Read Ot Danum YOHANES 5 Bible Online

YOHANES 5 - Ot Danum bible

YOHANES 5

¹Ulimba rih anai pesta ulun Yahudi, mahka Yesus hihkas nokuh Yerusalem.

²Ang Yerusalem doni ‘‘Bauntukang Tobiri,’’ anai ihcokobawak tolaga, ijo a'ang basaulun Ibrani tonohawot Betesda. Ang anan anai limo tombiran.

³Ang tombiran-tombiran rih aro ulun poros kaling; anai ijo bobulen, anai ijo botipang, anai ijo bolomu. [Iro paringoh ngindoi danum ang tolaga rih holucak.

⁴Tului anai wayahoh molehkat Tuhan nosuluh nokuh luwang tolaga rih tutang ngolucakrih danumoh. Tutang ulun poros ijo pahtukoh nyohowunyolong tolaga rih, ohkot danum holucak ahkan pios tahkan-ponyahkitoh, inon beweu mahcam ponyahkitoh.]

⁵Ang unuk orih anai ihcobehti bahkas ijo jari poros tolun pulu jalu toun kotahiuoh.

⁶Yesus nohto io kaling anan, tutang ta'an ijo io jari tahi samasino poros; mahka Yesus ngisok umba io, ‘‘Kani ihko pios?’’

⁷Ulun poros rih mutah, ‘‘Amai, eam anai ulun ang ohtoi ahkan posohowu ahku nokuh luwang tolaga ohkot danumoh holucak. Tutang pondehan ahku nokuh tolaga, ulun bohkon jari sohowu labih soun.’’

⁸Mahka Yesus nuhtui umba io, ‘‘Hihkatrih, ngahtang kahcangkaruk'mu, tutang nyalan.’’

⁹Aang wayah orih ka'a ulun orih pios. Io ngahtang kahcangkarukoh, tutang nyalan. Hal orih nyolung aang ondou Sabat.

¹⁰ Kotului orih dolang okon Yahudi nuhtui umba ulun ijo punai pios rih, ‘‘Ondou tuh ondou Sabat, ihko eam tou ngahtang unuk karuk'kam.’’

¹¹Tahpi ulun rih mutah, ‘‘Ulun ijo jari ngopios ahku nanai nyuhu ahku ngahtang kahcang'ku tutang nyalan.’’

¹²‘‘Iai Io ijo nyuhu ihko ngahtang kahcang'mu tutang nyalan?’’ hion'ndo.

¹³Tahpi ulun ijo jari pios rih eam kota'an iai uluioh, kotului Yesus jari dilap ang tohun ulun aro rih.

¹⁴Pongohuli Yesus hosombang umba ulun rih ang Lohpou Tuhan tutang nuhtui umba io, ‘‘Uhuntuh ihko jari pios. Ararih bodusa hino, mangat eam nyuru hal ijo labih ja'at.’’

¹⁵Mahka tulakrih ulun orih turus mander ahkan dolang pongowasa Yahudi, ijo Yesusrih jari ngopios io.

¹⁶Tutang tului orih iro nopara ngonyusah Yesus, tului Io ngopios ulun aang ondou Sabat.

¹⁷Tahpi Yesus nuhtui umba iro, ‘‘Amai-Ku turus bogawi nyiring uhuntuh, tutang Ahku ka bogawi.’’

¹⁸Tuhtui-tuhtui orih nguan dolang pongowasa Yahudi mahi-mahi ngurah jalan ahkan munu Io. Iro nguan orih eam baya kotului Io molanggar hadat agama ondou Sabat, tahpi tului Io nuhtui ijo Pohotala rih Amai-Oh; rimai Io monyama arop-Oh honong Pohotala.

¹⁹Yesus mutah ulun-ulun rih koloutuh, ‘‘Porocayarih, Anak eam dahpot nguaioh ino-inon hapan kowasa aiu bongoi. Io tihkas nguanrih inon ijo Io nohto tonguan Amai-Oh. Kobain inon ijo tonguan bain Amai, orih ka'a ijo tonguan bain Anak.

²⁰Kotului Amai ngasih umba Anak-Oh tutang ngorinah ahkai-Oh paring ijo konuai-Oh bongoi. Malah Amai ahkan ngorinah ahkai-Oh gawiu-gawiu ijo labih hajo hino, nyiring ihkam helan.

²¹Amai rih ngomonyun ulun mahtoi, tutang nonga ahkan iro pombolum sojahti tutang kototahiu; kodorih ka Anak nonga pombolum ijo kototahiu ahkan ulun ijo kani tononga-Oh pombolum.

²²Amai bongoi eam mosara iai ka. Paring kowasa ahkan mosara jari tonyorahoh ahkan Anak-Oh.

