Read Ot Danum YOHANES 11 Bible Online

YOHANES 11 - Ot Danum bible

YOHANES 11

¹ Ihcobehti bogare Lasarus mohcon ang Betania hihco umba konduangoh Maria tutang Marta.

² Maria, iorih ulunbawi ijo nusuh minyak buan harum aang pa'an Yesus tutang ngapitoh umba balouoh. Ang sino kotihka konduangoh Lasarus kaling-mondam.

³Koduo bohtouoh rih ngabaroh ahkan Yesus, ‘‘Tuhan, konduang 'kai ijo Tuhan ngasihoh rih mondam.’’

⁴Kotihka Yesus ngonih kabar orih, Io nuhtui, ‘‘Ponyahkit tuh eam ahkan kobainoh popahtoi. Tuhrih nyolung mangat Pohotala konohajooh, tutang mangat kobainoh Anak Pohotala ka'a konohajo.’’

⁵Yesus ngasih Marta, Maria tutang Lasarus.

⁶Tahpi kotihka Yesus ngonih kabar ijo Lasarus mondam, Io ha'atoh mohcon ang unuk-Oh duo ondou hino.

⁷Uliorih kolawui Io nuhtui umba murid-murid-Oh, ‘‘Olai ihto huli nokuh Yudea.’’

⁸Iro mutah, ‘‘Amai Guru, punan iou ulun-ulun Yahudi kani medak Amai umba bahtu, tutang huntuh Amai kani huli hino nokuh anan?’’

⁹‘‘Eamrih hondou ondou kotahiuoh duo balas jam?’’ hion Yesus, ‘‘ulun ijo nyalan ang ohkot hondou, eam io totarang tului io nohto koloang kolunon tuh.

¹⁰Tahpi amat ulun ijo nyalan ang ohkot pindong io totarang, tului eam aro koloang aang io.’’

¹¹Kodorihrih hion Yesus. Pongohuli Io nuhtui hino, ‘‘Sobat ihto, Lasarus jari tiruh, tahpi Ahku ahkan tulak ngomonyun io.’’

¹²Murid-murid Yesus nuhtui, ‘‘Tuhan, amat Lasarus tiruh noin io ahkan pios.’’

¹³Konohuang Yesus, iorih ijo Lasarus jari mahtoi. Tahpi iro ngahu konohuang Yesus anairih ijo Lasarus tiruh bahut.

¹⁴Tului orih, Yesus nuhtui umba iro hawui botarang, ‘‘Lasarus jari mahtoi.

¹⁵Tahpi Ahku sanang ka'a, Ahku eam anai ang anan, kotului labih pios ahkan'kam, mangat ihkam dahpot porocaya. Olairih ihto tulak uhuntuh nokuh Lasarus.’’

¹⁶Tomas ijo konohawot ‘‘Anak tahtup’’ nuhtui umba injah-injahoh murid-murid Yesus, ‘‘Olai ihto umba, nauhoh ihto mahtoi homboh Io!’’

¹⁷Kotihka Yesus johcok ang unuk orih, Lasarus jari ohpat ondou kotahiuoh ang tanom.

¹⁸Betania rih doni Yerusalem, kira-kira tolu kilomehter kahcuioh.

¹⁹Aro ulun Yahudi jari lombut masap Marta tutang Maria ahkan mahpung iro tului popahtoi konduangoh.

²⁰Kotihka Marta ngonih Yesus lombut, io soluka naharang Yesus, tahpi Maria mohcon ang lohpou.

²¹Hion Marta umba Yesus, ‘‘Tuhan, jahkaioh Tuhan anai ang ohtoi ohkot orih, musti konduang'ku eam mahtoi.

²²Olu kodorih ahku ta'an, ijo huntuh ka'a Pohotala ahkan nonga inon iou ijo Tuhan nyawot umba Io.’’

²³‘‘Konduang'mu ahkan bolum huli,’’ hion Yesus umba Marta.

²⁴Marta mutah, ‘‘Ahku ta'an Lasarus ahkan bolum huli amat ulun mahtoi paringoh tonomonyun ang Ondou Kiamat.’’

²⁵‘‘AHKU TUH IJO NONGA POMBOLUM TUTANG NGOMONYUN ULUN MAHTOI,’’ hion Yesus umba Marta. ‘‘ULUN IJO POROCAYA UMBA AHKU AHKAN BOLUM, OLU KA IO JARI MAHTOI.

²⁶Tutang ulun bolum ijo porocaya umba Ahku, kototahiuoh eam ahkan mahtoi. Porocaya ihko umba hal rih?’’

²⁷‘‘Tuhan,’’ hion Marta, ‘‘ahku porocaya Tuhan Anak Pohotala, Lahca Ponyolamat ijo ahkan lombut nokuh kolunon tuh.’’

²⁸Ulimba Marta nuhtui kodorih, io tulak na'ah Maria, konduangoh hawui sino-sinok umba io, ‘‘Amai Guru anai ang ohtoi; Io ngisok ihko.’’

²⁹Ngonih rih, Maria jio-jion hihkas, turus tulak nyopohpak Yesus.

³⁰Ohkot rih Yesus jaha nyolong nokuh desa. Io magun anai ang unuk Marta nyopohpak Io.

³¹Ulun-ulun Yahudi ijo rahat mahpung Maria ang lohpou, nohto Maria kuat tutang jio-jion soluka; jadi iro tulak ngahasu io, tului iro ngohu io nokuh tanom, ahkan nangih.

