Read Ot Danum YOHANES 2 Bible Online

YOHANES 2 - Ot Danum bible

YOHANES 2

¹Duo ondou pongohuli anai pesta kawin ang lowu Kana ang Galilea, tutang inai Yesus anai ang anan.

²Yesus honong murid-murid-Oh tonorawe nokuh pesta orih.

³Kotihka anggur korih jari opah, inai-Oh nuhtui umba Yesus, ‘‘Iro tumoslingis anggur.’’

⁴Yesus mutah, ‘‘Ine, ara nyuhu Ahku. Jaha johcok ohkotoh Ahku ngorinahoh arop.’’

⁵Tahpi inai Yesus nuhtui umba pohalu-pohalu, ‘‘Nguanrih iou, inon ijo tonuhtui-Oh ahkan'kam.’’

⁶Ang anan anai onom potoran ijo tonyodiaoh ahkan gunan pomuhipa'a numbun hadat Yahudi. Potoran rih nyino-nyinong suangoh kira-kira sorahtus lihter.

⁷Yesus nuhtui umba pohalu-pohalu orih, ‘‘Suangrih potoran-potoran orih umba danum.’’ Iro nyuangoh nyiring uras tuwi.

⁸Turus Yesus nuhtui umba iro, ‘‘Huntuh onin honjiot danum orih, tutang ngitotoh ahkan okon pesta.’’ Iro ngomin danum orih ahkan okon pesta,

⁹tutang io nginyamoh danum ijo jari boubah monjadi anggur korih. (Io eam ta'an tahkan umoh anggur orih, baya pohalu-pohalu ijo nyuang danum orih io ijo ta'ai.) Mahka okon pesta rih nokuh pongahten bahkas,

¹⁰turus nuhtui umbaoh, ‘‘Bahutoh ulun nyorunganoh anggur korih ijo paling pias labih houn, tutang amat dolang porawe jari peda ngorih, kolouumoh anggur korih ijo bahut. Tahpi konduang jari anaingina anggur ijo paling pios nyiring huntuh!’’

¹¹Orih rih tandahelan topahtukoh ijo tonapaoh Yesus. Io nguanoh orih ang Kana ang Galilea. Honong tanda orih Io ngorinahrih kohajoi-Oh. Mahka murid-murid-Oh porocaya umba Io.

¹² Uliumbarih Yesus tulak nokuh Kapernaum hombo-homboh umba inai-Oh, konduang-konduang-Oh hawui murid-murid-Oh. Iro mohcon ang anan papira ondou kotahiuoh.

¹³ Kotihka Ondou Pesta Paska ulun Yahudi jari doni, Yesus tulak nokuh Yerusalem.

¹⁴Ang Lohpou Tuhan ang Yerusalem Io sombangrih umba podagang-podagang sahpi, tobiri, tutang bulung dala; ka'a pohurup-pohurup duit tuot ang anan.

¹⁵Yesus napa ihco pahcat tahkan tali, turus muhko paring ohcin rih, pios tobiri, olu ka sahpi, tahkan luwang Lohpou Tuhan. Meja-meja pohurup duit tomokulop-Oh nyiring duit iro kosoburan koamo-amoh.

¹⁶Turus Io nuhtui umba podagang bulung dala, ‘‘Ngahtang paringoh tahkan ohtoi. Ara ngonjorianoh Lohpou Amai-Ku unuk bodagang!’’

¹⁷ Mahka murid-murid-Oh toringat ahkan ayat Surat Borasih tuh, ‘‘Kasih-Ku ahkan Lohpou-Mu, yo Pohotala, ijo monyaha ahtoi-Ku.’’

¹⁸Pongowasa-pongowasa Yahudi molawan Yesus, hion iro, ‘‘Cuba nguan tandahelan kolou tanda ahkan ihkai, ijo Ihko bohak botindak koloutuh.’’

¹⁹ Yesus mutah, ‘‘Ngahkasohrih Lohpou tuh, tutang a'ang tolu ondou Ahku ahkan nombokoh hoduli.’’

²⁰Turus iro nuhtui, ‘‘Ohpat pulu onom toun kotahiu tomorulu ahkan mangunoh Lohpou Tuhan tuh. Tutang Ihko kani mangunoh hoduli aang tolu ondou?’’

²¹Tahpi Lohpou Tuhan ijo konohuangoh Yesus anairih behtiu-Oh bongoi.

²²Jadi pongohuli, ulimba Yesus tonomonyun tahkan popahtoi, toingat murid-murid-Oh ijo hal rih pu'u tonuhtui-Oh. Mahka porocayarih iro ahkan inon hal ijo tonyurat luwang Surat Borasih tutang ahkan inon ijo tonuhtuioh bain Yesus.

²³Pondehan Yesus anai ang Yerusalem ang ohkot Pesta Paska, aro ulun porocaya ahkai-Oh, tului tandahelan-tandahelan ijo konuai-Oh.

²⁴Tahpi Yesus bongoi eam porocaya iro, kotului Io kosono paring ulun.

²⁵Eam porulu ulun nonga kotorangan ahkai-Oh tohou iai ka, tului Io bongoi ta'an inon ijo anai ang luwang ahtoi kolunon.