Read Ot Danum YOHANES 12 Bible Online

YOHANES 12 - Ot Danum bible

YOHANES 12

¹Onom ondou hounumba Ondou Pesta Paska, Yesus tulak nokuh Betania. Ang unuk rih mohcon Lasarus ijo jari konombolum bain Yesus tahkan popahtoi.

²Ang anan Yesus tonyorungan bain iro tutang Marta nohaluoh. Lasarus tutang pomasap-pomasap tuot kuman homboh umba Yesus.

³ Pongohino Maria lombut ngomin kira-kira sotengah lihter minyak buanharum narwastu ijo borega samasino. Io nohtaoh minyak buanharum rih nokuh pa'an Yesus, turus ngapitoh umba balouoh. Sohapus lohpou rih monjadi buanharum, kobain minyak buanharum rih.

⁴Tahpi Yudas Iskariot, ihcobehti murid Yesus — ijo pongo ngarana umba Yesus — nuhtui,

⁵‘‘Ombai minyak buanharum rih eam ponodagangrih umba rega tolu lahtus duit perak, tutang duitoh rih tononga ahkan ulun porosbolum?’’

⁶Yudas nuhtui kodorih eam kotului io nohtoani ulun porosbolum, tahpi kotului io ponahkou. Io bojoin ngomin duit tahkan kas ulun aro ijo konipos ang io.

⁷Tahpi Yesus nuhtui, ‘‘Nauhoh ulunbawi rih! Io nguan tuh ahkan ondou tonanom-Ku.

⁸ Ulun porosbolum hototurus anai ang parak ihkam, tahpi Ahku eam.’’

⁹Aro ulun Yahudi ngonih ijo Yesus anai ang Betania, jadi iro tulak nokuh anan. Iro tulak eam tului Yesus, tahpi ka'a tului iro kani nohto Lasarus ijo jari konombolum tahkan popahtoi, kobaiu-Oh.

¹⁰Orih kotului imam-imam kopala kani munu Lasarus ka'a;

¹¹tului io kotuluioh aro ulun Yahudi nohtah iro tutang porocaya umba Yesus.

¹²Angngohkos ondouoh ulun aro ijo jari lombut mangat parami Pesta Paska ngonih, ijo Yesus rahat aang ponyalan nokuh Yerusalem.

¹³ Mahka ulun aro ngomin doun-doun koruma turus hihkas naharang Io hawui bososurak, ‘‘Tararih Pohotala! Tomorehkatrih Io ijo lombut ngosan aran Tuhan. Tomorehkatrih Lahca Israel!’’

¹⁴Yesus ngondahpot ihcokungan keledai biou, tutang nunggangoh. Mahka nyolung ijo tonyurat ang Surat Borasih:

¹⁵ ‘‘Ara mihkoh, putri Sion! Nohto Lahca'kam lombut, nunggang ihcokungan keledai biou!’’

¹⁶Ang ohkot rih murid-murid Yesus jaha solembang paringoh rih. Tahpi uli Yesus konohajo umba popahtoi-Oh, kolawun'ndo toroingat ijo ijo konuan ulun aro tohimo Io jari tonyurat luwang Surat Borasih tohou Io.

¹⁷Ulun-ulun ijo anai ang anan ohkot Yesus na'ah Lasarus soluka tahkan tanom tutang ngombolum io tahkan popahtoi, turus nonga kosaksian tohou hal orih.

¹⁸Orih kotuluioh ulun aro tulak nokuh Yesus, tului iro ngonih ijo Io rih jari nguan tandahelan rih.

¹⁹Mahka ulun-ulun Parisi hopander ihco sama bohkon, ‘‘Ihto eam duon nguan ino-inon! Topahjah iou, paring kolunon tulak ngahasu Io!’’

²⁰Ang louk ulun-ulun aro ijo tulak nokuh Yerusalem, nohuang sombayang ang ohkot pesta orih anai ka'a popira behti Yunani.

²¹Iro lombut nokuh Pilipus tutang nuhtui, ‘‘Konduang, amat dahpot, ihkai jolik tu'u hosombang umba Yesus.’’ (Pilipus rih tahkan Betsaida ang Galilea.)

²²Mahka Pilipus tulak nuhtui hal orih ahkan Andreas, tutang pongohuli iro duo monyorihtaohrih ahkan Yesus.

²³Yesus nuhtui umba doro, ‘‘Jari ohkotoh Anak Ulun konohajo.

²⁴Tu'u morong auh-Ku tuh: Amat ihcokoluang paroi eam tongombulan ang luwang tana tutang mahtoi, io ahkan tohtap mohcon ihcokoluang. Tahpi amat luang paroi rih mahtoi kolawun io ahkan momua tutang aro paroi.

²⁵ Ulun ijo mongasih pombolumoh ahkan nihou pombolumoh. Tahpi ulun ijo mohonouoh pombolumoh luwang kolunon tuh, ahkan mohagaoh bagi pombolum sojahti tutang kototahiu.

²⁶Ulun ijo kani mohalu Ahku harus ngahasu Ahku; mangat pohalu-Ku duon hihco Ahku, ang umoh Ahku anai. Ulun ijo mohalu Ahku ahkan tonohoromat Amai-Ku.’’

