Read Ot Danum YOHANES 7 Bible Online

YOHANES 7 - Ot Danum bible

YOHANES 7

¹Uliorihrih Yesus tulak kodiling nokuh umo-umoh ang Galilea. Io eam kani nokuh tana Yudea, bain okon-okon Yahudi ang anan bomaksud ahkan munu Io.

² Ang uhun orih jari doni Ondou Pesta Tikap Doun.

³Mahka konduang-konduang Yesus nuhtui umba Io, ‘‘Nohtah ohrih unuk tuh tutang tulak nokuh Yudea, mangat murid-murid-Mu, dahpot nohto ka'a gawin-Mu.

⁴Eam aro ulun ijo ahkan monyuhukoh inon ijo io nguaioh, amat io jolik monjadi botarung. Amat Ihko nguanoh hal-hal koloutuh, sohapus kolunon harus ta'an!’’ (

⁵Kotului konduang-Oh bongoi ka'a eam porocaya umba Io.)

⁶‘‘Jaha ohkotoh ahkak-Ku,’’ hion Yesus umba iro, ‘‘tahpi ahkan'kam nyinong ohkot uras tou.

⁷Kolunon tuh eam harapan nyingi ihkam. Tahpi Ahku puna tonyingi bain kolunon, kotului Ahku toturus ngorinah ahkan kolunon ijo konuaioh ja'at.

⁸Tulak ihkam nokuh pesta orih, Ahku eam tulak, tului jaham ohkotoh ahkak-Ku.’’

⁹Kodorih auh Yesus umba konduang-konduang-Oh, tutang Io ka mohcon ang Galilea.

¹⁰Uli konduang-konduang-Oh tulak nokuh pesta rih, toni-tonih Yesus tulak bongoi eam ta'an ulun.

¹¹Kotahin pesta orih, karon-okon Yahudi ngurah Io tutang hokisok, ‘‘Ang umoh Io?’’

¹²Aro ulun nopara hosinok tohou Io. Anai ijo nuhtui, ‘‘Io ulun hinut.’’ Anai tongai ijo nuhtui, ‘‘Eam! Io molahcat ulun aro.’’

¹³Tahpi eam aro ihcobehti ka bohanyi nuhtui muhi-muhing tohou Io, tului iro mihkoh umba dolang okon Yahudi.

¹⁴Tohun-tohun rahat pesta, Yesus nyolong nokuh Lohpou Tuhan, turus nopara majar ulun.

¹⁵Okon-okon ulun Yahudi helan samasino tutang hion'ndo, ‘‘Koloukuwoh ulun tuh dahpot kota'an aro, podahar Io eam pu'u sokula?’’

¹⁶Yesus mutah, ‘‘Ijo Ahku majaroh tuh bohkon ajaran aik-Ku, tahpi ajaran Io ijo nyuhu Ahku.

¹⁷Ulun ijo kani numbun konohuang Pohotala, ahkan ta'an inon rih ajaran-Ku lombutoh tahkan Pohotala ata'ai tahkan Ahku bongok.

¹⁸Ulun ijo nonga ajaranoh bongoi, ngurah horomat ahkan aropoh bongoi. Tahpi ulun ijo ngurah horomat bagi Io ijo nyuhuoh, ulun rih bujur, eam aro alik aangoh.

¹⁹Eamrih Museh jari nonga poretah-poretah Pohotala ahkan'kam? Tahpi ang louk ihkam eam aro ijo numbun poretah-poretah rih. Ombai ihkam kani munu Ahku?’’

²⁰Ulun aro rih mutah, ‘‘Ihko bobucon! Iai kani munu Ihko?’’

²¹Yesus mutah, ‘‘Tihkas ihco gawi Ahku nguai aang ondou Sabat, tutang ihkam helan.

²² Museh nonga ihkam poroturan ahkan bosunat — oluka sunat rih kotu'ui eam asaroh tahkan Museh, tahpi tahkan amai-amai tahtu ajuh ijo hountahkan Museh. Tului orih, aang ondou Sabat ka ihkam kani nyunat ulun.

²³ Amat ihkam nguan orih mangat ara molanggar aturan Museh tohou sunat, ombai ihkam bosingi umba Ahku, tului ngopiosoh ulun paring ang ondou Sabat?

²⁴Ara mosara ulun hogalang ijo gihtan, tahpi hogalang koadilan.’’

²⁵Pongohuli anai pira-pira ulun Yerusalem nuhtui, ‘‘Eamkah Io tuh uluioh ijo rahat konurah mangat tomunu?

²⁶Nohtorih Io nuhtui umba kohandak-Oh ang tohimo ulun aro, tutang eam aro ijo nuhtui ino-inon umba Io! Inonrih pongowasa-pongowasa'ndo puna jari borondong ijo Io tuh Lahca Ponyolamat?

²⁷Tahpi amat Lahca Ponyolamat rih lombut, eam ihcobehti ka ta'an tahkan umoh asar-Oh! Podahar ihto ta'an tahkan umoh asaroh ulun tuh.’’

²⁸Pongohuli rahat Yesus majar ang luwang Lohpou Tuhan, Io na'ah umba auh ijo muhing, ‘‘Jadi ihkam ta'an iai Ahku tuh, tutang tahkan umoh asar-Ku? Ahku eam lombut ngosan konohuang-Ku bongok. Ahku tonyuhu bain Io ijo bohak nyuhu Ahku, tutang Io dahpot tomorocaya. Tahpi ihkam eam ngosono Io.

