Ahku?’’

³³ Ulun-ulun Yahudi orih mutah, ‘‘Eam kotului konuan-konuan-Mu ijo pios rih ihkai kani muhkah Ihko umba bahtu, tahpi kotului Ihko ngarana Pohotala. Ihko ihcobehti kolunon kani ngonjorian arop-Mu Pohotala.’’

³⁴ Turus Yesus mutah, ‘‘Eamkah ang Buhku Tourat'mu tonyurat: Pohotala nuhtui, ‘Ihkam anairih pohotala’?

³⁵Ihto ta'an ijo inon ijo tonyurat ang luwang Surat Borasih ahkan nyolung turus-jahamoh. Jadi, amat Pohotala nonga kohawot ‘pohotala’ ahkan ulun-ulun ijo norima auh-Oh,

³⁶ombai ihkam nuhtui Ahku ngarana Pohotala, tului auh-Ku Anak Pohotala? Molekan Ahku tongopili bain Amai, tutang sonuhu nokuh kolunon.

³⁷Amat Ahku eam nguan gawi ijo ponoretah Amai, ara porocaya umba Ahku.

³⁸Tahpi tului Ahku nguaioh, porocaya iou ihkam umba inon ijo Ahku nguai orih, oluka ihkam eam kani porocaya umba Ahku. Honong kolourih ihkam kota'an tutang solembang ijo Amai tahtap hihco umba Ahku, tutang Ahku tahtap hihco umba Amai.’’

³⁹Iro ngurahjalan hino nawan Yesus, tahpi Io ngoliuk tahkan tohun iro.

⁴⁰ Yesus huli nokuh pohoi Sungoi Yordan, ang unuk Yohanes houn mopondus, turus mohcon ang anan.

⁴¹Aro ulun lombut nokuh Io. Iro nuhtui, ‘‘Yohanes eam nguan tandahelan-tandahelan, tahpi paring ijo tonuhtuioh tohou ulun tuh morong.’’

⁴²Turus aro ulun ang anan porocaya umba Yesus.