²³Amai nguanoh rih mangat paring ulun mohoromat Anak kolou iro mohoromatoh Amai. Ulun ijo eam mohoromatoh Anak eam ka'a mohoromatoh Amai ijo nyuhu Anak.

²⁴Tu'u morong auh-auh-Ku tuh: Ulun ijo ngonih auh-auh-Ku, tutang porocaya umba Io ijo nyuhu Ahku, tepun pombolum sojahti tutang kototahiu. Io eam ahkan tonohukum; io jari morodehka tahkan popahtoi tutang dahpot pombolum.

²⁵Porocayarih: Ahkan lombut ohkotoh — malah jari johcok ohkotoh — ulun mahtoi ahkan ngonih auh Anak Pohotala. Tutang ulun ijo ngonih-Oh ahkan bolum.

²⁶Kolou Amai bongoi tohasak pombolum, kodorih ka Io ponjadi Anak-Oh tohasak pombolum ka'a.

²⁷Io jari nonga ahkan Anak-Oh hak ahkan mosara, tului Io Anak Ulun.

²⁸Ara ihkam helan ngonih hal tuh, tului ohkotoh ahkan lombut, ijo paring ulun ijo jari mahtoi ngonih auh-Oh,

²⁹ turus soluka tahkan kolowong. Ulun ijo jari nguan kohinut ahkan monyun bagi pombolum. Tahpi ulun ijo jari nguan koja'at ahkan monyun bagi tonohukum.’’

³⁰‘‘Ahku eam dahpot nguan ino-inon ngosan konohuang-Ku bongok. Ahku tihkas mosara numbun ijo ponoretah Pohotala. Tutang puhtusan-Ku rih adil, tului Ahku eam numbun konohuang-Ku bongok, molekan konohuang Amai ijo nyuhu Ahku.

³¹Amatjahka Ahku nonga kosaksian tohou arop-Ku bongok, kosaksian-Ku rih eam dahpot tonoharap.

³²Tahpi anai ulun bohkon ijo nonga kosaksian tohou Ahku, tutang Ahku ta'an ijo kosaksiaioh rih morong.

³³ Ihkam jari ngirim soruhan nokuh Yohanes, tutang io jari nonga kosaksian ijo morong tohou Ahku.

³⁴Hal tuh Ahku nuhtuioh eam tului Ahku perulu kosaksian tahkan kolunon, tahpi mangat'kam tonyolamat.

³⁵Yohanes rih sama umba sumbu ijo honjala tutang ngorolondang koloangoh. Bagi pondehan ohkot ihkam sanang norimaoh koboloang rih.

³⁶Tahpi kosaksian-Ku labih hajo umba kosaksian Yohanes. Inon ijo huntuh Ahku nguaioh tuh, ijo orih gawi ijo tononga Amai ahkak-Ku, mbuktioh ijo Amai jari nyuhu Ahku.

³⁷ Tutang Amai ijo nyuhu Ahku ka'a nonga kosaksian tohou Ahku. Ihkam jaha pu'u ngonih auh-Oh ata'ai nohto tapai-Oh.

³⁸Auh-auh-Oh eam lehket luwang ahtoi'kam, tului ihkam eam porocaya umba Ahku ijo tonyuhu-Oh.

³⁹Ihkam bolajar Surat Borasih, tului nanyam'kam ijo umba cara orih ihkam anai ngina pombolum sojahti tutang kototahiu. Tutang Surat Borasih rih bongoi nonga kosaksian tohou Ahku.

⁴⁰Tahpi ihkam eam kani lombut nokuh Ahku bagi dahpot pombolum kototahiu.

⁴¹Ahku eam ngurah tara tahkan kolunon.

⁴²Ahku ngosono ihkam. Ahku ta'an ihkam eam mongasih Pohotala luwang ahtoi'kam.

⁴³Ahku lombut umba kowasa Amai-Ku, tahpi ihkam eam norima Ahku. Tahpi amat ulun bohkon lombut umba kowasa aiu bongoi ihkam kani norima io.

⁴⁴Koloukuwoh ihkam dahpot porocaya, amat ihkam ngurah tara tahkan sama arop'kam, tutang eam bousaha ngurah tara tahkan Pohotala ijo Ihco?

⁴⁵Ara ngohu Ahku ahkan nosalan ihkam ang tohimo Amai. Mahka ijo ahkan monosalan ihkam anai rih Museh, io ijo ihkam harapoh.

⁴⁶Amatjahka ihkam porocaya umba Museh, ihkam porocaya umba Ahku, tului tohou Ahku rih io nyurat.

⁴⁷Tahpi amat ihkam eam porocaya ahkan inon ijo tonyurat bain Museh, koloukuwoh ihkam dahpot porocaya umba inon ijo Ahku jari nuhtuioh?’’