²⁹Ahku ngosono Io, tului Ahku asar tahkan Io, tutang Iorih ijo nyuhu Ahku.’’

³⁰Aang wayah rih iro jolik nawan Yesus, tahpi eam aro ijo bohanyi nambit Io, tului jaham johcok ohkotoh.

³¹Aro ang louk ulun-ulun rih nopara porocaya umba Yesus, tutang nuhtui, ‘‘Amat Lahca Ponyolamat rih lombut, inonrih Io duon nguan labih aro tandahelan tahkanumba ulun tuh?’’

³²Ulun-ulun Parisi ngonih koloukuwoh ulun aro rih hokosino-sinok tohou Yesus. Tului orih, homboh umba imam-imam kopala iro nyuhu tongai pongawal Lohpou Tuhan tulak nawan Yesus.

³³Yesus nuhtui umba ulun aro ang luwang Lohpou Tuhan, ‘‘Tihkas honjulu iou Ahku magun hihco umba ihkam. Ulirih Ahku tulak ahkan ijo nyuhu Ahku.

³⁴Ihkam ahkan ngurah Ahku, tahpi eam dahpot nyombangoh Ahku; tului ihkam eam dahpot lombut nokuh unuk ang umoh Ahku anai.’’

³⁵Turus dolang pongowasa Yahudi hoponuhtui sama aropoh, ‘‘Ulun tuh tulak nokuh amoh, nyiring ihto eam dahpot nyombang Io? Inonrih Io kani tulak ahkan ulun-ulun Yahudi ijo mohcon ang tana bohkon louk uhtus yonani, tutang majar ulun Yunani?

³⁶Inon maksudoh umba tuhtui, ijo ihto ahkan ngurah Io tahpi eam dahpot nyombang-Oh, tutang ijo ihto eam dahpot nokuh unuk ang umoh Io anai?’’

³⁷ Aang ondou lain tahkan pesta rih, iorih ondou ijo paling mbahtang, Yesus tombok ang luwang Lohpou Tuhan turus na'ah, ‘‘Ulun ijo tojahbolai pios io nokuh Ahku mangat ngorih.

³⁸ Tohou ulun ijo porocaya umba Ahku, tonyurat a'ang Surat Borasih: ‘Tahkan luwang ahtoioh nyalut danum ijo nonga pombolum.’ ’’ (

³⁹Yesus ngohawot auh rih tohou Roh Pohotala ijo tonorima bain ulun-ulun ijo porocaya umba Io. Kotului ang ohkot orih Roh Pohotala jaham tononga; tului Yesus jaham konohajo honong popahtoi-Oh.)

⁴⁰Aro ulun ngonih inon ijo konohawot bain Yesus, tutang tahkan louk iro rih anai ijo nuhtui, ‘‘Ulun tuh musti Nabi rih!’’

⁴¹Ijo bohkon nuhtui, ‘‘Tuhrih Lahca Ponyolamat!’’ Tahpi anai ka'a ijo nuhtui, ‘‘Ho, mira tou Lahca Ponyolamat lombut tahkan Galilea?

⁴² A'ang Surat Borasih tonyurat ijo Lahca Ponyolamat anairih lihit Dawid tutang ahkan lombut tahkan Betlehem, iorih lowu lohpou Dawid.’’

⁴³Laiuoh ulun-ulun nopara hosomba'an tohou Yesus.

⁴⁴Anai ijo kani nawan Io, tahpi eam ihcobehti ka nambit Io.

⁴⁵Kotihka dolang pongawal Lohpou Tuhan ijo sonuhu tulak nawan Yesus lombut hoduli, imam-imam kopala, tutang ulun-ulun Parisi rih ngisok umba iro, ‘‘Ombai ihkam eam ngomin Io nokuh ohtoi?’’

⁴⁶Dolang pongawal rih mutah, ‘‘Akaine, jaha pu'u anai ulun bopander naing Io!’’

⁴⁷‘‘Inonrih ihkam ka'a jari ponolacatoh baiu-Oh?’’ hion ulun-ulun Parisi rih.

⁴⁸‘‘Anaikah okon-okon ito ata'ai ulun Parisi ijo porocaya umba Io?

⁴⁹Tahpi ulun aro tuh, iro eam kosono hukum Museh, tutang koloukuwoh ka ka'a iro jari tonulut.’’

⁵⁰ Anai ihcobehti ang louk ulun-ulun Parisi rih, anairih Nikodemus ijo pu'u lombut nokuh Yesus. Nikodemus rih nuhtui umba ulun-ulun Parisi ijo bohkon,

⁵¹‘‘Numbun hukum, ihcobehti eam dahpot tomohukum sounumba porokaraoh tongonih tutang konuaioh rih tomoriksa.’’

⁵²‘‘Inonrih ihko ka'a tahkan Galilea?’’ hion'ndo. ‘‘Poriksarih houn Surat Borasih! Ihko ahkan nohto ijo eam anai Nabi ijo asar tahkan Galilea!’’ [

⁵³Uliorih rih, paring ulun buli nokuh lohpou'ndo.