Read Ot Danum YOHANES 18 Bible Online

YOHANES 18 - Ot Danum bible

YOHANES 18

¹Ulijadi Yesus bodo'a kodorih, Io tutang murid-murid-Oh tulak nokuh pohoi Sungoi Kidron. Ang anan anai ihco kombulan, tutang Yesus honong murid-murid-Oh nyolong nokuh kombulan orih.

²Yudas pongorana rih, ta'an unuk orih; tului Yesus bojoin hopuhpung ang anan umba murid-murid-Oh.

³Mahka Yudas tulak nokuh unuk rih, hawui ngomin ihcokawan sorodadu Romawi, tutang pira-pira ponokawan Lohpou Tuhan ijo sonuhu bain imam-imam kopala tutang ulun-ulun Parisi. Iro bosonjata, sumbu kurung tutang soho'an.

⁴Yesus ta'an paring ijo ahkan nyolung aang arop-Oh. Jadi Io soluka ngondonioh ulun-ulun orih tutang ngisok, ‘‘Ihkam ngurah iai?’’

⁵‘‘Yesus ulun Nasaret,’’ hion iro. ‘‘Ahku tuh Io,’’ hion Yesus. Yudas ijo pongorana tombok ang anan umba iro.

⁶Kotihka Yesus nuhtui umba iro, ‘‘Ahku tuh Io,’’ iro paringoh surutlihkut turus bolukang nokuh tana.

⁷Sino hino Yesus ngisok umba iro, ‘‘Ihkam ngurah iai?’’ ‘‘Yesus ulun Nasaret,’’ hion iro.

⁸‘‘Jari Ahku nuhtui, Ahku tuh Io,’’ hion Yesus. ‘‘Tutang amat puna Ahku ijo ihkam ngurahoh, nauhoh iro ijo bohkon tuh tulak.’’ (

⁹Honong nuhtui kolou orih nyolung inon ijo jari tonuhtui Yesus sounumbaoh: ‘‘Amai, tahkan ulun-ulun ijo Amai nongaoh ahkak-Ku, eam ihcobehti ka ijo nihou.’’)

¹⁰Simon Petrus ijo naking padang, nyohpitoh, turus molong jihpon imam hajo, nyiring bosaping tolingai koto'uioh. Aran jihpon orih Malkus.

¹¹ Mahka Yesus nuhtui umba Simon Petrus, ‘‘Ngupang huli padang'mu nokuh luwang kupangoh! Kuwah ihko niruk, Ahku eam ahkan ngorih sakir kongarot ijo tononga Amai ahkak-Ku?’’

¹²Turus sorodadu-sorodadu Romawi honong porowira tutang ponokawan-ponokawan ulun Yahudi, nawan turus manga Yesus.

¹³Aang pahtukoh iro ngitot Yesus noharep Hanas, tului iorih opu Kayapas, Kayapas anairih imam hajo aang toun orih.

¹⁴ Tutang io ijo jari mopingat dolang okon Yahudi ijo labih pios ihcobehti mahtoi tahkan hapus uhtus.

¹⁵Simon Petrus tutang ihcobehti murid bohkon nutut Yesus. Murid ijo bohkon tuh kosonan bain imam hajo; jadi io umba nyolong turus nutut Yesus, nokuh laoh lohpou imam hajo,

¹⁶Rahatrih Petrus ngindoi ang konaha ang bauntukang. Pongohuli murid ijo bohkon rih soluka, tutang nuhtui umba pohalu bawi ijo ngindoi ang bauntukang, turus ngomin Petrus nyolong nokuh luwang.

¹⁷Pohalu bawi ijo ngindoi ang bauntukang, nuhtui umba Petrus, ‘‘Oi, eamkah ihko ka'a anai ihcobehti murid ulun orih?’’ ‘‘Bohkon,’’ hion Petrus.

¹⁸Aang ohkot rih bahiu sorongin, jadi pohalu-pohalu tutang ponokawan imam jari nohun baho umba buring, tutang iro ngindu behtin'ndo ang anan. Petrus tulak nokuh anan tutang tombok ngindu hihco iro.

¹⁹Imam hajo ngisok Yesus tohou murid-murid-Oh tutang tohou ajaran-ajaran-Oh.

²⁰Yesus mutah, ‘‘Ahku hototurus nuhtui tutang tarang-tarangan ang toharep ulun aro. Ahku hototurus majar ang lohpou-lohpou sombayang tutang ang Lohpou Pohotala, unuk ulun Yahudi bahutoh hopuhpung. Eam pu'u Ahku nuhtui dolang inon aang tonih benyem.

