Read Ot Danum YOHANES 3 Bible Online

YOHANES 3 - Ot Danum bible

YOHANES 3

¹Anai ihcobehti tokoh agama tahkan barih ulun Parisi ijo bogare Nikodemus.

²Aang sino ngolomi io lombut nokuh Yesus tutang nuhtui, ‘‘Amai Guru, ihkai kota'an Amai tonyuhu Pohotala. Tului eam ihcobehti ka duon nguan tandahelan kolou ijo Amai nguai, amat Pohotala eam homboh io.’’

³Yesus mutah, ‘‘Porocayarih, eam ihcobehti ka duon monjadi anak uhkup Pohotala, amat io eam konanakrih hoduli.’’

⁴‘‘Kuwohtou ulun oko dahpot konanak hoduli?’’ hion Nikodemus umba Yesus. ‘‘Duontourih io nyolong hoduli nokuh luwang poronahkan inaioh tutang tonganak hoduli hino?’’

⁵Yesus mutah, ‘‘Tu'u morong hiok-Ku tuh: amat ulun eam tonganakoh tahkan danum tutang tahkan Roh Pohotala, ulun orih eam duon monjadi anak uhkup Pohotala.

⁶Kolunon socara behtiu konanakrih bain ulun oko, tahpi cara rohani konanakrih bain Roh Pohotala.

⁷Ara helan amat Ahku nuhtui: ihkam paringoh harus konanakrih hoduli.

⁸Bahiu nahpi nokuh umoh io kani; ihto ngonih auhoh, tahpi eam kota'an tahkan umoh polombutoh, tutang nokuh umoh tituioh. Kodorih ka'a umba ulun ijo tonganakrih bain Roh Pohotala.’’

⁹‘‘Koloukuwoh rih duon nyolung?’’ Nikodemus ngisok.

¹⁰Yesus mutah, ‘‘Ihko guru ang Israel; ombairih ihko eam kota'an?

¹¹Porocayarih: ihkai nuhtui tihkas tohou inon ijo ihkai kota'an, tutang ihkai nonga kosaksian tihkas tohou inon ijo jari ihkai nohtooh; tahpi ihkam eam kani monorima kosaksian ihkai.

¹²Ihkam eam porocaya amat Ahku monyorihtaoh ahkan'kam tohou hal-hal tahkan kolunon tuh; koloukuwoh ihkam duon porocaya, amat Ahku monyorihtarih ahkan'kam hal-hal tohou soruga?

¹³Eam ihcobehti ka pu'u nuhkat nokuh soruga, bohkontahkan Io ijo nosuluh nokuh kolunon, iorih Anak Ulun.

¹⁴ Sama kolou Museh ngahtangoh lohi tombaga ang tuhtuk doroh kahju ang padang balambah, kodorih ka'a Anak Ulun ahkan konahtangoh,

¹⁵mangat paring ulun ijo porocaya ahkai-Oh, ahkan duon pombolum ijo sojahti tutang kototahiu.’’

¹⁶Kotului Pohotala kodorih ngasih ulun ang kolunon tuh, nyiring Io nonga Anak-Oh ijo tukan, mangat nyino-nyinong ulun ijo porocaya umba Io eam binasa, molehkan norima pombolum sojahti tutang kototahiu.

¹⁷Tului Pohotala ngirim Anak-Oh eam ahkan momosaraoh kolunon tuh, tahpi ahkan monyolamatoh.

¹⁸Ulun ijo porocaya umba-Oh eam tomohukum, tahpi ulun ijo eam porocaya ius tomohukum bain Pohotala, tului io eam porocaya umba Anak Pohotala ijo tukan.

¹⁹Io tonyawot hogalang hal tuh: Koloang rih ius lombut nokuh kolunon, tahpi ulun labih jorik umba kopindong tahkan koloang, tului konuan iro ja'at.

²⁰Nyinong ulun ijo nguan koja'at, bosingi umba koloang; io eam kani lombut nokuh koloang, mangat gawiouoh ijo ja'at rih ara gihtan.

²¹Tahpi ulun ijo nguan kohondak Pohotala, lombut nokuh koloang mangat monjadi korinah inon ijo konuaioh rih anairih numbun kohondak Pohotala.

²²Ulirih Yesus tutang murid-murid-Oh hihkas nokuh Yudea. Io mohcon ang anan pira-pira kotahiuoh, umba iro tutang mopondus.

²³ Aang ohkot orih Yohanes jaha nyolong sipir. Io mopondus ang Ainon eam mahcu tahkan Salim, tului ang anan aro danum. Ulun-ulun lombut ahkaioh, tutang io mopondus iro.

²⁵Pira-pira murid Yohanes hosomba'anauh umba ulun Yahudi tohou aturan muhiarop.

²⁶Iro tulak nokuh Yohanes, tutang nuhtui, ‘‘Amai Guru, inon Amai magun ingat ulun ijo homboh Amai ang pohoi Sungoi Yordan orih, ijo Amai nunjukoh ahkan 'kai lomoi? Io huntuh mopondus ka'a, tutang paring ulun tulak nokuh Io!’’

²⁷Yohanes mutah, ‘‘Kolunon eam duon anaingina ino-inon amat eam tononga Pohotala ahkaioh.

²⁸ Ihkam bongom ius ngonih ahku nuhtui, ‘Ahku bohkon Lahca Ponyolamat. Ahku sonyuhu hounumba Io.’

²⁹Pongahten bawi rih anairih ain pongahten ijo bahkas. Sahabat pongahten bahkas rih tihkas tombok mambai tutang ngonih, tutang io sonang amat ngonih auh pongahten bahkas. Kodorih ka'a umba ahku. Uhuntuh ahku sonang samasino.

³⁰Iorih ijo harus mahi-mahi boguna, tutang ahku mahi-mahi sasaream boguna.’’

³¹Ijo lombut tahkan diang molowioh paringoh. Ijo lombut tahkan kolunon nyolongbarih ulun kolunon tutang mander hal-hal kolunon. Io ijo lombut tahkan diang molowi paringoh.

³²Io pander tohou inon ijo ius tonohto tutang konahai-Oh, tahpi eam ihcobehti ka porocaya aang kosaksian-Oh.

³³Ulun ijo porocaya aang kosaksian-Oh rih, mongahku ijo Pohotala morong.

³⁴Tului ulun ijo sonuhu Pohotala monyiar auh-auh Pohotala, kotului Roh Pohotala jari tononga ahkai-Oh sotuwioh.

³⁵ Amai sita Anak-Oh, tutang jari nyarah paring ahkai kowasa-Oh.

³⁶Ulun ijo porocaya ahkan Anak rih ahkan monorima pombolum ijo sojahti tutang kototahiu. Tahpi ulun ijo eam te'et ahkan Anak rih eam ahkan duon pombolum. Io tomohukum Pohotala nyiring kototahiuoh.