Read Ot Danum YOHANES 6 Bible Online

YOHANES 6 - Ot Danum bible

YOHANES 6

¹Papira ohkot pongohuli Yesus tulak nokuh pohoi Danou Galilea, ijo konohawot ka'a Danou Tiberias.

²Kojohcokoh ang anan, aro ulun ngahasu Io tului iro jari nohto tandahelan ijo konuai-Oh honong ngopiosoh ulun-ulun poros.

³Yesus nuhkat nokuh ngosan lukuh, turus tuot anan tutang murid-murid-Oh.

⁴Aang ohkot orih jari doni Ondou Pesta Paska ulun Yahudi.

⁵Ohkot Yesus nopahjah hokodiling-Oh, Io nohto ulun huru-hurun lombut nokuh-Oh. Mahka Io nuhtui umba Pilipus, ‘‘Ang umoh ihto dahpot moli ukun, mangat paring ulun tuh duon kuman?’’ (

⁶Yesus jari ta'an inon ijo ahkan konuai-Oh, tahpi Io nuhtui kolourih Io kani monguji Pilipus.)

⁷Pilipus mutah, ‘‘Luhte regai duo rahtus duit perak eam sukup ahkan ulun-ulun tuh, oluka nyinong behti baya dahpot honjiot iou.’’

⁸Ihcobehti murid Yesus ijo bohkon, iorih Andreas, konduang Simon Petrus, nuhtui,

⁹‘‘Ang ohtoi anai anak-inyam bahkas tepun limo kobilap luhte tutang duo ohcin. Tahpi eam bahkaoh ahkan ulun karon-tuh?’’

¹⁰‘‘Nyuhu ulun-ulun rih tuot,’’ hion Yesus. Mahka ang anan aro uru, jadi ulun-ulunrih tuot ang uru — paringoh anai kira-kira limo kuhjan behti ulun-ulun bahkas.

¹¹Pongohuli Yesus ngomin luhte rih, turus ngohawot torimakasih ahkan Pohotala. Ulimbarih Io magi-magioh luhte rih ahkan ulun aro. Pongohuli Io magi-magioh ohcin rih, tutang iro kuman sobosuh-bosuhoh.

¹²Ulijari paringoh ulun rih kuman nyiring bosuh, Yesus nuhtui umba murid-murid-Oh, ‘‘Nipunohrih kolowin ukun rih; ara nyiring anai ijo todian.’’

¹³Turus iro nipun putan ukun rih, duo balas tahcung tuwi kolowin ukun tahkan limo kobilap luhte, ijo tokuman bain ulun aro rih.

¹⁴Kotihka ulun aro nohto gawi aneh rih ijo konuan bain Yesus, iro nuhtui, ‘‘Tu'u-tu'u, tuhrih Nabi ijo tonoharap lombut nokuh kolunon!’’

¹⁵Yesus ta'an iro kani lombut mangat hojujuan Io monjadi Lahcan iro. Tului orih hihkasrih Io mokila nokuh daerah puruk.

¹⁶Kotihka ondou nopara pindong, murid-murid Yesus nosuluh nokuh danou.

¹⁷Turus iro jahkat alut mitah danou rih, ngohimat Kapernaum. Ondou jari pindong, tahpi Yesus jaha ka'a lombut nokuh iro.

¹⁸Pondehan orih danou nopara holucak tului bahiu karas.

¹⁹Ulimba bolayar, limo ata'ai onom kilomehter, iro nohto Yesus lombut nokuh alut tutang nyalan ang ngosan danum. Iro mihkoh samasino.

²⁰Tahpi Yesus nuhtui umba iro, ‘‘Ara mihkoh, tuh Ahku!’’

²¹Turus honong sanang ahtoi'ndo norima Io jahkat nokuh luwang alut, tutang uhun orih ka'a alut iro rih johcok ang unuk konohimat.

²²Anghawunrih ondouoh ulun aro ijo magun mohcon ang pohoi danou, borondong ijo nanaioh tihkas anai ihco alut ang anan. Iro ta'an ijo murid-murid Yesus jari tulak hapa alut rih, tutang Yesus eam aro homboh.

²³Pongohino pira-pira alut tahkan lowu Tiberias lombut tutang tuli doni unuk ulun aro rih kuman luhte, uli Tuhan ngohawot torimakasih.

²⁴Kotihka ulun aro rih nohto, ijo pios Yesus oluka murid-murid-Oh eam aro ang anan, iro ka'a jahkat alut-alut rih tutang tulak nokuh Kapernaum ngurah Yesus.

²⁵Kotihka ulun-ulun rih hosombang umba Yesus ang pohoi danou, iro ngisok umba Io, ‘‘Amai Guru, mira Amai johcok ang ohtoi?’’

