Read Ot Danum YOHANES 20 Bible Online

YOHANES 20 - Ot Danum bible

YOHANES 20

¹Aang ondou Minggu ngohkos, ohkot magun bota-botat, Maria Magdalena tulak nokuh tanom. Io nohto bahtu pongatopoh jari tokisat tahkan bauntanom rih.

²Mahka io nokoru ngurah Simon Petrus tutang murid ijo unuk sitan Yesus, tutang nuhtui umba iro, ‘‘Tuhan jari kononin ulun tahkan tanom tutang ahku eam ta'an ang umoh Io toniwa.’’

³Turus Petrus tutang murid ijo bohkon rih tulak nokuh kolowong.

⁴Koduooh nokoru, tahpi murid ijo bohkon rih tokang nokoru tahkan Petrus, tutang io johcok soun ang tanom.

⁵Io nokilik koluwang tanom tutang nohto benang bukusotu koniwa ang anan, tahpi io eam nyolong.

⁶Simon Petrus ngohasu tahkan lihkut, io turus nyolong koluwang tanom rih. Io nohto benang bukusotu koniwa ang anan,

⁷tahpi benanghoras ijo tomohtong ang kuhung Yesus eam aro ang donioh molekan botihpok aiubongoi.

⁸Pongohuli murid ijo labih soun johcok ang tanom, nyolong ka'a. Io nohto tutang porocaya. (

⁹Nyiring aang ohkot rih iro jaham solembang inon ijo tonyurat a'ang Surat Borasih ijo Io harus bolum tahkan popahtoi.)

¹⁰Ulijari rih murid-murid Yesus rih buli.

¹¹Maria Magdalena tombok ang baun tanom rih hawui nangih. Pondehan nangih, io ngonyungat koluwang lowong,

¹²turus nohto duo molehkat hopokajan puhti. Iro rih tuot ang lohkun unuk otun Yesus, ijo ihco ang hila kuhung-Oh, tutang ijo bohkonoh ang hila pa'ai.

¹³Molehkat-molehkat rih ngisok, ‘‘Ine, ombai ihko nangih?’’ Maria mutah, ‘‘Tuhan'ku jari tonomin tutang ahku eam ta'an Io koniwa ang umoh.’’

¹⁴Ulirih nuhtui kodorih, io ngulos nohto hila lihkutoh tutang nohto Yesus tombok ang anan. Tahpi Maria eam ngosono ijo iorih Yesus.

¹⁵Yesus ngisok umba io, ‘‘Ine, ombai ihko nangih? Ine ngurah iai?’’ Maria ngohu rih tuhkang komulan, jadi io nuhtui, ‘‘Amai, amat Amai ijo ngindah Io tahkan ohtoi, dohop nuhtui ahkak'ku ang umoh Amai ngiwa Io, mangat ahku dahpot ngomiu-Oh.’’

¹⁶Yesus nuhtui umba io, ‘‘Maria!’’ Maria ngulos nohto Yesus turus nuhtui aang tuhtui Ibrani ‘‘Rabuni!’’ (Rimai ‘‘Guru’’.)

¹⁷‘‘Ara nambit Ahku,’’ hion Yesus umba io, ‘‘tului Ahku jaha tulak nuhkat nokuh Amai. Tahpi tulak iou nokuh konduang-konduang-Ku, tutang momborihta ahkan iro ijo Ahku uhuntuh nuhkat nokuh Amai-Ku tutang Amai'kam, Pohotalak-Ku tutang Pohotalan ihkam.’’

¹⁸Mahka Maria tulak nyorihta ahkan murid-murid Yesus ijo io jari nohto Tuhan, tutang ijo Tuhan jari nuhtui paringoh rih ahkaioh.

¹⁹Aang ondou Minggu orih ka'a, kotihka jari pindong, murid-murid Yesus hopuhpung ang ihco lohpou, hawui bauntukang ijo tongulin, tului iro mihkoh umba dolang okon Yahudi. Songela Yesus lombut tutang tombok ang tohun iro tutang nuhtui, ‘‘Tabe kosanangkomangat ahkan'kam.’’

²⁰Ulimba nuhtui kodorih, Io pokarah ahkan iro longoi tutang kombuhang-Oh. Aang ohkot nohto Tuhan, iro jorih samasino.

²¹Turus Yesus nuhtui umba iro sino hino, ‘‘Tabe kosanangkomangat bagi'kam. Kolou Amai nyuhu Ahku, kodorih ka'a Ahku nyuhu ihkam.’’

²²Turus Io ngomusik hasong-Oh ahkan iro turus nuhtui, ‘‘Torimarih Roh Pohotala.

²³ Amat ihkam ngapun dusa ihcobehti ulun, Pohotala ka'a ngapunoh. Amat ihkam eam ngapun kosalan ihcobehti ulun, Pohotala ka'a eam ngapunoh.’’

²⁴Tomas (ijo konohawot ‘‘hotahtup’’) ihcobehti tahkan koduo balas murid Yesus, eam anai hihco iro bohkon, kotihka Yesus lombut.

²⁵Mahka murid-murid ijo bohkon nuhtui umba Tomas, ‘‘Ihkai jari nohto Tuhan!’’ Tahpi Tomas mutah, ‘‘Amat ahku jaha nohto luwang pahku aang longoi-Oh, jaha ngina iking'ku ang lohkun-lohkun himang pahku rih, tutang jaha ngina longok'ku aang kombuhang-Oh, samasino ahku eam kani porocaya.’’

²⁶Ihcominggu pongohuli murid-murid Yesus anai hino ang unuk orih, tutang Tomas tohko ka'a. Paring bauntukang tongulim. Tahpi Yesus lombut tutang tombok ang tohun-tohun iro hawui nuhtui, ‘‘Tabe kosanangkomangat ahkan'kam.’’

²⁷Pongohuli Yesus nuhtui umba Tomas, ‘‘Nohto longok-Ku, tutang ngina iking'mu ang ohtoi. Ngonjuluk longon'mu tutang nginaoh ang kombuhang-Ku. Ara bembang hino, tahpi porocaya iou!’’

²⁸Tomas nuhtui umba Yesus, ‘‘Tuhan'ku tutang Pohotala'ku!’’

²⁹Mahka Yesus nuhtui umba io, ‘‘Ihko porocaya kotului jari nohto Ahku, kowa? Kosanangsolamatrih ulun ijo porocaya oluka eam nohto Ahku!’’

³⁰Magun aro hino gawihelan-gawihelan bohkon ijo konuan Yesus ang toharep murid-murid-Oh, tahpi eam tonyurat ang luwang buhku tuh.

³¹Tahpi paringoh tuh tonyurat, mangat ihkam porocaya ijo Yesus anairih Lahca Ponyolamat, Anak Pohotala, tutang tului porocaya umba Io, ihkam ngondahpot pombolum.