²⁷‘‘Ahtoi-Ku sikinanyamoh; inon ijo harus Ahku nuhtuioh uhuntuh? Koharusrih Ahku nuhtui orih, ‘Amai, mokilarih Ahku tahkan uhuntuh?’ Tahpi kopunaoh ahkan nyuru wayah kokarot tuh rih Ahku lombut.

²⁸O Amai pohajoohrih aran Aim!’’ Mahka konahan auh tahkan langit nuhtui, ‘‘Ahku jari mopohajo-Oh, tutang Ahku ahkan mopohajo-Oh hino.’’

²⁹Ulun aro ijo tohko ang anan ngonih auh orih. Iro nuhtui, ‘‘Orih auh duhung!’’ Tahpi anai ka'a ijo nuhtui, ‘‘Eam! Molehkat ijo hopander umba Io!’’

³⁰Turus Yesus nuhtui umba iro, ‘‘Auh orih konahan eam ahkan koguna Ahkak, tahpi ahkan kogunan'kam.

³¹Uhuntuh jari ohkotoh kolunon tomosara; uhuntuh pongowasa kolunon tuh tomolinangoh.

³²Tahpi Ahku tuh, amat Ahku jari tonongahtang ang ngosan tana, Ahku ahkan nguhut paring ulun Ahkak-Ku.’’

³³Io nuhtui kodorih ahkan ngorinah koloukuwoh caraoh Io ahkan mahtoi.

³⁴ Ulun aro rih nuhtui umba Io, ‘‘Numbun Buhku Hukum ihkai, Lahca Ponyolamat ahkan bolum turus-jahamoh. Koloukuwoh Ihko tou nuhtui ijo Anak Ulun harus tongondiang ang ngosan tana? Iai Anak Ulun orih?’’

³⁵Yesus mutah, ‘‘Baya ahkan pondehan iou koloang rih anai ang louk ihkam. Jadi, nyalanrih ihkam kotahin koloang rih magun anai, mangat ihkam ara tonopahas kopindong. Ulun ijo nyalan ang luwang kopindong, eam kota'an nokuhumoh io tulak.

³⁶Porocayarih umba koloang rih, kotahin koloang rih magun anai aang ihkam, mangat'kam monjadi anak-anak koloang.’’ Ulijadi Yesus nuhtui kodorih, Io hihkas tahkan anan tutang eam kani pokarah arop-Oh ahkan'ndo.

³⁷Oluka jari aro tandahelan ijo konuan Yesus ang husuk iro, iro eam porocaya umba Io.

³⁸ Mahka nyolung ka'a, inon ijo jari tonuhtui Nabi Yesaya, ‘‘Tuhan, iairih ijo porocaya umba kabar ekai? Ahkan iairih kowasa Tuhan tongorinah?’’

³⁹Tului orih iro eam duon porocaya, tului Yesaya jari nuhtui ka'a, ‘‘Pohotala nuhtui,

⁴⁰ ‘Ahku ngombulenoh mahtan iro, nguan iro mahang ahtoi; mangat mahtan iro ara nohto, tiruk iro ara solembang. Mangat iro ara hoduli nokuh Ahku, turus Ahku ngopios iro.’ ’’

⁴¹Yesaya nuhtui kodorih tului io jari nohto kohajon Yesus, tutang bopander tohou Io.

⁴²Oluka kodorih, aro ulun bohkon ang louk pongowasa Yahudi porocaya umba Yesus. Tahpi iro eam bahanyi ngahku orih torus-tarang, tului iro mihkoh ara-ara ulun Parisi baca iro nyolong lohpou sombayang.

⁴³Iro labih jolik ngondahpot tara tahkan kolunon, tahkanumba ponorega Pohotala.

⁴⁴Turus Yesus na'ah, ‘‘Ulun ijo porocaya umba Ahku, eam umba Ahku io porocaya, tahpi ahkan Io ijo nyuhu Ahku.

⁴⁵Tutang ulun ijo nohto Ahku, nohto Io ijo nyuhu Ahku.

⁴⁶Ahku lombut nokuh kolunon tuh kolou koloang, mangat paring ulun ijo porocaya umba Ahku, ara mohcon ang luwang kopindong.

⁴⁷Ulun ijo ngonih ajaran-Ku, tahpi eam numbui-Oh — bohkon Ahku ijo mohukum io. Kotului Ahku lombut, eam ahkan mosara kolunon tuh, tahpi ahkan nyolamatoh.

⁴⁸Ulun ijo nulak Ahku tutang eam ngonih auh-Ku, jari anairih ijo mosaraoh. Auh ijo Ahku nyiaroh, orihrih ijo ahkan mosaraoh ang Ondou Kiamat.

⁴⁹Kotului Ahku eam bopander tahkan konohuang-Ku bongok; Amai ijo nyuhu Ahku, Io iou ijo moretah ahkak-Ku inon ijo harus Ahku nyiaroh tutang nuhtuioh.

⁵⁰Tutang Ahku ta'an ijo poretah-Oh rih nonga pombolum sojahti tutang kototahiu. Mahka Ahku mborihtaoh kolou ijo tongajar Amai ahkak-Ku.’’