Read Ot Danum YOHANES 4 Bible Online

YOHANES 4 - Ot Danum bible

YOHANES 4

¹Ulun-ulun Parisi ngonih ijo Yesus ngonduon tutang mopondus labih aro murid-Oh tahkan Yohanes. (

²Kotu'uioh Yesus bongoi eam mopondus, molekan murid-murid-Oh iou.)

³Kotihka Yesus kota'an ijo ulun-ulun Parisi ius ngonih tohou hal orih, Io tulak tahkan Yudea buli nokuh Galilea.

⁴A'ang ponyalaioh orih Io harus nyihing Samaria.

⁵ Mahka johcokrih Yesus aang ihco lowu ang Samaria ijo bogare Sikhar, eam mahcu tahkan tana ijo lomoi tononga Yakub ahkan Yusep anakoh.

⁶Ang anan todahpot sumur Yakub. Yesus bo'o samasino tului ponyalan, bain rih Io tuot ang saran sumur. Ohkot orih kira-kira pukul duo balas tohun ondou,

⁷tutang murid-murid Yesus jari tulak nokuh lowu ahkan moli ukun. Pongohuli lombut ihcobehti bawin Samaria nohuang ngalap danum. Yesus nuhtui umba io, ‘‘Ine, tou Ahku nyawot danum korih?’’

⁸

⁹ Ulunbawi rih mutah, ‘‘Tuan ulun Yahudi, ahku ulun Samaria; ombai Tuan nyawot korih tahkan ahku?’’ (Tului ulun-ulun Yahudi eam aro hokopahtuh umba ulun Samaria.)

¹⁰Yesus mutah, ‘‘Jahkaioh ihko kota'an ponongan Pohotala tutang iai ijo nyawot korih umba ihko, musti ihko bongom ijo nyawot danum umba-Oh, tutang Io ahkan nonga ahkan'kam danum bolum.’’

¹¹Hion ulunbawi rih, ‘‘Tuan eam anai hapangalap, tutang sumur tuh timbon tu'u. Tahkan umoh Tuan duon danum bolum?

¹²Yakub, amai tahtu ajuh ihkai, nonga ihkai sumur tuh. Io bongoi ngomin danum korihoh tahkan ohtoi; kodorih hino anak-anakoh tutang ohcin-ohcin konombolumoh. Inon Tuan ngohu, Tuan hajo tahkan Yakub?’’

¹³‘‘Ulun ijo ngorih danum tuh ahkan tojahbolai hino,’’ hion Yesus,

¹⁴‘‘tahpi ulun ijo ngorih danum ijo ahkan Ahku nongaoh, io eam ahkan tojahbolai hino nyiring kototahiu. Tului danum ijo ahkan Ahku nongaoh rih ahkan monjadi lowong danum ang luwang aropoh ijo ngombuhak soluka tutang nongarih ahkaioh pombolum ijo sojahti tutang kototahiu.’’

¹⁵Hion ulunbawi rih, ‘‘Tuan, nongarih ahku danum rih, mangat ahku eam tojahbolai hino; tutang eam usah hoduli nokuh ohtoi mangat ngalap danum.’’

¹⁶‘‘Tulak ihko na'ah bosai'kam, turus hoduli nokuh ohtoi,’’ hion Yesus.

¹⁷‘‘Ahku eam anai bosai,’’ hion ulunbawi rih. ‘‘Puna morong hiom,’’ hion Yesus.

¹⁸‘‘Tului ihko ius kawin limo tihkat, tutang bahkas ijo bolum hihco ihko uhuntuh eam bosai'kam.’’

¹⁹‘‘Uhuntuh ahku kota'an Tuan ihcobehti Nabi,’’ hion ulunbawi rih.

²⁰‘‘Tahtu ajuh 'kai nyembah Pohotala ang pupungpuruk tuh, tahpi uhtus Tuan nuhtui ijo baya ang Yerusalem iou unukoh ulun nyembah Pohotala.’’

²¹‘‘Porocayalah,’’ hion Yesus umba io, ‘‘ihco ohkot ulun ahkan nyembah Amai, bohkon hino ang pupungpuruk tuh, tutang bohkon ka'a ang Yerusalem.

²²Ihkam ulun Samaria nyembah ijo eam ihkam ngosonooh, tobalikoh ihkai ulun Yahudi nyembah Io ijo ihkai ngosonooh, tului kosolamatan lombut tahkan ulun Yahudi.

²³Tahpi ohkotoh ahkan lombut, molahan jari lombut, ijo umba kowasa Roh Pohotala ulun-ulun ahkan monyembah Amai, kolou Pohotala ijo morong, kolou ijo kononjolik Amai.

²⁴Tului Pohotala rih Roh, tutang tihkas umba kowasa Roh Pohotala ulun-ulun dahpot nyembah Amai, ijo kolouamah Io anai.’’

²⁵Ulunbawi rih nuhtui umba Yesus, ‘‘Ahku ta'an Lahca Ponyolamat (ijo konohawot Kristus) ahkan lombut. Amat Io lombut Io ahkan momborihta kokaron angihco ahkan ihto.’’

²⁶‘‘Ahku tuh Io,’’ hion Yesus, ‘‘Ahku ijo huntuh rahat bopander umba ihko.’’

