Read Ot Danum YOHANES 21 Bible Online

YOHANES 21 - Ot Danum bible

YOHANES 21

¹Uliorih Yesus ngorinah arop-Oh sino hino ang Danou Tiberias ahkan murid-murid-Oh. Kolihtuh konyolungoh:

²Ihco ondou Simon Petrus, Tomas ijo konohawot hotahtup, Natanael tahkan Kana ang Galilea, anak-anak Sebedeus, tutang duo murid Yesus ijo bohkonoh rahat hopuhpung.

³ Hion Simon Petrus umba ijo bohkon, ‘‘Ahku kani hihkas ngurah ohcin.’’ ‘‘Ihkai umba,’’ hion iro umba io. Mahka hihkasrih iro jahkat alut. Tahpi kotahin ihco ngolomi orih iro eam dahpot ino-inon.

⁴Kotihka mahtan ondou kani boloang, Yesus tombok ang kowang, tahpi iro eam ngosono ijo io orih Yesus.

⁵Yesus nuhtui umba iro, ‘‘Anak-anak-Ku, inon ihkam anai ohcin?’’ ‘‘Eam aro,’’ hion'ndo.

⁶ Yesus nuhtui umba iro, ‘‘Nimbailah jala'mu nokuh hila kotoun alut, noin ihkam ngondahpot ohcin.’’ Turus jala rih iro nimbaioh tahpi eam sanggup tonguhut huli kotului kodorih karoioh ohcin ang luwangoh.

⁷Murid ijo unuk konasih Yesus nuhtui umba Petrus, ‘‘Orih Tuhan!’’ Kotihka Simon Petrus ngonih ijo orih Tuhan, io mokehpan hahtiouoh (tului io eam hokolambi) turus nyohowu nokuh luwang danum.

⁸Murid-murid ijo bohkon ngahasu nokuh kowang umba alut, sambil nguhut jala ijo tuwi umba ohcin rih. Iro eam pira kahcui tahkan kowang, kira-kira solahtus mehter iou.

⁹Kotihka iro jahkat tahkan alut, iro nohto anai barah baho ang anan, hawoi ohcin ang ngosanoh tutang luhte.

¹⁰Yesus nuhtui umba iro, ‘‘Cuba ngomin nokuh ohtoi honjiot ohcin ijo bohua ihkam nawaioh.’’

¹¹Simon Petrus jahkat alut, turus nguhut jalaoh nokuh kowang. Jala rih tuwi umba ohcin ijo hajo-hajo; paringoh anai solahtus limo pulu tolu kungan. Tutang oluka karokaron orih, jalaoh eam borutat.

¹²Yesus nuhtui umba iro, ‘‘Has kuman.’’ Eam aro ihcobehti ka tahkan murid-murid-Oh rih petah ngisok, ‘‘Amai tuh iai?’’ Kotului iro ta'an ijo Io Tuhan.

¹³Pongohino Yesus ngondoni iro, ngomin luhte rih, tutang nonga ahkan iro. Io nguan kodorih ka'a umba ohcin rih.

¹⁴Tuhrih ijo kotolu tikatoh Yesus ngorinah arop-Oh ahkan murid-murid-Oh, uli Io bolum tahkan popahtoi.

¹⁵Ulimba iro kuman, hion Yesus umba Simon Petrus, ‘‘Simon anak Yona, kuwohkah ihko molowi mongasih Ahku, tahkanumba iro tuh mongasih Ahku?’’ ‘‘Morong, Tuhan,’’ hion Petrus, ‘‘Tuhan ta'an ahku mongasih Tuhan.’’ Hion Yesus umba io, ‘‘Nyokahtik anak-anak tobiri-Ku.’’

¹⁶Bagi koduo tikatoh Yesus ngisok umba io, ‘‘Simon anak Yona, inonkah ihko mongasih Ahku?’’ ‘‘Morong, Tuhan,’’ hion Petrus, ‘‘Tuhan ta'an ahku mongasih Tuhan.’’ Hion Yesus umba io, ‘‘Nyokahtik tobiri-tobiri-Ku.’’

¹⁷Bagi ijo kotolu tikatoh Yesus ngisok hino umba io, ‘‘Simon anak Yona, kuwohkah ihko mongasih Ahku?’’ Petrus monjadi porosahtoioh kotului Yesus ngisok umbaoh nyiring kotolu tikat. Mahka Petrus mutah hino, ‘‘Tuhan, Tuhan ta'an kopari-paringoh, Tuhan ta'an ahku mongasih Tuhan!’’ Turus Yesus nuhtui umba io, ‘‘Nyokahtik tobiri-tobiri-Ku.

¹⁸Tu'u morong hiak-Ku tuh: Kotihka ihko magun biou, ihko bongom mohtong kahang'mu, tutang tulak nokuh umoh bewe ihko nohuang. Tahpi amat ihko jari oko noin, ihko notahjuk longon'mu, tutang ulun bohkon ijo ngohut ihko tutang ngomin ihko nokuh umoh ihko eam kani nokuhoh.’’

¹⁹(Umba auh-auh orih Yesus ngorinah koloukuwoh Petrus ahkan mahtoi noin ahkan mopohajo Pohotala.) Uliorih Yesus nuhtui umba Petrus, ‘‘Ngahasu Ahku!’’

²⁰ Kotihka Petrus ngulos, Petrus nohto ang lihkutoh murid ijo tonokasih Yesus. (Io ijo tuot doni Yesus beteng'ndo kuman tutang ijo ngisok umba-Oh, ‘‘Tuhan, iai ijo ahkan ngarana Tuhan?’’)

²¹Nohto io, Petrus ngisok umba Yesus, ‘‘Tuhan, koloukuwoh umba io tuh?’’

²²Yesus mutah, ‘‘Jahkai Ahku kani io mohcon bolum johcok Ahku lombut, orih eam urusan'kam. Tahpi ihko ngahasu Ahku!’’

²³Mahka tosiar borihta ang marak murid Yesus, ijo murid orih eam ahkan mahtoi. Padahal Yesus eam nuhtui ijo murid rih eam ahkan mahtoi, molekan: ‘‘Jahkaioh Ahku kani io bolum nyiring Ahku lombut, orih eam urusan'kam.’’

²⁴Murid orihrih ijo nonga kosaksian tohou ang'conyolung-ang'conyolung tuh. Iorih ka'a ijo jari monyuratoh. Tutang ihto ta'an ijo inon ijo tonuhtuioh rih morong.

²⁵Magun aro hal bohkon ijo konuan bain Yesus. Jahkaanai paringoh rih tonyurat mihco-mihco, ahku nginyam eam aro sukup unukoh ang hapus tana unuk muat paring buhku ijo ahkan tonyurat orih.