²⁶Yesus mutah, ‘‘Tu'u-tu'u, ihkam ngurah Ahku, eam kotului ihkam jari horahti maksud tandahelan-tandahelan ijo jari Ahku nguai, tahpi tului ihkam jari kuman nyiring bosuh.

²⁷Ara bogawi mangat dahpot ukun ijo tou opah tutang maram. Bogawirih mangat ngondahpot ukun ijo eam tou maram tutang ijo nonga pombolum sojahti tutang kototahiu. Ukun rih ahkan tononga bain Anak Ulun ahkan'kam, tului Io jari tonotuot bain Pohotala Amai.’’

²⁸Turus iro ngisok umba Io, ‘‘Ihkai harus nguan inon mangat nguaioh kohondak Pohotala?’’

²⁹Yesus mutah, ‘‘Tuhrih ijo ngonjolik Pohotala tahkan ihkam: porocayarih umba Io ijo tonyuhu Pohotala.’’

³⁰‘‘Amat kolourih,’’ hion'ndo, ‘‘tanda inon ijo dahpot Amai ngorinah ahkan ihkai, mangat ihkai nohtooh tutang porocaya umba Amai? Inon ijo ahkan Amai nguaioh?

³¹ Tahtu ajuh ihkai, jari kuman manna ang padang bolambah, kolou ijo tonyurat ang luwang Surat Borasih, ‘Io nonga iro luhte tahkan soruga.’ ’’

³²Turus Yesus nuhtui umba iro, ‘‘Porocayarih: Eam Museh, molekan Amai-Ku rih ijo nonga ahkan'kam luhte ijo kotu'uioh tahkan soruga.

³³Tului luhte ijo tononga Pohotala anai rih, Io ijo mosuluh tahkan soruga tutang nonga pombolum ahkan ulun ang kolunon.’’

³⁴‘‘Amai,’’ hion iro, ‘‘nongarih ahkan ihkai luhte rih hototurus.’’

³⁵‘‘AHKU RIH LUHTE IJO NONGA POMBOLUM,’’ hion Yesus umba iro. ‘‘Ulun ijo lombut nokuh Ahku eam ahkan bolo'u hino nyiring kototahiuoh. Tutang ulun ijo porocaya umba Ahku hototurus io eam ahkan tojahbolai hino, nyiring kototahiuoh.

³⁶Tahpi kolou jari Ahku nuhtui ahkan'kam, oluka ihkam jari nohto Ahku, ihkam eam porocaya.

³⁷Paring ulun ijo tononga Amai ahkak-Ku ahkan lombut nokuh Ahku. Ahku eam ahkan nulak iai ka ijo lombut nokuh Ahku.

³⁸Tului Ahku mosuluh tahkan soruga, bohkon ahkan nguanoh konohuang bongon, molekan konohuang Io ijo nyuhu Ahku.

³⁹Tutang tuh rih konohuang Aiu ijo nyuhu Ahku: mangat tahkan paring ulun ijo tononga ahkak-Ku, eam 'cobehti ka nihou; tahpi mangat Ahku ngombolum iro ang Ondou Kiamat.

⁴⁰Puna tuhrih kojolik Amai-Ku: Mangat paring ijo nohto Anak tutang porocaya umba-Oh tepun pombolum sojahti tutang kototahiu, tutang Ahku ngombolumoh huli aang Ondou Kiamat.’’

⁴¹Ulun-ulun Yahudi nopara bokuhtuk nohimo Yesus, kotului Io nuhtui: ‘‘Ahku luhte ijo mosuluh tahkan soruga.’’

⁴²Hion'ndo, ‘‘Eamkah tuh Yesus, anak Yusep? Ihkai kosono inai amai-Oh! Koloukuwoh Io dahpot nuhtui ijo Io nosuluh tahkan soruga?’’

⁴³Turus Yesus nuhtui umba iro, ‘‘A'ai bokuhtuk.

⁴⁴Eam ihcobehti ka dahpot lombut nokuh Ahku, amat Amai ijo jari nyuhu Ahku, eam ngomin io ahkak-Ku; tutang ia-iai ijo lombut, ahkan Ahku ngombolumoh aang Ondou Kiamat.

⁴⁵ Ang luwang Buhku Nabi-nabi tonyurat koloutuh: ‘Paring ulun ahkan tongajar bain Pohotala.’ Jadi paring ulun ijo ngonih Amai tutang bolajar tahkan Io, lombut nokuh Ahku.

⁴⁶Orih eam borimai ijo anai ulun ijo jari nohto Amai. Tihkas Io ijo lombut tahkan Pohotala, jari nohto Amai.

⁴⁷Kota'anrih: Ulun ijo porocaya, ahkan tepun pombolum ijo sojahti tutang kototahiu.

