Read Ot Danum YOHANES 19 Bible Online

YOHANES 19 - Ot Danum bible

YOHANES 19

¹Pongohuli hino Pilatus nyolong, turus nyuhu ulun mahcat Yesus.

²Sorodadu-sorodadu nguan ihco ahkur lahca tahkan akah duhi turus nokehpai ang ngosan kuhung Yesus. Uliorih iro mokahjan Io jubah kolawu,

³turus dulangduli lombut nokuh Io, tutang nuhtui, ‘‘Bolum Lahca ulun Yahudi!’’ Pongohuli iro napar baui-Oh.

⁴Ulimba rih Pilatus soluka sino hino tutang nuhtui umba ulun aro rih, ‘‘Nohto! Ahku ngomin Io soluka ahkan'kam, mangat'kam ta'an ijo ahku eam nyombang ihco kosalai ka aang Io.’’

⁵Mahka Yesus soluka hawui hapa ahkur akah duhi tutang jubah kolawu. Pilatus nuhtui umba iro, ‘‘Nohto ulun rih.’’

⁶Kotihka imam-imam kopala tutang pongawal-pongawal rih nohto Yesus, iro ngociak, ‘‘Mahpak Io! Mahpak Io!’’ Pilatus nuhtui umba iro, ‘‘Omin rih Io, tutang mahpak Io bain'kam bongom, ahku samasino eam aro sombang ihco kosalan ka aang Io.’’

⁷Ulun-ulun Yahudi rih mutah, ‘‘Numbun Tourat 'kai, Io harus tonohukum mahtoi, tului Io ngahku arop-Oh Anak Pohotala.’’

⁸Kotihka Pilatus ngonih auh'ndo kodorih, io labih mihkoh hino.

⁹Mahka io nyolong hoduli nokuh istana tutang Yesus huli kononin nyolong, Pilatus ngisok umba Io, ‘‘Ihko asar tahkan umoh?’’ Tahpi Yesus eam kani mutah auhoh.

¹⁰Jadi Pilatus ngisok hino, ‘‘Ihko eam kani mutah auh'ku? Kota'ankah Ihko, ahku tepun kowasa moliwus Ihko, tutang kowasa nyopolahki Ihko!’’

¹¹Yesus mutah, ‘‘Amat Pohotala eam nonga kowasa rih ahkan'mu ihko samasino eam tepun kowasa ngosan Ahku. Tului orih ulun ijo nyarah Ahku ahkan'kam, labih hajo dusaioh tahkanumba ihko.’’

¹²Kotihka Pilatus ngonih auh orih, io ngurahjalan ahkan ngoliwus Yesus. Tahpi ulun-ulun Yahudi bokociak hajo, ‘‘Amat Tuan moliwus Io, Tuan eam jolahan Kaisar! Ulun ijo ngahku aropoh Lahca, anai rih musuh Kaisar!’’

¹³Kotihka Pilatus ngonih auh-auh orih, io ngomin Yesus soluka turus tuot ang koruci hakim ang unuk ijo konohawot Saoh Bahtu. (Ang bahasa Ibrani araioh Gabata.)

¹⁴Ohkot orih doni jam duo balas tohunondou, ondou sounumba Ondou Pesta Paska, Pilatus nuhtui umba ulun-ulun rih, ‘‘Tuh lahcan'kam!’’

¹⁵Iro bokociak-ciak, ‘‘Munu Io! Munu Io! Mahpak Io!’’ Pilatus ngisok, ‘‘Pahtutkah ahku mahpak lahcan'kam?’’ Imam-imam kopala mutah, ‘‘Tihkas Kaisar ihco-ihcooh ijo puna lahcan ekai!’’

¹⁶Mahka Pilatus nyarah Yesus ahkan iro ahkan tomahpak. Iro ngomin Yesus, turus ngitot Io tulak.

¹⁷Yesus soluka hawui ngohtun bongoioh kahju sopolahki-Oh nokuh unuk ijo konohawot, ‘‘Bangon Kuhung.’’ (Aang bahasa Ibrani konohawot Golgota.)

¹⁸Ang anan Io tomahpak. Homboh umba Io anai ka'a duo behti bohkon ijo tomahpak; ihcobehti ang sila komuloioh, ihcobehti ang sila koto'uioh tutang Yesus ang tohun.

¹⁹Ang kahju sopolahkin Yesus, Pilatus nyuhu nyurat tuh: ‘‘Yesus tahkan Nasaret, Lahca Ulun Yahudi.’’

²⁰Aro ulun Yahudi ngomasa surat rih, tului unuk Yesus nyopolahki rih eam mahco tahkan lowu. Surat rih a'ang bahasa Ibrani, Latin, tutang Yunani.

²¹Imam-imam kopala nuhtui umba Pilatus, ‘‘Ara nyurat, ‘Lahcan ulun Yahudi’, molekan nyurat iu, ‘Ulun tuh nuhtui, Ahku Lahcan ulun Yahudi.’ ’’

²²Tahpi Pilatus mutah, ‘‘Ijo jari ahku nyurat nauhoh tosurat.’’