²¹Jadi ombai Tuan ngisok Ahku? Ngisokrih iro ijo jari ngonihoh Ahku majaroh. Musti iro ta'an inon ijo jari Ahku nuhtuioh.’’

²²Kotihka Yesus nuhtui kodorih, anai ihcobehti ponokawan ang anan napar-Oh tutang nuhtui, ‘‘Bahanyi samasino Ihko mutah kodorih umba imam hajo!’’

²³Yesus mutah, ‘‘Amat Ahku nuhtui ang'co ijo sala, nuhtuiohrih ang ohtoi inon kosalaioh! Tahpi amat ijo Ahku nuhtui rih puna morong, ombai ihko napar Ahku?’’

²⁴Pongohuli Hanas nyuhu ulun ngitot Yesus honong pangaoh nokuh Imam Hajo Kayapas.

²⁵Simon Petrus magun tombok ka'a ngindu ang anan. Ulun-ulun nuhtui umba io, ‘‘Eamkah ihko ka'a murid ulun rih?’’ Tahpi Petrus eam ngahku, hioioh, ‘‘Bohkon!’’

²⁶Ihcobehti pohalu imam hajo, iorih jolahan tahkan ulun ijo tolingaioh tonehcep Petrus, hioioh, ‘‘Eamkah ahku nohto ihko ang komulan rih hihco umba Io?’’

²⁷Turus Simon Petrus eam ngahku hino, ‘‘Eam,’’ — tutang pas ang ohkot rih manuk dalung nondu.

²⁸Homboh ngohkos samasino iro ngomin Yesus tahkan lohpou Kayapas nokuh istana gubernur. Ulun-ulun Yahudi paringoh eam nyolong nokuh luwang istana, mangat iro eam buah pali cara agama kotului iro kani umba kuman ukun Paska.

²⁹Tului orih Pilatus tulak nokuh kanaha noharep iro hawui ngisok, ‘‘Inon auh dawa'kam tohimo ulun tuh?’’

³⁰Iro mutah, ‘‘Jahkaoh Io eam bosala, ihkai eam ahkan ngomin Io nokuh Amai Gubernur.’’

³¹Pilatus nuhtui umba iro, ‘‘Omin Io, tutang mosara Io numbun hukum'kam bongom!’’ Tahpi ulun-ulun Yahudi orih mutah, ‘‘Ihkai eam tou mosara ngopahtoi ulun.’’ (

³² Tuh monjadi, mangat nyolung inon ijo tonuhtui Yesus tohou caraoh Io ahkan mahtoi.)

³³Pilatus nyolong huli nokuh istana, tutang na'ah Yesus, turus ngisok, ‘‘Inon rih Ihko Lahca ulun Yahudi?’’

³⁴Yesus mutah auh Pilatus, ‘‘Inon kisok tuh tahkan ihko bongom, ata'ai anai ulun bohkon ijo jari nyorihta ahkan'mu tohou Ahku?’’

³⁵Pilatus mutah auh Yesus, ‘‘Inon ahku tuh ulun Yahudi? Ijo nyarah Ihko ahkak'ku anai rih uhtus-Mu bongom, tutang imam-imam kopala. Inon ijo jari Ihko nguaioh?’’

³⁶Yesus mutah, ‘‘Kolahcak-Ku eam tahkan kolunon tuh. Jahkaoh kolahcak-Ku tahkan kolunon tuh, ulun-ulun aik-Ku ahkan ngolawan mangat Ahku ara tonyorah ahkan okon-okon ulun Yahudi. Tahpi puna kolahcak-Ku eam tahkan kolunon tuh!’’

³⁷Mahka Pilatus ngisok umba Io, ‘‘Amat kodorih Ihko Lahca?’’ Yesus mutah, ‘‘Ihko bongom nuhtui ijo Ahku tuh Lahca. Ahku konanak tutang lombut nokuh kolunon ahkan ihco konohuang, iorih nonga kosaksian tohou komorong. Ulun ijo tahkan komorong rih ngonih Ahku.’’

³⁸Pilatus ngisak umba Io, ‘‘Inon rimaioh komorong?’’ Turus Pilatus soluka hino tahkan istana, tutang nuhtui umba ulun-ulun Yahudi, ‘‘Ahku eam sombang ihco kosalan ka aang Io.

³⁹Tahpi numbun hadat'kam, ahku moliwus ihcobehti ulun tahkan luwang sipir aang Ondou Pesta Paska. Kanikah ihkam mangat ahku moliwus Lahca ulun Yahudi ahkan'kam?’’

⁴⁰Iro mutah tutang bokociak muhing, ‘‘Eam, ara ijo Io, tahpi Barabas!’’ (Barabas orih rih ihcobehti ulun ponyilou.)