⁴⁸AHKU RIH LUHTE IJO NONGA POMBOLUM.

⁴⁹Tahtu ajuh'kam kuman manna ang padang bolambah tutang iro mahtoi ka'a.

⁵⁰Tahpi eam kolouorih umba luhte ijo nosuluh tahkan soruga; ulun ijo kuman luhte rih eam ahkan mahtoi.

⁵¹Ahkurih luhte ijo nosuluh tahkan soruga — luhte ijo nonga pombolum. Ulun ijo kuman luhte tuh ahkan bolum kototahiuoh. Luhte ijo ahkan Ahku nongaoh, ahkan pombolum ulun ang kolunon, anai rih usi-Ku.’’

⁵²Ngonih orih, ulun-ulun Yahudi hosuat ihco sama bohkon. ‘‘Koloukuwoh ulun tuh dahpot nonga usiou-Oh ahkan ihto mangat tokumaioh?’’ hion'ndo.

⁵³Turus Yesus nuhtui umba iro, ‘‘Porocayarih: Amat ihkam eam kuman usin Anak Ulun tutang ngorih daha-Oh, ihkam eam ahkan moro-morong bolum.

⁵⁴Ulun ijo kuman usi-Ku tutang ngorih daha-Ku, io tepun pombolum sojahti tutang kototahiu, tutang Ahku ahkan ngobolumoh aang Ondou Kiamat.

⁵⁵Kotului usi-Ku tu'u-tu'u ukun, tutang daha-Ku tu'u-tu'u korih.

⁵⁶Ulun ijo kuman usi-Ku tutang ngorih daha-Ku, io hihco honong Ahku, tutang Ahku honong io.

⁵⁷Amai ijo bolum rih nyuhu Ahku, tutang Ahku ka bolum tahkan Amai. Kolouorih ka'a ulun ijo kuman usi-Ku ahkan bolum tahkan Ahku.

⁵⁸Tuhrih luhte ijo nosuluh tahkan soruga: eam luhte kolou ijo ukun tahtu ajuh'mu. Kotului uli kuman luhte orih, iro mahtoi ka'a. Tahpi ulun ijo kuman luhte tuh ahkan bolum nyiring turus-jaham.’’

⁵⁹Paringoh tuh tonuhtui bain Yesus, kotihka Io majar ang lohpou sombayang ang Kapernaum.

⁶⁰Uliopah iro ngonih auh-auh Yesus rih, aro ang louk murid-Oh nuhtui, ‘‘Auh ajar tuh tokalou bahat. Iai ijo duon norimaoh!’’

⁶¹Yesus bongoi kota'an ijo murid-murid-Oh bokuhtuk tohou hal orih. Mahka Io nuhtui, ‘‘Inonrih ihkam tosinggung ahtoi tului auh-auh orih?

⁶²Koloukuwoh kojoriaioh noin amat ihkam nohto Anak Ulun nuhkat huli nokuh unuk-Oh ijo asar?

⁶³Ijo nguan ulun bolum iorih Roh Pohotala. Koba'as ulun eam aro gunaioh. Auh-auh ijo tonuhtui-Ku ahkan'kam tuh, anairih auh-auh Roh Pohotala tutang auh-auh ijo nonga pombolum.

⁶⁴Tahpi anai ka'a ang louk ihkam ijo eam porocaya.’’ (Yesus jari ta'an tahkan pahtukoh ia-iai ijo eam kani porocaya, tutang iai ijo ahkan ngarana umba-Oh.)

⁶⁵Turus Yesus nuhtui hino, ‘‘Orihrih kotuluioh Ahku monyorihtaoh ahkan'kam, ijo eam ihcobehti ka dahpot lombut nokuh Ahku, amat Amai eam toungoduonohrih.’’

⁶⁶Nopara uhun rih ka aro murid-Oh nohtahrih Io, tutang eam kani nututoh Io hino.

⁶⁷Turus Yesus ngisok umba koduo balas murid-Oh, ‘‘Inonrih ihkam ka'a kani nohtahoh Ahku?’’

⁶⁸ ‘‘Tuhan,’’ hion Simon Petrus umba Io, ‘‘nokuh umoh ihkai ahkan tulak? Tuhtui Tuhan nonga pombolum ijo sojahti tutang kototahiu.

⁶⁹Ihkai jari porocaya tutang yahkin ijo Tuhanrih soruhan borasih tahkan Pohotala.’’

⁷⁰Yesus mutah, ‘‘Eamkah Ahku ijo ngopili ihkam duo balas behti tuh? Mahka ihcobehti ang louk ihkam anairih sehtan!’’

⁷¹Ijo konohuang Yesus iorih, Yudas anak Simon Iskariot. Kotului, oluka Yudas ihcobehti tahkan koduo balas murid Yesus, io ahkan ngarana Yesus.