²³Uli sorodadu-sorodadu rih nyopolahki Yesus iro ngonin pokahjai-Oh. Pokahjai orih tobagi ohpat: nyinong behti ngondahpot ihco bagian. Iro ngonin ka'a jubah-Oh. Jubah orih eam anai tonusuk — tononawai tahkan diang nyiring pinda.

²⁴ Sorodadu-sorodadu bohaum sama aropoh, ‘‘Ara ihto nohtok mbagioh jubah tuh. Olai, ihto botenung, ahkan ta'antuhkas iai ihto ijo tuo ngondahpotoh.’’ Hal orih nyolung, mangat monjadi inon ijo tonyurat a'ang Surat Borasih, yorih: ‘‘Iro ahkan hobagi-hobilah hahtik-Ku, tutang botenung ahkan jubah-Ku.’’ Tutang puna sorodadu-sorodadu rih nguan kolouorih.

²⁵Ang doni sopolahkin Yesus, tombok inai Yesus, konduang bawi inai-Oh, Maria oruh Klopas, tutang Maria Magdalena.

²⁶Kotihka Yesus nohto inai-Oh, tutang murid-Oh ijo kokasih-Oh tombok ang anan, Yesus nuhtui umba inai-Oh, ‘‘Ine, orih anak Ine.’’

²⁷Pongohuli Yesus nuhtui umba murid-Oh rih, ‘‘Orih inai'mu.’’ Pondehan rih murid norima inai Yesus ahkan mohcon ang lohpouoh.

²⁸ Yesus ta'an ijo uhuntuh paringoh jari genep, tutang mangat inon ijo tonyurat a'ang Surat Borasih dahpot nyolung, Io nuhtui, ‘‘Ahku tojahbolai.’’

²⁹Aang anan anai ihco makuk tuwi umba danum anggur ijo mosom. Mahka ihco kambang karang tonocolop luwang danum anggur rih, turus nutung umba owuh hisop turus notahjukoh nokuh biwih Yesus.

³⁰Yesus ngonyelap danum anggur rih, turus nuhtui, ‘‘JARI SUHKUP!’’ Turus Io nuhkom kuhung-Oh tutang palus.

³¹Okon-okon Yahudi eam kani otun ulun-ulun ijo tonyopolahki rih tahtap kua-kuak ang kahju sopolahki ang ondou Sabat, mahihino sino tuh Sabat rih Ondou Pesta ijo ngomahtang. Tului ondou ohkot Yesus nyopolahki rih kona sounumba ondou Sabat rih, ulun-ulun Yahudi nyawot poromisi umba Pilatus ahkan molot pa'an-pa'an ulun ijo jari nyopolahki tutang nohka otun-otun ulun rih tahkan kahju sopolahki.

³²Mahka sorodadu-sorodadu rih tulak tutang molot labih houn pa'an tahkan duo behti ijo tonyopolahki homboh Yesus.

³³Kotihka iro johcok Yesus, iro nohto Io jari palus. Jari iro eam molot pa'ai-Oh.

³⁴Tahpi kombuhang Yesus tonyadop hapan lunju bain ihcobehti tahkan sorodadu-sorodadu rih, tutang cohpat soluka daha tutang danum.

³⁵Ulun ijo nohto bongoi kojodian rih, iorih ijo mborihta hal orih, mangat ihkam ka'a porocaya. Tutang kosaksianoh rih morong tutang io ta'an ijo orih morong.

³⁶ Hal orih nyolung, mangat monjadi inon ijo tonyurat aang Surat Borasih, yorih, ‘‘Eam ihco ka tahkan tulang-tulang-Oh ahkan tonopolotoh.’’

³⁷ Ang Surat Borasih ka'a tonyurat, ‘‘Iro ahkan nopahjah Io ijo jari iro nyadopoh.’’

³⁸Uliorih Yusep tahkan Arimatea nyawot poromisi umba Pilatus ahkan ngomin otun Yesus. (Yusep anairih ihcobehti murid Yesus tahpi toni-tonih, tului io mihkoh umba dolang okon Yahudi.) Pilatus nonga ijin ahkaioh jadi io tulak ngomin otun Yesus.

³⁹ Nikodemus ijo lomoi pu'u lombut masap Yesus ang ngolomi, tulak ka'a homboh Yusep. Nikodemus ngomin ramunhokuhku mur tutang garu — paringoh tolu pulu kilogram karoioh.

⁴⁰Koduo ulun rih ngomin otun Yesus, turus mukusoh umba benang bukusotu hombo-homboh umba ramunhokuhku rih numbun hadat ponanom ulun Yahudi.

⁴¹Ang unuk Yesus tonyopolahki anairih ihco kombulan. Ang luwang kobun orih anai ihco tanom bohua, ijo jaha pu'u tohapa ahkan monanom ulun.

⁴²Tului kolowong orih doni, tutang ondou Sabat doni nopara, iro nanom Yesus ang anan.