³²Ohkot Maria johcok ang unuk Yesus tutang nohto Io, suhkun tu'ut io ang tohimo Yesus tutang nuhtui, ‘‘Tuhan, jahkaioh Tuhan anai ang ohtoi ohkot rih, pasti konduang'ku eam ahkan palus.’’

³³Kotihka Yesus nohto Maria nangih, tutang ulun-ulun Yahudi ijo lombut homboh Maria orih ka'a nangih, ahtoi-Oh sedih, tutang Io nanyamngasi samasino.

³⁴Mahka ngisok rih Io umba iro, ‘‘Ang umoh ihkam ngolowong io?’’ ‘‘Olai nohtooh, Tuhan,’’ hion'ndo.

³⁵Turus Yesus nangih.

³⁶Mahka ulun-ulun Yahudi rih nuhtui, ‘‘Nohtorih eaminon kasih-Oh umba Lasarus!’’

³⁷Tahpi anai ang louk iro ijo nuhtui, ‘‘Io nguan ulun bobulen tou molenang, ombai Io eam tou ngahana mangat Lasarus ara mahtoi?’’

³⁸Yesus paham nanyamngasi hino, turus Io tulak nokuh tanom. Tanom rih tonapa tahkan lowong guha ijo konahtop umba bahtu hajo.

³⁹‘‘Ngahtun bahtu orih,’’ hion Yesus. Marta konduang ulun ijo mahtoi rih, mutah, ‘‘Tahpi Tuhan, io jari ohpat ondou tuh ang tanom. Punaoh jari buan maram!’’

⁴⁰Yesus nuhtui umba Marta, ‘‘Eamrih jari Ahku nuhtui ahkan'kam: Amat ihko porocaya, ihko ahkan nohto kodorih kohajoi kowasan Pohotala!’’

⁴¹Mahka iro ngahtun bahtu orih. Pongohino Yesus nokara nokuh langit tutang nuhtui, ‘‘Torimakasih Amai, tului Ihko jari ngonih Ahku.

⁴²Ahku ta'an Ihko toturus ngonih Ahku, tahpi Ahku nuhtui tuh, bagi ulun-ulun ijo anai ang ohtoi; mangat'ndo porocaya ijo Ihko rih ijo nyuhu Ahku.’’

⁴³Ulimba Io nuhtui kodorih, Yesus na'ah muhing auh-Oh, ‘‘Lasarus soluka!’’

⁴⁴Mahka soluka ulun ijo mahtoi rih. Longoi tutang pa'aioh magun tomohtong benang bukus otu, tutang baui totuhtup umba benang bukus bau. ‘‘Nguwat ohrih benang bukusotu, mangat io morodeka nyalan,’’ hion Yesus umba ulun-ulun ang anan.

⁴⁵Aro tahkan ulun-ulun Yahudi ijo lombut masap Maria, porocaya umba Yesus, ohkot iro nohto angjadi rih.

⁴⁶Tahpi pira-pira ang louk iro, hihkas nokuh ulun Parisi tutang ngabarohrih inon ijo jari konuan Yesus.

⁴⁷Tului orih ulun-ulun Parisi tutang imam-imam kopala nguan rahpat umba Majelis Bosara Agama. Iro nuhtui, ‘‘Ihto harus nguan inon? Ulun tuh nguan aro tandahelan!

⁴⁸Amat ihto mohonou Io nguan turus koloutuh, paring ulun ahkan porocaya umba Io. Tutang laiuoh pongowasa Ruma ahkan lombut tutang ngahkas Lohpou Tuhan tutang ko-paring uhtus ihto!’’

⁴⁹Ihcobehti tahkan iro ijo bogare Kayapas, imam hajo aang toun orih, nuhtui, ‘‘Ihkam eam ta'an ino-inon.

⁵⁰Inon ihkam eam borondong, ijo ahkan kogunan rayat, labih pios ihcobehti mahtoi tahkanumba paring uhtus lonyuh?’’

⁵¹Kotu'uioh Kayapas ngohawot orih, eam tahkan tirukoh bongoi. Tahpi kolou imam hajo toun orih, io nujum ijo Yesus ahkan mahtoi bagi uhtus Yahudi.

⁵²Tutang eam bagi uhtus Yahudi beweu, tahpi ka'a ahkan muhpungoh tutang mopohihco anak-anak Pohotala ijo bilang-bahas.

⁵³Nopara ondou orih pongowasa-pongowasa Yahudi bohaum ahkan munu Yesus.

⁵⁴Kotului orih Yesus eam hino mokarah ang baun ulunaro, ang marak ulun Yahudi. Io nohtah Yudea, turus tulak nokuh lowu ijo konohawot Epraim, doni padang bolambah. Ang anan Io mohcon sama-sama murid-murid-Oh.

⁵⁵Aang ohkot rih jari doni Ondou Pesta Paska ulun Yahudi. Aro ulun tahkan lowu koik jari tulak nokuh Yerusalem mangat molalus upacara moporasih aropoh houn umba pesta orih.

⁵⁶Iro ngurah Yesus, tutang ohkot hopuhpung ang Lohpou Tuhan, iro bopander sama arop'ndo, ‘‘Koloukuwoh tiruk'kam? Touhirah Io eam lombut nokuh pesta tuh.’’

⁵⁷Iro ngohawot kolouorih, bain imam-imam kopala tutang ulun-ulun Parisi ius polua poretah ijo ulun ijo ta'an ang umoh Yesus anai, harus nyorihtaoh, mangat Io dahpot tonawan.