Read Ot Danum YOHANES 16 Bible Online

YOHANES 16 - Ot Danum bible

YOHANES 16

¹Paringoh rih Ahku nuhtui ahkan'kam, mangat ihkam ara murtad.

²Ihkam ahkan tonyoluka tahkan lohpou-lohpou sombayang. Tutang ahkan lombut ohkotoh ijo ulun ijo munu ihkam, ahkan ngohu io mongabdi ahkan Pohotala.

³Iro nguan orih ahkan ihkam, tului iro jaha ngosono Amai kanika Ahku.

⁴Tahpi huntuh Ahku nuhtui rih ahkan'kam, mangat amat orih nyolung noin, ihkam mongingat ijo Ahku jari mborihtaohrih ahkan ihkam.’’ ‘‘Hal tuh eam Ahku mborihtaoh ahkan'kam tahkan pahtukoh, kotului Ahku magun hihcoumba ihkam.

⁵Tahpi huntuh, Ahku ahkan tulak nokuh Io, ijo jari nyuhu Ahku; tutang eam aro ihcobehti ka, tahkan ihkam ngisok nokuh umoh Ahku tulak.

⁶Huntuh malah ahtoi'kam monjadi sedih, tului Ahku nuhtui hal orih ahkan'kam.

⁷Tahpi Ahku nuhtui ijo morong ahkan'kam: Labih pios bagi ihkam, amat Ahku hihkas; tului amat Ahku eam hihkas, Pondohop orih eam ahkan lombut bagi ihkam. Tahpi amat Ahku hihkas, Ahku nyuhu Io ahkan ihkam.

⁸Amat Io lombut, Io ahkan ngorinah ahkan kolunon riman ijo komorongoh tahkan dusa, tahkan inon ijo morong, tutang tahkan torat Pohotala.

⁹Io ahkan ngorinah ijo eam porocaya ahkak-Ku orih dusa;

¹⁰ijo Ahku morong, kotului orih Ahku hihkas nokuh Amai, tutang ihkam eam ahkan nohto Ahku hino;

¹¹tutang ijo Pohotala jari nopara mohukum, kotului okon kolunon tuh jari tonohukum.

¹²Aro hino ijo kani Ahku nuhtuioh ahkan'kam, tahpi uhuntuh ihkam jaha sanggup norimaoh.

¹³Tahpi amat Roh orih lombut, yorih Io ijo ngorinah komorong tohou Pohotala, ihkam ahkan toniting-Oh ahkan ngosono paring komorong. Io eam ahkan bopander tahkan arop-Oh bongoi, tahpi nuhtui inon ijo jari konahan-Oh, tutang Io ahkan mborihtaoh ahkan'kam, inon ijo ahkan nyolung ang ondou pongo.

¹⁴Io ahkan mopohajo Ahku, tului inon ijo tonyiar-Oh ahkan'kam, tonorima-Oh tahkan Ahku.

¹⁵Paring ijo anai ang Amai anairih aik-Ku. Orih kotuluioh Ahku nuhtui ahkan'kam ijo inon ijo tonyiaroh Roh ahkan'kam, tonorima-Oh tahkan Ahku.’’

¹⁶‘‘Puta sinowayah iou, ihkam eam ahkan nohto Ahku hino, tutang ka'a puta sinowayah hino ihkam ahkan nohto Ahku.’’

¹⁷Pira-pira murid Yesus nopara hokisok hawui arop'ndo, ‘‘Inon konohuangoh Io nuhtui umba ihto: ‘Puta sinowayah iou, ihkam eam ahkan nohto Ahku, tutang puta sinowayah iou ihkam ahkan nohto Ahku’? Inon hino konohuang-Oh umba: ‘Ahku tulak nokuh Amai’?’’

¹⁸Iro hokisok toturus, ‘‘Inon rimai orih, ‘Puta sinowayah iou’? Ihto eam horahti Io nuhtui tohou inon!’’

¹⁹Yesus ta'an iro kani ngisok umba Io. Jadi Io nuhtui, ‘‘Nanai Ahku nuhtui, ‘Puta sinowayah iou, ihkam eam ahkan nohto Ahku, tutang ka'a, puta sino ohkot iu ihkam ahkan nohto Ahku.’ Orih rih ihkam hopander ang louk ihkam?

²⁰Porocayalah, ihkam ahkan nangih tutang nahtum, tahpi kolunon ahkan jorih. Ihkam ahkan susah ahtoi, tahpi kosusahan ahtoi'kam rih ahkan hubah monjadi kojorih.

²¹Amat ihcobehti ulunbawi ijo jonyo kanak, io susah ahtoi, kotului johcok ohkotoh io ngarot. Tahpi kodorih anakoh konanak, ulunbawi rih tolingouoh karotoh, tului kojorihoh bain ihcobehti longa konanakoh nokuh luwang kolunon.

²²Kodorih ka'a umba ihkam: Huntuh ihkam susah ahtoi, tahpi Ahku ahkan hosombang hino umba ihkam, mahka ahtoi'kam ahkan paham kojorihoh; tutang eam ihcobehti ka duon ngomin kojorih rih tahkan ahtoi'kam.

²³Aang ondou orih, ihkam eam ahkan ngisok ino-inon hino umba Ahku. Porocayalah: Inon iou ijo ihko nyawot umba Amai ngosan arak-Ku, orih ahkan tononga Amai ahkan'mu.

²⁴Nyiring ohkot tuh ihkam jaha nyawot ino-inon ngosan arak-Ku. Nyawot iou, mahka ihkam ahkan monorima, tului kojorih'kam jari soporuna.’’

²⁵‘‘Paringoh tuh Ahku nuhtui ahkan'kam umba tindung. Tahpi ahkan johcok ohkotoh, Ahku eam hapan tindung hino, tahpi nuhtui torus-torang ahkan'kam tohou Amai.

²⁶Aang ohkot orih, ihkam ahkan nyawot umba Amai ngosan arak-Ku; ngota'anrih, Ahku eam nyawot tahkan Amai ahkan ihkam,

²⁷kotului Amai bongoi ngasih ihkam. Amai ngasih ihkam tului ihkam ngasih Ahku, tutang porocaya ijo Ahku lombut tahkan Pohotala.

²⁸Puna Ahku asaroh tahkan Amai, tutang jari lombut nokuh luwang kolunon. Tahpi huntuh Ahku nohtahoh kolunon ahkan buli nokuh Amai.’’

²⁹Turus murid-murid Yesus nuhtui umbaoh, ‘‘Huntuh Tuhan nuhtui torus-torang tutang eam umba tindung,

³⁰tutang ihkai ta'an ijo Tuhan ta'an paringoh. Eam usah ihcobehti ka ngisok ino-inon umba Tuhan. Kotului orih ihkai porocaya Tuhan lombut tahkan Pohotala.’’

³¹Yesus mutah auh'ndo, ‘‘Jadi porocayalah ihkam huntuh?

³²Ingat! Ohkotoh ahkan lombut, puna jadi lombut, ihkam ahkan tonopisoh-pinjaoh. Ihkam ahkan buli nokuh lohpou nyinongbehti tutang nohtah Ahku bongok-Ku. Tahpi Ahku eam bongok-Ku tului Amai anai hihco Ahku.

³³Paringoh rih Ahku nuhtui, mangat ihkam ngondahpot kosanangkomangat tului hihco umba Ahku. Ang kolunon ihkam ahkan mongarot. Tahpi tabahohrih ahtoi'kam! Ahku jadi mongalah kolunon!’’