²⁷Ang kotihka orih murid-murid Yesus jari buli. Iro helan nohto Yesus bopander umba ihcobehti bawi. Tahpi eam ihcobehti ka tahkan iro ijo ngisok umba ulunbawi rih, ‘‘Inai perulu inon?’’ ata'ai ijo ngisok umba Yesus, ‘‘Ombai Amai bopander umba ulunbawi rih?’’

²⁸Mahka ulunbawi rih nohtah burungalapoh ang anan turus nokoru nokuh lowu tutang nuhtui umba ulun-ulun ang anan,

²⁹‘‘Olai nohto ulun ijo monyorihta ahkak'ku kokaron aang'co ijo pu'u ahku nguai. Toumorongrih Io rih Lahca Ponyolamat?’’

³⁰Mahka ulun-ulun rih ka nohtahrih lowu turus hihkas nokuh Yesus.

³¹Pondehan orih murid-murid-Oh ngomin Yesus kuman, ‘‘Amai Guru,’’ hion'ndo, ‘‘has kuman.’’

³²Tahpi Yesus mutah, ‘‘Anai ukun aang Ahku, ijo eam ihkam ta'ai.’’

³³Mahka murid-murid-Oh nopara saling ngisok, ‘‘Inon anai ulun ngomin ukun ahkai-Oh?’’

³⁴Turus Yesus nuhtui, ‘‘Ukun-Ku anairih numbun kohondak Io ijo nyuhu Ahku, tutang ngo-opahoh gawi ijo tonyorah-Oh ahkak-Ku.

³⁵Ihkam nuhtui, ‘Ohpat bulan hino rahat ngohtom.’ Tahpi Ahku nuhtui umba ihkam: Topahjah umo-umo ijo ius londa-londang masak, sodia ahkan tongohtomoh!

³⁶Ulun ijo ngohtom ius nopara norima uhpahoh tutang nipun buaoh ahkan pombolum ijo sojahti tutang kototahiu. Mahka ulun ijo nuhkan tutang ulun ijo ngohtom dahpot ngandah hombo-homboh.

³⁷Porobasa tuh morong ka'a, ‘Ijo ihco ngombulanoh, tutang ijo bohkon ngohtomoh.’

³⁸Ahku nyuhu ihkam tulak ngohtom ang umo ijo eam ihkam mousahaoh; ulun bohkon ius bogawi ang anan, tutang ihkam monorima koutungoh tahkan gawin'ndo.’’

³⁹Aro ulun Samaria ponduduk lowu rih porocaya umba Yesus, tului ulunbawi rih nuhtui, ‘‘Io nyorihta ahkak'ku kokaro aangihco ijo pu'u ahku nguai.’’

⁴⁰Mahka kotihka ulun-ulun Samaria rih hosombang umba Yesus iro nyawot hawui paham, mangat Io mohcon honong iro. Jadi Yesus mohcon ang anan duo ondou kotahiuoh.

⁴¹Pongohuli labih aro hino ulun porocaya umba Yesus tului inon ijo tongajar-Oh bongoi ahkan iro.

⁴²Iro nuhtui umba ulunbawi rih, ‘‘Ihkai porocaya uhuntuh, eam kotului inon ijo ihko nuhtuioh ahkan'kai, tahpi kotului ihkai bongon jari ngonih Io, tutang kota'an ijo Io puna Ponyolamat kolunon.’’

⁴³Uliopah duo ondou mohcon ang Sikhar, Yesus tulak nokuh Galilea.

⁴⁴ Yesus bongoi jari nuhtui, ‘‘Ihcobehti nabi eam ahkan duon horomat ang lowuioh bongoi.’’

⁴⁵ Tahpi kotihka Io johcok ang Galilea, ulun-ulun ang anan nyambut Io honong jorih ahtoi'ndo, tului iro anai ang Yerusalem, aang Ondou Pesta Paska, tutang jari nohto paring ijo konuan Yesus.

⁴⁶ Pongohuli Yesus buli nokuh Kana ang Galilea, ang anan Io pu'u ngubah danum monjadi anggur. Ang lowu rih anai ihcobehti pogawai pomoretah, anakoh rahat mondam ang Kapernaum.

⁴⁷Kotihka io ngonih ijo Yesus jari lombut nokuh Galilea tahkan Yudea, io tulak nokuh Yesus tutang nyawot, Yesus lombut nokuh Kapernaum mangat ngopios anakoh ijo jari doni palus.

⁴⁸Yesus nuhtui umba pogawai pomoretah orih, ‘‘Amat ihkam eam nohto tandahelan-tandahelan, ihkam eam porocaya.’’

⁴⁹‘‘Tuan,’’ hion pogawai pomoretah orih, ‘‘jelengrih lombut hounumba anak'ku palus.’’

⁵⁰Hion Yesus umba io, ‘‘Tulakrih anak'mu pios.’’ Ulun orih porocaya ahkan auh Yesus, turus io buli.

⁵¹Ang beteng jalan, pohalu-pohaluoh lombut nokuhoh tutang ngabar, ‘‘Anak tuan jari pios.’’

⁵²Turus io ngisok umba iro pukul pira anak'ku rih nopara pios. Iro mutah, ‘‘Malom kurang labih jam ihco tohun ondou pondamoh nihou.’’

⁵³Turus amai anak-inyam rih toingat ijo aang kotihka orih Yesus nuhtui umba io, ‘‘Anak'mu pios.’’ Mahka io tutang paring jolahaioh porocaya umba Yesus.

⁵⁴Tuhrih tandahelan ijo koduo ijo tonguan Yesus ang Galilea ulimba polombutoh tahkan Yudea.